من أهم الملامح اللي بتميز نظام التعليم في مصر هو التعدد والتنوع الواسع في المدارس اللي بتكون متاحة للطالب إنه يدرس فيها عشان تناسب كل فئات المجتمع المصري وتلبي كل احتياجاتهم، ودا بناءََ على مستوى الدخل والمعيشة للأسرة المصرية، أو مستوى التعليم اللي حابين يعلموه لأولادهم، وغيرها من المعايير اللي بتحدد نوع المدرسة اللي هيدخلها ابنهم.
من أشهر أنواع المدراس في مصر:
- المدارس الحكومية: الأوسع والأكثر انتشار.
- المدارس التجريبية.
- مدارس اللغات.
وغيرهم من الأنواع المختلفة، وحاليًا هنبدأ نتعرف على أهم مميزات وعيوب المدارس التجريبية ونعرف عنها أكتر كونها من أشهر وأهم المدارس اللي بيلجأ ليها أولياء الأمور في مصر.
نبذة عن المدارس التجريبية
تعد المدارس التجريبي بديل معقول بيتجه ليه أصحاب الدخل المتوسط؛ لإنها بتوفر المميزات اللي بيحتاجها أطفالهم فهنلاقيها: أعلى من المدارس الحكومية وأقل من المدارس الخاصة، فجمعت ما بين أجزاء ومميزات كل نوع فيهم، وبالرغم من إن الوزارة أصدرت أنباء أكتر من مرة بإلغائها إلا إنها موجودة وعددها كبير جداََ في كل أنحاء مصر.
لكن مع وجود بعض التعديلات اللي هتخضع ليها زي ما خضع ليها باقي نظام التعليم في مصر، علشان كدا مهم نتعرف على مميزات وعيوب المدارس التجريبية أكتر، ونفهم التطورات والقرارات الجديدة دي هيكون تأثيرها للأفضل أو لأ؟
أبرز القرارات الجديدة في 2024 – 2025
من القرارات اللي اتنفذت في عام 2022م إن المواد في المدارس التجريبية هيتم تدريسها للمرحلة الابتدائية بالعربي فهيتم دمج (اللغة العربية والدراسات والعلوم والرياضيات) في مادة واحدة، بالإضافة لدراسة الإنجليزي كمادة منفصلة، وبعدها هيبدأ الطالب في المرحلة الإعدادية يدرس الرياضيات والعلوم بلغة تانية.
ووقتها اعترض أولياء الأمور لإنهم شايفين إن القرارات دي بتزيد كفة مميزات وعيوب المدارس التجريبية ناحية العيوب وبتضطرهم للمدارس الخاصة اللي معندهمش المقدرة المالية يتحملوها أو للمدارس الحكومية اللي شايفين إنها أقل في جودة وكفاءة التعليم ومش هتوفر مستوى التعليم المناسب لأولادهم.
لكن في خطوات جديدة من الوزارة لتحسين نظام التعليم في المدارس التجريبية للعام الدراسي الجديد 2024 – 2025م وهي:
1- نظام فترات اليوم الدراسي لتقليل كثافة الفصول
ولإن المدارس التجريبية عليها إقبال شديد فدا بيعد من مميزات وعيوب المدارس التجريبية في نفس الوقت، وكحل من الوزارة فهتكون الدراسة في المدارس الرسمية والمتميزة للغات بنظام اليوم الواحد، يعني الطلبة هيقضوا في المدرسة يوم كامل مع فترة راحة، وهيتم استغلال الوقت بأنشطة رياضية وفنية وثقافية واجتماعية مفيدة تحت إشراف المدرسين والأخصائيين.
ولو حصلت زيادة في عدد الطلاب بشكل كبير، ممكن تتحول الدراسة لنظام الفترتين بدل اليوم الواحد، وهيتم استغلال وقت الفترتين في نفس الأنشطة المفيدة على أن يتم انصراف الطلاب الساعة 5.30 مساءََ مش 7.30 زي ما اتقال على مواقع التواصل الاجتماعي.
