كل ما تريد معرفته عن الجامعة الألمانية بالقاهرة

لو بتدور على جامعة خاصة تضمن لأولادك تعليم جامعي قوي، وشهادة مُعترف بيها دوليًا فالجامعة الألمانية بالقاهرة (GUC) من الجامعات اللي لازم تحطها في الحسبان. ودا لإنها بتقدم مستوى تعليم عالي على النظام الألماني، وبرامج دراسية متطورة بتأهل الطلاب لسوق العمل في مصر وخارجها.

في المقال دا؛ هنتعرف على كل التفاصيل اللي تهمك عن الجامعة الألمانية بالقاهرة: نظام التعليم، أهم الكليات والتخصصات، المصاريف الدراسية، شروط القبول، وكمان المنح اللي بتقدمها للطلاب المتفوقين، تابع معانا. 

نبذة عن الجامعة الألمانية بالقاهرة

اتأسست الـ GUC كجامعة خاصة قومية ثنائية مصرية وألمانية بموجب القرار الرئاسي رقم 27 سنة 2002، ودا من خلال جامعات ألمانية حكومية زي أولم (University of Ulm) وشتوتغارت (University of Stuttgart) تحت رعاية وزارة التعليم العالي المصرية ووزارة العلوم والفنون والبحث بولاية بادن فورتمبيرغ (Baden-Württemberg Ministry of Science, Research and the Arts).

دا بالإضافة لدعم الهيئة الألمانية للتبادل الأكاديمي (DAAD – German Academic Exchange Service)، والسفارة الألمانية بالقاهرة (German Embassy in Cairo)، والغرفة الألمانية للتجارة والصناعة (AHK – German-Arab Chamber of Industry and Commerce)، ووزارة التعليم والبحث الفيدرالية بألمانيا (BMBF – Federal Ministry of Education and Research)، وأخيرًا جامعة مانهايم (University of Mannheim)، وجامعة توبنغن (University of Tübingen)، وأكاديمية الفنون الجميلة في لايبزيغ (Academy of Visual Arts Leipzig).

الكليات والبرامج المتاحة بالجامعة الألمانية بالقاهرة 

بتضم الجامعة عدد كبير من البرامج البحثية والعملية المتطورة، وكل تخصص بيضم عدد من البرامج، زي:

كلية هندسة تكنولوجيا الإعلام

الكلية دي هدفها الأساسي هو تطوير كل حاجة ليها علاقة بمجال الإعلام ومعالجة المعلومات. برنامج الدراسة بيعتمد على أساسيات مهمة زي الرياضيات والفيزياء والإلكترونيات وعلوم الكمبيوتر، ومعاهم كمان تخصصات دقيقة زي تقنيات الصوت، الفيديو، الوسائط المتعددة، تصميم الميديا، واسترجاع المعلومات.

كلية هندسة وتكنولوجيا المعلومات

الكلية دي بتأهل الطلاب إنهم يكونوا متمكنين من كل المفاهيم الأساسية في تكنولوجيا المعلومات، وكمان يعرفوا يطوّروا أنظمة جديدة ويطبّقوها في مجالات زي شبكات الاتصالات، أوتوميشن المصانع، التحكم في المرور، وتصميم الدوائر الإلكترونية.

كلية الهندسة وعلوم المواد 

الكلية دي مؤمنة إن التقدم في أي صناعة بيعتمد على وجود مواد جديدة وتقنيات معالجة متطورة. عشان كدا، برنامج الدراسة بيركز على علوم المواد، صلابتها، وإزاي نستخدمها في الإنتاج والتصنيع. 

كلية الصيدلة والتكنولوجيا الحيوية

الكلية بتجمع ما بين الصيدلة والتكنولوجيا الحيوية في برنامج واحد، ودا بيدّي للطالب فرصة يتعلم بشكل متكامل ويشارك في أبحاث عالية الجودة بأسلوب ألماني.

