كتير من أولياء الأمور بيفضلوا إنهم يقدموا لأولادهم في نظام الـ IGCSE في مصر عن النظام الحكومي؛ عشان يزودوا فرصة قبولهم في المنح الدراسية والجامعات بره مصر.
وفي المقال دا هنعرض لك دليل شامل عن نظام الثانوية البريطانية، وما هي مواد IGCSE، ومستويات الدراسة، ونعرض مميزاتها وعيوبها، فتابع معانا.
يعني إيه مدارس IG؟
مدارس الـ IG هي مدارس دولية معتمدة بتتبع النظام البريطاني في التعليم، وبتكون تحت إشراف المجلس الثقافي البريطاني “British Council“.
والمدارس دي بتأهل الطلاب لدخول الجامعات العالمية، لإنها بتدرس مناهج الـ IGCSE وبرامجها، ودا لحوالي مليون طالب في أكتر من 10 آلاف مدرسة، موجودة في 160 دولة حوالين العالم.
وتقدر تتعرف على تجارب أولياء الأمور للمدارس البريطانية في مصر من خلال صفحة The IG Club على الفيس بوك.
إيه العلاقة بين المجلس الثقافي البريطاني ووزارة التربية والتعليم المصرية؟
في تعاون مشترك بين المجلس الثقافي البريطاني، ووزارتي التربية والتعليم، والتعليم العالي في مصر، ودا من خلال مذكرة تفاهم. بناءً عليه، المجلس الثقافي البريطاني بيشرف على كل اختبارات كامبريدج، وبيوفر دعم، وتدريب، وتوجيه للمدارس البريطانية في مصر .
والمجلس دا كمان مميز بثقة الطلاب، والمعلمين، والحكومات فيه، ودايمًا بيقدم لهم الدعم والمشورة، وبيحرص جدًا على نزاهة الامتحانات في كل المراحل التعليمية.
إيه هي الشهادة الثانوية البريطانية IGCSE؟
وقبل ما نجاوب على سؤال ما هي مواد IGCSE، هنعرفك إيه هي الشهادة الثانوية البريطانية IGCSE، وهي شهادة بتعادل الثانوية العامة بس معتمدة دوليًا.
والنظام دا بيعتمد على التعليم باللغة الإنجليزية، واتطور سنة 1988م للطلاب في المرحلة الثانوية، وبعد ما يخلصوا الدراسة بيدخلوا امتحانات تحت إشراف جامعة كامبريدج البريطانية، ولو نجحوا، بيحصلوا على شهادة معتمدة اسمها IGCSE.
واللي بيميز النظام الثانوي البريطاني عن غيره من الأنظمة إن كتير من أولياء الأمور شايفين إنه مختلف لإنه بيعلم الطلاب إزاي يفكروا بطريقة إبداعية، ويوسّعوا مداركهم.
دا غير إن الكورسات البريطانية بتختبر مهارات الإبداع عند الطالب، ودا بيساعده إنه يتعلم إزاي يحل المشاكل، ويعرض أفكاره، ويفكر بشكل إبداعي بعد دراسته للمنهج.
إيه الجهات اللي بتصدر شهادات IGCSE؟
فيه 3 جهات رئيسية بتصدر شهادات IGCSE: كامبريدج، بيرسون إدكسل، وأكسفورد AQA، والجهات دي بتقدم كورسات كتير، وطرق الامتحانات فيهم متشابهة، لكن ممكن تختلف في المناهج، أو المحتوى، أو مواعيد الامتحانات.
وبعض المواد بتكون أكتر انتشارًا عند جهة معينة عن التانية، ودا بيعتمد على عوامل زي درجة الصعوبة أو المرونة في إعادة الامتحانات؛ علشان كدا، لازم تتعرف كويس على المواد المتاحة في IGCSE وتختار الأنسب ليك.
ما هي مواد IGCSE؟
بينقسم نظام الـ IGCSE لمستويات، وبيكون عبارة عن 3 أقسام:
المستوى العادي “Ordinary level”
المستوى العادي هو المستوى اللي بيدرس فيه الطالب المواد الأساسية، اللي لازم يكون كل الطلاب عندهم خلفية عنها مهما كان مجال الدراسة اللي هيكملوا فيه، ومواد الـ O level هي:
- الأحياء.
- الفيزياء.
- الكيمياء.
- الرياضيات.
- اللغة العربية.
- اللغة الإنجليزية.
