واحدة من أشهر المدارس اللي بتكون خيار متاح لكتير من الأهالي وهما بيختاروا مدرسة ابنهم هي مدرسة النيل المصرية، لكن رغم شهرتها الكبيرة إلا إن ظهر فيها بعض العيوب اللي بتؤثر بشكل كبير على قرار ولي الأمر.
وفي المقال دا هنتعرف على أبرز عيوب مدرسة النيل المصرية خلال السنين اللي فاتت، وأبرز تصريحات الوزارة وإدارة المدارس للتعديل والتحديث فيها، عشان تقدر تختار القرار الصح لإبنك؛ فتابع معانا.
ما هي مدرسة النيل المصرية؟
هي مدارس مصرية تأسست بغرض تقديم أول شهادة مصرية مصممة بمعايير دولية، ومعترف بيها في كل الجامعات المصرية وعدد من الجامعات العالمية، وهي مدارس بتهدف لتقديم خدمات تعليمية دولية بجودة عالية.
بيشرف على المدارس دي وحدة شهادة النيل الدولية بالشراكة مع هيئة الامتحانات الدولية بجامعة كامبريدج البريطانية، واللي بدورها بتقدم الإرشاد المهني والدعم الفني للمدارس دي، وبتتولى اعتماد شهاداتها من الخارج، وبتتولى وزارة التربية والتعليم اعتماد الشهادة محليًا، والمدرسة ليها 14 فرع في مختلف أنحاء الجمهورية.
اعرف أكثر عن المدرسة من خلال مقال: مصاريف مدارس النيل المصرية
فروع مدرسة النيل المصرية
تم إنشاء أول 5 فروع للمدرسة سنة 2010م وهما:
- مدرسة النيل المصرية بالعبور.
- مدرسة النيل المصرية بأكتوبر.
- مدرسة النيل المصرية ببورسعيد.
- مدرسة النيل المصرية بالمنيا.
- مدرسة النيل المصرية بقنا.
وعلى مدار السنين بعد كده تم إنشاء 9 فروع تانية في باقي المحافظات وهما:
- مدرسة النيل المصرية بدمياط الجديدة.
- مدرسة النيل المصرية بأسيوط الجديدة.
- مدرسة النيل المصرية بمدينة السادات.
- مدرسة النيل المصرية بالأقصر (طيبة).
- مدرسة النيل المصرية بأسوان الجديدة.
- مدرسة النيل المصرية بمدينة الشروق.
- مدرسة النيل المصرية بالياسمين (التجمع).
- مدرسة النيل المصرية بالأندلس (التجمع).
- مدرسة النيل المصرية بالشيخ زايد.
وبكدا يكون عدد فروع المدرسة في سنة 2025 هما 14 فرع موزعين على محافظات مصر، وفي خطة لزيادة عددها خلال السنين الجاية تبعاََ لتصريحات الوزارة.
عيوب مدرسة النيل المصرية
بداية من عام 2020 زاد الحديث عن عيوب مدارس النيل المصرية، وبعض الأهالي اتقدمت بشكاوى منها اللي وصل لوزير التربية والتعليم، ومن المشاكل دي:
1- غلاء الزي المدرسي والمستلزمات الدراسية
بعض فروع مدارس النيل بقت تلزم الأهالي إنهم يشتروا الزي المدرسي واللوازم الدراسية من مكان معين، وكمان الزي المدرسي بقت أسعاره مبالغ فيها رغم وجوده في أماكن تانية بسعر أرخص، ودي حاجة بتخالف قرارات وزير التربية والتعليم، وبتخالف الشروط القديمة للمدرسة.
لكن بعد تصريح المصاريف الدراسية للعام الجديد 2024 – 2025 واللي كانت لا تزيد عن 50 ألف جنيه سنوياََ، فكانت مدارس النيل الدولية من أفضل المصروفات مقارنةََ بالمدارس الانترناشونال واللي زادت مصاريفها بشكل مش طبيعي.
2- الخلافات بين الفروع القديمة والجديدة
ظهر تجاهل من ناحية الفروع الجديدة في جزئية الحصول على نفس الشهادة المعتمدة من جامعة كامبريدج البريطانية زي ما بيحصل في الفروع القديمة، ودا عمل تخوف كبير عند الأهالي على مصير أبنائهم اللي في الفروع الجديدة، وخصوصاً اللي في المدارس الفنية.
لكن اختفت الشكاوى دي بعدها بفترة، وصرحت إدارة المدارس بإنها بتطبق نفس السياسات في كل فروعها.
3- قلة الرحلات الترفيهية
بنلاقي إن الفروع القديمة بتنظم العديد من الرحلات الترفيهية للطلاب من وقت للتاني، على عكس الفروع الجديدة اللي مش بتهتم بالنقطة دي.