الكلية كمان بتركّز على التطبيقات العملية اللي ليها علاقة بالصناعة والبيئة والرعاية الصحية، ودا بيجهز الخريج لسوق العمل بشكل قوي.

كلية تكنولوجيا الإدارة

مع التغيرات الكبيرة في الاقتصاد وسوق العمل، كلية تكنولوجيا الإدارة في الجامعة الألمانية بالقاهرة بتجهز الطلاب علشان يواكبوا متطلبات السوق العالمي. الكلية بتعلم الطالب إزاي يفكر بإدارة حديثة، وبتغطي مجالات زي التسويق، التمويل، التأمين، والإدارة العامة، مع التركيز على التطبيق العملي.

كلية العلوم التطبيقية والفنون

لو ابنك أو بنتك عندهم ميول فنية وبيحبوا التصميم، كلية العلوم التطبيقية والفنون في الجامعة الألمانية بالقاهرة ممكن تكون الاختيار المناسب ليهم. البرامج هناك حديثة ومبنية على خبرات من مصر وألمانيا، وهدفها إنها تجهّز الطلبة علشان يقدروا يصمموا منتجات جديدة تناسب السوق المحلي والعالمي، خاصة في مناطق زي الشرق الأوسط وأفريقيا وأوروبا والهند والصين.

بتضم الكلية برامج (التصميم الداخلي، التصميم الجرافيكي، تصميم المنتجات والأزياء).

كلية الحقوق والدراسات القانونية

الجامعة الألمانية بالقاهرة مش بس متميزة في الهندسة والصيدلة، كمان كلية الحقوق فيها من الكليات اللي بتقدم تعليم قانوني قوي. الطلبة هناك بيتعلموا على إيد دكاترة متخصصين، كمان الكلية بتوفر فرص تدريب كتير وبتشجع الطلبة على المشاركة المجتمعية، علشان يتخرجوا وهما جاهزين لسوق العمل القانوني سواء في مصر أو برا.

برامج ماجستير ودكتوراة إدارة الأعمال

بتوفّر الجامعة فرص قوية جدًا للتعليم بعد التخرج، سواء للي شغالين بالفعل أو لخريجين الجامعات التانية. ومن ضمن البرامج المهمة فيها: ماجستير إدارة الأعمال (MBA) ودكتوراة إدارة الأعمال (DBA).

دبلومات الدراسات العليا

كمان من الحاجات اللي بتميز الجامعة الألمانية بالقاهرة إنها بتقدم دبلومات دراسات عليا مدتها ترمَين، بتأسّس الطالب كويس في مجال إدارة الأعمال. وفي كمان دبلومات عملية وبحثية بتساعد الخريج إنه يكمل ماجستير أو دكتوراة، أو يبدأ حياته المهنية بشكل قوي سواء في مجال إداري أو تنفيذي. البرامج دي معمولة علشان تدمج ما بين الدراسة الأكاديمية والتطبيق العملي اللي بيحتاجه السوق.

شروط القبول

عشان ابنك يقدر يدخل الجامعة الألمانية بالقاهرة، لازم يكون معاه شهادة الثانوية العامة أو أي شهادة دولية زي البريطانية أو الأمريكية.

كمان من شروط التقديم إنه ينجح في اختبار اللغة الإنجليزية زي الـ IELTS أو الـ TOEFL حسب اللي بيتطلبه التخصص، ودا عشان يقدر يتابع الدراسة بسهولة، لإن الدراسة بتكون بالإنجليزي.

مميزات وعيوب الدراسة بالجامعة الألمانية

الجامعة الألمانية واحدة من أهم الفرص في مصر للطلاب، ومن أهم مميزاتها: 

• برامج معتمدة دوليًا: الشهادة اللي الطالب بياخدها من الجامعة معترف بيها في مصر وألمانيا وكمان دول الخليج زي السعودية والإمارات والكويت وقطر والبحرين وعمان.
• تعلم اللغة الألمانية: الجامعة بتدي فرصة للطلاب يتعلموا ألماني، ودا بيساعدهم لو حابين يشتغلوا في ألمانيا بعد كدا.
• فرص شغل بالخارج: إنها بتوفر تدريبات وشغل مع شركات ألمانية، يعني ممكن الطالب يلاقي فرص شغل بالخارج بعد التخرج.
• البنية التحتية: بتضم الجامعة مرافق بحثية متطورة زي المكتبات الشاملة والمعامل الحديثة.

