تنمية مهارات الأطفال 5 سنوات هي واحدة من المسؤوليات اللي ضروري يهتم بيها أولياء الأمور، لأن مهارات الطفل بتتطور في السن دا من الناحية الذهنية والحركية في نفس الوقت، فبيبدأ في السؤال عن الأشياء، وبيزيد شغفه في تجربة كل حاجة جديدة قدامه، عشان يفرغ طاقته الكبيرة.
عشان كدا من الأفضل إنك تتعرف على الطرق والأساليب اللي بتساعد في تنمية مهارات طفلك عشان ينمو ويتطور في الاتجاه السليم، ودا بالتحديد اللي هنتكلم عنه في السطور اللي جاية.
ما هي صفات الطفل في عمر 5 سنوات؟
عشان نقدر نوصل لأدق الطرق والأساليب اللي ممكن نستخدمها في تنمية مهارات الأطفال 5 سنوات لازم الأول نعرف إيه هي صفاتهم في السن دا، عشان نحدد نقط الضعف عندهم، ونشتغل على تطويرها، ومن أهم الصفات دي:
- قدرة متزايدة على استخدام اليد والأصابع بدقة، ودا بيسهل على الطفل الرسم، واستخدام المقص.
- القدرة على استخدام الأجهزة الرقمية، والتفاعل معاها بشكل محدود.
- قدرة الطفل على التعبير عن مشاعره، وفهم مشاعر الآخرين.
- المشي بثقة، والمشاركة في الأنشطة الرياضية الأساسية.
- الكلام بوضوح، وحكاية قصص صغيرة بعبارات بسيطة.
- زيادة عدد الكلمات اللي بيقدر الطفل يستخدمها.
- تطور قدرة الذاكرة على تذكر الأحداث والتفاصيل.
- تكوين الصداقات، ومشاركتهم في الألعاب.
- المساعدة في الأعمال المنزلية البسيطة.
وسواء كان الطفل بيمتلك المهارات اللي ذكرناها دي أو بيفتقدها فمن الأفضل إنك تساعده في تطوير مهاراته في السن دا.
أنشطة وألعاب لتنمية مهارات الأطفال 5 سنوات
عمر الخامسة هو السن اللي بيسبق دخول الأطفال إلى المدارس، وفي الوقت دا بيكون من المهم تنمية المهارات العامة اللي بتعزز من نمو الدماغ بصورة أفضل، لأن دا اللي بيدفعهم للحركة المستمرة، والتطور بصورة صحية.
وكمان نساعده على تعزيز ثقته بنفسه عشان يقدر ينمي حس التعاون والمشاركة مع غيره من الأطفال فيما بعد.
ولأننا بنسأل عن الطريقة اللي بتساعد في تنمية مهارات الأطفال 5 سنوات، فدا بيكون من خلال شوية طرق بتعتمد على الأنشطة والألعاب المختلفة اللي ممكن تضيفها في جدول طفلك اليومي، ودا بديل لقضاء أوقات طويلة قدام شاشة التلفزيون، واللي بتتسبب في إخماد مهاراته العقلية بمرور الوقت.
ومن أفضل الألعاب التي يمكنك البدء بها مع طفلك كلاً من:
1. لعبة لوحة الكلمات
بحسب البحث المقدم من موقع Researchgate بعنوان تطور اللغة عند الأطفال بنلاقي إن التطور اللغوي عند الأطفال بيتأثر بالبيئة اللي حواليهم، عشان كدا مهم نوفر لهم الألعاب والأنشطة اللي بتساعدهم على تنمية المهارات اللغوية.
ومن أبسط الألعاب اللي تقدر تبدأ بيها هي لعبة لوحة الكلمات، سواء باستخدام الألواح المباعة أو باستخدام بعض الأدوات البسيطة في بيتك.
فعلى سبيل المثال، تقدر ببساطة تكتب بعض الكلمات السهلة اللي بتقابل طفلك يومياً زي: “شمس، كرسي، باب، قلم .. وغيرها”.
وكمان تضيف صور لكل كلمة على اللوح، وتخلي طفلك يحط الكلمة جنب ورقة الصورة اللي بتشير ليها، بهدف تنمية مهاراته اللغوية وقدرته على القراءة، وتقدر تحصل على ورك شيت Worksheets من مكتبتنا.
2. لعبة المكعبات
واحدة من أمتع الألعاب اللي بتساعد في تنمية مهارات الأطفال 5 سنوات من الناحية الإبداعية، لإنه بيقدر يلعب بالمكعبات الملونة دي ويسرح بخياله في تشكيل المكعبات إلى أشكال مختلفة، منها الحيوانات أو العربيات، وغيرها من الأشكال اللي ممكن تنفيذها.
