مصاريف المدارس التجريبية في مصر 2021

مصاريف المدارس التجريبية في مصر

 

اختيار المدرسة المناسبة للطفل دايمًا بيشغل تفكير أولياء الأمور بمجرد ما طفلهم يوصل لسن المدرسة، وهنا بيتم الاختيار بناءً على العديد من المعايير سواء الخاصة بالطفل أو وولي الأمر زي مستوى التعليم في الأسرة، ومستوى المعيشة، ومهارات الطفل وغيرهم.

من ضمن المدارس اللي بيختاروا منهم هي المدراس التجريبية أو زي ما تم تسميتها بالمدارس الرسمية للغات، واللي تعتبر خيار متوسط بين المدارس الرسمية -الحكومية سابقًا- والمدارس الخاصة؛ لإن عدد الطلبة فيها بيكون أقل من العدد الموجود في المدراس الرسمية وده بيساعد المدرسة تهتم أكثر بالطلبة وبتنمية مهاراتهم على مدار سنوات الدراسة.

وفي نفس الوقت مصاريف المدارس التجريبية أقل من المدراس الخاصة، وبكده بتكون مناسبة لفئة متوسطي الدخل من أولياء الأمور، بالإضافة لعدة اختلافات تانية بتميزها عن باقي المدارس.

ما هي المدارس التجريبية (الرسمية لغات)

المدارس التجريبية هي مدارس تابعة لوزارة التربية والتعليم المصرية بتهتم بتدريس المواد الأساسية زي العلوم والرياضيات باللغة الإنجليزية، إلى جانب باقي المواد الأخرى واللي بيتم تدريسها بردو في النظام الحكومي.

ودايمًا بيتم الاهتمام باللغة الإنجليزية كلغة أولى في تعليم المناهج، فلا توجد مدارس رسمية للغات بتدرس المواد باللغة العربية، لإن أحيانا النقطة دي بتختلط على البعض وبيدوروا على مدارس رسمية للغات لأولادهم باللغة العربية.

كمان بجانب مادة اللغة الإنجليزية الرسمية بيتم إضافة مادة لغة إنجليزية Connect plus واللي كان موجود بدالها المستوى رفيع وكان خارج المجموع، وده بيساعد الطالب كتير جدا على تحسين مستواه وفهم وإتقان اللغة الإنجليزية بشكل كويس، على عكس المدارس الرسمية.

ومن هنا بنلاقي إن المدارس التجريبية (الرسمية للغات) بتختلف عن المدارس الرسمية والخاصة في العديد من النقاط اللي في الغالب بتميزها عنهم وأهمها إن مصاريف المدارس التجريبية متوسطة مقارنة بينهم الإتنين.

الفرق بين المدارس التجريبية والحكومية والخاصة

الفرق بين المدارس التجريبية والحكومية والخاصة في مصر

دايما بنلاحظ وجود اختلافات كتيرة بين أنواع المدارس في مصر، والاختلافات دي هي اللي بتساعد أولياء الأمور إنهم يقارنوا كويس بينهم ويعرفوا إيه نقاط القوة والضعف في كل مدرسة، ومنها بيقدروا يحددوا إيه الأنسب لحالتهم المادية ولمهارات أولادهم.

الفرق بين المدارس التجريبية والحكومية

رغم إن المدارس التجريبية (الرسمية للغات) والمدارس الحكومية (الرسمية) تابعين لوزارة التربية والتعليم المصرية، وده بيخليهم مشتركين في كذا حاجة زي تدريس نفس منهج اللغة العربية، والاعتماد على نظام الحفظ والتلقين في الدراسة، إلا إننا على الجانب الآخر بنلاقي عدة اختلافات زي:

  • عدد الطلبة في المدرسة

عدد الطلبة في المدارس الرسمية للغات بيكون أقل إلى حد ما من عددهم في المدراس الرسمية، وبالتالي بيكون في إمكانية للاهتمام بالطالب أثناء دراسته بشكل أكبر من المدارس الرسمية وكمان هو من أهم عوامل اختلاف مصاريف المدارس التجريبية.

