تعد مدارس الشويفات الدولية واحدة من أعرق المدارس في منطقة الشرق الأوسط، واللي ليها وجود في بلاد عربية كبيرة زي مصر والعراق والإمارات وغيرهم، وكل فترة بيكون في فرع جديد للمدرسة في أماكن مختلفة حول العالم.
والمدارس دي بتتبع نظام تعليمي قوي يقدر يحسن من مستوى طلابها بشكل مستمر على المستوى الفردي والجماعي، وكمان بتأهل الطالب لدخول أي جامعة في العالم.
وفي المقال دا هنتكلم عن أهم 6 معلومات محتاجين نعرفها عن مدارس الشويفات الدولية، تابع معنا.
1- نظام التعليم في مدارس الشويفات
بدأت المدارس دي لأول مرة في قرية الشويفات في لبنان سنة 1886م، وبعد فترة امتدت لدول كتير في الخليج ومصر.
وبتتبع مدارس الشويفات الدولية نظام SABIS® التعليمي ™، وهو مزيج بين تعليم عالي الجودة وقيم تقليدية بتتزرع في نفوس الطلبة بتساعدهم على تحمل المسؤوليات تجاه نفسهم والآخرين.
ودا نتيجة لتطويره وتحسينه واختباره لفترة طويلة لأكتر من قرن من الزمن، وبيخضع للتحديث عند الضرورة عشان يفضل مواكب للعصر والمجتمع والبيئة العالمية.
والنظام دا ليه اعتقاد ثابت؛ وهو إن النهج المدروس والفعّال بتخرج منه أفضل النتائج، ودا ممكن يتحقق عن طريق:
- تشجيع التلاميذ المجتهدين إنهم يندمجوا بسهولة في العملية التعليمية.
- التعليم المنهجي والشمولي من خلال أسلوب تعليم خاص بـ سابيس ®SABIS.
- متابعة الطلاب ومراقبة أدائهم وتقديم الدعم المناسب ليهم.
- إجراء اختبارات دورية متكررة.
- التخطيط والتحضير.
والمدارس التابعة للنظام بتوظّف كل إمكانياتها عشان تضمن نجاح الطالب في المنظومة، ودا بيخلي نسبة رسوب أي طالب ضعيفة جدًا؛ لإنهم مش بيسيبوا حد يفشل، وبيساعدهم في دا برنامج سابيس ®SABIS للرصد الأكاديمي SABIS® AMS.
شبكة SABIS® التعليمية موجودة في 20 دولة في 5 قارات حول العالم، وبيدرس مناهجها أكتر من 70 ألف طالب من سن 3 سنوات لـ 18 سنة.
وبيوفر النظام التعليمي دا مناهج دراسية صارمة موجهة دوليًا، وبيركز على الموضوعات الأساسية للغة الإنجليزية، والرياضيات، والعلوم، ولغات العالم، ودا لإعداد الطلبة بشكل قوي للكليات بعدين.
أهداف نظام التعليم المُتبع في مدارس الشويفات
مدارس الشويفات الدولية في مصر وغيرها من المدارس التابعة للنظام التعليمي دا بتهدف لتحقيق عدد من الأهداف الأكاديمية زي:
- إعداد الطلاب عشان تكون قادرة على الحفاظ على الجهود الفكرية لفترات طويلة.
- توفير تعليم جيد بيعتمد على إتقان اللغة الإنجليزية والعربية.
- تأهيل كل الطلاب لدخول أي كلية في أي جامعة في العالم.
- تمكين الطلاب من الاستفادة من نظام التعليم ثنائي اللغة.
- تدريب الطلاب على التفكير المنطقي والتفكير النقدي.
- توليد الإثارة للتعلم.
وكمان بتسعى لتحقيق عدد من الأهداف غير الأكاديمية زي:
- اتخاذ القرارات المدروسة والحكيمة في الأمور المتعلقة بالقضايا الاجتماعيّة.
- الدفاع عن القناعات والعمل على تحقيق فهم أفضل لأي طرح أو قضية.
- المشاركة في الأنشطة الطلابية والعمل المجتمعي.
- الاحتفاظ بمعايير عالية من القيم الأخلاقيّة والاجتماعيّة.
- تعزيز مبدأ التسامح، والتعاون، والعمل المشترك.
وبما إن التنافسية بتزيد جدًا في العالم، والتعليم الجامعي أصبح عنصر أساسي بيساهم في النجاح في المستقبل من الناحية العملية.
عشان كدا مدارس الشويفات الدولية -تحت إشراف نظام SABIS® التعليمي- بتجهّز كل طلابها لدخول كليات مرموقة وليها سمعة طيبة، يقدروا من خلالها يبدأوا أول الطريق في مسارهم الوظيفي.
