أهم الإسعافات الأولية للأطفال عند السقوط

مين فينا ما وقعش وهو صغير؟

تقريبًا مستحيل تلاقي طفل ما تعرضش لإصابة نتيجة سقوطه في مرحلة من مراحل حياته الأولى، ودا شيء عادي بيحصل في مراحل نموه الطبيعية; لإن الأطفال بطبيعتهم كائنات حركية عشوائية، عندهم فضول وحب استطلاع يعرفوا ويكتشفوا كل حاجة حواليهم، ودا بيخليهم معرضين بشكل كبير للإصابات اللي ممكن تكون بسيطة، وممكن بردو تكون خطيرة ومحتاجة تدخل سريع.

وعشان كدا مهم جدًا تكون الأمهات على علم بأهم الإسعافات الأولية للأطفال عند السقوط، عشان يقدروا يتعاملوا مع أي موقف طارئ بشكل صحيح.

أسباب سقوط الأطفال

في أسباب كتير تخلي الطفل يتعرض للسقوط منها أسباب طبيعية زي: 

• تعرض الطفل للسقوط في المدرسة نتيجة اللعب والهزار مع أصدقائه أو التدافع والزحام.
• تعرض الأطفال الرضع للسقوط من السرير أو أي مكان مرتفع.
• تعثر وسقوط الأطفال في مرحلة بداية تعلم المشي والجري. 
• سقوط الطفل في النادي أو أثناء ممارسة الرياضة.

ولكن أحيانًا بيكون كثرة تعرض الطفل للسقوط دليل على وجود مشاكل صحية أو جسدية عنده، زي:

• التعرض لحوادث السير
• مشكلة في الغدة الدرقية
• مشاكل العضلات
• مشاكل المفاصل
• ضعف الإبصار

وأمراض تانية كتير، عشان كدا لازم نتابع نمو الطفل وحركته بشكل دائم وباهتمام كبير، عشان ناخد بالنا بدري لو في أي مشكلة.

كيفية التصرف عند تعرض طفلك للسقوط

يعد الفحص الجيد من أول وأهم خطوات الإسعافات الأولية للأطفال عند السقوط، عشان تقدري تحددي مكان الإصابة، وتقيمي الوضع بشكل صحيح، وتحددي إذا كانت إصابته بسيطة أو خطيرة.

هنا لازم تحافظي على هدوءك وتركيزك، وتحاولي تهدي الطفل وتطمنيه، وكمان تتأكدي إنه في كامل وعيه، وتنفسه طبيعي.

طرق الإسعافات الأولية للأطفال عند السقوط

بتختلف طرق الإسعافات الأولية لسقوط الأطفال على حسب:

• شدة ومكان الإصابة اللي تعرض لها الطفل.
• الأعراض اللي ظهرت عليه بعدها.

فمثلًا بنلاقي كل إصابة ليها إسعافات أولية مختلفة، ومن أبرزهم:

الإسعافات الأولية للأطفال عند السقوط والإصابة بالرأس

إذا كانت الإصابة بالرأس بسيطة عبارة عن كدمة أو تورم خفيف نقدر نستخدم تلج أو مياه باردة على المنطقة المصابة لمدة ربع ساعة، أو لحد ما الألم يبدأ يقل، لكن يُفضل يكون التلج في كيس أو أي عازل من البلاستيك مش على رأس الطفل مباشرةً، عشان ما يحصلش نقص تروية أو زرقان في الجلد. 

ممكن كمان الطفل ياخد مسكن خفيف زي باراسيتامول يساعده يهدأ، وابتعدي عن الإيبوبروفين لإنه بيزود من النزيف في بعض الحالات وفقًا لدراسة اتنشرت في مجلة NYP. 

والأفضل نخليه يرتاح، وما يبذلش مجهود لمدة يوم كامل، ونخليه تحت الملاحظة، عشان نتطمن إنه ما ظهرش عليه أي أعراض مقلقة أو سلوك غريب.

