المغص عند الأطفال من أكتر الحاجات اللي بتقلق الأمهات في الشهور الأولى، خصوصًا مع البكاء المستمر من غير سبب واضح.
وعلشان نساعدك تتعاملي مع المرحلة دي بهدوء ووعي، جمعنالك في المقال دا كل المعلومات المهمة عن المغص وأسبابه، وأكتر الأسئلة اللي بتشغل بالك عن المغص.
هنوضح إيه أفضل أنواع دواء المغص للأطفال؛ وأنسب الطرق للتعامل مع المغص سواء بالحلول الطبيعية أو الأدوية الآمنة بعد استشارة الطبيب.
ما هو المغص عند الأطفال؟
تبعًا للأكاديمية الأمريكية لأطباء الأسرة AAFP فإن المغص هو فترات طويلة ومتكررة من البكاء من غير سبب واضح عند الطفل الرضيع، رغم إن حالته الصحية كويسة، وعلى الرغم إن الكلمة بتوحي إنه ليه علاقة بالبطن، بس الحقيقة إن السبب الحقيقي للمغص لحد دلوقتي مش معروف.
وبيبدأ المغص عادةََ من أول شهر في عمر البيبي، وبيزيد بشدة في عمر 6 أسابيع، لكن الخبر الحلو إنه بينتهي لوحده لما الطفل يوصل 6 شهور.
والشائع إن كتير من الأطفال بيبكوا تقريبًا في نفس الوقت كل يوم سواء الصبح أو بالليل، والبكاء ممكن يفضل مستمر لساعات من غير سبب واضح.
ونتيجة البكاء الكتير ممكن يخلي الطفل يبلع هوا، ودا يسبب له انتفاخ في بطنه، وبالتالي الوضع بيكون أسوأ.
رغم كدا، معظم الأطفال اللي بيعانوا من المغص بياكلوا كويس ووزنهم بيزيد طبيعي حتى لو كان عندهم مغص جامد مش بيكون بسبب الجوع.
ودا اللي بيوجه الأهالي لاستخدام دواء المغص اللي بيكتبه دكتور الأطفال، خاصةً لو الموضوع مستمر ومسبب تعب للطفل أو ليكِ.
اتعرفي على: علاج البلغم عند الأطفال بالأعشاب: وصفات طبيعية فعالة وآمنة.
إيه اللي ممكن يسبب المغص؟
تبعًا لدراسة اتنشرت على موقع NIH بتثبت إن علميًا مفيش سبب واضح أو أكيد للمغص. في الغالب المغص بيكون مجرد علامة إن الطفل حساس أكتر من غيره للمؤثرات حواليه، ولسه مش بيعرف يهدي نفسه أو ينظم جهازه العصبي (ودا لأن الجهاز العصبي عنده بيكون لسه مش ناضج كفاية).
وأثبتت دراسة تانية على موقع NIH إن المغص ممكن يكون بسبب إن الطفل عنده حساسية من نوع أكل معين في تغذية الأم لو كانت بترضع طبيعي. وفي حالات نادرة بيكون سببه إن الطفل مش متحمل بروتين اللبن الموجود في الحليب الصناعي.
وفي بعض الحالات، البكاء اللي بيبقى شبيه بالمغص ممكن يكون وراه سبب طبي تاني، علشان كدا مهم تتابعي مع دكتور الأطفال، واللي ممكن وقتها يرشحلك دواء المغص للأطفال يكون مناسب للحالة.
وبعض الدكاترة بيقولوا إن المغص ممكن يكون زي بداية صداع نصفي للأطفال، أو إن الطفل بيحس بالخوف أو الإحباط ومش عارف يعبّر.
طب نعرف إزاي إن اللي عند البيبي مغص مش حاجة تانية؛ لأن في شوية حالات ممكن تتشابه مع المغص، زي:
- حساسية من الحليب سواء الطبيعي أو الصناعي.
- مشاكل في العيون أو الأعصاب.
- إصابة في العضلات أو الأصابع.
- ارتجاع في المعدة.
- وجود عدوى.
