هل لاحظتي إن ابنك رجله باين عليها إنها “مُسطحة” من تحت؟ أو لما بيمشي بتحسي إن باطن رجله كله ملامس للأرض؟
ده ممكن يكون مؤشر على وجود فلات فوت عند الأطفال أو ما يُعرف بـ “تسطّح القدم”، وهي حالة شائعة في مراحل النمو.
لكن السؤال المهم لكل أم:
“هل الفلات فوت خطر؟ وهل محتاج تدخل؟ وإيه هو أفضل علاج للفلات فوت عند الأطفال يساعد ابني يمشي بطريقة طبيعية ومن غير ألم؟”
في المقال ده، هنشرحلك كل التفاصيل عن الحالة: أسبابها، طرق تشخيصها، وأهم خطوات العلاج الفعّالة اللي هتساعد ابنك يتحرك بثقة وراحة.
إيه هو الفلات فوت (القدم المسطحة)؟
الفلات فوت أو القدم المسطحة هي حالة بتكون فيها رجل الطفل ملامسة للأرض بالكامل من غير ما يبقى فيها التقوس الطبيعي اللي بيكون في باطن القدم. يعني لما تشوفي بصمة رجله على الأرض، هتلاقيها كلها ظاهرة من غير مساحة فاضية في المنتصف.
والسؤال هنا هل ده طبيعي؟
أه، الأطفال كلهم بيتولدوا برجلين مسطحة، والتقوس الطبيعي بيبدأ يتكون مع الوقت، وعادةً في سن 3 سنين تقريبًا.
طيب ليه بيحصل الفلات فوت للأطفال؟
في بعض الحالات، الأربطة والأوتار اللي بتشد عظام الرجل مش بتقدر تعمل التقوس الطبيعي، فبتفضل القدم مسطحة. وممكن نلاحظ إن التقوس بيظهر ويختفي تاني.
طيب هل الفلات فوت بيسبب مشاكل؟
أهالي كتير بيسألوا عن علاج الفلات فوت عند الأطفال ونوعه، ولكن قبل دا خلينا نعرف امتى ندور على العلاج.
في أغلب الأطفال، الفلات فوت مش بيسبب أي مشاكل في الحياة اليومية أو في اللعب.
لكن ممكن الطفل يحس بوجع أو تعب في رجليه لما بيمارس رياضة مجهدة أو بيقف لفترات طويلة، لأن التقوس الطبيعي بيكون عامل مهم في توزيع وزن الجسم على الرجل، ودا بيعتمد على نوع الفلات فوت.
إيه هي أنواع الفلات فوت عند الأطفال؟
في أنواع كتيرة من القدم المسطحة، لكن كلها بتكون فيها مشكلة اختفاء التقوس تحت القدم. هنتكلم عن الأنواع الأساسية علشان تعرفي شكل الفلات فوت عند الأطفال وتبقي قادرة تميزي النوع اللي عند طفلك.
1. الفلات فوت المرن (الأكثر شيوعاً)
ده النوع اللي بنلاقيه عند معظم الأطفال وبيكون التقوس ظاهر لما بيكون الطفل قاعد أو نايم؛ لكن لما الطفل بيقف، بيكون شكل الفلات فوت واضح والرجل بتظهر مسطحة بالكامل.
ودا بيبدأ من الطفولة وبيفضل مع الطفل لحد المراهقة، وبيكون في الرجلين مع بعض.
2. الفلات فوت الصلب (أصعب نوع)
في النوع ده، شكل الفلات فوت عند الأطفال بيكون واضح سواء الطفل واقف أو قاعد، ومفيش تقوس خالص في أي وضع، وبيظهر عادة في سن المراهقة وبيزيد مع الوقت.
والطفل ممكن يحس بوجع في رجليه ودي من ضمن الحالات اللي بتحتاج علاج لإنها بتسببله صعوبة في تحريك رجله كويس.
3. الفلات فوت المكتسب (الأقواس الساقطة)
ده نوع بيظهر فجأة عند الأطفال الكبار أو المراهقين؛ بيكون التقوس كان موجود وبدأ يختفي، والرجل بتكون بتلف برة.