كمان في دراسة على NCBI بعنوان “ارتباطات تعقيد بناء المكعبات لدى الأطفال بعمر 3 سنوات مع المهارات المكانية والرياضية اللاحقة” بتوضح إننا لو علمنا الأطفال كيفية البناء باستخدام المكعبات بطريقة ذكية فـ دا ممكن يأثر بشكل إيجابي على مهاراتهم المكانية والرياضية.
3. لعبة الذاكرة
لعبة الذاكرة هي واحدة من الألعاب البصرية اللي بنوصي بيها لتعزيز التركيز، لإنها بتعمل على تحفيز الدماغ -وخاصةً منطقة الذاكرة- على تذكر الأشكال الموجودة في البطاقات التعليمية.
فبيتم كشف بطاقتين على اللوح في وقت واحد، والمفروض طفلك يفتكر البطاقات اللي شبه بعضها، ودا بيعزز انتباه الطفل، وبيزود تركيزه.
تقدر تقرأ: 10 ألعاب لزيادة التركيز عند الأطفال في البيت والروضة والمدرسة
4. لعبة الألغاز – Puzzles
اللعبة دي مش بس بتناسب الأطفال، لكنها تنفع لكل أفراد الأسرة بجميع الأعمار للاستمتاع بيها، وفي نفس الوقت بتشتغل على تنمية وتعزيز العقل، ودا اللي بيساعد في تنمية مهارات الأطفال 5 سنوات المرتبطة بالتنسيق والحس الإدراكي.
وكمان بتعمل على تنمية المهارات الحركية والمعرفية وحتى التعليمية للأطفال، ودا بسبب تنوع ألواح الألغاز، فهنلاقي منها اللي بتشكل صورة في النهاية، ومنها اللي عبارة عن أرقام أو كلمات بيحتاج الطفل إلى تجميعها في شكل صحيح.
5. لعبة فرز الكرات الملونة
الألعاب اللي من النوع دا زي: جمع الكرات الملونة أو قطع الحلوى وحتى الإكسسورات من نفس اللون، بتحفز مهارات الطفل الحركية والإدراكية.
دا لإنه بيتعلم ازاي يفرق بين الألوان بسهولة وفي نفس الوقت بيتحرك لجمع القطع ببعضها، فدا بيساعده في تنمية المهارات الحركية وزيادة نشاطه البدني، وبالتالي بتنمو العضلات والأعصاب بصورة سليمة.
6. لعبة البحث عن الأشياء
هي كمان من الأنشطة والألعاب المميزة في تنمية مهارات الأطفال 5 سنوات، لإنها بتساعد في تعزيز اللياقة البدنية للطفل، لإنه بيتحرك كتير خلال بحثه عن الحاجات الموجودة في البطاقات التعليمية اللي بيتم تقديمها ليه.
فعلى سبيل المثال، تقدر تقدم له صورة زهرة أو شجرة أو نباتات، وهو يدور على حاجات شبهها في الواقع، وبكدا يزيد حسه الإدراكي، وكمان مع التدريب بتتحسن عنده الذاكرة البصرية والتعليمية، من خلال كتابة الكلمة الخاصة بكل بطاقة عليها.
7. لعبة المتاهة
تعد لعبة المتاهة من أفضل الألعاب اللي بتعزز من تنمية مهارات الأطفال 5 سنوات فيما فوق، فهي بتحفز الذهن، وبتنمي مهارات حل المشاكل والعقبات اللي بيمر الطفل بيها خلال محاولته للوصول من نقطة البداية إلى نقطة النهاية في المتاهة دي.
وممكن كمان نكتب أرقام وحروف جوه المتاهة، عشان يقدر الطفل يتتبعها، وبكدا نبقى بنعزز مهاراته التعليمية والإدراكية بشكل تدريجي.
8. لعبة العد
لو عندك الرغبة في تنمية مهارات الأطفال 5 سنوات الحسابية، فمن السهل تعمل دا عن طريق وضع صورة بتحتوي على عدد من حبات التفاح وصورة تانية للبرتقال أو أي نوع من الخضروات والفاكهة المفضلة لطفلك لتعزيز الانتباه.
وبعدها هتحط بعض العمليات الحسابية البسيطة، فعلى سبيل المثال تسأله عن ناتج إضافة 3 حبات من التفاح إلى 2 من حبات البرتقال، وبكدا يكون الجمع أسهل بالنسباله، ودي من الألعاب البسيطة اللي بتنمي القدرات الذهنية للأطفال بعمر الـ 4 – 5 سنوات.
