الفترة الأولى من التربية بتكون مهمة في تنمية مهارات الطفل عمر سنتين، لإنه بيبدأ فيها يستكشف ويتعرف أكثر على العالم المحيط، وبيكون عنده قابلية لتعلم سلوكيات ومهارات جديدة من خلال أحداث اليوم.
فبيكون من السهل علينا كأولياء أمور إننا ننمي عنده مهارات مختلفة في الفترة دي، زي مهارة الاستكشاف، والتواصل اللفظي، وغيره.
عشان كدا يهمنا في المقال نتعرف أكتر على المهارات دي بالتفصيل، وازاي نطورها.
علامات نمو الطفل الطفل عمر سنتين
عمر السنتين في حياة الطفل بيتميز بمجموعة من التطورات الملحوظة، واللي وذكرتها كمان منظمة اليونيسف-UNICEF، فبنلاقي الطفل بدأ ينطق بعض الكلمات بشكل صحيح، ويزود عدد المصطلحات اللي بيستخدمها في كلامه.
كمان بقى يعرف يستخدم إيده بشكل أفضل وأدق من قبل كدا، ويمشي بشكل متوازن، وهنا بيبدأ يتعرف أكتر على الحاجات اللي حواليه.
وبالتالي لازم نفهم إزاي نعزز التطورات دي، ونساعد أطفالنا على النمو بشكل أفضل.
المهارات الحركية وكيفية تنميتها في عمر السنتين
في عمر السنتين بنلاحظ تطور واضح في مهارات الطفل الحركية، فبيبدأ يطلع السلالم وينزل، بس بيحتاج مساعدة حد معاه.
وبيكون كمان قادر يقف على أصابع رجله، وممكن يلعب بكرة القدم المناسبة لسنه، ويجري أثناء اللعب لمسافات محدودة.
وعشان نساعد على تنمية مهارات الطفل عمر سنتين فممكن ندعمه في ممارسة بعض الأنشطة زي:
1- مسابقات الجري البسيطة
المسابقات دايمًا بتشجع الأطفال على المشاركة والتحدي، ومن أبسط الأنشطة اللي ممكن نعملها في سبيل تنمية مهارات الطفل الحركية، وهي إننا نعمل مسابقات جري بسيطة معاه.
ونشجعه يتحرك أكثر عشان يكسب المسابقة، وبالتالي هنساعد في تقوية عضلاته، وزيادة قدرته على الحركة بشكل أسهل.
ملحوظة: لازم المسافة اللي هيجريها الطفل تكون بسيطة، عشان ما يحصلش إجهاد أو ضرر له، ونتأكد إن المكان اللي بيجري فيه آمن عليه، عشان نتجنب إنه يحصله أي أذى.
2- ألعاب الركوب
ألعاب الركوب زي الدراجات وغيرها بتساعد بشكل كبير في تحسين المهارات الحركية للطفل، لإنها بتمرن عضلات الساق على الحركة، وبتزود قوتها.
كمان بتكون مفيدة جدًا لتمرين العقل وزيادة الوعي الحسي للطفل، وبالتالي فألعاب الركوب المناسبة لعمر سنتين بتلعب دور كبير في تنمية مهارات الطفل عمر سنتين.
3- ألعاب التوازن
من الألعاب المفيدة في تنمية مهارات الطفل الحركية هي ألعاب التوازن، فممكن تختار مجموعة من المخدات وتحطها جنب بعض، وتطلب من الطفل إنه يحاول يمشي فوقها بالظبط، من غير ما يسند على حاجة حواليه،.
تنمية مهارات الطفل عمر سنتين في اللغة
المهارات اللغوية عند الطفل عمر سنتين بتظهر في كونه قادر على تكرار الكلام اللي بيسمعه، ومدرك أسماء أعضاء الجسم، فلما الأم تبدأ تذكر اسم العضو يقدر يشاور عليه.
وبالإضافة لكدا بنلاقي إن نطقه للكلمات بدأ يتحسن، وبقى عارف يكون جملة من كلمتين وينطقها، وبنلاحظ إن البنات بيكون عندها تطور في المهارات اللغوية أسرع من الولاد.
وتبعًا لدراسة موقع ScienceDirect بنلاقي إن الطفل بيبدي اهتمام باللغة بين عمر 24:8 شهر، وبيلاحظ أولياء الأمور انتباهم للكلام، ومحاولة تكراره، وبالطبع دا بيساعد على تنمية مهارات الاتصال عندهم، وزيادة مفرادتهم اللغوية.
وتنمية مهارات الطفل عمر سنتين في اللغة بتتطلب مننا:
4- استخدام مصطلحات جديدة عند التحدث مع الطفل
استماع الطفل لمصطلحات جديدة باستمرار هيساعده يزود حصيلته اللغوية، وبالتالي هيكون في تطور ملحوظ في المهارات اللغوية عنده.