إلا إن العدد في الفترة دي بدأ يزيد في الفصول، وده بيتطلب من المدرس جهد أكبر عشان يقدر يوصل المعلومة للكم ده من الطلبة، بس عدد الطلبة في فصول المدارس الرسمية للغات لم يصل حتى الآن إلى العدد الموجود في المدارس الرسمية.

  • تدريس بعض المناهج باللغة الإنجليزية

في المدارس الرسمية للغات بيتم تدريس المواد الأساسية باللغة الإنجليزية زي مادة العلوم ومادة الرياضيات، وبيكون في مدرسين متخصصين لشرح المواد العلمية دي باللغة الإنجليزية.

لكن بالنسبة للمدارس الرسمية فبتكون كل المناهج باللغة العربية، واللغة الإنجليزية هي مادة إضافية وليست اللغة الأولى.

  • المصاريف السنوية

مصاريف المدارس التجريبية بتختلف من كونها مدارس تجريبية عادية ولا مميزة، لكن في الحالتين بتكون أعلى من المصاريف المطلوبة في المدارس الرسمية.

  • الاهتمام بالأنشطة

نظرًا لإن أعداد الطلبة في المدارس التجريبية أقل من المدارس التجريبية فبيكون في قدرة على الاهتمام بالأنشطة بشكل كبير أثناء فترة الدراسة، وده بيساعد الطلبة تنمي مهاراتها بشكل كويس.

  • عدد المدرسين أقل

المدارس الرسمية للغات بتحتاج مدرسين على درجة عالية من الخبرة عشان يقدروا يشرحوا المناهج العلمية باللغة الإنجليزية ويجابوا على جميع أسئلة الطلبة، لإن في الغالب أولياء الأمور مش هيكون عندهم القدرة إنهم يفهموا لولادهم المعلومات المكتوبة باللغة الإنجليزية.

إلا إن عدد المدرسين في المدارس التجريبية دايما قليل، وفي بعض الأحيان ده بيكون سبب كافي إن أولياء الأمور يحولوا لأبنائهم من المدارس الرسمية للغات للمدارس الرسمية أو غيرها عشان يتأكدوا من وجود مدرس بفكر تربوي بيساعد الطلبة على استيعاب المادة العلمية بشكل كويس.

الفرق بين المدارس التجريبية والخاصة

المدارس الخاصة هي مدارس بيمتكلها أحد الأشخاص بهدف التربح منها، وبتكون غير تابعة للحكومة، وبالتالي بيكون في فرق كبير بينها وبين باقي المدارس.

من الفروق بين المدارس الرسمية للغات والمدارس الخاصة في مصر:

  • لغة المناهج

في المدارس الرسمية للغات بتكون المناهج باللغة الإنجليزية دايما زي ما وضحنا، أما في المدارس الخاصة بنلاقي إن في مدارس بتتبع المناهج اللي باللغة العربية، ودي بتكون نفس المناهج الحكومية، بالإضافة إلى منهج مستوى رفيع.

أما النوع التاني من المدارس الخاصة بتكون باللغة الإنجليزية والطالب بيدرس نفس المناهج الموجودة في المدارس الرسمية للغات ودي مصاريفها بتكون أعلى من مصاريف المدارس التجريبية.

  • عدد الطلبة في الفصول

أعداد الطلبة في المدارس الخاصة بتكون قليلة جدا مقارنة بباقي المدارس، وده بسبب الشروط اللي لازم تكون متوفرة في الطفل عشان يقبلوه، وبسبب المصاريف الكتيرة اللي بتطلبها المدارس دي، وبكده عدد الطلبة في الفصول بيكون محدود وأقل من المدارس الرسمية للغات والمدارس الرسمية.

النقطة دي تعتبر ميزة بالنسبة للمدارس الرسمية للغات؛ لإن ده بيدي الطالب فرصة كبيرة للنقاش مع المدرسين وفهم المادة العلمية بشكل كويس، إلا إن ده أحيانًا بيحسس الطلبة بالتدلل ومش بيكونوا قادرين يتأقلموا مع الوضع الخارجي.

  • المصاريف السنوية

مصاريف المدارس الخاصة بتكون أكبر من مصاريف المدارس التجريبية، غير المتطلبات الثانوية اللي بيحتاجها طلبة المدارس الخاصة على مدار سنين دراستهم، وده بيخلي أولياء الأمور يفكروا كتير ويتأكدوا إنهم عندهم القدرة على تحمل المصاريف المطلوبة قبل ما يقدموا أوراق أولادهم في المدارس دي.