9. لعبة تجاوز العقبات
اللعبة دي بتناسب الأطفال من كل الأعمار، وكمان بتصلح للكبار مع تغيير بسيط في العقبات اللي ممكن تتحط عشان يتم تجاوزها.
واللعبة دي بالتحديد من الألعاب التفاعلية الرائعة اللي ممكن تساهم في تنمية عدد كبير من المهارات اللي بيحتاج ليها الطفل، سواء من الناحية الإدراكية أو العقلية واللغوية والمعرفية.
وبتقوم اللعبة في الأساس على صناعة بعض العقبات باستخدام الأدوات المتاحة حواليك عشان توصل لهدف معين، وبالتالي تقدر تعمل مسار خاص باستخدام المخدات، والترابيزات، والحبال، والكرات الملونة بشكل بسيط.
ويقدر طفلك يعدي من تحتها أو ينط من فوقها أو حتى يجمع الكرات الملونة كمحاولة لإضافة ألعاب أكتر من الألعاب اللي تم ذكرها.
ولو عايز تزود من تنمية مهارات الأطفال 5 سنوات المعرفية وتعزيز الذكاء، فتقدر تضيف الألغاز عن طريق الإجابة عن سؤال أو جمع الكلمات بالصور أو البحث عن شيء في صندوق رملي وغيرها من الألغاز اللي ممكن تضيفها للعبة دي.
نصائح هامة لولي الأمر لتنمية مهارات الطفل
لو عندك الرغبة في تنمية مهارات الأطفال 5 سنوات، فتقدر تعتمد على أي نشاط من الأنشطة اللي ذكرناها، وكمان بننصحك بالحاجات دي:
- ساعد طفلك يتفاعل مع غيره من الأطفال، عشان دا بيعزز من روح التنافس في الألعاب الجماعية.
- خليه يجرب رياضات مختلفة زي: السباحة، والكراتيه، والتنس، وكرة القدم.. وغيرهم، لتقوية عضلاته.
- مارسوا جزء من الأنشطة دي بره البيت، عشان يفرغ أكبر قدر ممكن من طاقته.
- قلل من وقت مشاهدته للتلفزيون، وشجعه على تجربة حاجات جديدة.
متى يجب استشارة الطبيب؟
كل اللي اتكلمنا فيه لحد دلوقت كان هدفه الأساسي هو تنمية مهارات الأطفال 5 سنوات، وتأخر الطفل في تطوير المهارات دي مش بالضرورة يكون ناتج عن سبب مرضي يستدعي القلق.
لكن مراكز السيطرة على الأمراض والوقاية منها (CDC) بتنصح أولياء الأمور بزيارة الطبيب المختص في حالة إن طفلهم بيعاني من حاجة من الحاجات دي:
- التشتت، وصعوبة التركيز على نشاط واحد لأكتر من 5 دقايق.
- مش بيستخدم صيغ الجمع أو الماضي بشكل صحيح.
- عدم القدرة على الكتابة، وصعوبة استخدام الأدوات.
- مش بيعرف يقول اسمه الأول والأخير صح.
- الاستجابة بصعوبة للناس اللي حواليه.
- البعد عن ممارسة الألعاب والأنشطة.
- التأخر في الكلام أو في المشي.
- صعوبة التعبير عن المشاعر.
الخلاصة
في السن دا، بيبدأ ينفتح ويتطور عقل وجسم طفلك بطريقة ملحوظة، وبيكون قادر على اكتساب مجموعة كبيرة من المهارات اللي بترسم طريقه للمستقبل، والعمل على تنمية مهارات الأطفال 5 سنوات بالطريقة اللي ذكرناها بيلعب دور حيوي في بناء أسس قوية لنمو الطفل فيما بعد.
فمن خلال التفاعل وتوفير بيئة تعلم إيجابية، يقدر الأهل يكونوا داعمين بشكل مثالي لتطوير الطفل من كل النواحي، وإدراك العلامات اللي بتشير إلى تأخر الطفل في تطوير مهاراته بيعد خطوة حاسمة، لإنها بتتيح الفرصة للوالدين لاستشارة الأطباء والمتخصصين، عشان يحصلوا على التوجيه الصحيح.
وبكدا نكون قدمنا للوالدين طرق تنمية مهارات الأطفال 5 سنوات المختلفة اللي بنوصي بيها، سواء كان داخل أو خارج البيت.
أضف تعليق