وبالرغم إن الجامعة الألمانية بالقاهرة فيها مميزات كتير، بس في نقاط ممكن تبقى عيوب لبعض الأهالي والطلبة:

• المصاريف الدراسية عالية مقارنة بالجامعات الحكومية، ودا ممكن يبقى حمل على بعض الأسر خصوصًا لو في أكتر من طالب في التعليم.
• شكوى الطلاب من قلة الدعم الفني لما بيكون في مشاكل تقنية في الدراسة أونلاين، ودا بيأثر على متابعتهم للمحاضرات أو تسليم الشغل المطلوب.

مصروفات الترم في الجامعة الألمانية بالقاهرة 2025 – 2026

لو ناوي تقدم لأولادك في الجامعة الألمانية مهم تعرف إن المصاريف بتختلف حسب الكلية والتصنيف اللي بيتحدد على حسب مجموع الطالب أو المرحلة الدراسية واللي بتتغير مع كل سنة جديدة. ودي تفاصيل مصروفات الفصل الدراسي الواحد للطلبة المصريين:

كليات الهندسة (كلية الهندسة، هندسة الإعلام، هندسة تكنولوجيا المعلومات):

• الفئة “أ”: 308,500 جنيه
• الفئة “ب”: 349,750 جنيه
• الفئة “ج”: 400,000 جنيه

كلية تكنولوجيا الإدارة

• الفئة “أ”: 296,160 جنيه
• الفئة “ب”: 335,760 جنيه
• الفئة “ج”: 384,000 جنيه

كلية الصيدلة والتكنولوجيا الحيوية

• الفئة “أ”: 247,250 جنيه
• الفئة “ب”: 291,870 جنيه
• الفئة “ج”: 333,500 جنيه

كلية الحقوق والدراسات القانونية

• الفئة “أ”: 178,800 جنيه
• الفئة “ب”: 207,500 جنيه
• الفئة “ج”: 234,500 جنيه

كلية العلوم التطبيقية والفنون

• المصروفات: 272,780 جنيه (لكل الفئات)

كلية طب الأسنان

• الفئة “أ”: 160,000 جنيه
• الفئة “ب”: 170,000 جنيه
• الفئة “ج”: 190,000 جنيه

بالنسبة للطلاب الأجانب فدي المصروفات اللي حددتها الجامعة للترم الواحد للطلبة الجدد:

الكليات (الهندسة – تكنولوجيا الإدارة – الصيدلة – الحقوق والدراسات القانونية):

• الفئة “أ”: 3800 يورو
• الفئة “ب”: 4500 يورو
• الفئة “ج”: 5150 يورو

كلية العلوم التطبيقية والفنون: 4050 يورو (لكل الفئات)

كلية طب الأسنان:

• الفئة “أ”: 5000 يورو
• الفئة “ب”: 6000 يورو
• الفئة “ج”: 7000 يورو

رسوم إضافية في الجامعة الألمانية بالقاهرة

بجانب المصاريف الدراسية الأساسية، الـ GUC حددت رسوم تانية لازم الأهالي ياخدوا بالهم منها:

• رسوم اختبارات القبول: 1200 جنيه مصري عند التقديم سواء في مرحلة القبول المبكر أو القبول العادي، والرسوم دي غير قابلة للاسترداد.
• وديعة تأمين للمعامل: كل طالب بيدفع وديعة قدرها 10,000 جنيه مصري أو 420 يورو، ودي بتكون تأمين لاستخدام المعامل، وبتسترد في نهاية الدراسة بعد خصم أي تلفيات أو أضرار.