وبالتالي يمكن اختصار الاختلافات بين المدارس الحكومية، والتجريبية والخاصة في الجدول الآتي:

وجه المقارنة

المدارس الحكومية

المدارس الخاصة

المدارس التجريبية

طبيعة المناهج









بيتم تدريس جميع مناهج المواد العلمية باللغة العربية تحت إشراف وزارة التربية والتعليم المصرية، مع إضافة اللغة الإنجليزية كمادة منفصلة.

اللغة اللي موجودة في المناهج بتختلف على حسب نوع المدرسة؛ لإن في مدارس خاصة بتدرس المنهج الحكومي باللغة العربية إلى جانب المستوى الرفيع.
وفي نوع تاني لغات بيدرس للطلبة نفس المنهج اللي موجود في المدارس التجريبية.

بتعتمد على اللغة الإنجليزية كلغة أساسية في الدراسة؛ لإن هدفها بيكون تطوير لغة الطالب، ومفيش أي مدرسة تجريبية بتدرس للطلبة المناهج باللغة العربية.

كثافة الطلبة في الفصول




عدد الطلبة بيكون كبير جدا وده بيزود الأعباء على المدرس؛ لإنه بيكون عليه توصيل المعلومة لكل الطلبة الموجودة في الفصل في وقت محدود.

في المدارس الخاصة بتكون الأعداد قليلة، وده بيساعد الطلبة تفهم أكثر، وتقدر تتناقش مع المدرسين بسهولة.

العدد أقل من اللي موجود في المدراس الحكومية، لكن لا زال كبير، وبالتالي بتكون نفس المشكلة موجودة.

المصاريف المطلوبة



تعتبر مدراس مجانية، لإن المصاريف المطلوبة خلال السنة بتكون بسيطة جدا.

المصاريف كتيرة جدا مقارنة بباقي المدراس، وده يعتبر من أكبر الأسباب اللي بيتراجع أولياء الأمور بسببها عن التقديم في المدارس دي لأولادهم.

أعلى من المدراس الحكومية، لكن بالنسبة للمدارس الخاصة فالمصاريف بتكون محدودة.

أنواع المدارس التجريبية في مصر

أنواع المدارس التجريبية في مصر

المدارس الرسمية للغات في مصر بتبدأ من مرحلة رياض الأطفال إلى المدارس الثانوية، وبتنقسم إلى نوعين؛ مدارس تجريبية عادية، ومدارس تجريبية مميزة، والنوعين بيختلفوا أكيد عن بعض، ممكن تعرف أكتر عن الفرق بينهم من هنا.

بالنسبة للمدارس التجريبية العادية بيكون في التزام بالمربع السكني للأسرة، يعني لازم مكان السكن يكون تابع للإدارة التعليمية الخاصة بالمدرسة، وأقل سن بيتم قبوله هو سن 5 سنوات.

أما المدارس التجريبية المميزة فمن السهل التقديم في أي مدرسة حتى لو كانت خارج نطاق المنطقة السكنية للأسرة بشرط إن يكون عمر الطالب أكثر من 5 سنوات؛ لإن الأولوية بتكون للأطفال اللي سنهم أكبر.

كمان مصاريف المدارس التجريبية المميزة أعلى من المصاريف المطلوبة في المدارس العادية، وكثافة الطلبة في الفصل بتكون أقل، بالإضافة إلى إنه بيكون في اهتمام أكبر بالأنشطة.

متوسط مصاريف المدارس التجريبية

متوسط مصاريف المدارس التجريبية

وزارة التربية والتعليم بتحدد سنويًا مصاريف المدارس التجريبية على حسب المرحلة التعليمية للطالب.

بناء على النشرة الخاصة برسوم المدارس التجريبية لعام 2021 بتكون المصاريف كالآتي:

-بداية من رياض الأطفال بتكون قيمة مصاريف المدارس التجريبية حوالي 1600 جنيه مصري في السنة الأولى، و1341 في السنة الثانية.