وبيكون مصحوب بوجع في أغلب الحالات، وسببه غالباً التهاب في الأوتار ودا كمان بيحتاج علاج.
4. الفلات فوت الخلقي (من الولادة)
ده نوع نادر بيكون موجود من الولادة، وبتكون عظمة الكاحل في مكان غلط، وشكل الفلات فوت عند الأطفال بيكون واضح من أول الولادة، وفي الغالب محتاج تدخل طبي سريع.
وبعد ما عرفنا الأنواع، هنعرف دلوقتي الأسباب والأعراض للحالة دي.
أسباب الفلات فوت عند الأطفال
تبعاََ لدراسة اتنشرت على موقع ScienceDirect أثبتت إن كل ما بيكبر الطفل؛ نسبة الفلات فوت بتقل، والنسبة بتنزل من 39.5% في سن 6 سنين لـ 11.8% في سن 12 سنة.
وأثبتت دراسة نشرها موقع ResearchGate إن الأطفال اللي عندهم زيادة في الوزن؛ احتمال إصابتهم بالفلات فوت بيكون أعلى؛ يعني السمنة بتضاعف الخطر أكتر من مرتين؛ لإنها بتسبب ضغط على الأربطة والعظام.
دا بجانب مجموعة من الأسباب أبرزها:
- العيوب الخلقية: زي التحام عظام القدم مع بعض بشكل غير طبيعي أو الشلل الدماغي أو متلازمة داون أو حنف القدم.
- الإصابات: الأطفال اللي بيمارسوا رياضة عنيفة أو عندهم إصابات متكررة في الرجل.
- الوراثة: لو في تاريخ عائلي للمرض، احتمال كبير يظهر عند الأطفال.
- التهاب الأوتار: اللي بيضعف الأربطة المسؤولة عن التقوس.
- لبس الأحذية غير المناسبة: مش بتدعم قوس القدمين وضيقة جداً.
- أمراض معينة: زي السكري والتهاب المفاصل.
- ضعف العضلات والأربطة اللي بتدعم القدم.
- الراحة الطويلة وعدم الحركة لفترات طويلة.
أعراض الفلات فوت عند الأطفال
ودي أهم الأعراض اللي لازم تنتبهي ليها عشان تتأكدي إن الطفل محتاج لعلاج الفلات فوت عند الأطفال:
- الطفل بيشتكي من وجع في: باطن الرجل، الكعب، الكاحل، الركبة والظهر.
- الرجل بتكون مسطحة من تحت ومفيش تقوس ظاهر.
- تيبس في الرجل فبيحس بصعوبة في تحريك رجله.
- التعب السريع من المشي مسافات قصيرة.
- صعوبة في المشي فبيقع كتير أو بيتعثر.
- تغير في المشية فبتكون مشيته غريبة شوية.
اتعرفي على: الجديد في علاج التوحد أبرز 7 دراسات حديثة.
نصائح عملية لتقليل أعراض الفلات فوت عند الأطفال
عاوزة تخففي الوجع والانزعاج اللي بيحصّل لطفلك بسبب الفلات فوت؟ دي نصائح سهلة ومفيدة:
- الوزن الصحي: حافظي على وزن طفلك المثالي علشان يخف الضغط على الرجلين.
- كمادات الثلج: ضعيها على المناطق المؤلمة علشان تخففي الالتهاب والوجع.
- تقليل الأنشطة المجهدة: خففي من الجري والقفز لو بيزود الألم عند الطفل.
- الراحة: خلي طفلك يتجنب الوقوف لفترات طويلة.
النصايح دي بجانب استشارة دكتور عظام متخصص في علاج الفلات فوت عند الأطفال؛ لأن الاكتشاف المبكر بيسهل العلاج جداََ، فبلاش تستني الأعراض تزيد علشان تروحي للدكتور.
هل الفلات فوت خطر؟
مش شرط يكون خطر، ودي أهم حاجة الأمهات لازم يعرفوها؛ في معظم الحالات، الفلات فوت عند الأطفال بيكون بسيط ومؤقت، وبيتعدل طبيعي مع النمو.
