الكذب عند الأطفال من المشاكل المنتشرة والوارد حدوثها معاهم من سن صغير، وفي حالة استخدام الطفل للكذب عشان خايف من العقاب أو للهروب من التزام عليه، فمسؤوليتك إنتي وباباه إنكم تحاولوا تغيروا السلوك دا، عشان ما يكبرش ويتطور عنده، ووقتها هتكون مشكلة كبيرة.
عشان كدا في المقال دا بنعرض لك في المقال أبرز أسباب الكذب عند الطفل، وأنواعه، وطرح التغلب عليه، ونصائح للتعامل السليم.
أسباب الكذب عند الأطفال
الطفل ممكن يكذب لأسباب كتيرة مش شرط بس إنه خايف من العقاب، ومن أبرز الأسباب للسلوك دا عند بنلاقي:
- السيطرة على وضع معين زي إنه ميروحش التمرين
- الغيرة من زميل ليه أو واحد من إخواته
- اختبار سلوك جديد ومحاولة تجربته
- الاعتقاد إن الكذب شيء مضحك
- الهروب من الحماية الزايدة
- كسب تعاطف الآخرين
- اللعب مع أبوه وأمه
- تعزيز احترام الذات
- اتهام شخص تاني
- الخوف والقلق
- تقليد للكبار
- تجنب العقاب
ووفقًا لدراسة اتنشرت على موقع ScienceDirect وجدوا إن الكذب عند الأطفال بيرتبط بشكل كبير بمشاكلهم السلوكية، ورغبتهم في تجاوز أخطائهم، واستخدامه للحصول على مكافآت.
ودا بيرتبط بشكل كبير بأسلوب التربية اللي بيتلقاها الطفل، والمفاهيم اللي بيتعرف عليها من البيئة اللي حواليه.
أشهر أنواع الكذب عند الأطفال
ولإن مش كل الكذب مرضي عند الأطفال أو سلوك سيء، فهنلاقي إنه بيتقسم لأنواع بتعتمد على نية الطفل وسبب استخدامه، ومنها:
1- الكذب الخيالي
ودا بيخلق فيه الطفل قصة وبيحكيها، عشان يلفت الانتباه، أو يكسب التعاطف والحب من الآخرين، ويعد من أشهر أنواع الكذب عند الأطفال.
الكذب هنا ممكن نعتبره سلوك طبيعي إلى حد ما، لإن الطفل بيختلق قصص يحكيها للمتعة، وبيكون لسه عنده خلط بين الواقع والخيال.
2- الكذب الاجتماعي
النوع دا بيظهر عند الطفل أكتر في سن المدرسة، وبيكون بغرض التفاخر، فبيعتقد إن الكذب مقبول لو حابب يخبي حاجة عن حياته الشخصية قدام صحابه، عشان يظهر بمستوى مادي أفضل، أو غيره.
3- كذب الدفاع عن النفس
بيضطر الطفل في بعض الأوقات إنه يكذب عشان يدافع عن نفسه، أو يهرب من مسؤولية عليه، أو عشان خايف يتعاقب.
وهنا بيكون الغلط من الوالدين، لإنهم ما ركزوش مع الطفل على أهمية الصدق، وعودوه عليه في تعاملهم معاه.
4- كذب المبالغة
الأطفال أبطال الحكايات والخيال، فأوقات بيحبوا يخلقوا قصص أو يضيفوا أحداث على حاجة حصلت بالفعل عشان يجذبوا انتباه والديهم أو الآخرين، وأوقات بغرض الهروب من مسؤولية عليهم.
5- الكذب المرضي
الكذب عند الأطفال ممكن يكون مرضي، وهنا بنلاقي الطفل بيستخدم الكذب للهروب من المشاكل حتى لو على حساب الآخرين، وممكن يتهمهم بحاجات ما عملوهاش.
والنوع دا لو اتكرر مع الطفل بيكون متأصل في شخصيته، وبيتمكن منه، وبيكبر معاه، فبيكون طول الوقت كلامه خليط من الكذب والحقيقة.
6- الكذب الانتقامي
من أخطر أنواع الكذب على نفسية الطفل، ودا من خلال إلقاء التهمة أو اللوم على شخص بيكرهه أو بيغير منه، ودا بيكون كذب مقصود، لإنه بيفكر قبلها، وبيدبر إنه يأذي الشخص التاني بأي شكل.
7- الكذب بهدف تقليد الآخرين
من الأخطاء اللي بيعملها الأب والأم أمام طفلهم هي الكذب في أي تفصيلة وهو عارف حقيقتها، فبيحس إن الكذب عادي، وبيقلده لإنه حس إنه مباح.
