مستقبل الثانوية العسكرية في مصر

دايمًا بعد الشهادة الإعدادية بتتقسم الطلبة لكذا مجموعة حسب ميولهم والمستقبل اللي راسمينه لنفسهم، فمجموعة مثلًا بتفضل الثانوية العامة، ومجموعة تانية بتفضل مدارس الـ IG، وغيرهم.

لكن في مجموعة طلبة بيكون هدفها التقديم في المدارس العسكرية والاستفادة بالمميزات اللي بتقدمها المدارس دي.

طيب إيه مستقبل المدارس العسكرية في مصر؟ وهل هتكون الشهادة بمثابة الثانوية العامة ولا أقل؟

تفاصيل نظام الثانوية العسكرية

مستقبل الثانوية العسكرية بيكون محدد أكثر من نظام الثانوية العامة بالرغم من تشابههم في المواد الدراسية إلى حد كبير، يعني المواد اللي بيدرسها الطالب في نظام الثانوية العسكرية بتكون هي ذاتها اللي بيدرسها طلبة نظام الثانوية العامة خلال 3 سنين دراسية زي:

• الكيمياء
• الفيزياء
• الأحياء
• اللغة الإنجليزية
• التربية الدينية
• الرياضيات

كمان المناهج اللي بيدرسوها بتكون مناهج حديثة تم الإشراف عليها من وزارة التربية والتعليم المصرية.

بجانب مواد الثانوية العامة بيتم إضافة بعض المواد الثانية اللي بتأهل الطالب إنه يلتحق بالكليات العسكرية بعد نهاية الثانوية.

من المواد اللي بيتم إضافتها هي التربية العسكرية اللي بتساعد الطالب يفهم النظام العسكري أكثر ويتعلم الانضباط والالتزام عشان يقدر يتعامل بنفس الطريقة بعد كده؛ لإن مستقبل الثانوية العسكرية بيكون بردو كلية تابعة للنظام العسكري.

الدراسة في نظام الثانوية العسكرية مش بتعتمد فقط على المواد الدراسية النظرية، لإن الطالب بيحتاج للتدريبات الجسدية بشكل مستمر للحفاظ على لياقته، وإعداده للكليات العسكرية، وبكده مستقبل الثانوية العسكرية في مصر بيكون مميز.

الطالب بيتم تدريبه على الرماية والفروسية وألعاب القوى وغيرهم، والنقطة دي مش بس بتخليه يقدر يتعامل صح في الأوقات الصعبة، لكن كمان بتساعده ينمي مواهبه الرياضية ويتميز فيها وياخد بطولات.

يعني بجانب العلوم النظرية اللي بيدرسها الطالب في النظام ده، فالدراسة الثانوية العسكرية هدفها تطلع شخص يقدر يواجه الصعوبات بمهاراته الحربية بقوة وحزم، ويمكن الاعتماد عليه كأحد أفراد القوات المسلحة.

وبجانب كده، فالثانوية العسكرية بتقدم مميزات إضافية للطلبة المقيدين في مدارسها.

المميزات التي تقدمها الثانوية العسكرية

الشهادة الثانوية العسكرية بتمنح الطالب كتير من المميزات اللي ممكن يكون أغلبها مش موجود عند طلاب الثانوية العامة، بالإضافة إلى المميزات اللي بتضيفها لشخصية الطالب واللي بتساعده يتعامل مع الظروف الصعبة.

من أشهر المميزات دي:

حصول الطالب على شهادة تعادل الثانوية العامة

نظام الثانوية العسكرية في مصر هو نظام خاضع لإشراف وزارة التربية والتعليم، وبالتالي بيتم التعامل مع شهادة الثانوية العسكرية كشهادة معتمدة تؤهل الطالب الحاصل عليها للتقديم في الكليات المصرية.

متاحة لخريجي الأزهر

بعض الناس بيعتقدوا إن إمكانية التقديم في المدارس العسكرية بيقتصر فقط على الطلبة الحاصلين على شهادة الإعدادية العامة.

لكن في الحقيقة التقديم في نظام الثانوية العسكرية هو حق أي طالب مصري ناجح وحاصل الشهادة الإعدادية سواء كانت شهادة عامة أو أزهرية، حتى وإن كانت المدارس العسكرية مش موجودة في المحافظة اللي ساكن فيها.