والمستوى دا بيساعد الطلبة إنهم يفهموا نظام الدراسة قبل ما ينتقلوا للمستوى المتقدم؛ عشان يكونوا مؤهلين كويس للمستوى الجديد، وطبيعي الـ O level يكون أسهل شوية من المستوى المتقدم.
المستوى المتقدم “Advanced level”
في المستوى دا الطالب بيبدأ يحدد ما هي مواد IGCSE اللي هيكمل فيها حسب الكلية اللي هيدخلها، لإن المواد دي هي اللي هتأهله لدخول الكلية بعد كدا، واللي لازم يحقق فيها درجات معينة عشان يقدر يدخل الجامعة اللي عايزها.
وبكدا الطالب مش هيدرس كل المواد الأساسية تاني، بمعنى إنه لو اختار إنه يدخل كلية طبية، يبقى مش هيضطر يدرس المواد اللي ليها علاقة بالكليات الأدبية، والعكس صحيح.
وبالتالي الطالب هيركز أكتر على المواد اللي تبع مجال الكلية اللي حددها، وهيختار المواد سواء من نظام الدراسة التابع لـ كامبريدج “Cambridge” أو نظام إدكسل “Edexcel”.
وبيتم التحكم في اختيار نظام منهم عن طريق المدرسة، ومدرس المادة، وكمان الطالب له الحق إنه يختار النظام اللي يحبه.
لكن بعض المواد ممكن تكون موجودة في نظام كامبريدج، ومش موجودة في نظام إدكسل أو العكس، وفي الحالة دي بيكون النظام إجباري.
فالمستوى المتقدم بينقسم لمرحلتين؛ مرحلة AS ومرحلة A2، وفي النهاية بتتجمع درجات المرحلتين مع بعض، ويتحدد على أساسها مستوى الطالب، وإمكانية تقديمه في الجامعات البريطانية من عدمها.
المستوى التكميلي “Advanced subsidiary”
بعد ما بيعرف الطالب ما هي مواد IGCSE اللي حابب يدرسها في المستوى المتقدم ودرسها بالفعل، في المستوى دا بقى بيدرس أساسيات متعلقة بشكل أكبر بالكليات اللي هيدخلها، مش مجرد مواد للشعبة، ودي بتساعدهم في تكوين خلفية كويسة عن مواد الكليات.
وتخصيص شعبة معينة لدراستها بيتم بردو في المدارس الحكومية، لكن الطالب مش بيدرس أساسيات لمواد الجامعة زي ما بيحصل في نظام الـ IGCSE في مصر.
تعرف على: المدارس البريطانية في محافظة الجيزة.
ما هي مواد IGCSE الدراسية المؤهلة للكليات في نظام الـ IG؟
طلبة نظام الثانوية البريطانية IG بيختاروا المواد اللي حابين يدرسوها في المستوى المتقدم على حسب المجال اللي هيكملوا فيه زي ما وضحنا، فلو اتكلمنا عن المواد التأهيلية للجامعات هنلاقي:
1- ما هي مواد IGCSE المؤهلة للكليات الطبية؟
بالنسبة للطلبة اللي بيكون هدفهم دخول الكليات الطبية لازم يدرسوا بعض المواد الأساسية في الـ O level وهي:
- المحاسبة.
- الكيمياء.
- الفيزياء.
- الأحياء.
أما عن الأحياء فبيتم دراستها كمان في الـ A level، لإنها أكتر مادة ليها علاقة بالكليات الطبية، وفي النهاية بيكون مطلوب تقدير معين في كل مادة حسب التنسيق، عشان الطالب يقدر يلتحق بالكلية الطبية.
2- ما هي مواد IGCSE المؤهلة لكليات الهندسة؟
بنلاقي إن المواد المؤهلة لكليات هندسة بتكون نفس المطلوبة للكليات الطبية ما عدا الأحياء، وبيكون مكانها Maths، وفي الحالة دي بنلاقي إن دراسة الـ Maths للـ A level إجبارية.
3- ما هي مواد IGCSE المؤهلة للكليات النظرية والأدبية؟
نظام الـ IGCSE مش خاص بس بالطلبة اللي مهتمين بالمجالات العلمية، لإن في مرونة إن الطالب يختار المجال الأدبي، ويدخل كلية نظرية زي في حالة الثانوية العامة.
وهنا مش بيكون إجباري إن الطالب يدرس مواد محددة في الـ A level، فممكن يدخل كلية نظرية بعد دراسته 8 مواد أساسية بس في الـ O level، ونجاحه فيهم بتقدير معين بتحدده لجنة التنسيق.
