تعد مدارس الشويفات الدولية واحدة من أعرق المدارس الدولية في منطقة الشرق الأوسط واللي ليها وجود في بلاد عربية كبيرة زي مصر والعراق والإمارات وغيرهم، ولحد دلوقت بيتم افتتاح فروع جديدة للمدرسة في أماكن مختلفة حول العالم.
المدارس بتتبع نظام تعليمي قوي يقدر يحسن من مستوى طلابها بشكل مستمر على المستوى الفردي والجماعي، وكمان بتأهل الطالب لدخول أي جامعة في العالم.
في المقال دا هنتكلم عن أهم 6 معلومات محتاجين نعرفها عن مدارس الشويفات الدولية.
1- نظام التعليم في مدارس الشويفات الدولية
بدأت مدارس الشويفات الدولية لأول مرة في قرية الشويفات في لبنان سنة 1886م، وبعد فترة امتدت لدول كتير في الخليج ولمصر.
المدارس دي بتتبع نظام SABIS® التعليمي ™، وهو مزيج بين تعليم عالي الجودة وقيم تقليدية بتتزرع في نفوس الطلبة تساعدهم على تحمل المسؤوليات تجاه نفسهم وتجاه غيرهم، وتم تطويره وتحسينه واختباره لفترة طويلة -أكتر من قرن من الزمن- وبيخضع للتحديث عند الضرورة عشان يفضل مواكب للعصر والمجتمع والبيئة العالمية.
النظام ليه اعتقاد ثابت وهو إن النهج المدروس والفعّال بتنتج عنه أفضل النتائج، والنتائج المتميزة دي ممكن تتحقق عن طريق:
- التخطيط والتحضير.
- التعليم المنهجي والشمولي من خلال أسلوب تعليم خاص بـ سابيس ®SABIS.
- إجراء اختبارات دورية متكررة.
- متابعة الطلاب ومراقبة أدائهم وتقديم الدعم المناسب ليهم.
- تشجيع التلاميذ المجتهدين إنهم يندمجوا بسهولة في العملية التعليمية.
المدارس التابعة للنظام بتوظّف كل إمكانياتها عشان تضمن نجاح الطالب في المنظومة، وده بيخلي نسبة رسوب أي طالب ضعيفة جداً لأنهم مش بيسيبوا حد يفشل، وبيساعدهم في دا برنامج سابيس ®SABIS للرصد الأكاديمي SABIS® AMS.
شبكة SABIS® التعليمية موجودة في 20 دولة في 5 قارات حول العالم، وبيدرس مناهجها أكتر من 70 ألف طالب من سن 3 سنوات لـ 18 سنة.
النظام التعليمي دا بيوفر مناهج دراسية صارمة موجهة دوليًا، وبيركز على الموضوعات الأساسية للغة الإنجليزية والرياضيات والعلوم ولغات العالم، ودا من أجل إعداد الطلبة بشكل قوي للكليات فيما بعد.
أهداف نظام التعليم المُتبع في مدارس الشويفات
مدارس الشويفات الدولية في مصر وغيرها من المدارس التابعة للنظام التعليمي دا بتهدف لتحقيق عدد من الأهداف الأكاديمية زي:
- تأهيل كل الطلاب لدخول أي كلية في أي جامعة في العالم.
- توفير تعليم جيد بيعتمد على إتقان اللغة الإنجليزية والعربية والرياضيات.
- تمكين الطلاب من الاستفادة من نظام التعليم ثنائي اللغة.
- تدريب الطلاب على التفكير المنطقي والتفكير النقدي.
- إعداد الطلاب عشان تكون قادرة على الحفاظ على الجهود الفكرية لفترات طويلة.
- توليد الإثارة للتعلم مدى الحياة.
وكمان بتسعى لتحقيق عدد من الأهداف غير الأكاديمية زي:
- الاحتفاظ بمعايير عالية من القيم الأخلاقيّة والاجتماعيّة.
- اتخاذ القرارات المدروسة والحكيمة في الأمور المتعلقة بالقضايا الاجتماعيّة.
