زاد الإقبال على المدارس الانترناشونال المعتمدة في مصر في الفترة الأخيرة؛ ودا بسبب ظهور بعض العيوب في المدارس الرسمية زي زيادة التكدس في الفصول، ووجود مناهج تعتمد بشكل كبير على الحفظ والتلقين بدون ما يكون في فرصة للإبداع.
ومن ضمن المدارس الانترناشونال المعروفة هي المدارس الأمريكية المعتمدة في مصر، واللي بتتبع التقنيات الحديثة في التعليم، وبتقدم مناهج تعليمية مميزة جدًا بتساعد الطالب في تنمية مهاراته، وتخليه قادر يواكب التطور حواليه.
ومع اختلاف المناهج أكيد بيكون في نظام دراسة مختلف، والنظام ده بيركز أكتر على الأنشطة اللي بيقوم بيها الطالب، ومشاركته أثناء الدراسة.
هنعرض لك من خلال المقال أهم التفاصيل عن المدارس الأمريكية المعتمدة الموجودة في مصر، ونوضح أهم مميزاتها، وعيوبها عشان تقدر تختار المدرسة المناسبة لأولادك.
1- ما هي المدارس الأمريكية المعتمدة؟
المدارس الأمريكية المعتمدة في مصر هي مدارس بتتبع نظام تعليمي حديث، وبتدرس مناهج معتمدة من أمريكا، والمناهج دي بتختلف تماماً عن مناهج المدارس الرسمية “الحكومية” سابقًا في مصر؛ لإنها بتهتم بشكل كبير بتنمية قدرات الطالب ومهاراته بجانب مستواه الدراسي.
دا غير إن المدرس مش بيتعامل مع المنهج إنه جزء لازم يتشرح، والطالب يحفظه عشان يقدر يحل، هو دوره يساعد الطالب إزاي يفكر صح، وبيتيح له فرصة إنه يبدع، على عكس الموجود في المدارس الرسمية.
بالإضافة إن المدارس الأمريكية المعتمدة في مصر بتمنح الطالب شهادة معتمدة تؤهله إنه يكمل دراسته الجامعية خارج مصر، ودا بعد دخوله امتحان SAT، لكن عشان يتقبل في الجامعات المصرية، ويكون معترف بالشهادة دي؛ لازم يكون اجتاز امتحان EST المصري.
وبالتالي فالمدارس الأمريكية بتقدم ميزة كويسة جداً للطلبة اللي حلمهم يكملوا دراستهم بره مصر ويتعرفوا أكتر على نظام الدراسة في الجامعات الخارجية.
اقرأ عن: ما هو امتحان EST
2- قائمة بالمدارس الأمريكية المعتمدة في مصر
تعد المدارس الأمريكية المعتمدة من أشهر المدارس الانترناشونال الموجودة في مصر، وبالتالي بنلاحظ وجود العديد من المدارس الأمريكية في محافظات مصر.
محافظة القاهرة
- المدرسة المصرية الأمريكية الدولية
- الكلية الأمريكية بالقاهرة
- المدرسة الأمريكية الدولية
- مدرسة نارمر الأمريكية
- المدرسة الإنجليزية الحديثة بالقاهرة
- مدارس كابيتال الدولية
محافظة الإسكندرية
محافظة الجيزة
- مدرسة نفرتاري الدولية
- مدارس مصر للغات الدولية
- المدرسة الأمريكية الدولية بالشيخ زايد
- مدرسة سمارت فيجن
محافظة القليوبية
كمان بنلاقي مدرسة جلوري في الدقهلية، ومدرسة الفؤاد الدولية في الشرقية، وغيرهم من المدارس الأمريكية المعتمدة في محافظات مصر.
3- نظام الدراسة في المدارس الأمريكية المعتمدة في مصر
نظام الدراسة في المدارس الأمريكية المعتمدة هو نظام متكامل بيبدأ من المرحلة الابتدائية، وبيستمر لمدة 12 سنة، والطالب اللي بيتخرج بيكون معاه شهادة تعادل شهادة الثانوية العامة.
وعشان يحصل الطالب على الشهادة النهائية اللي بتمكنه من دخول الجامعات المصرية لازم يجتاز امتحان EST زي ما وضحنا، ودا امتحان بيكون تحت إشراف وزارة التربية والتعليم المصرية بدون تدخل من الجهات الأمريكية.
