تعد مدارس الفصل الواحد في مصر فرصة جيدة للأطفال المتسربين من التعليم، ودا في حال كان عندك طفل الظروف ما ساعدتهوش يكمل تعليمه، وسنه أقل من 14 سنة سواء مصري أو وافد من دولة تانية.
فممكن يعوض تعليمه من خلال الالتحاق بفصول التعليم المجتمعي “الفصل الواحد”، وبعدها ينضم للمدارس الرسمية.
هنعرض لك في المقال إيه هي مدارس الفصل الواحد، وأهميتها لحل لمشكلة تسرب الأطفال، وأهم مميزاتها وعيوبها وأماكن تواجدها في مصر، تابع معنا.
ما هي ظاهرة تسرُب الأطفال من التعليم؟
دي في حالة الأطفال اللي بتكون بدأت في التعليم في المدارس، ومع الوقت ولأسباب مختلفة، بتبدأ تتسرب؛ بمعنى إنها تسيب التعليم وتبطل تروح المدارس.
زمان كانت الظاهرة دي منتشرة أوي في مصر، بسبب:
- عدم تواجد المدارس في القرى بشكل كبير
- عمل الأولاد في سن مبكر
- الزواج المبكر للبنات
لكن دلوقتي في تحسن في الموضوع دا، وعدد الأطفال المتسربين قل كتير عن الأول؛ نتيجة لزيادة الوعي، وظهور المدارس المجتمعية خاصةً للبنات اللي اتسربوا من التعليم في الصعيد لبعد المدارس.
وبتكشف إحصائية اتعملت في سنة 2023 إن عدد الطلاب المتقدمين للمرحلة الابتدائية وصل لـ 100٪ بمعنى إن كل الطلاب اللي المفروض يدخلوا المدارس بتقدم في ميعادها وبتدخل بالفعل، دا غير إن دلوقتي بقى نسبة التقديم في المدارس بالتساوي بين الأولاد والبنات.
لكن المشكلة بتظهر بعد كدا، إن في أطفال ما بيكملوش تعليمهم، وبتقل النسبة لـ 85% في الإعدادية، فبيطلع الطفل من التعليم للأسباب اللي قلناها قبل كدا.
وجات مدارس الفصل الواحد كفرصة تعويضية للأطفال دي، عشان يكملوا تعليمهم بشكل طبيعي.
1- ما هي مدارس الفصل الواحد في مصر؟
من أكبر المشاكل الموجودة في مصر كانت قلة المدارس مقارنةً بعدد الطلبة، ودا كان سبب رئيسي لانتشار الجهل والفقر والمرض.
وعشان كدا قامت الدولة بجهود كبيرة من خلال مبادرة التعليم للجميع سنة 1990 لالتحاق جميع الطلبة بالمدارس، من خلال عدد من المشروعات التعليمية.
ومن ضمنهم مشروع المدارس المجتمعية أو “مدارس الفصل الواحد في مصر لتعليم الأطفال ذوي الظروف القاسية”؛ ودا أنشأته اليونسكو سنة 2004 بالتعاون مع برنامج الغذاء العالمي ووزارة التربية والتعليم ومنظمات المجتمع المدني، وانتشرت في عدد كبير من محافظات مصر.
وهي عبارة مدارس ابتدائية في النجوع والقرى المحرومة من التعليم، أو المناطق اللي بيتواجد بيها عدد قليل من المدارس، وبتكون عبارة عن فصل واحد بمساحة 50 متر، ومجهز للعملية التعليمية.
وبتنفع تتعمل في مجرد فصل واحد مش لازم مبنى كامل، وبتكون مدرسة متعددة المستويات؛ بمعنى إن أطفال من مراحل تعليمية متقاربة بيكونوا موجودين مع بعض في نفس الفصل، يعني أولى وتانية وتالتة يقعدوا مع بعض، ورابعة وخامسة وسادسة”مع بعض.
والمدرسة ينفع تبتدي بـ 30 طالب، وبيتعلموا بطريقة تعدد المستويات؛ يعني كلهم بياخدوا كل الأساسيات مع بعض، وبعد كدا بيتقسموا مجموعات على حسب الصف الدراسي بتاعتهم.