- الدفاع عن القناعات والعمل على تحقيق فهم أفضل لأي طرح أو قضية.
- المشاركة في الأنشطة الطلابية والعمل المجتمعي.
- تعزيز مبدأ التسامح، والتعاون، والعمل المشترك.
- تقبُّل الجميع في أي مكان في العالم عن طريق معرفة أوجه التشابه والاختلاف.
التنافسية بتزيد جداً في العالم بتاعنا حاليًا، ويعد التعليم الجامعي عنصر أساسي بيساهم في النجاح في المستقبل من الناحية العملية، وعشان كدا مدارس الشويفات الدولية -تحت إشراف نظام SABIS® التعليمي- بتجهّز كل طلابها لدخول كليات مرموقة وليها سمعة طيبة، يقدروا من خلالها يبدأوا أول الطريق في مسارهم الوظيفي.
تقدر كمان تعرف معلومات أكتر عن النظام التعليمي ده من مقال : 6 معلومات عن نظام سابيس التعليمي SABIS.
2- مميزات الدراسة في مدارس الشويفات الدولية
مدارس الشويفات الدولية بتتميز عن غيرها من المدارس بحاجات كتير زي:
تأهيل الطالب لامتحان الشهادة البريطانية (IG)
الدراسة بنظام SABIS في مدارس الشويفات بتأهل الطالب للحصول على الشهادة الثانوية البريطانية أو الشهادة العامة الدولية للتعليم الثانوي وبيرمز ليها بـ IGCSE، وهي امتحان قائم على اللغة الإنجليزية ومعترف بيها في المملكة المتحدة وفي كل دول العالم.
تأهيل الطالب لامتحان الدبلومة الأمريكية (SAT)
اختبار الـ SAT هو اختصار لـ Scholastic Assessment Test، ونقدر نقول عليه إنه امتحان بيقيس مدى جاهزية طلاب الثانوية للقبول في الجامعات ومؤسسات التعليم العالي في الولايات المتحدة الأمريكية.
استخدام برنامج سابيس ®SABIS للرصد الأكاديمي
بتستخدم مدارس الشويفات الدولية -تحت إشراف نظام سابيس التعليمي- برامج بتسمح ليهم بتقييم فوري وموثوق للمعارف اللي بيكتسبها التلميذ من خلال الدراسة عندهم، ودا بيساعدهم في متابعة كل طالب بشكل دقيق وفعّال.
من أهم البرامج دي هو برنامج سابيس ®SABIS للرصد الأكاديمي SABIS® AMS واللي بيقدروا عن طريقه يكتشفوا الثغرات التعليمية عند كل طالب وتحديدها بدقة، وبعد كدا يشتغلوا بحلول عملية مدروسة لمعالجة الثغرات دي مع كل طالب لوحده أو في مجموعات حسب نوع المشاكل اللي بتواجه كل طالب، ودا نتيجته في النهاية استقبال الطلاب للمنهج الدراسي بشكل سهل وبسيط.
3- شروط التقديم وكيفية القبول في مدارس الشويفات الدولية
عشان تقدم في واحدة من مدارس الشويفات الدولية بيكون في شوية أوراق مهمة لازم تجهزها، وهي :
- شهادة الميلاد بتاعة الطالب اللي هتقدمله، ويستحسن تكون شهادة كمبيوتر حديثة.
- البطاقة الشخصية للأب وللأم، أو البطاقة الشخصية بتاعة ولي أمر الطالب في حال وفاتهم.
- صور شخصية حديثة.
- نموذج طبي وتملأ كل البيانات المطلوبة فيه.
- صورة من شهادة التطعيم للطالب.
- آخر شهادة مدرسية أخدها الطالب أو كشف درجات وتقديرات ليه من المدرسة دي.
بيفتح باب التقديم من شهر نوفمبر وبيستمر لحد إكتمال العدد المطلوب، وبتتراوح كثافة الفصول جوه المدارس من 28 لـ 33 طالب بحد أقصى لكل فصل.