إزاي تعرف إن اللي عند طفلك مغص؟
لو طفلك بيعيط أكتر من 3 ساعات في اليوم، ولمدة 3 أيام في الأسبوع، ولسه مستمر كدا لأسابيع فدا غالبًا مغص. وكمان ممكن تلاحظ إن:
- الطفل بيفضل يبكي لفترات طويلة ومش بيهدى بسهولة.
- الطفل بيشد رجليه على بطنه أو يقوس ضهره.
- صوته بيكون عالي ومزعج.
- الهدوء والرجوع للبكاء تاني.
- البكاء بيزيد بالليل.
- وشه بيحمر جدًا.
رغم كل دا، الطفل اللي عنده مغص بياكل كويس، وبيزيد في الوزن، ودا شيء مهم. ولو البكاء مستمر ومسببلك قلق، دايمًا ممكن ترجعي للدكتور علشان يرشحلك دواء المغص للأطفال المناسب لحالته.
إزاي تساعد طفلك لو عنده مغص؟
تبعًا لدراسة اتنشرت على موقع ScienceDirect أثبتت فعالية حفاظ الأمهات على نظام غذائي صحي ومتوازن على تقليل أعراض المغص عند الأطفال.
ودي كانت تجربة إيجابية لبعض الأطفال، لكن مازال مفيش علاج نهائي للمغص، بس في شوية حاجات ممكن تساعد وتهوّن عليكِ وعلى البيبي. مع الوقت هتعرفي إيه اللي بيناسب ابنك أو بنتك.
- جربي تدلكي له بطنه بحركات دائرية قبل ما يعيط، بس بلاش بعد الرضاعة على طول.
- خلّي وضعيته أثناء الرضاعة يكون قاعد بشكل مستقيم علشان ما يبلعش هوا.
- ساعديه يتجشأ بعد الرضعة علشان ما يتعبش من الغازات.
- خدي طفلك في حضنك وقت البكاء، حضنك بيريّح.
- ضعيه في حمام دافيء ممكن يريّح بطنه ويهديه.
- ابعدي بيه عن الزحمة، والنور العالي، والضوضاء الكتير.
- جربي تمارين لإخراج الغازات من بطنه.
- استخدمي الضوضاء البيضاء.
- هزيه هز خفيف يهدّيه.
ولو حسيتي إن المغص زاد أو مستمر ممكن تتكلمي مع دكتور الأطفال يرشح لك دواء المغص للأطفال المناسب لحالة طفلك.
اتعرفي على: اضطرابات الأكل عند الأطفال: إزاي تكتشفها وتساعد ابنك يتغلب عليها؟
هل الرضاعة الطبيعية بتسبب مغص؟
بالعكس، الرضاعة الطبيعية ممكن تساعد في تهدئة طفلك وتخفف وجع المغص شوية. حاولي تفرغي الحليب من ناحية واحدة من صدرك قبل ما تنقلي للناحية التانية، لأن اللبن في النص التاني بيكون فيه دهون أكتر، والدهون دي بتبطّأ الهضم شوية ودا بيريّح بطن البيبي.
لو بترضّعي طبيعي، حاولي تقللي من شرب الشاي والقهوة أو أي مشروب فيه كافيين، لأن الكافيين ممكن يسبب له قلق أو مغص.
لو بترضّعي ابنك بالببرونة، خلي بالك من نقطة مهمة: قللي كمية الهوا اللي ممكن تدخل للبيبي أثناء الرضاعة. واستخدمي وضعية صحيحة عشان ما يبلعش هوا كتير.
متغيريش نوع اللبن الصناعي من نفسك، لأن تغيير الحليب ممكن يسبب له تعب أكتر، ولو حسيتي إن اللبن مش مناسب، اتكلمي مع دكتور الأطفال قبل أي تغيير.
في ببرونات وحلمات بتتباع في السوق مكتوب عليها إنها كويسة للمغص، بس الحقيقة مفيش دليل علمي واضح إنها فعالة فعلًا، وكمان بتكون غالية وصعب تنظيفها.
وضعية النوم والمغص عند الرضع
في أوقات المغص عند الأطفال؛ طبيعي تفكري تغيّري أوضاع نومه علشان تريّحيه. لكن لازم تعرفي إن الوضع الآمن لنوم الرضع دايمًا هو على الظهر مش على الجنب أو البطن.