وكحل إضافي هيتلغي يوم السبت كإجازة وهيكون لكل فصل دراسي يوم إجازة لتقليل الأعداد بالفصول.
2- نظام التقييم الجديد لزيادة استيعاب الطلاب في الفصول
ودا بيشمل 5 نقاط هامة واللي بدورها هتزود مقارنة مميزات وعيوب المدارس التجريبية ناحية المميزات ودا لتركيزها الكبير على تقييم مستوى الطالب ومتابعته:
1. المناهج الدراسية لكل صف دراسي
- الصف الأول والثاني الابتدائي: اللغة العربية، اللغة الإنجليزية، الرياضيات، متعدد التخصصات، التربية الدينية، التربية البدنية والصحية، أنشطة التوكاتسو.
- مدارس اللغات: يضاف منهج Connect Plus للغة الإنجليزية.
- منهج القيم واحترام الآخر يُدرس بنصف فترة أسبوعياً ضمن التربية الدينية.
- الصف الثالث الابتدائي: نفس المواد السابقة مع تدريس “القيم واحترام الآخر” بشكل منفصل من معلم اللغة العربية، ومعلم الرياضيات يدرس منهج متعدد التخصصات.
- التربية البدنية تُنفذ من خلال دليل الأنشطة لمعلم التربية الرياضية.
- الصف الرابع والخامس والسادس الابتدائي:
- المواد: اللغة العربية، اللغة الإنجليزية، الرياضيات، العلوم، تكنولوجيا المعلومات والاتصالات، التربية الفنية، القيم واحترام الآخر.
2. الفترات الدراسية:
- مدارس اللغات: فترتين إضافيتين لمنهج Connect Plus.
- إجمالي الفترات: 15 فترة أسبوعياً.
- مدة كل فترة: 100 دقيقة.
3. نظام التقييم
للصفين الأول والثاني الابتدائي:
قياس الأداء والسلوك شهرياً من خلال:
- مهام تحريرية (أسئلة قصيرة، كراسة أداء، مهام منزلية).
- مهام مهارية (مهارات حياتية زي الأشكال الهندسية).
- مهام شفهية (أسئلة ومناقشات).
- المواظبة والحضور (5 درجات).
وبيلتزم المعلم بتسجيل المجموع دا في ملف يخص الطالب عليه إمضاء موجه المادة ومدير المدرسة وإرساله لولي الأمر في نهاية الصف الدراسي لتوضيح مستوى الطالب، وبيكون من خلال الألوان:
- الأزرق (85% -100%)
- الأخضر (65%-85%)
- الأصفر (50%-65%)
- الأحمر (أقل من 50%)
وللعلم إن حضور الطالب شرط للانتقال بنسبة لا تقل عن 60%.
للصفوف الثالث إلى السادس الابتدائي:
- الامتحان النهائي: 60 درجة.
- المهام الأدائية: 10 درجات.
- كراسة الواجب: 5 درجات.
- النشاط الأسبوعي: 5 درجات.
- التقييم الشهري: 10 درجات.
- السلوك والمواظبة: 5 درجات.
- كراسة النشاط: 5 درجات.
- الإجمالي: 100 درجة.
ويُعقد التقييم الشهري في نهاية كل شهر، والامتحان النهائي يشمل المنهج كاملاً.
-
تقييمات خلال الفصل الدراسي الواحد
بيتقسم لـ 3 تقييمات:
- تقييم شهري أول: بيستهدف أجزاء المقرر اللي اتدرست من بداية العام الدراسي لنهاية شهر أكتوبر، وبيقيس نتايج التعلم المستهدفة، وبيكون ليه 5 درجات.
- تقييم شهري تاني: بيستهدف أجزاء المقرر من نهاية شهر أكتوبر حتى نهاية شهر نوفمبر، وعليه 5 درجات.
