مهم لكل من الوالدين يكونوا عارفين إجابة السؤال كيف تختار الرياضة المناسبة للطفل؛ لأنه مع تنوع الاختيارات المتاحة واختلاف شخصية الطفل وطبائعه بيقع الوالدين في حيرة وتشتت عشان محتاجين يقدموا لطفلهم أفضل حاجة تساعده على تقوية بنيته الجسدية بالإضافة إلى أنه يستمتع بيها وبممارستها عشان تحقق الرياضة فعلًا الهدف منها ويستفيد منها في جوانب مختلفة.
في المقال هنوفر للوالدين دليل شامل في كيف تختار الرياضة المناسبة للطفل عشان نسهل عليهم عملية الاختيار ونقدر نخليهم يختاروا الأفضل ليهم ولصحة أطفالهم بكل يسر وسهولة.
في البداية محتاجين نعرف ليه مهم إن الطفل يمارس الرياضة فمهم نعرف الفوائد المختلفة للرياضة.
فوائد الرياضة للأطفال: فوائد صحية، فوائد نفسية، فوائد اجتماعية
الرياضة مش مجرد نشاط بيمارسه الطفل لكن هي عبارة عن مجموعة متنوعة من الفوائد في أجزاء كتير من حياة الطفل لو قدرنا نجاوب على سؤال كيف تختار الرياضة المناسبة للطفل؟
بتنقسم الفوائد إلى:
الفوائد صحية
من الفوائد الصحية للرياضة:
- تحسين القدرة على التحمل، بالإضافة إلى تعزيز صحة القلب والأوعية الدموية.
- الحفاظ على وزن صحي، عشان نجنب الطفل خطر الإصابة بالأمراض المزمنة زي السكري وغيرها من الأمراض.
- تقوية العضلات والعظام.
- زيادة المرونة والتوازن عند الطفل.
- تحسين النوم.
- بديل جيد لتفريغ الطاقة الزائدة.
الفوائد النفسية
تأثير الرياضة على الجانب النفسي بيتضح في:
- إكساب الطفل مزيد من الثقة بالنفس.
- تعلم مهارات جديدة ومتنوعة.
- اكتساب عادة ممارسة التمارين الرياضية بانتظام.
- تعلم مهارة الانضباط وتحسينها
- تكوين صورة صحية عن جسمه وصحته.
الفوائد الاجتماعية
أما عن الفوائد الاجتماعية للرياضة فهي:
- تعلم مهارات التواصل بشكل أفضل.
- اكتشاب مهارة العمل الجماعي، وتعلم تحمل المسؤولية.
- فرصة جيدة لاكتساب صداقات متنوعة.
كل دي بتعد فوائد للرياضة بيحصل عليها الطفل مباشرة ومع ذلك بتأثر فيه على المدى الطويل طول حياته، المهم نساعد الطفل على اختيار الرياضة اللي توفر له كل الفوائد دي وزيادة.
كيف تختار الرياضة المناسبة للطفل
مهم نعرف إن إجابة سؤال كيف تختار الرياضة المناسبة للطفل مبنية على عدة عوامل أساسية لازم نراعيها في الاختيار واللي منها:
- مراعاة سن الطفل: لأن لكل فئة عمرية رياضة تتناسب مع نموهم وقدراتهم.
- حب الطفل للرياضة: مهم في اختيارنا نراعي حب الطفل للرياضة والشغف بممارستها.
- مناسبة لقدرات الطفل الجسدية: زي الطول والوزن وقوة العضلات لأنها بتختلف من طفل لآخر حسب بنيته وتكوينه الجسدي.
- مراعاة الفروقات في التعامل بين الأطفال لأننا هنجد في طفل يحب المشاركة الجماعية وبيستمتع بيها وطفل تاني بيفضل يلعب بشكل فردي وبيبدع في كده المهم نعرف الطفل ايه اللي بيفضله.
- مناسبة الرياضة لجدول طفلك: لازم تكون الرياضة متوافقة زمنيًا مع دراسة طفلك وحياته الاجتماعية ولعبه الحر كمان بدون ما تلغي أي جزء من حياته أو نحط الطفل تحت ضغط بأي شكل كان.
- مين اللي هيساعد طفلك على اللعب والتمرين وهيتابع معاه كل التمارين.
- التكلفة المادية للرياضة لو رياضة بتحتاج معدات وزي، وازاي ممكن تختار اللي يناسب طفلك ويناسب دخل الأسرة وتوفق بين حب طفلك للرياضة ودخلك.
بالإضافة لكل النقاط السابقة اتأكد إن مفيش أي عوائق صحية بتمنع طفلك من ممارسة الرياضة دي واستشير دكتور طفلك عشان متنقلبش الرياضة ضد طفلك وبكده هيكون معاك دليل كامل لـ كيف تختار الرياضة المناسبة للطفل.