ودا لأن النوم على البطن أو الجنب ممكن يقلل نسبة الأكسجين اللي بيوصل لجسم الطفل، ودا بيرفع خطر الإصابة بـ متلازمة موت الرضع المفاجئ (SIDS) – وهي حالة خطيرة بتحصل فجأة أثناء النوم.
ولو محتاجة تهدئي طفلك شوية، ممكن تحطيه على بطنه على رجلك وتدلّكي ضهره برفق. الضغط الخفيف دا ممكن يريّحه ويساعده يطرد الغازات بس أول ما ينام، لازم ترجعي تحطيه على ضهره.
وطبعًا، بجانب الراحة الجسدية والتلامس، – في بعض الحالات – ممكن تحتاجي تستخدمي دواء المغص للأطفال، خصوصًا الأنواع اللي بتحتوي على مواد فعالة زي السيميثيكون، ودا بعد استشارة الطبيب.
العوامل المشتركة بين المغص والارتجاع
خلينا نتفق إن مش كل بكاء الطفل بيكون بسبب المغص، لإن في حالة تانية بتسبب إزعاج للطفل وبتخليه يبكي، وهي الارتجاع ودا بيكون في منه طبيعي لحد عمر 6 شهور، ولو كمل مع الطفل وزاد حدته بيكون اسمه مرض الارتجاع المعدي المريئي “GERD”.
الارتجاع الطبيعي
طفلك بيرجع كميات صغيرة من اللبن (سواء طبيعي أو صناعي) من غير تعب أو بكاء، ودا غالبًا ارتجاع طبيعي وبيحصل مع أطفال كتير ومش بيكون مؤلم.
ودا بيكون بسبب ضعف وعدم اكتمال نمو العضلة السفلية العاصرة للمريء، وبالتالي بيسمح بعودة اللبن أو الطعام الموجود في المعدة إلى الأعلى.
الارتجاع المعدي المريئي
بيمتد لبعد 6 شهور، وبيكون فيه الترجيع زيادة، ودا بيسبب حموضة بتضايق الطفل وبتخليه يبكي وينزعج جداً، بالإضافة إنه بيسبب مشاكل أكبر زي إلتهابات في المريء أو الربو أو إلتهابات في الرئة، فلو لاحظتي إن ابنك بيعيط بشكل مبالغ فيه، أو بيرفض ياكل، أو بيكح وبيشرق وهو بيرجع، وبيقوم فجأة من النوم يعيط؛ اتكلمي مع دكتور الأطفال فورًا علشان يشخص الحالة صح.
المغص
لكن لو طفلك بيعيط كتير، ووشه بيحمر، وبيشد رجليه لبطنه فدا ممكن يكون مغص، ووقتها ممكن يحتاج دواء المغص للأطفال زي Simethicone أو Dentinox علشان يخفف الغازات والوجع.
وطبعاً بيكون الترجيع عنده طبيعي وكميته قليلة ولما بينام مش بيقوم مزعوج من الحموضة زي حالة الارتجاع.
هل الإمساك له علاقة بالمغص عند الأطفال؟
الإمساك من الحاجات اللي بتحصل كتير عند الرضع. لو طفلك بيتبرز مرتين أو أقل في الأسبوع، أو بتكون حركة الأمعاء مؤلمة مع براز ناشف أو كبير الحجم، فدا غالبًا إمساك.
في بعض الحالات، بيظهر مغص الإمساك بعد الرضاعة، لأن الأكل بيحفّز حركة الأمعاء، ودا ممكن يسبب ألم وبكاء، خصوصًا الصبح.
بعض الدراسات بتقول إن الأطفال اللي عندهم مغص ممكن يتبرزوا أقل من غيرهم بس مش كل الأبحاث أثبتت دا.
لكن لو لاحظتي إن طفلك بيعاني من المغص والإمساك في نفس الوقت، أو حاسة إنه مش بيتبرز زي ما انتي متوقعة، اتكلمي مع طبيب الأطفال؛ عشان يرشح لكِ دواء المغص للأطفال المناسب لحالة طفلك، زي المنتجات اللي بتحتوي على سيميثيكون، اللي بتقلل الانتفاخ وتريح البطن.