عشان كدا لازم نحرص إننا نستخدم مصطلحات جديدة وإحنا بنتكلم مع الطفل، ونركز على المصطلحات دي ونكررها لحد ما نتأكد إنه سمعها كويس وأدركها.
5- تسمية الأشياء أمامه وحثه على تكرارها
بنلاحظ إن الطفل في عمر السنتين بيكون قادر على تكرار المصطلحات اللي بيسمعها، وبالتالي ممكن نستغل النقطة دي بإننا نسمي الأشياء زي: الألعاب والألوان، وأسماء الحيوانات البسيطة مثًلا، ونشجع الطفل على تكرارها تاني.
وكمان نكون حريصين إننا نشاور على الأشياء دي وإحنا بننطقها، عشان نعزز عنده الحس الإدراكي.
6- حكاية القصص
الأطفال بطبعهم بيحبوا يسمعوا القصص والحكايات المختلفة، وأحيانًا هما اللي بيطلبوا دا من ولي الأمر، لإنها بتكون وسيلة لتسليتهم وزيادة قدرتهم على التخيل.
وحرصك على حكاية القصص البسيطة هيساعد بشكل كبير في تنمية مهارات الطفل عمر سنتين، وهيزود الحصيلة اللغوية.
وممكن هنا بعد انتهاء القصة نطرح عليه بعض الأسئلة ونخليه يجاوبها، وهنلاحظ إنه بدأ يستخدم ألفاظ من اللي سمعها وقت الحكاية.
ويمكنك أيضًا قراءة: أبرز 9 تمارين تعليم القراءة والكتابة لطفلك
7- مطابقة الحيوانات
في اللعبة دى هتحتاج تستخدم مجسمات حيوانات بصورها، وتطلب من الطفل مطابقة مجسم الحيوان بالصورة، وبعد كدا ينطق اسمه. دا هيحفز ذاكرة الطفل، وينمى لغته، وهيساعد على تنمية مهارات الطفل عمر سنتين.
تنمية المهارات الحركية الدقيقة لطفل عمر سنتين
الطفل لما بيوصل لعمر السنتين بيكون قادر إنه يمسك الأقلام بإيده، ويلون ويرسم خطوط في اتجاهات مختلفة، وكمان بيقدر يخلع ملابسه، ويلبسها بمساعدة من والديه طبعًا.
ومن أهم الأنشطة والألعاب اللي بتساعد في تنمية مهارات الطفل عمر سنتين هي:
8- أنشطة الرسم والتلوين
الألوان الخشبية بتجذب انتباه الأطفال، وتشجعهم يستخدموها، سواء في رسم الخطوط، أو تلوين الأشكال المختلفة، وبنلاحظ إن قدرتهم على الإمساك بالأقلام بتتحسن مع التعود على استخدامها.
وبالتالي نقدر نوفر للطفل مجموعة من الألوان وكتب التلوين، عشان نساعده يحسن المهارات اليدوية، ويكون عنده تناسق بين حركة اليد والعين.
9- عجينة الصلصال
تشكيل عجينة الصلصال بيحتاج لحركات يدوية دقيقة باستخدام الأصابع، فبيزود قدرة الطفل على أداء الحركات الدقيقة مع الوقت، وبيحسن المهارات اليدوية عنده بشكل كبير.
ملحوظة: لازم نراقب الطفل أو نكون معاه وقت لعبه بالصلصال، عشان نتأكد إنه بيلعب بأمان، لإنه ممكن يجرب إنه يحطه في الفم أو يبلعه، ودا هيسبب خطورة على صحته.
10- ألعاب البازل
تعد ألعاب البازل وتحريك القطع من أشهر الألعاب اللي بتساعد على تنمية المهارات الدقيقة عند الطفل، وبالتالي ممكن نستخدم ألعاب البازل السهلة والبسيطة في سبيل تنمية مهارات الطفل عمر سنتين.
ورغم فوائد لعبة البازل وكونها لعبة مسلية بنلاقي إن بعض الأطفال بيرفضوا يلعبوا بيها، وبيملوا من استخدامها، لإنها بتكون صعبة بالنسبة ليهم.
ولكن نقدر نتغلب على النقطة دي بإننا نكافئ الطفل في كل مرة يلعب فيها بلعبة البازل، ونشجعه إنه يكملها، ومع الوقت هنلاحظ تطور كبير في مهاراته الحركية الدقيقة.
