واحدة من الأمور اللي بتؤرق الأهالي هي ظهور الصفات السلبية على طفلهم، وتحول الطفل من حالة النشاط والحيوية والحركة اللي بتميز مرحلة الطفولة إلى اللامبالاة والكسل والسلبية تجاه كل حاجة حواليه.
إيه هي صفات الطفل السلبي؟ وازاي ممكن الوالدين يتعاملوا معاه، ويقدروا يطوروا منه، ويكون طفل أفضل؟
دا اللي هنعرفه من خلال المقال.
أسباب إصابة الطفل بالسلبية
بداية قبل ما نعرف إيه هي صفات الطفل السلبي هنتعرف على الأسباب اللي خلته يتحول للشكل دا.
في عدة عوامل بتساعد إن الطفل يتحول لطفل سلبي غير مبالي منها:
- عدم استقلالية الطفل، واعتماده على الوالدين في أبسط الأمور اليومية.
- مشاكل صحية أو نفسية بيعاني منها الطفل فتظهر في شكل سلبية.
- سلبية الوالدين، واللي بتظهر في سلوكهم وكلامهم فيقلدها الطفل.
- قلة الاهتمام وإهمال الأهل لطفلهم فيحس إنه مش مهم ليهم.
- تميُّز أحد الأطفال عن غيره، ومفيش عدل في معاملة الأولاد.
- الدلع المفرط واللي بيخلي الطفل يتحرك حسب ما يحب.
- عدم قدرة الطفل على التعبير عن نفسه بشكل صحيح.
- فرض السيطرة على الطفل، وتقييده، وتقييد حريته.
- عدم الاستماع لأسئلة الطفل والتقليل منها.
- المشاكل والخلافات بين الأب والأم.
كل دي عوامل بتساعد في تكوين شخصية الطفل السلبي، لكن ازاي أتأكد إن طفلي سلبي؟
صفات الطفل السلبي
في سمات بتكون واضحة، وسهل على الأهل لما يشوفوها يعرفوا إن طفلهم بيعاني من السلبية، ومنها:
1- فقدان الحماس
فجأة هتلاقي طفلك بعد ما كان بيسألك ماما إيه رأيك، أو بابا شوف عملت إيه، أو إنه يعبر عن إعجابه بحاجة ويظهر حماسه للعبة أو أكلة بيحبها أو غيرها هيتحول لحالة البرود، ومش هيعبر عن حماسه حتى لو كان بيعمل حاجة بيحبها، وهتسيطر السلبية والبرود على ردود فعله على أمور كتيرة، ودي من أبرز صفات الطفل السلبي.
2- محاولة استفزاز الجميع
ممكن تلاقي طفلك بيعترض على الوجبة اللي بتقدميها، ويوصفها بأوصاف مش محببة، وممكن تلاقيه بيعترض على كل حاجة بتتقدم ليه بشكل مبالغ فيه.
وهيشعر الأهل إن الطفل بيحاول يستفزهم، ويفقدهم أعصابهم، لكنه في الحقيقة بيحاول يتواصل معاهم لكن بطريقة خاطئة.
3- التذمر والشكوى المستمرة
هنجد من صفات الطفل السلبي كُتر الشكوى، فبيشتكي تقريبًا من كل أمور حياته، ودايمًا بيعترض ويتذمر على أبسط الأشياء اللي ممكن تحصل معاه، وهيبقى دا نمط عام ليه.
4- التنمر
للأسف ممكن يوصل الطفل السلبي إلى التنمر، فيبدأ يعيب في كل اللي حواليه من أهله وأصحابه وغيرهم، ودي من أشهر صفات الطفل السلبي المؤذية ليه واللي حواليه، لأنها بتضره، وبتنفر الناس منه.
5- تدني المستوى الدراسي
ممكن توصل الحالة بالطفل السلبي إنه يفقد شغفه حتى في المذاكرة والدراسة، ويتأثر مستواه بشكل كبير، ويطرح أسئلة زي: ليه المفروض أذاكر؟ وهستفيد إيه؟ وغيرها.
ومهما حاول الأهل تشجيعه وتحفيزه مش بيتأثر، ودي واحدة من أبرز صفات الطفل السلبي اللي بتؤرق الأهل.
6- الحزن وفقدان السعادة
من صفات الطفل السلبي فقدان السعادة والحزن دايمًا، وممكن يبكي في أوقات مختلفة ولأسباب بسيطة، ومهما حاول الأهل إسعاده بالحاجات اللي بيحبها أو بطرق مختلفة بيظل الحزن ملازم ليه.
رغم كل الصفات اللي ممكن تضايق الأهل أو يلاقوا صعوبة في التعامل معاها إلا إنهم لازم يتأكدوا إن طفلهم مش وحش، هو محتاج معاملة مختلفة عشان يقدر يتخلص من سلبيته.
طرق التعامل مع الطفل السلبي
التعامل مع صفات الطفل السلبي أمر مش مستحيل، لكنه بيتطلب بذل مجهود، ومن الطرق الصحيحة للتعامل مع الطفل في الحالة دي:
توقف الأهل عن السلبية
ممكن تكون سلبية الأهل هي الأساس اللي خلى الطفل يتحول للصورة دي، فبيكون نسخة مُصغرة منهم ومن ردود فعلهم.