ما هو أفضل دواء المغص للأطفال؟
رغم عدم وجود نوع واحد يُعتبر الأفضل بشكل قاطع، إلا أن فيه مجموعة شائعة من دواء المغص للأطفال يُمكن استخدامها بعد استشارة الطبيب لتخفيف الانزعاج والغازات:
1- نقط سيميثيكون (Simethicone)
هي الأكتر استخدامًا، وتُستخدم للمساعدة في التخلص من الغازات، وبالتالي بتخفف من أعراض المغص. وعلى الرغم من شعبيتها بين الأمهات إلا أن فعاليتها لم تُثبت بدراسات كافية، لكنها آمنة للتجربة تحت إشراف طبي.
2- قطرات البروبيوتيك (زي Lactobacillus reuteri)
أحيانًا بتفيد بعض الأطفال خاصةََ اللي بيرضعوا طبيعي، لإنها بتساهم في دعم صحة الجهاز الهضمي وتقليل البكاء المرتبط بالمغص، لكن الأبحاث عليها لسه محدودة.
3- دواء Dentinox
يُعتبر Dentinox واحد من أشهر أنواع دواء المغص للأطفال، ويحتوي على المادة الفعالة ديميثيكون (Dimeticone)، اللي بتقلل الغازات وبتخفف من آلآم البطن المرتبطة بالمغص عند الرضع.
وبيمتاز الـ Dentinox بدرجة أمان عالية، ونادرًا ما يُسبب آثارًا جانبية، ودا بيخليه اختيار مناسب لكتير من الأمهات. ولكن مهم الانتباه لأي علامات تحسّس تظهر على الطفل، زي:
- الطفح الجلدي
- الحكة أو تورم الجلد
- صعوبة التنفس
وفي حال ظهور أي من الأعراض دي بنوقف استخدام الدواء فورًا وبنلجأ لاستشارة الدكتور.
وعادةً بتكون الجرعة 20 مجم بعد الرضاعة أو الوجبة، بشرط عدم تجاوز الجرعة اليومية 240 مجم.
4- الخلطات العشبية والأدوية المركبة
يُفضل تجنبها لعدم وجود أدلة كافية على فعاليتها، وفي الغالب ما بيكونش استخدامها آمن مع الرضع.
مضاعفات المغص عند الرضع
رغم إن المغص حالة مؤقتة وبتزول تلقائيًا مع الوقت، إلا إن التعامل معاها ممكن يكون مرهق نفسيًا للأهل أكتر من الطفل نفسه. فالمغص نادرًا ما يسبب مضاعفات صحية مباشرة للرضيع، لكن تأثيره على الآباء بيشمل:
- متلازمة هز الرضيع – نتيجة فقدان السيطرة من شدة التوتر.
- زيادة خطر إصابة الأم باكتئاب ما بعد الولادة.
- شعور الوالدين بالإرهاق أو العجز أو الذنب.
- التوقف المبكر عن الرضاعة الطبيعية.
ورغم إن استخدام دواء المغص للأطفال ممكن يخفف الأعراض ويساعد في تهدئة الطفل إلا إنه مش بديل عن الدعم النفسي والمعنوي من الأهل خلال المرحلة دي.
هل يمكن الوقاية من المغص؟
لحد دلوقتي مفيش طريقة مضمونة للوقاية من المغص، ببساطة لأن السبب مش معروف بدقة.
لكن ممكن تساعدي طفلكِ على الشعور بالراحة والاطمئنان من خلال اللمس، والروتين الهادئ، وتجربة بعض الحلول زي دواء المغص للأطفال بعد استشارة الطبيب. ومع الوقت هتعدي المرحلة دي بسلام.
الخاتمة
مهم تعرفي إن المغص مش مرض، وإنه مرحلة بتعدي مع الوقت. بس وجود طريقة تريّح طفلك وتقلل من الألم بيفرق كتير في يومه ويومك. فاختاري الحل المناسب بعد ما تستشيري دكتورك.
وافتكري دايمًا إن كل طفل مختلف، وإنتي أكتر واحدة تقدري تفهمي احتياجاته.
أضف تعليق