وبتستقبل المدرسة الأطفال من سن 8 – 14 سنة، وحديثًا أصبحت تستقبل مدارس الفصل الواحد الأطفال من السن الأساسي من 6 سنوات لـ 14 سنة، وزاد عدد المعلمين والمعلمات بالفصل الواحد لـ 4 معلمين وممكن يوصل لـ 7 .
2- ما هو هدف مدارس الفصل الواحد في مصر؟
الهدف من مدارس الفصل الواحد هو القضاء على ظاهرة الأطفال المتسربين من التعليم؛ للحد من الأمية، وبالتالي يقل انتشار الجهل، والبطالة، وعدد أطفال الشوارع.
فبتستقبل مدارس الفصل الواحد التلاميذ من سن 6 – 14 سنة بمراحل تعليمية مختلفة، وبيتلقوا تعليمهم كلهم في نفس الفصل، وتقع المدارس دي في النجوع، والقرى النائية، والأماكن الفقيرة بعيد عن التكتلات العمرانية.
وصرحت وزيرة التضامن بتخصيص مبلغ 90 مليون جنيه لدعم المدارس التعليم المجتمعي، ودا بناءً على توجيهات رئيس الجمهورية، اللي كان من ضمنها تخصيص مليار جنيه لعدد من الموضوعات التعليمية.
ومنها دفع المصاريف الدراسية للأسر غير القادرة، ودعم التعليم المجتمعي، والحضانات، واستكمال الحلقة التعليمية للطلاب في أسر التكافل لحد ما يوصلوا لنهاية تعليمهم الجامعي.
ودا كله في إطار دعم الأسر المحتاجة، وتنمية المجتمع من خلال القضاء على الجهل.
اقرأ أيضًا: الفرق بين المدارس الخاصة والحكومية
3- نظام التعليم بمدارس الفصل الواحد في مصر
بيجمع الفصل الواحد أطفال من أكتر من صف دراسي، وبيكون مسؤول عن الفصل معلم واحد أو اتنين من المؤهلات المتوسطة أو العُليا، وبيدرسوا نفس المناهج الأساسية للطلبة، وبعدين بيكّونوا مجموعات للأطفال نفس السن، وبيدرسوا حاجات ملائمة للصف الدراسي بتاعهم.
4- مميزات مدارس الفصل الواحد في مصر
تتميز مدارس الفصل الواحد بعدد من المميزات، أبرزها:
- تعليم مهارات تؤهل الطلاب للعمل من خلال “نشاط التكوين المهني” اللي بيضم الاقتصاد المنزلي، والتربية الفنية، والتغذية، والزخرفة، والتطريز، والزراعة
- حصول الطالب على شهادات تعليمية رسمية، تُمكنه من الالتحاق مرة تانية بالمدارس الرسمية
- خلق جو تشجيعي للأطفال، من خلال تكوين مجموعات من نفس السن
- تميُز طرق تدريس مدارس الفصل الواحد بالبساطة والمرونة؛ لمساعدة الطالب على الفهم
- توافر أجهزة حاسب آلي ووسائل تعليمية مساعدة
- تشجيع الطلبة المتفوقين، وإعطائهم هدايا وجوائز
- ترفيه الطلاب من خلال إقامة الحفلات، والأيام الترفيهية
- مرونة المناهج عن المدارس الرسمية العادية
- تأهيل الطلبة للحصول على فرص عمل أفضل
- مجانية التعليم للأطفال المتسربين
- صرف وجبة يومية للطلاب
- مرونة مواعيد الدراسة
5- عيوب مدارس الفصل الواحد في مصر
بالرغم من إن مدارس الفصل الواحد حلت مشكلة مهمة في مصر، لكن تنفيذها بيضم سلبيات كتير بتأثر على جودة العملية التعليمية، ومنها:
إهدار المال والمجهود
ودا بسبب تواجد مدارس الفصل الواحد في قرى فيها مدارس ابتدائية أصلًا، وبعضها بيكون داخل المدارس نفسها، وبالتالي الأفضل وجود حل لضم الطلبة دي للمدارس، لإنها تواجدت بكل متطلباتها ومواردها.
قلة كفاءة العملية التعليمية
ودا لإن المعلمين غير متخصصين في مادة معينة، فالمعلم بيدرس كل المواد لمختلف الصفوف الدراسية للطلبة.