-بالنسبة للمرحلة الابتدائية بنلاقي مصاريف المدارس التجريبية بتبدأ من 1506-1736 في أول 3 سنوات، ومع السنة الرابعة والخامسة بتكون حوالي 750 جنيه مصري.

أما في السنة السادسة بتكون 522 جنيه مصري.

-في المرحلة الإعدادية المصاريف المطلوبة بتختلف، وبتتراوح بين 650-660 على مدار سنوات الدراسة فيها.-أما بالنسبة للثانوية العامة بتكون مصاريف المدارس التجريبية 652 جنيه مصري.

مصاريف المدارس التجريبية بتختلف كل سنة، ومع فتح باب التقديم للطلبة الوزارة بتنزل نشرة جديدة بالمصاريف المطلوبة، فمن الممكن إن يكون في تغيير في الأرقام دي مع إصدار النشرة الجديدة.

هل تستحق المدارس التجريبية مصاريفها

بناءً على تجربة وآراء العديد من أولياء الأمور بيتضح إن المدارس التجريبية في مصر أفضل بشكل كبير من المدارس الرسمية؛ لإنها بتكون أقل كثافة في عدد الطلبة.

بالإضافة إلى إنها بتأسس الطلبة في اللغة الإنجليزية بمصاريف أقل من المصاريف المطلوبة في المدارس الخاصة، وبالتالي بيعتبروا إنها خدمة مميزة بتكاليف أقل.

إلا إننا في الفترة دي بنلاقي إن بعض أولياء الأمور بيعتبروها لا تستحق المصاريف بعد زيادة أعداد الطلبة في الفصول واللي بيؤدي إلى عدم اهتمام بالطلبة في بعض الأحيان.

لكن على أية حال، فالمدارس الرسمية للغات لا زالت تمتلك الكتير من المزايا عن المدارس الرسمية.

الخلاصة

المدارس التجريبية (الرسمية للغات) هي مدارس بتهتم بتدريس اللغة الإنجليزية كلغة أساسية، وبالتالي بيتم تدريس المواد الأساسية زي العلوم والرياضيات بنفس اللغة عشان الطالب يقدر يتقن اللغة الإنجليزية على مدار سنين دراسته.

الفرق بين المدارس الرسمية للغات والمدارس الحكومية (الرسمية) هي إن المدارس الرسمية للغات بتهتم أكثر باللغة الإنجليزية كلغة أولى في الدراسة، وبيكون في تركيز على الأنشطة اللي بيعملها الطالب.

أما عن المدارس الخاصة فمصاريفها بتكون أعلى بكتير من المدارس الرسمية للغات، وفي منها أنواع بتدرس المناهج باللغة العربية زي النظام الحكومي، ومدارس تانية بتكون مناهج المواد العلمية فيها باللغة الإنجليزية زي المدارس الرسمية للغات.

المدارس التجريبية في مصر بتتقسم لنوعين وهما المدارس التجريبية العادية، والمدارس التجريبية المميزة، والفروق الرئيسية بينهم هي كثافة الطلبة، والأنشطة اللي بيعملوها، والمصاريف المطلوبة.

وزارة التربية والتعليم المصرية هي المسئولة عن تحديد مصاريف المدارس التجريبية في بداية كل عام دراسي، وبيكون في اختلاف دايما كل سنة، عشان كده لازم تتابع النشرات الحديثة اللي بتنزلها الوزارة عشان تتأكد إنك عندك المقدرة على سداد المصروفات دي للطالب.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

ورك شيت للاطفال Worksheet For Kids

ماث شيت – Math Worksheet 2

ماث شيت – Math Worksheet 2 يحتوي  علي الارقام و الاعداد للاطفال في مرحلة الكي جي للتدريبات علي توصيل الارقام و كتابتها و المراجعة عليها

كي جي 1 انترفيو – KG 1 Interview Worksheet

كي جي 1 انترفيو – KG 1 Interview Worksheet بيساعدك تدرب طفلك علي اسئلة اللي بيتعرض ليها اثناء التقديم لاي مدرسة لمرحلة الحضانة تدريبات اخري

انضم إلي جروب دليل المدارس المصرية

إقرأ أكثر..

mood_bad
  • لا توجد تقييمات/تعليقات.
  • اضف تعليق