لكن بعض أولياء الأمور مش بيعتبروا دا عيب حقيقي لإن الهدف الأساسي من المدرسة هو حصول أبنائهم على تعليم جودته عالية.
4- زيادة المصاريف الدراسية
في عام 2021 كان واحد من أهم عيوب مدرسة النيل المصرية هو ارتفاع المصروفات الدراسية بشكل مبالغ فيه بنسبة من 20 لـ 30 % عن قبل كدا، رغم إن المدارس دي هي مشروع قومي بيسعى لتقديم نموذج تعليمي متميز عالي الجودة بمصروفات مدعمة، وبالتالي دا بيخالف لوائح المدرسة القديمة.
لكن زي ما وضحنا، المصاريف مزادتش بشكل كبير في العام الدراسي الجديد، وما تخلفتش عن نسبة الزيادة المصرح بيها من الوزارة (7%).
5- نقص المعلمين في المراحل الدراسية المختلفة
لاحظ الأهالي وجود نقص في عدد المعلمين، وقدموا دا في شكوى للوزير كأحد أهم عيوب مدرسة النيل المصرية، وطالبوا بتعيين مدرسين جداد عندهم كفاءة ومعتمدين من كامبريدج، وكمان طالبوا بإعادة تقييم المدرسين اللي اتعينوا في الفترات الأخيرة، لإن عدد كبير منهم غير مؤهل لنظام المدرسة.
6- فقدان التواصل المباشر مع أولياء الأمور
بيظهر كمان من عيوب مدرسة النيل المصرية انقطاع التواصل المباشر ما بين إدارة المدرسة وأولياء الأمور، الأمر اللي بيخلي في فجوة وعدم متابعة لمستوى الطلبة، وبيوصل لولي الأمر إحساس بانفصاله وبعده عن تعليم ابنه، وممكن يفقد فرص التحسين من مستوى الطالب.
7- عدم توفير موجهين للمواد
بيطالب أولياء الأمور بتوفير موجهين للمواد اللي بيتم تدريسها على مستوى الفروع، لإن غيابهم بيأثر على سير الخطط الأكاديمية ودراسة المناهج كاملة، وممكن يحصل خلل، والطالب ما يستكملش المنهج بالشكل المطلوب، وبالتالي هيفقد جزء مهم من تعليمه.
8- عدم تناسب خطوط الباصات مع محل سكن الطلاب
من عيوب مدرسة النيل المصرية إن المدرسة مش بتوفر باصات بخطوط متنوعة، فالبالتالي الخطوط مش بتتناسب مع محل سكن كتير من الطلاب.
والأمر دا بيخلق مشكلة لكتير من أولياء الأمور، وبيحتاروا في طريقة توصيل أولادهم.
9- اشتراطات عديدة لدفع مصروفات مختلفة
بتشترط المدرسة دفع ألف جنية مقابل أنشطة مختلفة، بالإضافة لألف وخمسمائة جنيه مقابل استخدام موقع LMS التعليمي، ودا بيكلف الأهالي مصروفات زيادة غير مصروفات المدرسة، والزي المدرسي، ومصروفات الباصات، الحاجة اللي بتكون مرهقة ليهم، وبتستنزفهم بشكل كبير.
10- عدم اتباع منهج جامعة كامبريدج بشكل كامل
على الرغم من إن نهج المدرسة قائم على مناهج كامبريدج إلا إن من عيوب مدرسة النيل المصرية اللي أزعجت الأهالي بشكل كبير عدم اتباع المدرسة للمنهج بشكل كامل، فـ مش كل أساليب وطرق التعليم بتطبق بل في جزء منها بيتم إغفاله.
11- ارتفاع قيمة مصروفات الاختبارات
بيواجه الأهالي كمان مشكلة في ارتفاع قيمة مصروفات الاختبارات بشكل مبالغ فيه، فمثلًا ممكن يوصل اختبار مادة في المستوى الثالث لـ 14 ألف جنيه تقريبًا، الحاجة اللي بتخلي أمر المصروفات بشكل عام من أبرز عيوب مدرسة النيل المصرية اللي بيعاني منها الأهالي.
ولكن خلال عامي 2023 و 2024 واجهت مدارس النيل المصرية الشكاوى دي بعدد من التصريحات للتأكيد على عدم صحتها وعدم ترويج الشائعات عن المدارس، دا بالإضافة لاهتمام الدولة بيها اللي ظهر خلال عدة قرارات من وزارة التربية والتعليم، والزيارات المتكررة خلال الأعوام الأخيرة من وزير التربية والتعليم، ودا للتحقق من جودة التعليم في المدارس دي بزيارة مختلف الفروع ليها بالمحافظات، وإبداء ملاحظات لتطوير المنظومة.