اقرأ أيضًا: ما هو الفرق بين نظام IB و IG؟
الاختبارات
وبعد ما تعرفنا على ما هي مواد IGCSE؛ هنتكلم عن نظام امتحان الشهادة الثانوية البريطانية اللي بيعتمد على مدى فهم الطالب، وسرعته في الاستنتاج والتفكير بعيدًا عن حفظ المعلومة، وعشان كدا بتتنوع الاختبارات ما بين التحريري والشفوي والعملي.
وبيجتاز الطالب الاختبار مرة واحدة في العام، وبينقسم المجموع لـ 4 مستويات بناءً على قرار المجلس الأعلى للجامعات، وهي:
- الأول (A): بمجموع 95%.
- الثاني (B): بمجموع 85%.
- الثالث (C): بمجموع 67.5%.
- الرابع (D): بمجموع 60%.
ودي أوقات الامتحان تبعاً لكل جهة:
- بيرسون إدكسل: مايو / يونيو / أكتوبر / نوفمبر / يناير.
- Oxford AQA: مايو / يونيو / أكتوبر / نوفمبر / يناير.
- كامبريدج: مايو / يونيو / أكتوبر / نوفمبر.
أهم حاجة إن التقدير العام للطالب ما يقلش في المستوى عن C حتى يتم قبوله في الجامعات.
مصروفات دراسة منهج الـ IG
بتتراوح مصروفات مدارس الشهادة الثانوية البريطانية IGCSE ما بين 150.000 – 350.000 جنيه مصري على حسب المدرسة، ولمعرفة رسوم امتحان IGCSE في مصر تقدر تتعرف عليها من خلال الموقع.
وللعلم إنه من حق أي طالب دراسة الـ IG بعد انتهائه من المرحلة الإعدادية، طالما إنه خريج مدرسة لغات.
ما هي مواد IGCSE وعدد سنوات الدراسة؟
وزي ما معرفة مواد الشهادة الثانوية البريطانية بيشغل بال أولياء الأمور، فمدة الدراسة مهم يعرفوها، وعادةً دراسة منهج الـ IGCSE بياخد سنتين، وممكن الطالب يقسم المواد على 3 سنوات خلال 5 فصول دراسية كحد أقصى.
المهم اجتياز الاختبارات النهائية، واللي غالبًا بتكون في شهري يونيو ونوفمبر في كل عام، وبعدها النتائج بيتم إعلانها في شهري أغسطس ويناير.
مميزات وعيوب الشهادة الثانوية البريطانية
نظام الـ IGCSE في مصر بيختلف عن نظام الثانوية العامة المصرية في أكتر من نقطة، ودا بيخليه مميز بشكل كبير، إلا إنه بجانب المميزات دي بيكون في بعض العيوب اللي لازم تعرفها كويس، وتخلي بالك منها قبل ما تقدم لأولادك فيها.
أهم مميزات نظام الـ IGCSE
بعد معرفة ما هي مواد IGCSE خلينا نعرض لك أبرز مميزات الشهادة الثانوية البريطانية اللي بتفرقها عن الثانوية العامة، وهي:
حصول الطالب على شهادة معتمدة
اعتماد الشهادة بيتيح لطلبة الثانوية البريطانية فرصة دخول الجامعات الحكومية والخاصة في مصر، بدون الحاجة لأي شهادات تانية.
بالإضافة إلى إتاحة فرصة دخول أي جامعة في أي مكان في العالم، في حالة توافر الإمكانيات بدون إجراء معادلات بجانب شهادته؛ لإن المواد اللي درسها هي نفسها اللي بتتدرس للطلبة خارج مصر.
المرونة العالية في النظام
بيكون في صلاحيات للطالب إنه يقسم المواد على أكتر من سنة، ويوزعها على حسب قدراته، فمش لازم ياخد المقرر كله في وقت محدد، والميزة دي بتساعد الطالب إنه يركز جهده على عدد معين من المواد اللي يقدر يدرسها.
كمان عنده قدرة إنه يختار المواد المتعلقة بالكلية اللي حابب يدخلها، ودا بيساعده يكوّن خلفية كويسة عن المواد اللي هيحتاجها في سنين دراسته بعد كدا.