تأهيل الطالب للكليات الحربية

طلبة نظام الثانوية العسكرية بيخضعوا لعدد كبير من الاختبارات زي الاختبارات العلمية، والاختبارات الجسدية وغيرهم للتأكد من مدى استعداد الطالب للدخول في النظام العسكري.

وفي حالة نجاح الطالب في جميع الاختبارات دي بيتم قبوله في الثانوية العسكرية، أما لو حصل مشكلة في واحد منهم مش هينفع ينضم للثانوية العسكرية لإنه هيعتبر غير مؤهل للانضمام.

وبالتالي الطالب اللي بينجح في مجموعة الاختبارات دي بيكون عنده فرصة أكبر من غيره بكتير إنه ينجح في اختبارات التقديم للكليات الحربية، وكمان الثانوية العسكرية بتساعده يتميز فيها لإن الطالب بيكون عنده خلفية كبيرة عن طبيعة الكلية.

توفير سكن ومواصلات وتأمين صحي

المدارس الثانوية العسكرية موجودة في عدد معين بس من محافظات مصر، وبالتالي بيكون في صعوبة عندهم في التقديم.

لكن الدولة بتتغلب على النقطة دي بتوفير سكن لطلبة الثانوية العسكرية لإن الدراسة بتكون بنظام اليوم الكامل مع المبيت.

وبالإضافة لكده فهي كمان بتوفر مواصلات داخلية، وتأمين صحي لجميع الطلاب لتحقيق مبدأ الرعاية الصحية.

عناية وإشراف داخل المدارس العسكرية

بيشرف على جميع طلبة نظام الثانوية العسكرية داخل المدارس أشخاص اتخرجوا من نفس المدرسة، وبيكون هدفهم الاهتمام أكثر بالطلبة ورعايتهم.

صرف مكافآت مالية للطلبة

بيحصل جميع طلبة نظام الثانوية العسكرية في مصر على مكافآت شهرية، بالإضافة إلى بعض المكافآت التحفيزية للطلبة المجتهدين.

وده بيعتبر حافز للطلبة إنهم يكملوا التدريبات المطلوبة ويتحملوا صعوباتها باجتهاد.

تعلم الانضباط والالتزام

نظام المدراس الثانوية العسكرية بيركز على تعليم الطلبة الانضباط والالتزام في التعامل، وده بيساعد الطلبة على التكيف مع الأساليب العسكرية الشديدة وبيعلمهم قوة التحمل.

تخصصات الثانوية ومستقبل كل منها

المدراس الثانوية العسكرية في مصر بيكون لها أكثر من تخصص، وكل تخصص له مدرسة مختلفة عن التخصص التاني.

التخصصات المتاحة في المدارس العسكرية:

ثانوية عسكرية جوية

تعتبر الثانوية العسكرية الجوية من أشهر المدارس العسكرية داخل وخارج مصر، واللي بتسمح للطلبة إنهم يكونوا من أبناء القوات المسلحة، وبتكون للولاد بس، ومستقبل الثانوية العسكرية هنا بيكون الالتحاق بالكلية الجوية أو الكليات الحربية.

الأوراق المطلوبة للتقديم في الثانوية العسكرية الجوية

• عدد ٨ صور شخصية للطالب
• اصل شهادة الميلاد كمبيوتر مع صورتين ضوئيتين منها
• بيان قيد عائلي وأربع صور طبق الأصل منه
• نموذج بيان نجاح الطالب في شهادة الإعدادية
• فيش جنائي للطالب وولي الأمر
• تقديم نموذج ٩ جند مختوم بختم مندوب التجنيد
• نموذج ١ جند تطوع
• شهادة صحية من مستشفي حكومي معتمد
• صورة بطاقة الرقم القومي للطالب اذا كان سنه ١٦ عام
• اقرار موافقة ولي الامر

كما أنه يمكنك سحب الملفات من مكاتب التنسيق في محافظات القاهرة من الهايكستب والإسكندرية والاسماعيلية والسويس والمنيا وأسيوط. ولباقي المحافظات تستطيع سحب الملف من مكتب المستشار العسكري بالمحافظة.