- الامتحان النهائي: يعقد في نهاية الفصل الدراسي وبيكون على كل المنهج اللي اتدرس، وبياخد الطفل الـ 3 درجات النهائية بالإضافة لدرجات كراسة الواجب، وكراسة النشاط، والتقييم الأسبوعي، والمهام الأدائية، والمواظبة والسلوك.
5. تعليمات إضافية
- مادة تكنولوجيا المعلومات بيدرسها معلمين الحاسب الآلي أو التطوير التكنولوجي، والمهارات المهنية بيدرسها معلمين المجالات.
- معلمين المواد الأساسية هم المسؤولين عن تدريس المناهج، ومعلم اللغة العربية يدرس القيم واحترام الآخر والتربية الدينية.
- في حالة عدم حضور الطالب النسبة المطلوبة، يخضع لبرنامج علاجي يتم تحت إشراف المدرسة وإدارة التعليم.
3- توزيع درجات أعمال السنة لزيادة تحفيز الطلاب
توزيع درجات أعمال السنة للصفوف المختلفة بالشكل دا:
للصفين الأول والثاني الابتدائي:
- 20 درجة لكراسة الحصة.
- 20 درجة لكراسة الواجب.
- 20 درجة لكراسة النشاط.
- 20 درجة للتقييم الأسبوعي.
- 10 درجات للمهام الشفهية.
- 5 درجات للمهام المهارية.
- 5 درجات للحضور والمواظبة.
لا توجد تقييمات شهرية أو امتحانات للفصل الدراسي.
للصفوف الثالث والرابع والخامس والسادس الابتدائي:
- 5 درجات لتقييم الشهر الأول.
- 5 درجات لتقييم الشهر الثاني.
- 5 درجات لتقييم الشهر الثالث.
- 5 درجات لكراسة الواجب.
- 5 درجات لكراسة النشاط.
- 5 درجات للتقييم الأسبوعي.
- 5 درجات للمهام الأدائية.
- 5 درجات للمواظبة والسلوك.
- 60 درجة لامتحان الفصل الدراسي.
للصفين الأول والثاني الإعدادي:
- 15 درجة لتقييم الشهر الأول.
- 15 درجة لتقييم الشهر الثاني.
- 10 درجات لكراسة الواجب.
- 20 درجة للاختبارات الأسبوعية.
- 10 درجات للمواظبة والسلوك.
- 30 درجة لامتحان الفصل الدراسي.
للصفين الأول والثاني الثانوي:
- 15 درجة لتقييم الشهر الأول.
- 15 درجة لتقييم الشهر الثاني.
- 10 درجات لكراسة الواجب.
- 20 درجة للاختبارات الأسبوعية.
- 10 درجات للمواظبة والسلوك.
- 30 درجة لامتحان الفصل الدراسي.
وفي نهاية كل فصل دراسي، بيتم تحويل الدرجات إلى الدرجة الأصلية للمادة باستخدام نسبة الدرجة التي حصل عليها الطالب من مجموع 100 درجة.
تقدر تتعرف أكتر على المدارس التجريبية من خلال مقال: ما هي المدارس التجريبية في مصر وأهم 9 معلومات عنها.
أنواع المدارس التجريبية
وقبل ما نوضح مميزات وعيوب المدارس التجريبية، هنتعرف على أنواعها الأول، وهي:
- المدارس التجريبية العادية (الرسمية).
- المدارس التجريبية المتميزة ( الرسمية المتميزة – “كانت بتسمى المستقبل سابقًا”).
وعلى الرغم من التشابه اللي ممكن يكون واضح ما بين المدارس التجريبية العادية (الرسمية) والمدارس التجريبية المتميزة (الرسمية المتميزة) إلا إن بينهم فروق واضحة بتتلخص في نقاط أساسية، وهي:
1- المصروفات الدراسية
المصروفات المدرسية بيعتبرها أولياء الأمور من مميزات وعيوب المدارس التجريبية؛ لإن في جزء بيشوفها معقولة بالنسبة للي بتقدمه، وجزء شايف إنه كتير ومش مناسب.