هنفصل في بعض النقاط السابقة عشان نساعدك أكتر في الاختيار
اختيار الرياضة المناسبة لسن الطفل
بيكتسب الطفل المهارات والقدرات المختلفة مع مرور الزمن ونموه، وكل ما بيكبر عمر الطفل سنة بيكون نما عنده قدرات ومهارات تتناسب مع سنه واحتياجه في التوقيت دا، عشان كده الرياضة اللي تناسب الطفل في عمر السبع سنوات متتناسبش مع الطفل في عمر السنتين لأن صاحب السبع سنوات عنده نضج جسدي وعقلي أكبر من صاحب السنتين فمهم نراعي النقطة دي واحنا في طريقنا لـ كيف تختار الرياضة المناسبة للطفل.
وهنقدر نقسم الاطفال حسب قدراتهم إلى فئات:
أولا: من عمر سنتين لخمس سنوات
ثانيا: من عمر 6 سنوات لـ 9 سنوات
ثالثا: من عمر 10 سنوات لـ 12 سنة
رابعا: من عمر 12 لـ 14 سنة
خامسا: من عمر 15 فيما فوق
هتقدر تقرأ أكتر بالتفصيل عن الرياضة المناسبة للفئة العمرية.
تشجيع الطفل على ممارسة رياضات مختلفة
أحد أهم النقاط في دليل كيف تختار الرياضة المناسبة للطفل إنك تسمح لطفلك بالتجربة والاستكشاف وخليه يحدد الرياضة اللي استمتع بيها أكتر وكشخص مسؤول عنه راقبه وساعده يوصل للرياضة اللي تناسبه.
ممكن تشجع طفلك على ممارسة الرياضة عن طريق إنك:
- تبدأ مع طفلك وجهز قائمة محددة في بالرياضات اللي طفلك حابب يجربها واقرأ معاه عنها وخليه يضيف رياضات مختلفة في القائمة حسب المعلومات اللي سمعها واتكلمت معاه عنها.
- تحدد جدول زمني لطفلك عشان يبدأ يمارس الرياضات دي ويجربها لكن مهم متخليش طفلك يمارس أكتر من رياضة في وقت واحد.
- تراقب طفلك في أثناء اللعب والتمرين واتأكد إذا كان طفلك حب الرياضة دي ولا لا، وممكن تعمل دا عن طريق طرحك لعدة أسئلة زي: إذا كان استمتع بممارسة التمارين النهاردة، أو ايه أكتر جزء بيحبه في اللعبة، وخليه يتكلم كمان عن مدربه وأصحابه اللي بيمارسوا معاه الرياضة، وإذا واجهته مشكلة أو لا.
- تحاول متضغطش على طفلك عشان يختار رياضة أنت بتحبها أو أنت شايف إن الرياضة دي هي الأصح للطفل اسمح بحرية الاختيار ولو لقيت طفلك بعد مدة من التمرين حابب يوقف الرياضة اتوقف فعلًا وجربوا رياضة تانية في النهاية طفلك اتعلم مهارات جديدة واكتشف نفسه وأنت كمان قدرت تفهم جزء من طفلك وشخصيته.
الرياضات الجماعية أم الفردية أنسب لطفلك؟
طبائع الطفل وشخصيته مش بس بتحدد طريقة تعليمه وتعامله لكنها مهمة كمان في إجابة كيف تختار الرياضة المناسبة للطفل
سواء كان طفلك بيحب الاختلاط بالناس والمجتمع بشكل كبير أو بيبحب يلعب بشكل فردي فهيقدر يلاقي الرياضة اللي تناسبه.
في رياضات جماعية كتير يقدر يجربها الطفل زي كرة القدم وكرة السلة كرة اليد والهوكي والبيسبول وغيرهم وهتساعده الرياضات دي على اكتساب مهارات متنوعة زي تعلم العمل الجماعية والقيادة واكتساب أصدقاء جدد يتعامل معاهم الطفل.
أما لو كان طفلك بيميل للفردية وبيستمتع بقضاء أوقات أكتر مع نفسه وبتظهر مهاراته بشكل منفرد فالرياضات الفردية زي السباحة وركوب الدراجة والجري والألعاب القتالية (الملاكمة الجودو .. وغيرهم) تعتبر هي الاختيار الأنسب ليه وهتساعده في تنمية مهارات مختلفة زي الاعتماد على النفس وتحمل المسؤولية بشكل أكبر والبراعة في صناعة واتخاذ القرارات وغيرهم.
سواء كان طفلك اجتماعي أو لا اسمح له بتجريب رياضات مختلفة وممكن تجرب تخليه يمارس الرياضة مع صديق ليه أو أحد أفراد العائلة دا هيشجعه في البداية وهيكون أكثر حماس.