أماكن وعنوان المدراس الثانوية العسكرية الجوية

• المدرسة الثانوية الجوية ١: مدينة نصر بجوار النادي الأهلي
• المدرسة الثانوية الجوية ٢: بألماظة – مساكن الشروق خلف مساكن شيراتون.
• المدرسة الثانوية الجوية بحلوان: حلوان القبلية – منطقة ورش الطائرات
• الاسكندرية: عزبة سعد – منطقة سيدي جابر

ثانوية عسكرية رياضية

المدارس العسكرية الرياضية يتجهز الطلبة يكونوا أبطال رياضيين إلى جانب تفوقهم الدراسي، وبتساعدهم دايمًا ينافسوا على البطولات الرياضية، وده بيتم برعاية القوات المسلحة المصرية.

مدارس التمريض العسكري

بتمنح مدارس التمريض العسكري درجة رقيب متطوع في القوات المسلحة، وبتقدم راتب شهري بعد فترة التدريب.

كمان بتقدم علاج مجاني للطالب وأسرته أثناء الدراسة وبعد الانتهاء منها، والمدارس دي بتتيح فرصة للبنات للتقديم على عكس المدارس العسكرية الجوية والرياضية.

ثانوية عسكرية فنية

المدارس الفنية بتكون متاحة للولاد والبنات، وبتزود فرص خريجيها للحصول على وظائف داخل المصانع والشركات لإنه طبيعية دراستهم بتساعدهم يفهموا الشغل كويس.

الكليات المتاحة لطلبة الثانوية العسكرية

الطلبة اللي بتقدم في النظام ده يكونوا عارفين مستقبل الثانوية العسكرية في مصر ومحددين الكلية اللي حابين يكملوا فيها دراستهم بعد الثانوية، وكل كلية منهم بيكون لها شروط للالتحاق بيها بجانب الشروط العامة.

من الكليات المتاحة للطلبة في النظام ده:

• الكلية الحربية
• الكلية الجوية العسكرية
• الكلية الفنية العسكرية
• كلية طب القوات المسلحة
• الكلية البحرية

شروط الالتحاق بالمدارس العسكرية

عشان الطالب يقدر يلتحق بالمدارس الثانوية العسكرية بيكون في مجموعة شروط أكثر من اللي بيحتاجها عشان يقدم في الثانوية العامة.

بالنسبة للشروط اللازم توافرها عند كل الطلاب مهما كان التخصص اللي هيدخلوه:

موافقة ولي الأمر على الالتحاق بالمدارس العسكرية

من ضمن متطلبات المدارس العسكرية وقت فتح باب التقديم للطلاب هو تقديم ورقة مكتوبة من ولي الأمر يؤكد فيها

موافقته على التحاق ابنه بنظام الثانوية العسكرية.

النجاح في الشهادة الإعدادية بمجموع معين

التقديم في المدارس الثانوية العسكرية بيتطلب النجاح في المرحلة الإعدادية مع وجود شهادة تثبت النجاح.

ودايما بيكون في حد أدنى كل سنة للقبول في المدارس دي، ووزارة التربية والتعليم هي المسئولة عن تحديد ذلك بناءً على  تقييم درجات الطلاب.

في حالة إن الطالب رسب في مادة معينة وكرر امتحانها مش بيكون له الحق في التقديم في الثانوية العسكرية حتى لو نجح في الامتحان المكرر إلا لو حاصل على بطولات رياضية.

لازم بجانب البطولات الرياضية يكون حاصل على الحد الأدنى للقبول في سنة التقديم.

سن الطالب مش أقل من 14 سنة ولا أكثر من 17 سنة

القائمين على نظام المدارس الثانوية العسكرية بيحددوا سن معين للطالب عشان يقدر يلتحق يقدم ويتقبل في النظام ده، وفي حالة زيادة أو نقص عمر الطالب مش بيتم قبوله.

بالإضافة لكده لازم يكون طول الطالب مناسب، يعني ماينفعش يكون طوله أقل من 165 سم، ووزنه يكون مناسب لطوله، لإن الثانوية العسكرية بتهتم جدًا باللياقة البدنية.