اعتماد المناهج على الفهم أكتر من الحفظ
في كل مرحلة بتتحدد ما هي مواد IGCSE اللي الطالب هيدرسها، والمناهج الموجودة في النظام بتركز أكتر على التفكير والإبداع، وتنمية مهارات الطالب، بدون التطرق لطرق الحفظ التقليدية أو الحشو الكتير اللي ممكن يكون موجود في النظام الحكومي.
ممكن تكون الطريقة دي صعبة شوية على بعض طلبة نظام الثانوية البريطانية، إلا إنها بتوسع آفاقهم، وبتخليهم يهتموا بالبحث، ويعرفوا إزاي يوصلوا للمعلومة بطريقة صح، والنقطة دي بتكون مفيدة أكتر للطلبة اللي مهتمة بمجالات البحث العلمي المختلفة.
وجود مراقبين من المجلس البريطاني
المجلس البريطاني هو المسؤول الأول عن تطبيق نظام الـ IGCSE في مصر، وهو المشرف على نظام الامتحانات والتنسيق الخاص بالجامعات المختلفة. وبالتالي جميع المراقبين بيكونوا تابعين للمجلس البريطاني، يعني بكدا مش هيكون في مجال أبدًا للغش.
كمان الامتحانات بتكون من بره مصر، وبتتعمل بأكتر من شكل زي الامتحانات التحريرية، والشفوية، وغيرهم، وبتتصحح بردو بره مصر، فمش بيكون في تحيز لأي طالب.
يعني الدرجات اللي بياخدها الطالب هي درجاته اللي بتعبر عن مستواه الدراسي الفعلي، والمدرسة مش مسؤولة عن أي درجات إضافية لأعمال السنة الخاصة بالطالب.
اقرأ أيضًا: 10 شروط لقبول الطلاب الحاصلين على شهادة الثانوية الإنجليزية IG بالجامعات المصرية.
مفيش إلزام إن الطالب ياخد دروس خصوصية
الطالب هو اللي بيحدد هو محتاج دروس خصوصية في المواد ولا لأ بناءً على قدراته؛ لإن نظام الـ IGCSE في مصر مختلف تمامًا عن النظام الحكومي زي ما قولنا.
والامتحانات في نظام الثانوية البريطانية مش بتختبر قدرة الطالب على الحفظ والتسميع، لكن بتقيس قدرته على التفكير السريع، ومدى استيعابه للمعلومات المقررة.
كمان عادةً بيكون في مساعدين مع كل مدرس داخل الفصل بيساعدوا الطلبة إنهم يستوعبوا الجزء اللي بيتشرح، ويجاوبوا على أسئلتهم، وبكدا احتياجهم للدروس الخصوصية إلى حد ما بيقل.
تعرف على: المدارس البريطانية في القاهرة.
وهنا نكون وضحنا ما هي مواد IGCSE، وأبرز مميزات الدراسة في النظام دا، لكن إيه العيوب أو التحديات اللي ممكن تعيق الدراسة؟
عيوب نظام الـ IGCSE في مصر
أما عن عيوب النظام دا فهي:
التكلفة العالية
مصاريف نظام الـ IGCSE في مصر بتكون أعلى بكتير جدًا من النظام الحكومي، ودا بيخلي ولي الأمر في بعض الأحيان يتراجع عن قراره في التقديم للطالب في النظام دا رغم مميزاته الكتيرة، لعدم قدرته على سداد الرسوم المطلوبة.
ولو اضطر الطالب إنه ياخد دروس خصوصية وقتها التكلفة بتزيد على ولي الأمر، لإن بيكون في رسوم إضافية للدروس دي بجانب الرسوم الأساسية للمدرسة.
عدم إمكانية تغيير المواد التأهيلية للكليات بعد اختيارها
الطالب بيبدأ يختار ويعرف ما هي مواد IGCSE في كل مرحلة هيدرسها بعد المستوى العادي O level بناءً على الكلية اللي حابب يدخلها، وفي المرحلة دى بيدرس مواد متعلقة بالمجال اللي هيكمل فيه.
بعدها الطالب مش بيكون عنده قدرة لتغيير المواد اللي اختارها، لو حابب يدخل كلية في مجال تاني غير اللي حدده في البداية.
التركيز على البحث بشكل أكبر
نظام الـ IGCSE في مصر بيعتمد على البحث أكتر من التلقين، ودا بيكون مناسب جدًا للطلبة اللي عندها شغف البحث للوصول للمعلومات.