أحدث تصريحات وزارة التربية والتعليم التي تخص مدارس النيل المصرية
عيوب مدرسة النيل المصرية واحد من المواضيع اللي انتبهت ليها الوزارة وبناءً عليه اهتمت بيها وبملاحظتها، وأصدرت عدة قرارات خاصة بيها، ومنها:
1- أكد وزير التربية والتعليم إن الوزارة مهتمة بتطوير مدارس النيل المصرية، وبتسعى لزيادة عددها ودا بناءََ على توجيه رئيس الجمهورية.
ومن ضمن الخطط هي متابعة زيارة المدارس بكل فروعها، وأثناء زيارته لإحدى المدارس اجتمع الوزير مع المدرسين وأكد على أهمية دورهم في تحسين مستوى الطلاب، وطلب منهم الاستمرار في تطوير مهاراتهم، واستخدام طرق تدريس حديثة.
ومن توجيهات الوزير لتطوير مدارس النيل:
- تطوير منصة “LMS” الخاصة بالمدارس واستخدام التكنولوجيا بشكل أكبر.
- الاهتمام بمقترحات أولياء الأمور لتطوير مستوى التعليم.
- تكثيف الأنشطة الرياضية والفنية والثقافية للطلاب.
- اختيار أفضل المدرسين وتحفيزهم باستمرار.
- تقييم دوري لمديري المدارس.
2- قرار وزاري جديد يخص مدارس النيل المصرية
أصدرت وزارة التربية والتعليم قرار وزاري رقم 148 لسنة 2024 بينظم قواعد الدراسة والامتحانات في المدارس اللي بتدرس مناهج دولية أو أجنبية أو ذات طبيعة خاصة.
- التزام مدارس النيل
مدارس النيل المصرية الدولية عليها الالتزام بالقرار دا، وبيتضمن تدريس مواد اللغة العربية والتاريخ والتربية الدينية من رياض الأطفال وحتى المرحلة الثانوية. - تفاصيل القرار:
- مرحلة رياض الأطفال: تدريس اللغة العربية.
- الصفوف من الأول حتى الثالث: تدريس اللغة العربية والتربية الدينية.
- الصفوف من الرابع حتى التاسع: تدريس اللغة العربية، الدراسات الاجتماعية، والتربية الدينية طبقًا للمنهج المصري.
- الصفوف من العاشر حتى الثاني عشر: تدريس اللغة العربية، والتاريخ، والتربية الدينية وفقًا للمحتويات المعتمدة من الوزارة.
3. نسبة درجات اللغة العربية والتاريخ
بالنسبة للمجموع الكلي للطالب، تُحتسب درجات اللغة العربية والتاريخ بنسبة 10% لكل مادة، ليشكلوا معًا 20% من المجموع الكلي.
أحدث تصريحات مدارس النيل المصرية
حرصت إدارة مدارس النيل على تحسين أغلب عيوب مدرسة النيل المصرية وتكذيب بعضها لإنه غير صحيح، وأصدرت قرارات تعديلية لتلافي بعض الأمور اللي كانت سبب في إغضاب أولياء الأمور، وبتتلخص في:
1- الاستعدادات للعام الدراسي 2024 – 2025
صرحت مدارس النيل المصرية الدولية إنها جاهزة تمامًا لبدء العام الدراسي 2025، بالتنسيق مع فروعها الـ 14 في مختلف أنحاء الجمهورية، من القاهرة الكبرى لحد أسوان.
واستقبلت المدارس العام دا عدد 10698 طالب وطالبة، واهتموا بتدريب 1286 معلم ومعلمة على الأساليب الحديثة في التدريس والتقييم عشان يضمنوا جودة التعليم.
دا بالإضافة لتجديد وصيانة المدارس عشان تكون البيئة التعليمية مناسبة لجميع الطلاب على جميع الأصعدة.
2- تصريح يخص سلامة شهادة مدارس النيل واعتمادها
أكدت إدارة مدارس النيل إن شهاداتها الدولية مميزة لإنها أول شهادة مصرية بتحمل معايير دولية، وليها قرارات وزارية خاصة بتنظمها.
وشددت المدارس على إن منظومة مدارس النيل بتحظى بدعم كبير من الحكومة، والقيادة السياسية اللي بتسعى لتقديم تعليم عالي الجودة لكل المصريين.
وطالبت الإدارة الناس ما يصدقوش أي شائعات عن عيوب مدرسة النيل المصرية أو تكهنات مش صحيحة، لإن دا بيعمل بلبلة بدون داعي.