11- ألعاب لصق الكرات
هى من الألعاب اللي بتزود الصبر عند الطفل، وبتقوي استخدام إيده، وطريقتها بتكون بلصق مجسم دائري فارغ على الحيطة، ووضع لاصق داخله، وبيصوب الطفل داخل دايرة اللصق بالكرات بحيث الكرة متخرجش بره الدايرة، وبيتحسب بس الكرات اللي بتلزق.
تنمية المهارات الاجتماعية لطفل عمر سنتين
تطور الجانب الاجتماعي للطفل في عمر السنتين بيتضح في:
- تفضيل التواجد مع الأطفال عن التواجد بمفرده
- تقليد كلام وأفعال الآخرين.
- زيادة قدرته على التخيل
وبنلاقي إن تنمية مهارات الطفل عمر سنتين في الجانب دا ممكن تحصل بسهولة عن طريق:
12- ألعاب التخيل
ألعاب التخيل زي لعبة الأدوار، وألعاب العرائس وغيرها بتلعب دور كبير في تنمية مهارات الطفل عمر سنتين في الجانب الاجتماعي، لإنها بتدي ليه مساحة كبيرة إنه يعبر عن تفكيره، ويمثل الحاجات اللي بيتخيلها قدام أصحابه، أو أفراد عيلته.
وبالتالي حرصنا على مشاركة أطفالنا في الألعاب التخيلية هيعمل طفرة كبيرة في مهاراتهم الاجتماعية.
13- تشجيع الطفل على طرح الأسئلة
بعض الأطفال بيكون عندهم خوف من طرح الأسئلة، وبيفضلوا إنهم يكونوا ساكتين، لكن دا بيأثر بالسلب على مهاراتهم الاجتماعية.
وبالتالي عشان ننمي مهارات الطفل الاجتماعية لازم نشجعه على طرح الأسئلة، ونسمع أسئلته كويس، ونحاول نجاوب عليها بالطريقة اللي يفهمها، ونديله مساحة لطرح أسئلة تانية.
المهارات العاطفية وكيفية تنميتها
بنلاقي العديد من العلامات اللي بتوضح تنمية مهارات الطفل عمر سنتين في الجانب العاطفي، فبنلاحظ إن الطفل في السن دا بيبدأ يتعلم إزاي يعبر عن اللي جواه.
ولكن الموضوع بيكون صعب عليه، فبيلجأ أوقات لنوبات غضب مع الصريخ، أو السقوط على الأرض، لإنه بيعتبرها أنسب طريقة يقدر من خلالها يظهر مشاعره.
دورنا هنا كأولياء أمور ومربين إننا نعلم الطفل يطور من مهاراته العاطفية، ودا عن طريق:
14- التعاطف مع الطفل
تعاطفنا مع أطفالنا هيساعدهم يعبروا دايمًا عن إحساسهم، وهيعلمهم ضرورة إظهار تعاطفهم مع اللي حواليهم، وهيرفع من مستوى الذكاء العاطفي عندهم، لإنهم عارفين إننا هناخد إحساسهم دا في اعتبارنا.
لكن لما نحسسهم بعدم اهتمامنا للي بيقولوه فطبيعي إنهم يفضلوا عدم التصريح عن مشاعرهم للي حواليهم.
15- مدح الطفل باستمرار على أفعاله الصحيحة
مدح الطفل على الحاجات الكويسة اللي بيعملها في يومه بيزود ثقته في نفسه، وبيخليه مبسوط وهو بيعمل المهام المطلوبة منه.
وكمان بيشجعه إنه يمدح الآخرين، ويعبر عن تقديره لأفعالهم، وبالطريقة دي بنلاحظ تنمية مهارات الطفل عمر سنتين في الجانب العاطفي.
16- تشجيعه على التعبير عن مشاعره
تشجيع الطفل على التعبير عن مشاعره بيساعده يكون طفل مستقر نفسيًا، لإن كبت مشاعره بيسبب مشاكل كتيرة ممكن يعاني منها مع الوقت، وعلاج المشاكل دي مش بيكون سهل.
وبالتالي لازم ولي الأمر يهتم إنه يسأل الطفل عن شعوره، ويشجعه يعبر عن الشعور دا باستمرار، بدون خوف، أو خجل من الآخرين، ودا بيعزز ثقته بنفسه.
عشان يكون طفل سوي قادر على فهم مشاعره والتعبير عنها بسهولة، وفهم مشاعر الآخرين وتقديرها.
تنمية مهارات الطفل عمر سنتين في التفكير
بنلاحظ إن الطفل في عمر السنتين بيكون قادر على تصنيف الأشكال، والألوان المختلفة، وفهم التعليمات البسيطة وتنفيذها، وكمان قدرته على التخيل بتكون أكبر.