- المدارس الرسمية: بتكون مصاريفها أعلى من المدارس الحكومية بنسبة معقولة، فهنلاقي مصاريف المدارس الحكومية بتتراوح من 300 جنية حتى 600 جنية على حسب الفئة العمرية أما المدارس الرسمية فتتراوح المصروفات من 750 جنية حتى 880 جنية على حسب الفئة العمرية.
- المدارس التجريبية المتميزة: فبتكون تقريبًا ضعف مصاريف المدارس التجريبية العادية فهنلاقيها بتتراوح ما بين 2150 جنية حتى 3130 جنية تقريبًا، وبتتحدد على حسب الفئة العمرية.
2- كثافة الطلاب
المدارس الرسمية العادية: عدد الطلاب فيها بيكون في حدود الـ 36 طالب يعني أقل من الحكومي.
المدارس الرسمية المتميزة: عدد الطلاب فيها بيوصل لـ 29 طالب بس يعني أقل بكتير.
ولكن في بعض المحافظات بتزيد الأعداد عن كدا في بعض المدارس وبتوصل لـ 50 والمدارس دي غير مجهزة للأعداد الكبيرة، ودا بيأثر على العملية التعليمية بالسلب.
3- سن القبول
المدارس الرسمية العادية: بتقبل من سن أصغر بشوية مقارنة بالمدارس الرسمية المتميزة فهنلاقي في المدارس الرسمية سن القبول بيبدأ من 4 سنوات تقريبًا لمرحلة رياض الأطفال.
المدارس الرسمية المتميزة: بيصل سن القبول لـ 5 سنوات و 11 شهر.
4- النطاق الجغرافي
المدارس الرسمية العادية: في شروط القبول لازم يكون تابع لنفس إدارة السكن.
أما المدارس الرسمية المتميزة: بتقبل من أي مكان أو إدارة في المحافظة نفسها.
5- تدريس اللغة الثانية
تُدرس اللغة التانية بداية من الصف الرابع الابتدائي للمدارس التجريبي العادي، ومن الصف الأول الإعدادي للتجريبي المميز.
ودلوقتى هنوضحلك أبرز مميزات وعيوب المدارس التجريبية عشان تاخد القرار الصائب لطفلك.
مميزات المدارس التجريبية
بتتميز المدارس التجريبية بفروقات إيجابية عن المدارس الحكومية، وهي:
1- كثافة عددية أقل
من أهم مميزات المدارس التجريبي هو إن عدد الطلاب أقل عشان يقدر الطالب يركز، وياخد فرصته كاملة في التعليم.
2- مصاريف دراسية معقولة
تناسب الناس اللي متقدرش على مصاريف المدارس الخاصة لإن دخلهم ميكفيش يغطي متطلباتها وفي نفس الوقت هتوفر تعليم أفضل عن تعليم الحكومي، وكمان مؤخرًا أصدر وزير التعليم قرار بإتاحة الفرصة للتقسيط بحيث يبقى الموضوع أسهل على ولي الأمر، ويتخفف عنه عبء المصاريف.
3- الاهتمام باللغات
واحدة من مميزات وعيوب المدارس التجريبية في نفس الوقت هي اللغة التانية، فبعض أولياء الأمور بيشوف إنها فرصة كويسة لتعلم اللغات، وعلى الجانب الآخر بيشوفوا إنها بتسبب ضغط على الطالب.
فبنلاقي إن المدارس التجريبي بتوفر للطلاب دراسة بالإنجليزي بالإضافة لإتاحة الدراسة بلغات تانية الفرنسية أو الألمانية أو غيرهم؛ الحاجة اللي هتساعد الطالب يتميز ويتفوق في دراسته لو كانت لغته الأساسية -اللغة العربية- قوية؛ لإن اللغات هتوسع من إدراكه وفهمه.