تقدر كمان تعرف معلومات أكتر عن النظام التعليمي دا من خلال مقال : 6 معلومات عن نظام سابيس التعليمي SABIS.
2- مميزات الدراسة في مدارس الشويفات الدولية
مدارس الشويفات بتتميز عن غيرها من المدارس بحاجات كتير زي:
تأهيل الطالب لامتحان الشهادة البريطانية (IG)
الدراسة بنظام SABIS في مدارس الشويفات بتأهل الطالب للحصول على الشهادة الثانوية البريطانية أو الشهادة العامة الدولية للتعليم الثانوي وبيرمز ليها بـ IGCSE، وهي امتحان قائم على اللغة الإنجليزية ومعترف بيها في المملكة المتحدة وفي كل دول العالم.
تأهيل الطالب لامتحان الدبلومة الأمريكية (SAT)
اختبار الـ SAT هو اختصار لـ Scholastic Assessment Test، ونقدر نقول عليه إنه امتحان بيقيس مدى جاهزية طلاب الثانوية للقبول في الجامعات ومؤسسات التعليم العالي في الولايات المتحدة الأمريكية.
استخدام برنامج سابيس ®SABIS للرصد الأكاديمي
بتستخدم مدارس الشويفات الدولية -تحت إشراف نظام سابيس التعليمي- برامج بتسمح ليهم بتقييم فوري وموثوق للمعارف اللي بيكتسبها التلميذ من خلال الدراسة عندهم، ودا بيساعدهم في متابعة كل طالب بشكل دقيق وفعّال.
ومن أهم البرامج دي هو نظام سابيس ®SABIS للرصد الأكاديمي SABIS® AMS واللي بيقدروا عن طريقه يكتشفوا الثغرات التعليمية عند كل طالب وتحديدها بدقة.
وبعد كدا بيشتغلوا بحلول عملية مدروسة لمعالجة الثغرات دي مع كل طالب لوحده أو في مجموعات حسب نوع المشاكل اللي بتواجه كل طالب، ودا نتيجته في النهاية استقبال الطلاب للمنهج الدراسي بشكل سهل وبسيط.
3- شروط التقديم وكيفية القبول في مدارس الشويفات الدولية
التقديم في واحدة من مدارس الشويفات بيكون خلال عدد من الخطوات، وهي:
1- زيارة المدرسة
بيسمح للأهل زيارة المدرسة وياخدوا جولة فيها، ويمكن تحديد المقابلة دي عن طريق البريد الإلكتروني للمدرسة.
2- تقديم الأوراق المطلوبة
بيفتح باب التقديم كل عام من شهر نوفمبر وبيستمر لحد اكتمال العدد المطلوب، وبتتراوح كثافة الفصول جوه المدارس من 28 لـ 33 طالب بحد أقصى لكل فصل.
المهم يتسدد رسوم الدخول عشان يقدر ولي الأمر يكمل الإجراءات ويغطي التكاليف الإدارية، والأوراق المطلوبة هي:
- البطاقة الشخصية للأب وللأم، أو البطاقة الشخصية لولي أمر الطالب في حال وفاتهم.
- آخر شهادة مدرسية حصل عليها الطالب أو كشف درجات وتقديرات ليه من المدرسة دي.
- نموذج طبي وتملأ كل البيانات المطلوبة فيه.
- صورة من شهادة التطعيم للطالب.
- 2 صور شخصية حديثة.
- صورة بطاقة الهوية أو صورة من جواز السفر.
3- إجراء اختبار تحديد المستوى
في حالة تقديم الطلب لدخول الصف التاني، بيتطلب أداء اختبار تحديد مستوى للطالب كجزء أساسي لقبوله، وبناءً عليه بتختاره المدرسة.
ويمكن حجز ميعاد للاختبار دا من خلال البريد الإلكتروني للمدرسة.
وبناءً على نتيجة الاختبار وعلامات الطالب في المدرسة السابقة بياخد تقييم دقيق من المدرسة، دا بالإضافة لمعرفة ميول الطالب وشخصيته زي هل هو مندفع؟ ومدى تطوره النفسي والاجتماعي، ورغبته في النجاح والعمل بجدية، وهل المدرسة ملائمة إنها تلبي احتياجات الطفل أو لأ.
ولو المدرسة قيمت الطالب إنه مناسب والورق المطلوب اتقدم كله بدون نقص بيتحجز مكان للطالب في المدرسة.
4- أماكن تواجد المدرسة في مصر
مصر فيها مدرستين بس حتى الآن بيتبعوا لفروع مدارس الشويفات الدولية، في القاهرة الجديدة وفي 6 أكتوبر.
فرع القاهرة الجديدة
تأسس سنة 1995م ومكانه في الحي الرابع، مدخل القاهرة الجديدة أمام القطامية هايتس، منطقة الشويفات، التجمع الخامس.