تنمية مهارات التفكير عند الطفل لا تقل أهمية عن باقي المهارات اللي ذكرناها، ومن الحاجات اللي بتساعدنا ننمي المهارات دي:
17- ألعاب التصنيف
تصنيف الأشياء تبعًا لألوانها، أو أحجامها بيحسن الإدراك البصري للطفل والذاكرة، وبيطور مهارات التفكير عنده بشكل كبير.
وبالتالي لو استخدمنا ألعاب التصنيف كوسيلة لتنمية مهارات التفكير عند الطفل، هنلاحظ تطور المهارات دي عنده بوضوح.
18- ألعاب المكعبات
من أشهر الألعاب اللي بيستخدمها الأطفال هي لعبة المكبعات، وبنلاحظ إنها بتلعب دور مهم في تنمية مهارات الطفل عمر سنتين في التفكير.
لإن الطفل في كل مرة بيستخدمها بيبدأ يفكر إزاي يحط المكعب في مكانه الصحيح، عشان يكون شكل معين، وبالتالي دا بيساعده على التفكير بطريقة مختلفة باستمرار.
19- طرح الأسئلة
طرح الأسئلة المفتوحة على الطفل، وسماع إجاباته عنها باهتمام بيساعد في تنمية مهارات الطفل عمر السنتين، وبيحسن من إدراكه.
وبالتالي بدل ما تجاوب بس على أسئلة طفلك، تقدر كمان تطرح عليه الأسئلة المفتوحة، وتسمع إجاباتها باهتمام،
وتقدر تقرأ كمان بالتفصيل مقال عن: أنشطة وألعاب ذكاء للأطفال في البيت من عمر 1 إلى 15 سنة.
أهم أسباب تأخر نمو الطفل عمر سنتين
بعض الأطفال في عمر السنتين بيعانوا من تأخر النمو، وتبعًا للأكاديمية الأمريكية لطب الأطفال- AAP قالت إن فحص الأطفال من بداية ولادتهم، وعرضهم على أخصائي طبي بيعد أمر ضروري في متابعة نموهم.
لإنه بيسمح بالتدخل المبكر لما بيحصل أي اضطرابات في نمو الطفل، عشان كدا مسؤولية الأهل مراقبة نمو الطفل، وعرضه على دكتور متخصص بطب الأطفال، خاصة في الفترات المحددة من أكاديمية طب الأطفال وهي عند عمر:
- 9 شهور
- 18 شهر
- 30 شهر
وبيرجع تأخر نمو الطفل لعدة أسباب، من أهمها:
إهمال التغذية الجيدة للطفل
عدم الاهتمام بالتغذية الجيدة للطفل عمر سنتين بيأثر بالسلب على معدل نموه، وبالتالي ممكن يسبب تأخر في النمو مقارنة بباقي الأطفال اللي في نفس العمر.
وهنا بييجي دور الأم في تقديم تغذية سليمة للطفل تساعده على النمو بشكل صحي.
إهمال في إعطاء التطعيمات
تطعيم الأطفال حديثي الولادة بيعد من أهم الإجراءات الوقائية اللى بتقوي مناعة الطفل، وكمان بتقلل من فرص الإصابة بالأمراض زي الشلل، والحصبة، والتقزم وغيره، واللي بيأثر بالتبعية على نموهم.
الولادة المبكرة
موعد ولادة الطفل بيأثر على معدل نموه، فبنلاحظ إن الولادة المبكرة بتزود من احتمالية حدوث مشاكل في نمو الطفل، وتأخر الكلام وغيره من الأعراض، لكن حدوث دا بيكون غير مؤكد.
الخلل الهرموني
كل هرمون موجود بالجسم بيكون له نسبة معينة، ولو زاد أو قل عنها بتحصل مشاكل بالجسم، وبنلاحظ إن نقص هرمون النمو، أو قصور الغدة الدرقية بيسببوا تأخر في نمو الطفل عمر سنتين.
المشاكل الوراثية
بعض الأطفال بيتولدوا بمشاكل وراثية بتكون هي السبب وراء تأخر النمو عندهم، زي متلازمة داون، والتدخل المبكر بالعلاج في الحالة دي بيساعد إلى حد ما في تحسن حالة الطفل.
الخلاصة
تنمية مهارات الطفل عمر سنتين بتتطلب اهتمام وتوجيه من الأهل، واللي لازم يوفروا لطفلهم في المرحلة دي بيئة آمنة للعب والاستكشاف، ويشجعوه على المشاركة في أنشطة متنوعة بتعزز تطوير قدراته الحركية، واللغوية، والاجتماعية.
وكمان لازم تساعد طفلك على تعزيز ثقته بنفسه، عشان تشجعه يكتسب المهارات اللي محتاجها.
أضف تعليق