لكن أحيانًا بتكون الأعراض أشد من كدا، ووقتها بيكون التصرف مختلف، ومن أبرز الأعراض دي:

• القيء أكتر من مرة خصوصًا لو قيء لا إرادي.
• الرغبة الشديدة في النوم بشكل غير عادي.
• عدم القدرة على تحريك جزء من جسمه.
• فقدان الوعي بعد الإصابة مباشرة.
• حساسية للضوء أو الضوضاء. 
• نزيف من الأنف أو الفم.
• اتساع في بؤبؤ العين.
• صعوبة في التنفس.
• ألم شديد غير مبرر. 
• تشتت في الذاكرة.
• صداع قوي.
• نوبات تشنج.

وفي حالة ظهور عرض من الأعراض دي، بيكون التصرف الصح سرعة التوجه للطوارئ أو طلب الإسعاف، لإن التأخير ممكن يعرض الطفل لمضاعفات خطيرة.

الإسعافات الأولية للأطفال عند السقوط والإصابة بالكسور

تعد إصابات كسور العظام من الحالات الشديدة والمؤلمة اللي المفروض يكون التعامل معاها بوعي وحرص، فهنا:

• ما تحاوليش تحركي الطفل من مكانه أو تضغطي على مكان الإصابة خاصةً إذا كان الكسر في الرقبة أو العمود الفقري. 
• اتصلي بالإسعاف بسرعة، لطلب المساعدة ونقل الطفل للطوارئ، وهناك هيتم عمل الأشعة والإجراءات اللازمة لحالته.
• حاولي تبردي المنطقة المصابة بكمادات مياه باردة، عشان تقللي الألم اللي الطفل حاسس بيه بشكل مؤقت.
• غطي الطفل، وساعديه يحس بالدفء لو كان بردان.

الإسعافات الأولية للأطفال عند السقوط والإصابة بالتواء الكاحل

من أكتر الإصابات اللي بتقابل الأمهات هي إلتواء الكاحل، ودا بيحصل لما بيمد الطفل الأربطة في كاحليه أكتر من اللازم.

وخطوات الإسعاف في الحالة دي بسيطة من خلال:

1. الاستراحة
2. وضع كيس تلج فوق الكاحل لمدة 15 دقيقة كل ساعتين
3. رفع الكاحل فوق مستوى القلب
4. لف ضمادة حوالين الكاحل لمنع التورم
5. إعطاء الإيبوبروفين لتقليل الألم والتورم

وتجنبي وضع قدمه في مياه دافية لإنها ممكن تزود من التورم والألم.

وفي حالة تكرر الإصابة للطفل لازم تستشيري طبيب، لإن وفقًا لدراسة اتنشرت على موقع JAMA Network بنلاقي إن الأطفال اللي بيعانوا من زيادة في الوزن واتصابوا من التواء حاد في الكاحل عندهم قابلية كبيرة لاستمرار أعراض التورم والألم لفترة طويلة، ودا بيسمى اعتلال الكاحل المزمن.

اقرئي أيضًا: صندوق الإسعافات الأولية في المنزل.

الإسعافات الأولية للأطفال عند السقوط والإصابة بالجروح

قبل التعامل مع أي جرح لازم تتأكدي من غسل ايديكي كويس جدًا بالمياه والصابون، ويفضل تلبسي جوانتي طبي لو متوفر، وبعدها:

1. اضغطي على مكان الجرح لو في نزيف بسيط عشان يوقف.
2. نضفي الجرح باستخدام محلول ملح لو متوفر أو أي مياه معقمة.
3. غطي الجرح بشاش طبي معقم، عشان الجرح ما يتعرضش للتلوث. 
4. اسرعي بزيارة الطبيب لو حصل أي تورم أو احمرار أو ارتفاع في درجة حرارة الجسم أو رعشة.

ومن الأمور المهم تبعدي عنها هي تنضيف الجرح بالكحول؛ لإنه بيحرق الطفل جدًا، وبلاش كمان تستخدمي الهيدروجين بيروكسيد، لإنه بيسبب تلف للجلد وبيبطأ من شفائه، ودا وفقًا لدراسة اتنشرت على موقع NIH. 

وفي حالة الجروح الكبيرة اللي بيظهر فيها الأنسجة أو العظام والنزيف فيها موقفش خلال 15 دقيقة اتوجهي فوراً للمستشفى. 

اقرئي أيضًا: الإسعافات الأولية للجروح عند الأطفال وأبرز الأخطاء المتعلقة بها. 