وكان بيبقى قبل امتحان الـ EST، فيه امتحانين “SAT و ACT”، لكن بعد ما حصل بعض المشاكل زي تسريب امتحان SAT أصبح امتحان EST هو الوحيد المعترف به داخل مصر.
الدراسة في النظام الأمريكي بتركز بشكل أساسي على تنمية المهارات، وإعداد طالب عنده القدرة على حل المشاكل اللي حواليه بطريقة إبداعية، على عكس المدارس الرسمية اللي بيكون هدفها تلقين الطالب عشان يقدر يحل كويس في الامتحانات اللي بتختبر مدى قدرته على الحفظ.
والدراسة بتكون متقسمة على 3 أو 4 فصول دراسية حسب نظام المدرسة، وخلال كل فصل بيكون في أنشطة كتيرة، وتطبيقات مطلوبة بيتقيم الطالب من خلالها، بالإضافة إلى الامتحانات اللي بتتعمل في نهاية كل فصل دراسي.
وبنلاقي إن الأنشطة، والتطبيقات، ومشاركة الطالب داخل المدرسة بيكون عليها أكتر من 50 % من المجموع الكلي، وبالتالي بيكون معاه فرصة إنه يجمع درجات كتيرة خلال فترة الدراسة.
كمان بالطريقة دي بيقل الضغط النفسي من عليه؛ لإنه مش بيكون مطالب بحفظ المناهج في فترة معينة عشان يقدر ينجح.
4- شروط الالتحاق بالمدارس الأمريكية المعتمدة
بتستقبل المدارس الأمريكية في مصر دفعات جديدة من الطلبة كل سنة، والقائمين على العمل بيكونوا حريصين جدًا على إن الطالب اللي هيلتحق بالمدرسة يكون مؤهل فعلًا إنه يكمل ويتفوق فيها.
عشان كدا بيكون في مجموعة من الشروط الواجب توافرها في الطالب عشان يلتحق بواحدة من المدارس الأمريكية المعتمدة في مصر، وأهمها:
لا يقل سن الطالب عن 4 سنوات
لازم الطفل يكون كمل عُمر الـ 4 سنوات عشان يقدر يلتحق بمرحلة رياض الأطفال في المدارس الأمريكية في مصر.
اجتياز الطالب للاختبارات
المدارس دي بتوفر مجموعة من الاختبارات اللي لازم الطالب يجتازها قبل التقديم، والاختبارات دي تعد بمثابة دليل واضح على إن الطفل مؤهل لدخول المدارس الأمريكية.
حصول الأب والأم على مؤهل دراسي عالي
لازم الأب والأم يكونوا حاصلين على مؤهل عالي؛ لإن المناهج بتتقدم باللغة الإنجليزية، وبالتالي ولي الأمر مش هيقدر يتابع كويس مع الطفل لو مستوى تعليمه متوسط.
تقديم جميع الأوراق المطلوبة
المدارس الأمريكية في مصر بتنزل نشرة أو بيان بيوضح الأوراق دي بالظبط، فضروري ولي الأمر يلتزم بيها.
وللعلم، شروط التقديم في المدارس الانترناشونال سواء الأمريكية أو غيرها، وممكن يحصل فيها تغييرات من وقت للتاني، وكمان بتختلف من مدرسة للتانية.
عشان كدا الأفضل التوجه للمدرسة لمعرفة الأوراق والشروط المطلوبة أو مراجعة النشرة اللي المدرسة بتنزلها.
5- مميزات نظام التعليم الأمريكي
اختلاف نظام التعليم الأمريكي عن الأنظمة التعليمية التانية بيخليه يكتسب مجموعة من المميزات اللي بتشجع ولي الأمر يختاره لأولاده؛ لإنه مدرك إن النظام دا بيساعدهم على التفوق، والوصول لأحلامهم.
ومن أهم المميزات الموجودة في المدارس الأمريكية المعتمدة في مصر:
الاهتمام بتطوير الطالب وتنمية مهاراته
المدارس الأمريكية في مصر زي ما بتهتم بمستوى الطالب الدراسي، بتكون حريصة على تنمية مهاراته، وبتساعده يكون عنده مساحة كبيرة للإبداع.