أما بالنسبة للطلبة اللي بتحب تتعلم بطريقة الحفظ والتلقين لكل المعلومات المطلوبة فبيكون النظام صعب عليهم، والمجهود اللي محتاجين يبذلوه بيكون كبير إلى حدٍ ما.
مستوى الطالب في اللغة الإنجليزية لازم يكون قوي
نظام الثانوية البريطانية بيحتاج طالب مستواه مرتفع بشكل كبير في اللغة الإنجليزية، عشان يقدر يدرس المواد المطلوبة كويس، لإن الدراسة في النظام دا بتكون باللغة الإنجليزية بس.
وبكدا لو مستوى الطالب ضعيف في اللغة الإنجليزية مش هيقدر يكمل في نظام الـ IG، والأفضل إنه يختار نظام تاني للدراسة، لكن النقطة دي ممكن بسهولة يتم التغلب عليها بإننا نشجع الطالب إنه يطور من نفسه أكتر في اللغة الإنجليزية قبل ما يقدم في نظام الـ IG عشان يقدر يتميز فيه.
إجبار الطلاب على أداء امتحانات في كل فصل دراسي
طلاب مدارس نظام الـ IGCSE لازم يلتزموا بأداء الامتحانات اللي بتتعمل في كل فصل دراسي، لإن مجموع الدرجات اللي بيجيبوها في الامتحانات دي بتكون هي درجاتهم في آخر السنة.
وبكدا بيكون عليهم ضغط نفسي كبير؛ لإن مطلوب منهم يجمعوا درجات معينة في الامتحانات دي، عشان يوصلوا لمجموع كويس في آخر السنة.
الخلاصة
نظام الـ IGCSE في مصر بيتميز عن النظام الحكومي في حاجات كتيرة زي إنه بشهادة معتمدة بتمكن الطلبة يدخلوا أي كلية داخل أو خارج مصر.
بالإضافة إلى مرونة النظام بشكل أكبر من النظام الحكومي، وإمكانية تقسيم المواد المقررة على أكتر من سنة دراسية بناءً على رغبة وإمكانيات الطالب، دا غير إنه بإمكانه يحدد ما هي مواد IGCSE اللي هيدرسها.
كمان بتركز في مناهجها على التفكير والإبداع بدون حشو أو تلقين، ودرجة الطالب بتعبر في النظام دا عن مستواه الحقيقي لإن مش بيكون في مجال للغش.
أما عيوبه بتتمركز على الطالب وقدرته على التعلم باللغة الإنجليزية، وبطريقة التعليم اللي بتركز على الفهم أكتر، دا بجانب المقدرة المادية للأهل لتحمل مصروفات النظام.
وبكدا نكون وضحنا كل ما يتعلق بدراسة الشهادة الثانوية البريطانية في مصر، وتقدر تختار الأنسب لمستقبل ابنك.
Ahmed Abdel Aziz
نوفمبر 15, 2021 at 10:15 صفرصه الدخول أحد كليات القمه الحكوميه بمصر من الشهاده الأنجليزيه أفضل من الشهاده الثانويه العامه ولا العكس ؟؟؟؟
Ashraqat Mostafa
نوفمبر 16, 2021 at 10:55 صالفرق بس ان الشهادات الاجنيه ليها نسبة ٥٪ فقط في الجامعات المصرية
Ahmed Abdel Aziz
نوفمبر 15, 2021 at 10:19 صفرصه الألتحاق بأحد كليات القمه الحكوميه داخل مصر أفضل من الشهاده البريطانيه من الشهاده الثانويه العامه المصريه ولا العكس ؟؟؟؟
Salwa Rizk
يناير 19, 2023 at 4:07 مهل ممكن بنتي ما تدريس physics وتدرس bio chemistry
Math Arabic Cs Tourism and business
وتدخل صيدله او علاج طبيعي في احدي الكليات الخاصه
saif
يناير 21, 2023 at 5:55 مال tourism مش ماده معترف بيها في الجامعات المصريه انصحك تاخدي environmental manegment او combined science او Computer science او عربي كل دي مواد بيكون ال A* فيها سهل ف برفع من المجموع النهائي و كلهم معترف بيهم في مصر
Maysa
مايو 2, 2023 at 1:05 ممصاريف السنة فى Igللمرحلة الثانوية
Sara
يونيو 4, 2023 at 6:27 ممصاريف المدرسه كام
Omar Osama said
يونيو 29, 2023 at 10:53 مانا ابني معاه7مواد Olevel+AsMath وعايز يدخل هندسه ممكن ولا لا
أضف تعليق