الطالب مصري الجنسية

الالتحاق بالثانوية العسكرية مقتصر بس على الطلبة المصريين، ولا يحق لأي طالب خارج مصر الانضمام للمدراس العسكرية، وكمان لازم يكون الأب والأم مصريين.

إجراء واجتياز جميع الاختبارات المطلوبة

المدارس العسكرية بتطلب دايما من الطلبة اللي حابين يقدموا إجراء بعض الاختبارات عشان يتأكدوا من كفاءة الطالب ومدى قدرته على النجاح في نظام الثانوية العسكرية.

الاختبارات بتتعمل على 3 مراحل:

• المرحلة  الأولى، ودي بتكون في المدرسة العسكرية.
• المرحلة الثانية، وبتكون اختبارات تخصصية.
• المرحلة الثالثة، وفي المرحلة دي بيتعمل اختبارات كشف الهيئة.

أما عن أنواع الاختبارات المطلوب اجتيازها:

• اختبارات علمية

في الاختبارات دي بيتعرفوا على مستوى الطالب العلمي، ومدى ذكائه عشان يتأكدوا من كونه هيقدر ينضم للثانوية العسكرية أو لأ.

• اختبارات طبية

هنا بيتم إجراء فحص طبي للتأكد من عدم وجود أمراض تؤثر على صحة الطالب، لإن بعض الامراض حالتها بتسوء مع التمارين الشاقة المطلوبة في نظام الثانوية العسكرية.

وبالتالي لو الطالب عنده أمراض ممكن تتفاقم مع زيادة التمرين بيتم استبعاده.

• اختبارات بدنية

اللجنة في الحالة دي بتعمل فحص جسدي الطالب عشان تتأكد من عدم وجود إعاقة تمنعه من عمل التمارين أو بذل مجهود بدني.

• اختبارات نفسية

الغرض من الاختبارات دي معرفة إزاي الطالب هيتصرف في حالة وجود ضغط نفسي عليه، هل هيهرب وينسحب؟ ولا هيكمل حتى لو ده هيأثر على حياته؟

• اختبار الهيئة

الاختبار ده بيكون زي انترفيو الشركات، والهدف منه التعرف على شخصية الطالب وإزاي بيفكر وبيتعامل.

في الاختبار ده لازم يتأكدوا إن سلوك الطالب كويس، لإن لو في مشكلة في أسلوبه أو سلوكه هيتم استبعاده ومش هيكون في إمكانية للطعن إلا عن طريق جهات عسكرية.

حسن السير والسلوك

نظام المدارس الثانوية العسكرية قائم على الالتزام والانضباط، والقائمين على النظام دايما حريصين على تطبيق ده، وبالتالي بيكون من شروط القبول حسن السير والسلوك للطالب والأسرة زي ما وضحنا في النقطة اللي فاتت.

الخلاصة

الثانوية العسكرية هي درجة بتعادل الثانوية العامة، وبيدرس فيها الطالب كل المواد الموجودة في الثانوية العامة بالإضافة لمجموعة مواد تانية بتأهله للانضمام للكليات الحربية والمعاهد العسكرية.

أما عن مستقبل الثانوية العسكرية، فتخصصاتها بتأهل الطلبة لمجموعة كبيرة من الكليات العسكرية زي الكلية البحرية، والجوية، وكلية الدفاع الجوي زي ما ذكرنا.

القائمين على نظام الثانوية العسكرية بيحطوا مجموعة شروط لازم الطالب يلتزم بيها عشان يتم قبوله بالمدرسة، واللي منها إنه يكون مصري الجنسية، وسِنه لا يقل عن 14 سنة ولا يزيد عن 17 سنة، ويجتاز جميع الاختبارات المطلوبة.

الاختبارات اللي بتتعمل قبل الالتحاق بالمدارس العسكرية بتكون متنوعة وبتقيس كذا حاجة عند الطالب زي مهاراته، ودرجة ذكائه، وقوة تحمله تحت ضغط نفسي عشان يتأكدوا من إن وجود الطالب داخل المدرسة العسكرية هيكون مناسب ولا لأ.