وبكدا نظام التعليم الأمريكي هيساعد الطالب يكتشف مهاراته الحقيقية، ويطورها خلال سنوات الدراسة من خلال ممارسة الأنشطة المختلفة، وكمان بتشجعه إنه يشارك في الأنشطة دي؛ لإن نسبة كبيرة من المجموع النهائي للطالب بيكون معتمد عليها.
الحصول على شهادة معتمدة تعادل شهادة الثانوية العامة
المدارس الأمريكية المعتمدة في مصر بتضمن للطالب فرصة الالتحاق بالجامعات الدولية، واستكمال الدراسة خارج مصر، لإن الطالب بيكون معاه فرصة إنه يدخل امتحان SAT أو ACT.
أما إذا كان الطالب بيفضل استكمال الدراسة داخل الجامعات المصرية فامتحان EST فبيكون إلزامي عشان يتم الاعتراف بشهادته.
يعني في الحالتين الطالب هيحصل على شهادة معتمدة معادلة لشهادة الثانوية العامة زي اللي بيحصل عليها من المدارس الرسمية في مصر.
وجود فرصة لتعويض النقص في الدرجات خلال العام الدراسي
السنة الدراسية في المدارس الأمريكية المعتمدة في مصر مقسمة لأكتر من فصلين دراسيين، وفي نهاية كل سنة بيتم حساب متوسط الدرجات اللي حصل عليها الطالب في كل الفصول دي.
وبالتالي لو الطالب حصل على درجات قليلة في فصل دراسي منهم بيكون معاه فرصة للتعويض في الفصول الدراسية التانية، ودا مش بيأثر كبير على مجموعه النهائي.
تخفيف الضغط النفسي على الطالب
رغم إن المناهج في المدارس الأمريكية المعتمدة في مصر بتكون طويلة إلا إن الضغط النفسي على الطالب مش كبير؛ لإنه بيحصل على درجات كتيرة خلال العام الدراسي من خلال الأنشطة، والمشاريع اللي بيعملها، وبيكون في درجات بسيطة على الامتحانات النهائية.
وبالتالي الطالب بيدخل الامتحان وهو معاه درجات عالية تساعده ينجح، ومن هنا الضغط النفسي بيقل.
6- عيوب نظام التعليم الأمريكي
أي نظام تعليمي في العالم بيكون فيه مجموعة من المميزات والعيوب، ودور ولي الأمر هو المقارنة بينهم عشان يعرف هل النظام دا مناسب للطالب ولا في نظام تاني هيكون مناسب أكتر.
أما بالنسبة لنظام التعليم الأمريكي؛ فبنلاحظ مجموعة من العيوب اللي بتخلي ولي الأمر يعيد النظر قبل ما يقدم لابنه فيه، والعيوب دي زي:
بعض المناهج غير كافية لتأهيل الطلبة للكليات
المناهج اللي بتدرس في المدارس الأمريكية هي مناهج معتمدة من أمريكا زي ما وضحنا، وبتقدم قيمة علمية كويسة جداً مقارنة بالمناهج المصرية.
لكن في بعض المواد بنلاحظ إن المعلومات اللي بيدرسها الطالب خلال سنوات دراسته مش بتكون كافية إنه يحصل من خلالها على خلفية عن مناهج الكلية اللي حابب يكمل فيها.
المناهج الطويلة
بعض طلبة المدارس الأمريكية المعتمدة بيشتكوا إن المناهج بتكون طويلة إلى حدٍ ما، فبيكون من الصعب عليهم فهمها كلها بشكل كويس.
لكن عشان المناهج معتمدة على الفهم أكتر من الحفظ، وطريقة التعليم بتركز أكتر على الأنشطة والمشاركة فممكن نعتبر إن المناهج مقبولة إلى حد ما.
إلغاء اعتماد امتحان SAT في مصر
امتحان SAT هو امتحان بيؤهل الطالب إنه يلتحق بالجامعات الخارجية، وتم اعتماده في مصر لفترة، فكان الامتحان دا لوحده إثبات كافي على أهلية الطالب لدخول الجامعات المصرية
لكن حصل بعض المشاكل في امتحان SAT في الفترة الأخيرة، زي إنه كان بيتم تأجيله بعد تحديد موعده، وإنه اتسرب للطلبة، وبالتالي أُصدر قرار بإلغاء اعتماد امتحان SAT في مصر.