الإسعافات الأولية للأطفال عند السقوط وحدوث نزيف الأنف

وفقًا لدراسة اتنشرت على موقع PMC فإن نزيف الأنف شائع في مرحلة الطفولة، فما بين كل 10 أطفال في طفل بيصاب بنزيف الأنف بشكل متكرر، وبعض الحالات بيكون لأسباب حميدة وحالات تانية بتحتاج تدخل جراحي.

وللتعامل السليم  للحد من النزيف، بيكون مطلوب منك إجراءات بسيطة لكنها فعالة، زي:

• حاولي تهدي الطفل، لإن العصبية والحركة الزيادة ممكن تزود النزيف. 
• ثبتي الطفل في وضعية الميل أو الانحناء لقدام على عكس المتعارف عليه بإرجاع الرأس للخلف وهو تصرف غلط، لإن دا ممكن يسبب إنه يبلع الدم ويتقيأ.
• اضغطي على الأنف لمدة من 5 لـ 10 دقايق على الأقل بشكل متواصل، عشان توقف النزيف.
• اتجهي للطوارئ فورًا لو النزيف موقفش بعد مرور 20 دقيقة.

ولإنك مش هتقدري توقفي نشاط طفلك وتحميه من خطر الإصابة بنسبة 100% لكن في طرق تقدري تعمليها تقلل من خطر الإصابة. 

اقرئي أيضًا: أبرز الإسعافات الأولية عند ارتفاع درجة الحرارة للأطفال. 

طرق الوقاية لحماية الطفل من السقوط

من أهم النصائح اللي بتساعد على حماية الطفل من السقوط:

1. حاولي ما تسيبيش أطفالك الصغيرين لوحدهم بدون متابعة أو إشراف من شخص كبير تحت أي ظرف حتى لو لفترة زمنية قصيرة؛ المتابعة بتكون مهمة جدًا في السن الصغير.
2. اتفرجي مع طفلك علي فيديوهات توعية لمخاطر السقوط، واشرحي له أهم الإسعافات الأولية للأطفال عند السقوط، وإزاى يتصرف لو حصل دا لحد من زمايله، دا هيشجعه ويحسسه بالمسؤولية.
3. حاولي تتناقشي مع طفلك، واشرحي له خطورة العادات السيئة زي القفز من مكان عالي، وحفزيه بالتشجيع والمكافآت.
4. حاولي تجهزي للطفل في مرحلة تعلم المشي مكان للحركة واللعب يكون سطح مستوي وجاف، وتشيلي أي عقبات ممكن تسبب تعرضه للسقوط.
5. اتأكدي إن ملابس الطفل مناسبة، وإنه بيستخدم وسائل حماية لتأمينه زي الخوذة أو واقي الركبة والكوع لو بيمارس أي نشاط رياضي. 
6. اهتمي بإضاءة المنزل، واستخدمي لمبات الإنارة الليلية، عشان تسهلي على الطفل الرؤية، وتمنعيه من التعثر.
7. ابعديه عن الشبابيك والبلكونات، واتأكدي من إغلاقهم جيدًا، وإن الطفل مش هيقدر يفتحهم.
8. اتأكدي إن الطفل قاعد في المكان المخصص ليه في العربية، ولابس حزام الأمان.
9. أمني البيئة المحيطة بالطفل، وابعديه عن الأماكن المرتفعة والسلالم

اقرئي أيضًا: أهم 5 طرق ضرورية للإسعافات الأولية للأطفال للاختناق. 

في النهاية لازم نكون مؤمنين إن الحذر لا يمنع القدر، ومهما حاولنا نحمي أطفالنا من التعرض للإصابات والحوادث عمرنا ما هنقدر نعيشهم في فقاعة ونقفل عليهم طول الوقت. 

فعشان نأمنهم ونضمن سلامتهم؛ كل اللي نقدر نعمله إننا ناخد احتياطاتنا، عشان نقلل فرص الإصابة، ونتفاداها على قد ما نقدر، ولو لا قدر الله حصلهم أي إصابة نكون مستعدين، وعلى وعي كامل بمفهوم الإسعافات الأولية للأطفال عند السقوط لمختلف الإصابات. 

المصادر

A Parent’s First Aid Guide for Treating 10 Common Kid Injuries. 

First Aid for Fall Injuries in Children. 

What to do if your child just fell down. 

First Aid: Falls.