وبالتالي لازم الأب والأم يراقبوا سلوكياتهم ويبدأوا بالتغيير وتجنب السلبية قبل ما يطلبوا دا من طفلهم.
كمان نقدر نستعين بأطفالنا في دا، يعني نقولهم ينبهونا لو أظهرنا أي موقف سلبي، ودا هيساعد الأهل والأطفال في نفس الوقت.
تغيير نظرته للمواقف
من الحلول المقترحة لمعالجة صفات الطفل السلبي هي تغيير الزاوية اللي بيشوف بيها الأمور، فبدل ما نقوله بطل سلبية نخليه يشوف الحاجة الإيجابية في الموقف.
كمان نقدر نعزز دا فيه من خلال توضيح أهمية الإيجابية، وازاي هتساعده في ثقته بنفسه، وطرح أسئلة تخليه يستنتج ضرر السلبية.
تعزيز الشعور الإيجابي
من الحاجات اللي بتخلق شعور إيجابي عند الطفل هو إدراكه للنعم اللي بيمتلكها. خلي الطفل يذكر خمس حاجات هو ممتن لوجودها في حياته، ومن غيرها كان هيحس إن حياته أصعب، أو حاجات بتحسسه بالسعادة.
ويقدر يمارس التمرين دا بشكل يومي، لأنه هيساعده على تعزيز الشعور الإيجابي في نفسه.
المساعدة على فهم المشاعر والتعبير عنها
لو كان أساس وجود صفات الطفل السلبي هو عدم قدرته على التعبير عن مشاعره أو عدم فهمها من الأساس فدا هيتطلب من الأهل مساعدة الطفل في فهم كل شعور، ومعرفة الطرق الصحيحة للتعبير عنه.
إظهار الحب
واحدة من الطرق المهمة في التعامل مع صفات الطفل السلبي هي اهتمام الوالدين بيه، ومهم كمان يظهروا التعاطف لابنهم، ويعبروا عن حبهم ليه، وتقبله في كل حالاته، ومهما عمل هما بيحبوه ويقدّروه.
حل المشاكل العضوية والنفسية
من أسباب ظهور صفات الطفل السلبي وجود مشاكل صحية زي: الضعف العام أو بعض المشاكل النفسية زي: انفصام الشخصية، فلازم الأهل يتأكدوا من سلامة الطفل الصحية والنفسية قبل ما يطلقوا عليه إنه طفل سلبي.
تجاهل بعض السلبية
مش صح في كل مرة يُظهر الطفل حالة مزاجية سلبية إن يكون في رد فعل عليها، مهم في بعض الأوقات تجاهل الحالة السلبية لكن بدون تجاهل الطفل نفسه، بمعنى إننا نتجاهل شعوره بالسلبية لو كان بسيط أو في مواضيع صغيرة.
عدم وصف الطفل بالسلبية
تكرار وصف الطفل بأنه سلبي أو غير مبالي بيرسخ الصفات دي في ذهنه، وبيبدأ يتصرف على أساسها، وممكن يكون هو مش سلبي لكن يكتسب صفات الطفل السلبي بسبب كلام الوالدين.
لازم كمان الأهل ينتبهوا إن حتى لو الطفل سلبي يتجنبوا يلقبوه بكده، أو يذكروا ده قدام العائلة والأصدقاء، لأنه هيحسسه بشعور سيء، وهتزداد الأمور تعقيداً، ودا مش هيساعده أبدًا يتحول لطفل إيجابي.
نصائح للتخلص من سلبية الطفل
تغيير صفات الطفل السلبي وتحويله لطفل بيتمتع بصفات إيجابية وشخصية كلها طاقة وحيوية هيتطلب صبر كبير، وبذل مجهود، وتطبيق لحلول مختلفة، واللي منها:
- ممارسة الأخلاق الإسلامية في يومك زي: الصدق، والصبر، والتسامح عشان الطفل يقلدك.
- تعليم طفلك الصلاة، وقراءة القرآن، وأعمال الخير، لإن ليها دور كبير في تعزيز الإيجابية.
- تشجيع طفلك على التواصل معاك، وافهم مشاعره واحتياجاته.
- ضبط الأهل لأعصابهم قدر الإمكان، والمحافظة على هدوئهم.
- منع العقوبات الجسدية وركز على التوجيه والتعليم.
- البحث عن السبب الرئيسي اللي خلاه طفل سلبي.
وممكن كمان تطلع على نصائح جامعة هارفارد للآباء للتعامل مع الطفل السلبي.
الخلاصة
الكلام مع الطفل واحتوائه بالإضافة إلى المحاولة المستمرة هي أساس النجاح في مساعدة الطفل عشان يتخلص من السلبية.
وبكدا نكون عرضنا طريقة التعامل مع سلبية الأطفال، وأسباب ظهورها، وازاي ممكن الأهل يتعاملوا بطريقة سليمة معاه، عشان ينقذوه من السلبية.
أضف تعليق