لكن لو الحالة بدأت تسبب مضاعفات زي:
- إصبع القدم المخلبية (تقوس الأصابع زي المخلب).
- التهابات الأوتار خاصة وتر العرقوب ومؤخرة الكعب.
- انحراف إصبع قدم الطفل الكبير.
- ألم في الرجل أو الركبة أو الكاحل.
- تعب سريع أثناء اللعب أو المشي.
- ميل القدم للداخل أثناء الوقوف.
- تآكل الحذاء من ناحية معينة.
- التهاب أربطة باطن القدم.
- عرج في المشي.
وقتها محتاجة تروحي لطبيب عظام أو قدمين (orthopedic specialist)، لأن الحالة دي ممكن تحتاج خطة علاج الفلات فوت عند الأطفال بشكل أسرع.
تشخيص الفلات فوت عند الأطفال
التشخيص بيبدأ بخطوات بسيطة لكن دقيقة جدًا:
الفحص السريري
الطبيب بيخلي الطفل يقف ويمشي على أطراف الأصابع وعلى الكعب، وبيلاحظ شكل الرجل أثناء الحركة. كمان بيفحص مرونة القدم ويشوف لو فيه ألم أو شدّ في الأوتار.
الأشعات والتحاليل
لو الحالة مش واضحة، الطبيب ممكن يطلب:
- أشعة سينية X-ray لتوضيح وضع العظام.
- أشعة مقطعية CT أو رنين مغناطيسي MRI في الحالات النادرة.
- تحليل المشي gait analysis عشان يشوف طريقة مشي الطفل بالتفصيل.
كل ده بيساعد الطبيب يحدد إذا كان الفلات فوت بسيط ولا محتاج علاج خاص.
طرق علاج الفلات فوت عند الأطفال
العلاج بيختلف من حالة للتانية، ومش شرط إن كل طفل عنده فلات فوت ياخد نفس الخطة.
الأطباء بيقسموا العلاج لـ 3 مستويات:
1. العلاج البسيط (بدون تدخل طبي كبير)
لو الحالة خفيفة ومش مسببة ألم، الطبيب غالبًا هينصح بـ:
- تمارين منزلية لتقوية عضلات الرجل (زي الوقوف على أطراف الأصابع أو التقاط الأشياء بالأصابع).
- تشجيع الطفل يمشي حافي على الرمل أو العشب، لأن دا بيقوّي العضلات بشكل طبيعي.
- اختيار أحذية طبية مناسبة فيها دعم للقوس الداخلي.
- متابعة دورية كل 6 شهور لملاحظة التطور.
في المرحلة دي، علاج الفلات فوت عند الأطفال بيكون بسيط جدًا ومش مؤلم، وكل المطلوب متابعة واهتمام من الأم.
2. العلاج الطبيعي والدعامات الطبية
لو الطفل بيشتكي من ألم أو تعب في الرجل، الطبيب ممكن يوصي بـ:
- تعديل الأنشطة اليومية: تقليل الجري المفرط أو الرياضات اللي فيها ضغط كبير على القدم.
- استخدام مسكنات الألم في حالة الألم الشديد، ومضادات الالتهاب لتخفيف الورم والالتهابات.
- فرش طبي (Orthotics) بيتعمل مخصوص لرفع القوس ودعم القدم.
- جلسات علاج طبيعي لتقوية العضلات والأربطة اللي بتدعم القدم.
العلاج ده بيكون فعال جدًا خصوصًا في الحالات اللي بتظهر بعد سن المدرسة.
3. العلاج الجراحي
ده بيكون آخر حل، ومش بنلجأ له إلا لو فشلت الطرق التانية. الجراحة بتكون ضرورية لو فيه:
- أوتار مشدودة جدًا بتمنع الطفل من الحركة الطبيعية.
- ألم مزمن مش بيتحسن.
- تشوه خلقي في العظام.