4- سن مبكر للدراسة
بتبدأ مرحلة رياض الأطفال Kg فيها من سن 4 سنوات، فالبتالي الطفل بيتأسس وبيتعلم اللغات من سن صغير. ومن جانب تاني ومع كل المميزات اللي بتظهر للمدارس سواء العادية أو المتميزة إلا إنها مازال ليها عيوب واضحة لازم ننتبه ليها.
عيوب المدارس التجريبية
بنكمل في توضيح مميزات وعيوب المدارس التجريبية عشان تكون الصورة كاملة أمامك وتقارن وتشوف الأنسب لطفلك، ومن عيوب المدارس التجريبية:
1- كفاءات أقل
السبب الأساسي اللي بيخلي ولي الأمر يدخل ابنه مدرسة تجريبية هو إن ابنه يتعلم بشكل أفضل، ولكن من أهم عيوب المدارس التجريبية إن المدرسين اللي عندهم الكفاءة والخبرة العالية نسبتهم بسيطة مقارنة بمدرسين مدارس اللغات؛ فبيضطر ولي الأمر لتوفير دروس خصوصية لابنه عشان يعوض الفجوة اللي حصلت، وبيتحمل مصاريف دراسية أعلى عشان يكمل مع ابنه بطريقة سليمة، ويتعلم صح زي ما بيتمنى.
2- إقبال كبير
واحدة من مميزات وعيوب المدارس التجريبية مع بعض إنها بتجمع ما بين مميزات نوعين من المدارس (الحكومية والخاصة) فهنلاقي إقبال كبير عليها من أولياء الأمور ودا عيب مهم وبيزود التنافس عليها؛ لإنها بتعد حل وسط ومناسب ليهم ولظروفهم، فبالتالي القبول والالتحاق بيها ممكن يكون صعب.
3- هوية الطفل مهددة
دراسة الطفل بلغة تانية مهمة وبتسمح له بفرص أكبر للتعليم من صغره، ولما يكبر بتفتح له فرص أكتر، لكن كمان بسبب تركيز الأهل والمعلمين على تعلم اللغة الإنجليزية أكتر بيكون معرض إنه يفقد هويته العربية الأساسية، ويفقد تواصله مع المجتمع حواليه بشكل كبير مش صغير، فلو كانت اللغة العربية بتاعته ضعيفة، هيكون طفل مشتت وفاقد لأهم أساس من أساسياته، ودا من أكبر عيوب مدارس اللغات في مصر.
هل الالتحاق بالمدارس التجريبية قرار صائب؟
مميزات وعيوب المدارس التجريبية كتيرة ومازال حتى النهاردة القرارات ليها مضطربة فمهما كانت نوع المدرسة اللي هتختارها لأولادك، حدد المعايير اللي تناسبك وتوافق قدرات طفلك واسأل عن المدرسة بشكل كويس.
وفي ظل القرارات الجديدة من وزارة التربية والتعليم اللي اهتمت بشكل كبير إنها تقضي على عيوب المدارس التجريبية زي كثافة الطلاب في الفصول، وتوفير نظام تقييم دوري لكل الصفوف، فدا بيدي أمل لكل ولي أمر إن المنظومة بتطور للاتجاه الصحيح.
وفي الأول والآخر مستوى طفلك مرتبط بمدى انتباهك ومتابعتك ليه؛ فلو دورت على أفضل مدرسة لطفلك والتحق بيها، تابعه كويس وذاكر معاه واتواصل مع معلميه لمعرفة مستواه واعرف نقاط قوته وضعفه عشان تساعد في حلها، فالاستمرار بمتابعة الطفل ومساعدته مش هيحتاج دروس خصوصية وهتكون المدرسة كافية ليه.
وبكدا نكون وضحنا أبرز مميزات وعيوب المدارس التجريبية والقرار الصائب هيعتمد على ظروفك ومتابعتك لطفلك.
أضف تعليق