الرياضة المناسبة لجسم كل طفل وقدراته الجسدية
بالإضافة لكل النقاط السابقة في كيف تختار الرياضة المناسبة للطفل في عامل مهم لازم ننتبه ليه أثناء الاختيار وهو قدرة الطفل الجسدية ممكن يكون في طفلينليهم نفس العمر وبيتمتع بقدر عالي من النمو النفسي والعقلي لكن ميقدروش يمارسوا نفس الرياضة بسبب اختلاف قدراتهم الجسدية.
من الحاجات المهمة اتكلم مع طبيب لو كان طفلك بيعاني من مشكلة صحية أو ضعف ما عشان يحدد ايه الاختيارات المتاحة قدام طفلك.
كمان قوة الطفل البدنية وقدراته الجسدية المختلفة بتساهم في اختيار نوع الرياضة فمثلًا لو كان طفلك طويل وبنيته الجسدية قوية فرياضة كرة السلة اختيار مناسب ليه ولقدرته، وإذا كان الطفل عنده تناسق كبير بين حركة ايده وعينه وانتباهه عالي فممكن يلعب التنس أو الهوكي وهتكون اختيار مميز يتناسب مع مهارته.
لو كان طفلك بيعاني من الوزن الزائد ابدأ معاه الأول بأشياء بسيطة وتغيير نمط حياته حياة فيها حركة أكثر وأكل صحي أكثر وتدرج معاه لحد ما يبدأ يلعب رياضة بيحبها ويستمتع بيها.
لازم تراعي دايمًا إن الرياضة مهم تكون مفيدة لطفلك وبيحبها ودا في المقام الأول لاختيارك.
هل تختار رياضات تتطلب الاحتكاك الجسدي أم لا؟ contact or non contact sports
من العوامل المهمة اللي لازم ينتبه ليها الأب والأم في أثناء اختيار الرياضة للطفل هل الرياضة دي فيها اتصال مع الغير أو عديمة الاتصال، والعامل اللي بيتحكم في الاختيار هو الطفل نفسه وطبيعته.
الرياضة اللي فيها اتصال بيتطلب من الطفل الاحتكاك الجسدي المباشر مع غيره فمثلًا الشخص اللي بيحب الحركة بشكل كبير وبيحب حركات المصارعة وغيرها فاختيار رياضة زي كرة القدم هيكون أمر مناسب ليه لأنها هتكون بديل جيد ومفيد لتفريغ الطاقة الزائدة وتحويلها لطاقة مفيدة ولعبة الطفل يستمتع بيها ويقضي وقت لطيف فيها، كمان رياضات الدفاع عن النفس فيها احتكاك كبير لكنه منظم بقوانين وقواعد ودا هيساعد الطفل على التحكم في نفسه وحركته بشكل أكبر عشان يقدر يستغل قدراته بشكل سليم، لكن مهم نراعي سلامة الطفل وعدم تعرضه للأذى واتباع الإجراءات للحفاظ على صحة وسلامة الجميع.
أما لو كان طفلك بيتسم بالهدوء ويميل إلى السكون فمهم نختار له رياضة عديمة الاتصال بدون احتكاك جسدي مع غيره هتتناسب معاه بشكل أفضل زي مثلًا التنس أو رياضة الهوكي أو السباحة هتكون اختيار ممتاز للطفل ولطبيعته الهادية.
كمان في بعض الأمور اللي مهم تنتبه ليها واحنا بنجاوب على كيف تختار الرياضة المناسبة للطفل وبتتمثل في:
استمع لرأي الطفل
أكتر حد هيعرف المناسب للطفل هو الطفل نفسه، فمهم تسمع لرأيه وخليه يشاركك ويقولك ايه الرياضة اللي بيستمتع بيها وايه الرياضة اللي محبهاش.
خليه يكون ليه رأي وتحمل لبعض المسؤولية في اختيار اللعبة اللي تناسبه حتى لو كنت شايف إنه مش هيستمتع بيها اسمحله يجرب ويكتشف مواهبة وحبه للرياضة بتوجيه مناسب منك.
متجبرش الطفل على رياضة لكونك كنت بتستمتع بيها أو شايفها الأفضل أو لمجرد إن في أطفال كتير في نفس سنه بيلعبوها اسمح له بالحرية والتعبير عن نفسه بالرياضة اللي تتوافق مع مهاراته وشخصيته وحبه عشان يقدر يأديها بحب واستمتاع.