زيادة الكثافة الطلابية
عدد الطلبة بيكون كتير بالفصل الواحد، وبالتالي بيقل استيعاب الطلبة، وبيصعب دور المعلم لسماع كل الطلبة.
صعوبة دور المعلم
دور المعلم في مدارس الفصل الواحد بيكون صعب ، ودا لإنه مُطالب يحضر عدد كبير من الحصص في مواد مختلفة.
دا غير توجيه التعليمات للعدد كبير من الأطفال، والشرح أكتر من مرة لاختلاف استيعاب كل طفل عن التاني بسبب اختلاف السن.
اقرأ أيضًا: أهم 7 مميزات وعيوب المدارس التجريبية
6- شروط الالتحاق بمدارس الفصل الواحد في مصر
وعشان تقدر تقدم للطالب بمدارس الفصل الواحد، في شرطين للالتحاق، هما:
- يُقدم بيان نجاح أو بيان رسوب للطلبة اللي كانت مقيدة بالمرحلة الابتدائية، وتسربوا من التعليم
- يكون سن الطفل من 6 – 14 سنة
7- الأوراق المطلوبة لمدارس الفصل الواحد في مصر
بعد توافر شروط الالتحاق، هيكون مطلوب أوراق للتقديم:
- صورة لبطاقة الرقم القومي لولي الأمر
- صورة فوتوغرافية 4*6
- شهادة ميلاد الطالب
- طلب الالتحاق
8- خطوات التقديم لمدارس الفصل الواحد في مصر
بيسمح للطلبة الوافدين، والطلبة المتسربين للتقديم في مدارس الفصل الواحد، وبتكون خطوات التقديم:
- يُقدم ولي الأمر طلب للإدارة العامة للتعليم المجتمعي في “حالة الطلبة الوافدين”، أما “للطلبة المتسربين” بيقدم التماس للإدارة لإكمال تعليم الطالب.
- تُرسل إدارة التعليم المجتمعي خطاب لإدارة الوافدين للاستفسار عن حالة الطفل.
- تُخاطب المدرسة الإدارة المركزية عشان توافق على التحاق الطالب، وأول ما بيوصلها الرد من الإدارة المركزية بالموافقة، بترسلها للمديرية.
9- أين توجد مدارس الفصل الواحد في مصر؟
بيصل عدد مدارس الفصل الواحد لأكتر من 5 آلاف مدرسة في مختلف محافظات مصر، وبتضم عدد من الطلاب بنسبة 0.5٪ من إجمالي الصفوف الدراسية، ومنها:
- 6 مدارس في البحر الأحمر
- 9 مدارس في الوادي الجديد
- 10 مدارس في جنوب سيناء
- 550 مدرسة في بني سويف
- 73 مدرسة في الإسماعيلية
- 106 مدرسة في قنا
- 74 مدرسة في القاهرة
- 40 مدرسة في القليوبية
- 169 مدرسة في الجيزة
- 491 مدرسة في المنيا
- 413 مدرسة في البحيرة
- 376 مدرسة في الشرقية
- 632 مدرسة في الفيوم
- 617 مدرسة في أسيوط
الخلاصة
تعد مدارس الفصل الواحد في مصر فرصة تعويضية للأطفال المتسربين من التعليم، وهي مدارس ابتدائية تقام في المناطق النائية والنجوع، وبتكون عبارة عن فصل واحد بيضم أطفال من مراحل تعليمية مختلفة، وبيدرس المناهج معلم أو أكتر.
ومن مميزاتها إنها بتسمح للأطفال المتسربين إكمال تعليمهم بالمدارس الرسمية، وبتوفر أنشطة كتير بتؤهل الطلبة لسوق العمل، دا غير حصولهم على التعليم مجانًا، وتوفير الوسائل التعليمية الأساسية.
ومع ذلك يوجد سلبيات لمدارس الفصل الواحد زي، ضعف جودة التعليم، ودا لعدم وجود معلمين متخصصين، وزيادة كثافة الطلبة بالفصل، وإهدار الموارد لتواجدها بمناطق بها مدارس رسمية بالفعل.
ولكن مع كدا تعد مدارس التعليم المجتمعي مبادرة حقيقية لتنمية المجتمع من خلال تعليم الأطفال المتسربين، والحد من الأمية ،وانتشار أطفال الشوارع.
أضف تعليق