3- تصريح يخص بعض قرارات الوزارة للعام الدراسي الجديد
بالنسبة لمادة اللغة الفرنسية، الوزارة قررت إنها مادة نجاح ورسوب بس مش داخلة في المجموع، لكن مدارس النيل أكدت إن دا مش بينطبق على طلابها؛ لإن اللغة الفرنسية عندهم تعتبر مادة أساسية وبتدخل في المجموع لأنها مهمة للتقديم في الجامعة.
4- تصريح شركة مصر للإدارة التعليمية
وضّحت إنها حققت تقدم كبير الفترة الأخيرة، زي توحيد الرؤية في مدارس النيل، وتحسين الوضع الإداري والأكاديمي، وصرحت إن مناهج النيل بطبيعتها محتاجة تقييمات ومتابعة مستمرة، زي المشاريع والامتحانات المختلفة، وكل حاجة بتكون منظمة بجداول بتوصل لأولياء الأمور قبلها بفترة كافية.
وكحل لمشاكل التقييم والنتائج اللي لاحظوا إن السنة اللي فاتت كان فيه تفاوت كبير في درجات الطلاب في التقييمات النهائية، ودا بسبب إن التقييمات على مدار السنة ما كانتش متماشية مع امتحان آخر السنة، فحصلت وقفة لإعادة التخطيط، وشمل دا:
- تخصيص مديرين للمواد لمتابعة التدريس والتقييم.
- تبادل خبرات بين المدارس الجديدة والقديمة.
- تحسين أسلوب التدريس.
- خطة العمل الجديدة.
وخطة العمل الجديدة لعام 2024 – 2025، هي:
تقسيم السنة لـ 3 ترمات، وكل ترم فيه تقييمات ومشاريع، إضافة إلى اختبارات تجريبية في الترم الأخير لمساعدة الطلاب على الاستعداد لامتحانات آخر السنة.
وفايدة الامتحانات التجريبية بتتلخص في:
- تدريب الطلاب على شكل الامتحانات النهائية، خصوصًا للصف الرابع أو اللي محولين من أنظمة تعليمية تانية.
- إعداد خطط علاجية بعد تحليل النتائج لمعالجة نقاط الضعف.
- رصد أخطاء الطلاب وتصحيحها مباشرة مع المعلمين.
- تدريب المدرسين على إدارة الامتحانات وتصحيحها.
أما الاختبار التجريبي التاني فتوقيته مناسب جدًا في آخر السنة، وبيساعد الطالب يراجع المنهج.
والهدف الرئيسي منه تجهيز الطالب نفسيًا، وأكاديميًا للامتحانات النهائية بدون توتر.
وأفادت في النهاية إن كل الخطوات دي معمولة عشان تتفادى الأخطاء، وعيوب مدرسة النيل المصرية اللي كانت بتحصل في التقييمات قبل كدا، وتهيئ الطلاب لامتحانات آخر السنة بهدوء وثقة.
ودا بيدعم كلام د/ أماني الفار مدير عام مدارس النيل المصرية عن نظام الدراسة بمدرسة النيل والركائز الأساسية في العملية التعليمية، ومدى تطور المناهج، ودا تقدر تشوفه من خلال حلقة د/ أماني الفار في برنامج جروب الماميز.
وتقدر تسأل أولياء الأمور عن تجربتهم بمدارس النيل من خلال جروب أولياء الأمور مدارس النيل المصرية الدولية، وتتعرف على تجاربهم عشان تاخد القرار الصائب.
الخلاصة
أثارت عيوب مدرسة النيل المصرية اللي ذكرناها غضب أولياء الأمور خلال السنين اللي فاتت، وطلبوا حل المشاكل دي في أسرع وقت ممكن، وبناءََ عليه كان في تحرك سريع من الوزارة لمتابعة المدارس لحلها، وتضمينها لخطة تطوير أنظمة التعليم، ودا لمدى أهميتها عند الوزارة.
دا غير اهتمام إدارة المدرسة بعدد من التصريحات الموجهة لأولياء الأمور لتكذيب الشائعات، وعمل خطة لعام دراسي جديد على مبادئ هامة لتطوير العملية التعليمية، بداية من تدريب المعلمين، واستقبال عدد كبير لسد حاجة فروع مدارس النيل كلها، والاهتمام بالبنية التحتية للفروع لتأمين بيئة سالمة للطالب، والحرص على تحديث المناهج بصورة مستمرة للحفاظ على جودة التعليم والشراكة مع منظمة كامبريدج الدولية.
وبكدا نكون عرضنا أبرز عيوب مدرسة النيل المصرية اللي ظهرت خلال السنين اللي فاتت، وكل التصريحات الخاصة بيها من الوزارة وإدارة المدارس، ودورك كولي أمر هو تقييم كل نقطة من العيوب دي، والموازنة بينها وبين المميزات عشان تقدر تاخد قرار صح.
أضف تعليق