ملحوظة مهمة لطلاب إدارة الأعمال؛ لو ابنك أو بنتك اختاروا برنامج إدارة الأعمال القائم على التكنولوجيا، هيحتاجوا يدرسوا 30 ساعة إضافية، يعني ترم كامل زيادة عن البرنامج العادي.

أما بالنسبة لتقسيم المصاريف لـ 3 فئات: A، B، وC، فدي بتتحدد حسب مجموع الطالب في الثانوية العامة. كل ما كان المجموع أعلى، كل ما الطالب يدخل في فئة مصاريف أقل.

يعني ببساطة، الفئة A بتكون أقل مصروفات، وC هي الأعلى. ودا لأن الجامعة بتكافئ الطلاب المتفوقين بمنح جزئية تقلل المصاريف الدراسية.

نظام المنح المقدمة من الجامعة للمتفوقين

الجامعة الألمانية بالقاهرة بتقدم منحة دراسية شاملة لأوائل المحافظات، والمنحة دي بتغطي كل حاجة: المصاريف الدراسية، ورسوم التقديم، وكمان السكن والمواصلات، ومعاهم مصروف شهري، وكُتب وأدوات دراسية. 

فلو ابنك أو بنتك من أوائل الجمهورية، يقدروا يقدّموا على المنحة في واحدة من الكليات الموجودة بالجامعة.

وكل سنة الجامعة بتختار عدد معين من كل المحافظات، ودا حسب مجموع الثانوية العامة، وكمان لازم يعدّوا اختبارات القدرات اللي بتحطها الجامعة، وفيه كليات زي الهندسة والفنون ليها اختبارات خاصة.

وآخر ميعاد للتقديم هو 15 أغسطس 2025، ولو حابين تقدّموا، لازم تمّلوا استمارة التقديم الخاصة بالمنحة.

وأعلنت الجامعة الألمانية بالقاهرة عن استقبال 70 منحة كاملة مجانية لعام 2025 للطلاب المتفوقين، والمنح دي بيكون ليها شروط معينة:

شروط أكاديمية

• حصول الطالب على معدل مرتفع في الثانوية العامة أو ما يعادلها من الشهادات زي IB، SAT ،IG.
  
• اجتياز متطلبات التقييم الخاص بالجامعة، ودا لإن بعض التخصصات بتحتاح اختبار قبول خاص بيها وانترفيو شخصي لتحديد ملائمة الطالب مع البرنامج.
• تقديم أبحاث لدعم طلب المنحة، وخاصةً للمتقدمين لبرامج الماجستير والدكتوراة.

شروط شخصية

• أن يكون الطالب شارك في بعض الأنشطة التطوعية والاجتماعية زي المشاريع المجتمعية، والبرامج التطوعية، والمبادرات الإنسانية.
• أن يكون الطالب حصل على جوائز في الرياضات المختلفة سواء في المدرسة أو النادي دا هيدعم ملفه.
• أن يكون سجل في مجلس الطلاب أو قيادة الفرق.

شروط خاصة بالتخصص

• اجتياز اختبار قبول في الرياضيات ومبادئ البرمجة للمتقدمين للتخصصات الهندسة والتكنولوجيا لقياس استيعابهم للمفاهيم الأساسية للتخصص.
• تقديم مقال شخصي أو اجتياز مقابلة مع اللجنة لتوضيح الأهداف المهنية في حالة التقدم لتخصصات الإدارة والاقتصاد.
• تقديم ملف أعمال خاص بمهاراته الفنية والإبداعية لإن دا بيدعّم طلبه للتخصصات الفنية زي برنامج التصميم الجرافيكي والفنون التطبيقية.

وبتقدم الجامعة الألمانية بالقاهرة 4 أنواع من المنح:

المنح الكاملة

تعد من أبرز أنواع المنح لإنها بتغطي كل التكاليف الدراسية بما فيها المصاريف والرسوم والإقامة.