في الحالات دي، الطبيب ممكن يعمل جراحة بسيطة بتساعد على تصحيح شكل القدم نهائيًا، زي:
- نقل الأوتار (Tendon transfers): تعديل مكان الوتر عشان يتحسن الشكل.
- قطع العظام (Osteotomy): تعديل في شكل العظام نفسها.
- دمج المفاصل (Fusion): تثبيت المفاصل عشان تقليل التشوه.
بعد الجراحة، الطفل بيحتاج فترة تأهيل وعلاج طبيعي لتقوية الرجل من جديد.
أبرز 15 تمرين لعلاج الفلات فوت عند الأطفال
التمارين من أبرز طرق علاج الفلات فوت، وبتساهم بشكل كبير في التحسن وتقوية العضلات، ومنها:
1. تمرين رفع القوس
- الطريقة: يقف الطفل ويرفع الجزء الداخلي للقدم مع تثبيت الأصابع والكعب على الأرض.
- الفوائد: يقوي العضلات المسؤولة عن تكوين القوس الطبيعي.
2. تمرين المشي على الأصابع
- الطريقة: المشي لمسافة قصيرة باستخدام أصابع القدمين فقط.
- الفوائد: يقوي عضلات الساق والقدم ويحسن التوازن.
3. تمرين المشي على الكعب
- الطريقة: المشي على الكعبين مع رفع أصابع القدم للأعلى.
- الفوائد: يطور التوازن ويقوي عضلات مختلفة في القدم.
4. تمرين دحرجة الكرة
- الطريقة: الجلوس على كرسي ودحرجة كرة تنس تحت باطن القدم.
- الفوائد: يدلك ويقوي قوس القدم ويساعد على استرخاء العضلات.
5. تمرين التقاط المنشفة
- الطريقة: استخدام أصابع قدميه لالتقاط منشفة من الأرض وشدها لاتجاه الجسم.
- الفوائد: يقوي العضلات الصغيرة في باطن القدم والأصابع.
6. تمرين شد المنشفة
- الطريقة: وضع قدم على منشفة ومحاولة تجميعها لاتجاه الداخل باستخدام الأصابع.
- الفوائد: يحسن مرونة الأصابع ويقوي عضلات القوس.
7. تمرين إطالة وتر العرقوب
- الطريقة: الوقوف مقابل حائط ووضع قدم للأمام والتانية للخلف مع تثبيت الكعبين.
- الفوائد: بيطول وتر العرقوب ويحسن مرونة القدم.
8. تمرين رفع الكعب
- الطريقة: الوقوف ورفع الكعبين عن الأرض لأعلى مستوى ممكن والنزول ببطء.
- الفوائد: يقوي عضلات الساق والكاحل.
9. تمرين دوران الكاحل
- الطريقة: الجلوس ورفع القدم وتحريك الكاحل في شكل دواير كبيرة.
- الفوائد: يحسن مرونة المفصل ويقوي العضلات المحيطة.
10. تمرين الضغط على الكرة
- الطريقة: الجلوس والضغط على كرة مطاطية بين باطن القدمين.
- الفوائد: يقوي العضلات الداخلية للقدم والفخذ.
11. تمرين المشي على الرمال
- الطريقة: المشي حافي القدمين على الرمل الناعم.
- الفوائد: يقوي جميع عضلات القدم بشكل طبيعي.
12. تمرين الإصبع المرفوع
- الطريقة: الجلوس ورفع الإصبع الكبير مع تثبيت الأصابع التانية على الأرض.
- الفوائد: يحسن التحكم في عضلات القدم.
13. تمرين المقاومة بالشريط
- الطريقة: استخدام شريط مطاطي ومقاومة حركة القدم للداخل والخارج.
- الفوائد: يقوي العضلات الجانبية للقدم.
14. تمرين التوازن على قدم واحدة
- الطريقة: الوقوف على قدم واحدة لمدة 30 ثانية مع الحفاظ على التوازن.
- الفوائد: يحسن التوازن ويقوي عضلات القدم والكاحل.
15. تمرين الكتابة بالأصابع
- الطريقة: الجلوس واستخدام أصابع القدم لالتقاط أقلام الرصاص وكتابة الحروف.