استمع لأرآء المدربين
من ضمن دليل كيف تختار الرياضة المناسبة للطفل مهم تعرف كمان بعد ما تسمع لطفلك اسمع للمدرب بتاعه وناقشه في إمكانيات وقدرات طفلك وإذا كانت الرياضة اللي بيلعبها الطفل حاليًا مناسبة ليه ولمهاراته ولا محتاج يبذل مجهود بشكل تاني، أو إن الرياضة غير متوافقه معاه.
اسمح لخبرة المدرب لأنه تعامل مع أطفال كتير بأنماط وشخصيات مختلفة وبالتالي هتساعد طفلك للوصول للأفضل حتى لو تطلب الأمر التوقف عن الرياضة اللي بيمارسها حاليًا لكونها مش مناسبه لعضلات الطفل وقدراته البدنية وقدراته العقلية بسبب صغر سنه أو لكون الطفل ما أظهرش شغفه بيها ومش قادر يعبر عن دا لكن مدربه قدر يلمس دا في أثناء التدريب، خذ بنصيحة المدرب وتوجيهاته وخليها في عين الاعتبارات.
اعتبارات أخرى مهمة
في 3 اعتبارات بيكون للأهل ليهم دور كبير فيها عشان يسهلوا على الطفل ممارسة الرياة ولازم ينتبهوا ليها وهم بيجابوا على سؤال كيف تختار الرياضة المناسبة للطفل ويتتمثل في:
دراسة الطفل وتنظيم الوقت
مهم نرتب أولويات الطفل ونعرف ايه اللي ليه الأولوية وزي ما ممارسة الرياضة شئ مهم كمان دراسة وتعليم الطفل شئ مهم فمحتاجين نرتب جدول محدد يتناسب مع عمر الطفل ومع دراسته سواء كانفي سن المدرسة أو قبل السن دا، ويكون موعد ممارسة الرياضة واضحه ومحدده فالبتالي مفيش حاجة تطغى على حاجة أو يحصل إهمال في جزء من حياته ويفقد التوازن في حياته.
تكلفة ممارسة الرياضة
الحالة المادية للأسرة واحدة من أهم الاعتبارات اللي لازم الأسرة تنتبه ليها وهم بيختاروا الرياضة مع طفل، بتحتاج الأسرة تاخد في عين الاعتبار إذا الرياضة بتحتاج لبس خاص أو أدوات خاصة بالإضافة لمصاريف الاشتراك في النادي أو توفير مدرب للطفل وعلى أساس كل دا بتختار الأسرة اللي يتوافق مع طفلهم ومع الحالة المادية ليهم.
استعداديتك لاستمار وقتك ومجهودك
مش بس الطفل اللي هيبذل مجهود في ممارسة الرياضة لكن كمان انت كأب أو كأم هتقدروا تبذلوا قد ايه من وقتكم ومجهودكم عشان الطفل يقدر يمارس الرياضة دي ومتكونش مجرد مرة أو مرتين وبعدها ينقطع، زي ما رتبتم جدول لأطفالكم رتبوا جدول يومكم أنتم كمان وخلوا في توافق بين الجدولين عشان متهملوش في متطلباتكم ومسؤولياتكم واللي تتضمن كمان ممارسة الطفل للرياضة اللي بيحبها.
دي بعض النصائح واللي تعتبر دليل مهم في كيف تختار الرياضة المناسبة للطفل مهم تتبعها وتاخد بالك منها، بالإضافة إنها هتحتاج منك صبر بشكل كبير ومساعدة كبيرة منك لطفلك بشكل فعال بدون الضغط عليه أو الملل.
مش لازم طفلك يمارس رياضة مشهورة ومعروفة عند اللي في سنه طالما هي مناسبه ليه وبيستمتع بيها.
الانضباط والالتزام لازم يكون الطفل متحلي بيه وهي مهارة هيكتسبها مع الوقت، لكن مهم كمان يكون الوالدين عندهم الانضباط والالتزام في تعليم الطفل والالتزام بأخذه لمواعيد التمارين والحضور في التوقيت المناسب، وممكن كمان مساعدته على التمرن خارج وقت النادي.
اتأكد إن الرياضة تكون من شغف وحماس الطفل مش من حماس والديه أو تم اختيارها لمجرد إن أحد الوالدين بيحبها وبيحب يمارسها، تذكر إن طفلك هو مسؤول منك لكن كمان هو ليه شخصية مستقلة ومختلفة متلغيش وجودها.
ممكن بعد فترة تلاقي طفلك مش حابب يكمل في الرياضة اللي كان بيمارسها اتكلم معاه واعرف الأسباب ايه ولو كان السبب إن الطفل مش لاقي نفسه فيها ولا بيستمتع بالممارسة ساعده يغيرها وادعمه، أما لو كان بيعاني من مشاكل وهو بيحب الرياضة دي حاول تحل معاه المشاكل وساعده يكمل في اللي بيحبه بكل راحة.
أضف تعليق