4- أماكن تواجد المدرسة في مصر
مصر فيها مدرستين بس حتى الآن بيتبعوا لفروع مدارس الشويفات الدولية، في القاهرة الجديدة وفي 6 أكتوبر.
فرع القاهرة الجديدة
تأسس سنة 1995م ومكانه في الحي الرابع، مدخل القاهرة الجديدة أمام القطامية هايتس، منطقة الشويفات، التجمع الخامس.
الفرع تابع لمركز الدراسات الدولي بالقاهرة واللي بيسعى لمساعدة كل الطلاب في تحقيق كل إمكانياتهم وإعدادهم للنجاح في الكلية، وكمان بيعزز من قيمهم المدنية والأخلاقية والمعنوية.
المركز بيمتلك مرافق عصرية مبنية للمحافظة على مستوى عالي من الكفاءة دائمًا، واللي منها:
- مختبرات علوم.
- مختبرات كمبيوتر.
- مكتبات من طابقين.
- غرف للفن والموسيقى.
- حمامات سباحة داخلية.
- ملاعب تنس.
- مسارات ألعاب القوى.
- ملاعب كرة قدم.
- قاعات رياضية.
- مسرح من 600 مقعد.
- كافيتيريا.
وبيسعى المركز من خلال كل دا إنه يحافظ على مكانته كمقدم للتعليم العالي الجودة إلى هيئة طلابية شديدة التنوع.
فرع السادس من أكتوبر
تابع لمركز الدراسات الدولي بـ 6 أكتوبر واللي تأسس سنة 2003م، وهدفه هو ضمان العمل كوحدة أسرية واحدة من أول المعلمين والطلاب وأولياء الأمور لحد عمال الأمن وعمال النظافة، بحيث يكون المجتمع المدرسي كله بيتعامل مع بعضه بطريقة محترمة وصادقة وهادفة، ودا عشان يخلقوا بيئة مدرسية للطلاب يحسوا فيها بالراحة والأمان والقدرة على التركيز في التعلم.
فرع مدارس الشويفات الدولية في 6 أكتوبر موجود في دريم لاند -قريب من أهرامات الجيزة- ومبني على مساحة 60 ألف متر مربع، بغرض استيعاب 1600 طالب بحد أقصى.
5- مصاريف الدراسة
المصروفات الدراسية في مدارس الشويفات الدولية بتختلف حسب السنة الدراسية، وحسب أخر تحديث للعام الدراسي 2022-2023 بنلاقي إنها بتبدأ من 39 ألف جنيه للحضانة وحتى 100 ألف جنيه للثانوية العامة.
المصاريف دي غير شاملة لمصروفات الكتب الدراسية أو أي متعلقات تانية دي مصاريف الدراسة بس، ومصاريف الباص بتتراوح من 16 لـ 20 ألف جنيه مصري حسب بُعد المسافة عن مكان المدرسة.
6- آراء أولياء الأمور في مدارس الشويفات
خلينا نعرض شوية من الآراء الإيجابية لأولياء أمور لطلبة في مدارس الشويفات الدولية:
“يتم تأسيس الكي جي بشكل رائع ولا يوجد أي ضغط بالدراسة”
“يتم التواصل بين الإدارة وأولياء الأمور عبر الإيميل، وسريعي الاستجابة للمشاكل والتعليقات”
“لهم نظام تعليمي خاص يسمى SABIS، وهو قريب بعض الشيء من الأمريكي كما يدرب الطلاب على امتحانات SAT الهامة”
ولكن إحدى أولياء الأمور ليها وجهة نظر مختلفة وبتقول :”لم تعجبني طريقتهم في التعامل مع تعديل سلوك الأطفال”
وأخيرا، اختيار المدرسة المناسبة لأولادك هي مسؤوليتك، وعشان كده لازم تدور الأول عن معلومات لأكتر من مدرسة قبل ما تاخد قرار، وحاولنا في المقال ده نجمع كل المعلومات اللي ممكن تبقى بتدور عليها ويهمك تعرفها كـ ولي أمر.
أضف تعليق