- الفوائد: يقوي التحكم في أصابع القدم والعضلات الدقيقة.
نصائح مهمة للممارسة:
ممارسة التمرينات دي هتساعد في حالة طلب الطبيب المعالج ممارسة التمارين في البيت أو جلسات العلاج الطبيعي والتمارين بتكون مكملة في البيت، المهم يكون:
- ممارسة التمارين يومياً لمدة 15-20 دقيقة مش أكتر من كدا.
- الاستمرارية هي مفتاح النجاح في تحسين الفلات فوت.
- جعل التمارين ممتعة عن طريق تحويلها لألعاب
- البدء بتمارين بسيطة وبعدين التدرج للأصعب.
- التوقف فوراً عند الشعور بألم شديد.
مخاطر إهمال الفلات فوت عند الأطفال
علاج الفلات فوت عند الأطفال مهم وإهمال الحالة لو مسببة ألم للطفل بيكون ليه مضاعفات زي:
- فلات فوت دائم: فقدان كامل للتقوس وعدم القدرة على العلاج.
- مشاكل في الوقوف: صعوبة في الوقوف على أطراف الأصابع.
- تشوهات دائمة: ممكن تستمر طول العمر.
- تلف الأوتار: مع نمو الطفل وزيادة الوزن.
- ألم وتورم مزمن في باطن القدم والكاحل.
مشاكل تانية ممكنة:
- مشاكل في الركبة والظهر: بسبب توزيع الوزن بشكل غير متساوي.
- التهاب الأوتار: نتيجة الإجهاد المستمر.
- التواء الكاحل المتكرر: نتيجة عدم الاستقرار.
أهم الأسئلة الشائعة عن علاج الفلات فوت عند الأطفال
دي إجابات لأهم أسئلة عن علاج الأقدام المسطحة عند الأطفال:
1- هل طفلي محتاج أحذية خاصة؟
الحقيقة عن الأحذية الطبية:
- مش بتصلح الفلات فوت هي بتساعد في تخفيف الألم لو الطفل بيشتكي من وجع، وبتدعم القدم علشان تخفف الضغط على الأوتار.
2- امتى بنلجأ للدعامات؟
- لو في وجع مستمر رغم الراحة والتمارين.
- لتسهيل الحركة علشان الطفل يقدر يمارس حياته بشكل طبيعي.
- كجزء من خطة العلاج مع التمارين والعلاج الطبيعي.
3- إزاي أتصرف في الحالة دي؟
1. في السنوات الأولى: انتظري وراقبي من غير قلق خاصةََ لو مفيش ألم والطفل طبيعي.
2. من 6 – 8 سنوات: ولسه مفيش تحسن، استشيري دكتور.
3. في أي سن: لو ظهرت أعراض على الطفل، روحي لدكتور فورًا.
الوقاية من الفلات فوت عند الأطفال
مش دايمًا نقدر نمنع الفلات فوت، خصوصًا لو سببه وراثي، لكن فيه شوية خطوات بتقلل احتمالية تطوره أو تمنع مضاعفاته:
- تابعي أي تغير في شكل أو حركة رجله مع طبيب العظام.
- خليه يلعب رياضات خفيفة زي السباحة أو ركوب العجل.
- اختاري دايمًا حذاء مريح وداعم للقوس.
- حافظي على وزنه المثالي.
الخلاصة
في النهاية، لازم نعرف إن علاج الفلات فوت عند الأطفال مش مجرد موضوع تجميلي، لكنه مهم لصحة وسلامة المشي والحركة.
الوعي والمتابعة المبكرة هما سر نجاح العلاج. راقبي خطوات ابنك، واهتمي بأي شكوى من ألم أو تعب، واستشيري الطبيب قبل ما تتفاقم الحالة.
وبالاهتمام والرعاية، هتقدري ترجعي لطفلك راحته وثقته في كل خطوة بيخطيها.
المصادر
Flat feet (pes planus): Types, symptoms, treatment.
Recognizing and Treating Flat Feet in Children.
أضف تعليق