كيفية التعامل مع الكذب عند الأطفال على حسب العمر
مفيش عمر محدد بيبدأ الطفل فيه إنه يكذب، لكن ممكن نقول إن الطفل بيكذب من أول عمر الـ 3 سنوات أو يمكن قبل كدا، ودا أثبتته دراسة اتنشرت على موقع ResearchGate بتشير إلى إن الأطفال بيميلوا للكذب من سن صغير جدًا.
وهيختلف تعاملك معاه في كل مرحلة، ومن أهم الطرق للتعامل مع الطفل الكذاب في المراحل العمرية المختلفة:
من سن 2 – 4 سنوات (الكذب = خيال)
في السن دا، ما بيكونش في فرق عند الطفل بين الحقيقة والكذب، ولا الخيال والرغبات وأحلام اليقظة.
فمثلًا ممكن يوصف لك حاجة مش موجودة زي: “أنا بعمل حاجة خارقة زي سوبر مان”، والتصرف السليم وقتها مش إنك تقوليله أنت كذاب أو بطل كلام غلط.
الصح إنك توضحي له الحقيقة، وإيه اللي يقدر يعمله من اللي اتخيله، ولو في حاجة مش صح زي إنه اتهم أخوه بحاجة ما عملهاش نوضح له براحة إن دا مش صح وحرام، وإنه لازم يقول الحقيقة.
من سن 5 – 8 سنوات (كذب غير مقصود)
في العمر دا الطفل بيكون فهم يعني إيه كذب، وبيستخدمه امتى، زي إنه يهرب من الواجب أو المدرسة أو التمرين، وفي الغالب الطفل بيلجأ له لما بيكون مضطر يعمل حاجة مش حاببها أو أكتر من تحمله.
ووفقًا لدراسة اتنشرت على ScienceDirect بنلاقي إن أوقات كتير الطفل بيكذب لإنه بيقلد الكبار وخاصةً والديه، لإنهم بيكذبوا فـ ليه ما يكذبش!
وهنا التعامل الصحيح بيكون بإنك ما تكدبيش لأي سبب أنتي أو باباه، وتعززي عنده فكرة الحقيقة، وإن الكذب سلوك مش صح.
وكل دا بأسلوب هادي ومن غير انفعال، وتوضحي إيه السلوك البديل الصحيح، وتبيني عواقب الكذب.
من سن 9 – 12 سنة (الكذب المتعمد)
في العمر دا الطفل بيحدد هويته، وبتزيد استقلاليته، وبتتكون عنده بعض المباديء والأخلاق اللي اتغرست فيه أثناء تربيته من خلال المواقف المختلفة، وبقى يقدر يكذب بشكل أحسن ويحس بتأنيب الضمير لو عمل حاجة غلط.
وهنا الأفضل هو مصاحبة الطفل، والنقاش معاه بشكل هادي، عشان يبطل يكذب، لإن لازم يكون عنده الراحة والثقة في إنه يتكلم عن الحاجات الغلط اللي بيقابلها أو السلوكيات الغلط اللي بيعملها أصحابه من غير ما يخاف من اللوم والعتاب.
وخدي بالك دا سن التأثر بالصحاب وسلوكياتهم، والأفضل تنبهيه على السلوكيات السلبية، وتذكري السلوكيات الصحيح، عشان يبدأ يعملها.
من سن 12 – 18 سنة
هنا الطفل بيكون وصل للمراهقة، وفاهم كويس يعني إيه كذب، وإيه عواقبه، وعارف كويس إيه مقبول وإيه مرفوض.
والأفضل هنا هو مصاحبة الطفل بردو، بحيث ما يخافش منك، ويحكيلك، وياخد رأيك.
اتعرفي على: أبرز 11 مشكلة سلوكية | أسبابها وعلاجها.
أهم النصائح لتعديل سلوك الكذب عند الأطفال
ودلوقتي هنوضحلك إزاي تعدلي سلوك الكذب من غير ما تأثري على نفسية طفلك.
وضع فاصل بين الحقيقة والخيال
وضحنا قبل كدا إن الطفل ممكن يكذب بدافع الخيال وعدم الفصل بينه وبين الواقع، فبيكون الكذب بغرض التسلية والاستمتاع، ودا أمر طبيعي.
ودورك إنك تعززي مخيلته، وتشجعيه على خلق قصص وحكايتها، بس لازم توضحي له الفرق بين الواقع والخيال، وإنه ما ينفعش يستخدم القصص دي للكذب.
بس ممكن يستخدم قصص الخيال دي لحكايات قبل النوم، فلو طفلك قالك أنا طيرت في السماء وشفت حاجات كتير، اسمعيه وقوليلي اوصفلي اللي شفته، وساعديه يسرد قصة مش بس مجرد مشاهد، وشجعيه يكتبها.
تشجيع الطفل على قول الحقيقة
لو حسيتي إن طفلك بيكذب أو عرفتي حقيقة حاجة كان كذب عليكي فيها كلميه بهدوء، وحسسيه بالأمان عشان يقول الحقيقة، وامدحيه على صراحته حتى لو كان الموقف مزعج بالنسبة لك.