المنح الجزئية

بتكون فرصة كويسة للطلاب اللي مقدروش يحصلوا على المنحة الكاملة فهي بتغطي جزء من الرسوم الدراسية، والباقي على الطالب.

المنح الخاصة

دي منح خاصة في مجالات محددة زي منح الدراسات العليا الماجستير والدكتوراة، بهدف دعم الطلاب المتفوقين في مجالات معينة.

المنح المخصصة لذوي الاحتياجات الخاصة

بتوفر الجامعة جزء من المنح لذوي الاحتياجات الخاصة وبتوفر لهم بيئة مناسبة ومريحة للتعلم بالإضافة للدعم المالي لتغطية التكاليف الدراسية.

خطوات التقديم على المنح:

• التسجيل عن طريق موقع الجامعة.
• تقديم الأوراق المطلوبة.
• اجتياز الاختبارات والمقابلة الشخصية.
• انتظار النتيجة.
• التسجيل بعد القبول النهائي من الجامعة

وبالنسبة لورق التقديم فهو مشابه للمطلوب في حالة الطلاب المتقدمين وبيتضاف عليه، خطاب رسمي من المدرسة أو الإدارة التعليمية فيه ترتيب الطالب على مستوى المحافظة.

ومقال بسيط بالعربي أو الإنجليزي، يوضح ليه الطالب عايز يقدم على المنحة، ويحكي شوية عن محافظته وإزاي ممكن يطورها.

كمان الجامعة أكدت إن لازم الطالب يقرأ شروط المنحة كويس ويوقع الاتفاقية بعد الموافقة. 

الفرق بين الجامعة الألمانية بالقاهرة والجامعة الدولية الألمانية

جامعة الـ GIU هي جامعة شقيقة لجامعة الـ GUC بتخصصات وبرامج مختلفة، وواحدة من الجامعات اللي ليها شراكات دولية؛ اتأسست سنة 2019 ومكانها العاصمة الإدارية الجديدة، وهي من ضمن الجامعات التطبيقية فتركيزها الأول على كيفية التنفيذ وبعدها كيفية المعرفة على عكس الـ GUC فهي جامعة بحثية.

الجامعتين بيقدموا نفس الدرجات العلمية بداية من البكالوريوس للماجستير والدكتوراة، وبتمنح الجامعتين شهادات معترف بيها في مصر وألمانيا وجميع الجامعات الألمانية الشريكة.

تختلف الجامعة الدولية الألمانية في التخصصات عن الـ GUC؛ فبتشمل تخصصاتها:

• إدارة الأعمال (التسويق الرقمي، الأعمال الدولية، المحاسبة، التمويل المصرفي، إدارة العقارات، ريادة الأعمال، إدارة السياحة والضيافة).
• الهندسة (الروبوتات والأتمتة، أنظمة الطاقة الكهربائية، هندسة التصنيع، الأتمتة والتحكم، ميكاترونيات السيارات).
• هندسة العمارة للتصميم الداخلي والهندسة المعمارية.
• التصميم (المجوهرات والأزياء، والتصميم الصناعي).
• هندسة الأدوية والتكنولوجيا الحيوية.
• المعلوماتية وعلوم الكمبيوتر.
• العلاج الطبيعي.

في النهاية، الجامعة الألمانية بالقاهرة تعد من الجامعات اللي بتقدم تعليم عالي بجودة عالمية في قلب مصر. سواء كنت بتدور على برامج بكالوريوس قوية، أو دراسات عليا متميزة، أو حتى منح دراسية بتساعد في تخفيف العبء المالي، هتلاقي فيها اختيارات متنوعة تناسب طموحات ابنك أو بنتك. قبل ما تقرروا، اتأكدوا انكم عرفتوا كل التفاصيل عن المصاريف، شروط القبول، ومميزات كل كلية.

الاستثمار في التعليم الصح هو أول خطوة في مستقبل أفضل لأولادنا.