الفرع تابع لمركز الدراسات الدولي بالقاهرة واللي بيسعى لمساعدة كل الطلاب في تحقيق كل إمكانياتهم وإعدادهم للنجاح في الكلية، وكمان بيعزز من قيمهم المدنية والأخلاقية والمعنوية.
وبيمتلك المركز مرافق عصرية مبنية للمحافظة على مستوى عالي من الكفاءة دائمًا، واللي منها:
- غرف للفن والموسيقى
- حمامات سباحة داخلية
- مسارات ألعاب القوى
- مسرح من 600 مقعد
- مكتبات من طابقين
- مختبرات كمبيوتر
- ملاعب كرة قدم
- قاعات رياضية
- مختبرات علوم
- ملاعب تنس
- كافيتيريا
وبيسعى المركز من خلال كل دا إنه يحافظ على مكانته كمقدم للتعليم العالي الجودة إلى هيئة طلابية شديدة التنوع.
فرع السادس من أكتوبر
تابع لمركز الدراسات الدولي بـ 6 أكتوبر واللي تأسس سنة 2003م، وهدفه هو ضمان العمل كوحدة أسرية واحدة من أول المعلمين والطلاب وأولياء الأمور لحد عمال الأمن وعمال النظافة.
بحيث يكون المجتمع المدرسي كله بيتعامل مع بعضه بطريقة محترمة وصادقة وهادفة، ودا عشان يخلقوا بيئة مدرسية للطلاب يحسوا فيها بالراحة ،والأمان، والقدرة على التركيز في التعلم.
وعنوان فرع مدارس الشويفات الدولية في 6 أكتوبر موجود في دريم لاند -قريب من أهرامات الجيزة- ومبني على مساحة 60 ألف متر مربع، بغرض استيعاب 1600 طالب بحد أقصى.
5- مصاريف الدراسة
المصروفات الدراسية في مدارس الشويفات الدولية بتختلف حسب السنة الدراسية، وحسب آخر تحديث للعام الدراسي 2023 – 2024.
بنلاقي إنها بتبدأ من 89 ألف جنيه للحضانة، والمصاريف دي غير شاملة لمصروفات الكتب الدراسية أو أي متعلقات تانية دي مصاريف الدراسة بس.
أما بالنسبة للمصاريف الدراسية المعلن عنها للصفوف الدراسية، في مدرسة الشويفات فرع أكتوبر لعام 2023 – 2024، فهي:
مصروفات الكتب لمرحلة الحضانة 5210 جنيه، ومصروفات الكتب للمرحلة الابتدائية 5970 جنيه، وباقي المراحل بتتراوح من 8570 – 10000 جنيه، بالإضافة لمصروفات المدرسة:
- رياض الأطفال المستوى الأول 93995 جنيه.
- المرحلة الابتدائية الصف الأول 126765 جنيه.
- المرحلة الابتدائية الصف الثاني 126365 جنيه.
أما مصاريف فرع القاهرة بتكون المصاريف فهي عبارة عن:
رسوم الباص بتكون 20000 جنيه، ومصروفات الكتب لمرحلة الحضانة 5000 جنيه، وبتتراوح من 5900 – 8500 جنيه في المرحلة الابتدائية دا بجانب مصاريف المدرسة وهي:
- رياض الأطفال المستوى الأول 89000 جنيه.
- المرحلة الابتدائية الصف الأول 118900 جنيه.
- المرحلة الابتدائية الصف الثاني 121500 جنيه.
اقرأ أيضًا عن: مدارس التكنولوجيا التطبيقية الدولية
6- آراء أولياء الأمور في مدارس الشويفات الدولية
خلينا نعرض شوية من الآراء الإيجابية لأولياء أمور لطلبة في مدارس الشويفات:
- “يتم التواصل بين الإدارة وأولياء الأمور عبر الإيميل، وسريعي الاستجابة للمشاكل والتعليقات”.
- “لهم نظام تعليمي خاص يسمى SABIS، وهو قريب بعض الشئ من الأمريكي كما يدرب الطلاب على امتحانات SAT الهامة”.
- “يتم تأسيس الكي جي بشكل رائع ولا يوجد أي ضغط بالدراسة”.
ولكن بعض أولياء الأمور ليهم وجهة نظر مختلفة وواحد من التعليقات دي: “لم تعجبني طريقتهم في التعامل مع تعديل سلوك الأطفال”.
وأخيرًا، اختيار المدرسة المناسبة لأولادك هي مسؤوليتك، وعشان كدا لازم تدور الأول عن معلومات لأكتر من مدرسة قبل ما تاخد قرار.
حاولنا في المقال دا نجمع كل المعلومات اللي ممكن تبقى بتدور عليها ويهمك تعرفها كـ ولي أمر عشان لو حابب تدخل ابنك في واحدة من مدارس الشويفات الدولية.
أضف تعليق