واظهري احترامك لشجاعته، وعززي السلوك دا عنده بتخفيف العقوبة أو المكافآت الرمزية، ووضحي له امتنانك للثقة المتبادلة بينكم بالرغم من وجود أخطاء ومشاكل بتحصل.
وبعدين احكي له قصص تبين إيجابيات الصراحة، وسلبيات الكذب، وعواقبه. كمان حاولي تفرضي الحقيقة كقاعدة منزلية ما فيهاش نقاش، وكوني أول شخص بيطبقها، وهتكون جزء رئيسي من حياتك.
اقرئي: أبرز الأخطاء الشائعة في التربية وكيفية تجنبها.
عدم المبالغة في العقاب
استخدام العقاب والحرمان المبالغ فيه من الأساليب الخطأ في التربية وفي تعديل سلوك الكذب عند الأطفال، وما بيكونش ليه أي نتيجة إيجابية، بالعكس بينتج عنه الغضب والنفور والزيادة في الكذب.
والأفضل استيعاب الطفل، ومعرفة سبب الكذب، والحوار معاه بهدوء.
عدم الاستدراج
من الأخطاء الشائعة بشكل كبير بين الأهل هي جر الطفل إنه يقول الحقيقة، ويعترف بكذبته وفي الآخر يتعاقب أو يتحرم من حاجة وفي الأول يكون في وعد منهم إنهم مش هيعاقبوه.
وخطأ كمان إنه يتحط في موقف محرج قدام حد أو استدراجه لفضحه، والأفضل هو طلب إنه يوعدك بإنه يقول الحقيقة،وإن مش هيكون في عقاب مبالغ فيه.
ولو رفض الاعتراف فهميه ببساطة إنك عرفتي إنه كذب، وإنك عاوزة تعرفي السبب عشان تحلي المشكلة معاه، وابعدي تمامًا عن الصراخ والتحقيق؛ لإن دا هيقعد الأمور، وهيخليه يكذب أكتر ويعاند معاكي.
تحديد سبب الكذب
اسألي طفلك بكذا طريقة عشان تفهمي دوافع كذبه من وجهة نظره، وإيه السبب في إنه بيخبي حاجة عليكي وهل هو خايف ولا عمل كدا عشان تاخدي بالك منه، ولا بيكذب عشان عارف لو قال الحقيقة إنك هتزعقي وهتعاقبيه زي مرات قبل كدا.
التحلي بالهدوء
زي ما وضحنا لك قبل كدا إن لغة الحوار بهدوء مع الطفل وعدم الصراخ عليه؛ هيكون أفضل بكتير، وهيديله المساحة إنه يتكلم بصراحة، ويعبر عن مشاكله، وسبب إنه كذب.
وبهدوء هتوضحي عواقب الكذبة، وكل المساوئ المترتبة عليها، واللي ممكن تأثر على مشاعر بعض الناس، ودا هيساعده يطور من ذكائه العاطفي، وقدرته على رؤية المواقف بشكل تاني.
ومهم كمان ما تقوليلوش أنت كذاب وكذبت عليا قبل كدا، لإن دا هيخليه هيشوف نفسه كدا وهيستمر في الكذب، وهيكون صعب تعدلي السلوك دا بعد كدا.
الأطفال أوقات بيتصرفوا بشكل أسوء لمجرد إنهم عارفين إن مفيش حاجة بترضي أهلهم، ومفيش طريقة يكسبوا حبهم وثقتهم بيها، لإنهم طول الوقت بيفكروهم بأخطائهم اللي فاتت.
التركيز على أنك قدوة لطفلك
الطفل ما بيشوفش الكذب من منطق الأخلاق والحلال والحرام والمنظور اللي بيشوفوا الكبار، لإن بيستوعب الصدق والحقيقة وأهميتهم بالتدريج كل ما بيكبر.
وبتلعب البيئة دور كبير في تحويل سلوك الكذب عند الأطفال لعادة يومية من خلال مراقية الآخرين وتقليدهم، يعني ببساطة ما ينفعش تكذبي قدامه أنتي أو باباه بأي دافع حتى لو الأمر بسيط.
وأخيرًا، الكذب عند الأطفال ممكن يكون إشارة إيجابية لنمو إدراكهم وإبداعهم لو استخدموه في خلق قصص خيالية للاستمتاع، لكن لو استخدموه بأسلوب مش كويس وبشكل متكرر هيكون مشكلة سلوكية كبيرة عندهم، ومهم تتعدل عشان ما تبقاش صفة متأصلة فيهم.
وطريقة تعديل السلوك دا بتختلف تبعًا للسن زي ما وضحنا.
أضف تعليق