وهنا الطلبة اللي حلمهم استكمال الدراسة في الخارج بيكونوا شايفين إن النقطة دي من عيوب المدارس الأمريكية، ولكن لسه في فرصة إنهم يحققوا حلمهم، ويقدموا على امتحان SAT.
ارتفاع قيمة المصروفات المدرسية
المصروفات المدرسية اللي بتطلبها المدارس الأمريكية المعتمدة في مصر بتكون مرتفعة مقارنة بمصروفات المدارس الرسمية، وبالتالي بعض أولياء الأمور ما بيكونش عندهم القدرة المادية لسداد كل المصروفات خلال سنوات الدراسة.
ومن هنا بنلاقي إن أولياء الأمور بيعيدوا تفكيرهم وحساباتهم تاني قبل التقديم لأولادهم في المدارس الأمريكية، وبعضهم بيفضل البديل بسعر أقل.
7- متوسط مصاريف المدارس الأمريكية المعتمدة
المدارس الأمريكية المعتمدة في مصر بتقدم مميزات كتيرة جدًا زي ما وضحنا، وبالتالي المميزات دي عشان يتم تقديمها بالشكل الأمثل لازم يكون في رسوم أعلى من غيرها من المدارس.
وبنلاقي إن مصاريف المدارس الأمريكية بتختلف من مدرسة للتانية، وكمان بتختلف من مرحلة دراسية للتانية زي ما بيحصل في باقي المدارس الانترناشونال.
فمثلاً مصاريف المدرسة الأمريكية الدولية لسنة 2023 بتبدأ من حوالي 170 ألف جنيه في مرحلة رياض الأطفال، وبتزيد بشكل كبير لحد ما توصل إلى حوالي 210 ألف جنيه في المرحلة الثانوية.
أما مصاريف المدرسة الأمريكية بالقاهرة التابعة للسفارة الأمريكية -اللي تعد من أغلى المدارس الأمريكية- بتبدأ من 193 ألف جنيه لرياض الأطفال، وبتزيد في كل مرحلة؛ فبتوصل لحوالي 544 ألف جنيه في المراحل الثانوية من الصف 9 – 12.
والمصاريف بتزيد سنوياً بنسبة من 15% – 20% حسب اللي أبلغت بيه الوزارة لعام 2023 – 2024.
ودا بيثبت فعلًا إن مصاريف المدارس الأمريكية المعتمدة في مصر بتختلف من مدرسة للتانية، ودا بيخلي المدارس الأمريكية اختيار لأولياء الأمر اللي دخلهم عالي، ويقدروا بتحملوا المصاريف دي.
الخلاصة
المدارس الأمريكية المعتمدة في مصر هي مدارس تتبع النظام الأمريكي في الدراسة، وبتعتمد على تنمية مهارات الطالب، وزيادة قدرته على الإبداع.
المدارس دي بتقدم مميزات كتيرة للطلبة، وبتمنح شهادة تعادل الثانوية العامة، ولو هدف الطالب يكمل دراسة بالخارج فلازم يجتاز امتحان SAT، ولو هيكمل بالجامعات المصرية فبيحتاج يجتاز امتحان EST.
ومقابل المميزات اللي بتقدمها المدارس الأمريكية بتكون المصاريف الدراسية عالية، ودا بيتطلب دخل عالي لأولياء الأمور عشان يقدروا يدخلوا أبنائهم فيها.
ومن هنا لازم ولي الأمر يفكر كويس في التفاصيل دي قبل ما يختار مدرسة أمريكية لابنه، ويوازن بين المميزات والعيوب، ويتأكد إنها فعلًا مناسبة لقدرات الطفل، ولمستواه المادي.
mohamed
أكتوبر 10, 2021 at 1:27 صاسم المدرسه مش ظاهر ضمن الاختيارات
مدارس دمياط الدوليه الخاصه
Asmaa
أغسطس 20, 2023 at 12:03 مهو انا حاليا تالته اعدادي بس ف حكومي عادي مش لغات ممكن اني اقدم ف المدرسه ؟+بتاخد المدرسه من مجموع كام
أضف تعليق