كيفية تعليم النطق للأطفال ثلاث سنوات

اللحظة اللي بينطق فيها الطفل أول كلمة بتكون لحظة مميزة ليه وللأهل، عشان كدا هنلاقي الأهل مترقبين ليها، ومع وصول الطفل لثلاث سنوات هنلاقيهم بيبحثوا عن طرق تعليم النطق للأطفال ثلاث سنوات، ولو ظهرت أي اضطرابات في النطق أو خلل بيبدأ يظهر القلل والخوف.

في المقال دا هنتعرف أكتر إزاي ممكن الأب والأم يبدؤوا رحلة تعليم النطق للأطفال ثلاث سنوات وتكون رحلة مثمرة ومفيدة للطفل.

الفرق بين اضطراب الكلام وتأخر الكلام

بداية قبل ما نتعرف على طرق تعليم النطق للأطفال ثلاث سنوات لازم نفرق بين مشكلة تأخر الكلام ومشاكل اضطراب الكلام.

تأخر الكلام

تأخر الكلام مشكلة مرتبطة بالنمو الطبيعي للطفل ما بين سن السنتين وحتى سن الخمس سنوات، ونقدر نقول تأخر في الكلام لو واجه الطفل صعوبات في تعلم كلمات جديدة أو تكوين جمل مفيدة تتناسب مع عمره، يعني يقدر يتكلم لكن بمعدل بطيء عن الأطفال اللي في نفس عمره، وهيقدر الأهل يحلوا المشكلة دي عن طريق تمارين التواصل، وبعض تقنيات تعليم النطق للأطفال ثلاث سنوات.

اضطراب الكلام

وهي مشكلة بتستمر حتى بعد البلوغ، فنلاقي الطفل عنده صعوبات في نطق بعض الأصوات بشكل صحيح أو عسر الكلام، واللي بينتج عنه صعوبات في فهم اللغة، وعادة ما بيرتبط بمشكلة تانية زي التوحد أو اضطرابات ذهنية وغيرها، وعشان يتعالج محتاج تدخل من أخصائي يوصف حالة الطفل، ويوضح الطرق المناسبة للتعامل معاه؛ عشان يتخطى المشكلة دي بسلام.

طرق تعليم النطق للأطفال ثلاث سنوات

سهل إن الأهل يطوروا من مستوى اللغة والكلام ونطق طفلهم لو كان مش بيعاني من أي مشاكل صحية، أما لو بيعاني من مشكلة تأخر الكلام فقط فمن الحلول العملية المساعدة:

1- اخلقي حوار مع طفلك

استغلي كل فرصة في اليوم وحوليها لأداة تساعد في تعليم النطق للأطفال ثلاث سنوات عن طريق كلامك معاه عن اللي عملتيه في يومك، أو لو محتاج حاجة خليه يتكلم، أو أسأليه أسئلة مفتوحة إجابتها ما تكونش “نعم” أو “لا”، واتناقشي معه باستفاضة، واسمحي له يجاوب، وحاولي دايمًا تغوصي في التفاصيل عشان تخلقي له فرصة لتعلم النطق والكلام.

خليه يطلب احتياجه، زي لما يجوع وأنتي متوقعة دا لأنه معاد الأكل، ما تقدميش الأكل مباشرة، وانتظريه يطلبه ويعبر عن مشاعره، أو خلي بعض الألعاب في مستوى نظره لكن بعيده عن ايده، عشان هو يطلبها، وتقدري تسأليه إيه اللي ممكن يعمله بيها أو عاوزها ليه أو إزاي بيلعب بها، واطلبي منه يعلمك، واستغلي دا، وخليه يتكلم، وأنتي كمان اتكلمي معه.

2- فعلي الألعاب الخيالية

الأطفال في السن دا بيتميزوا إنهم ممكن يخلقوا قصص وحكايات خيالية، ويتوسعوا في خيالهم بشكل كبير، ودي ميزة نقدر نستفيد منها ونحولها لأداة تساعد في تعليم النطق للأطفال ثلاث سنوات، فممكن تبدئي الحكاية مع طفلك، وتخليه يكملها هو بتفاصيل من عنده، ومتقوليش دا موجود أو لا، لأن اللعبة معتمدة على الخيال.

كمان لو في ألعاب موجودة تقدري تخلقي منها حكاية تكونوا أبطالها، وممكن تلاقي طرق تانية تمارسوا بها لعبة ممتعة، وفي نفس الوقت يطور من لغته.

3- اقرئي مع طفلك

القراءة من الأمور الهامة جدًا والفعالة في تعليم النطق للأطفال ثلاث سنوات؛ لأنها بتزود حصيلته اللغوية، وبتضيف ليه مفردات وجمل جديدة.

ممكن توفري لطفلك كتب تناسب عمر الثلاث سنوات، أو تقرئي له من كتب متنوعة قبل النوم، أو في أوقات مختلفة، وهتكون فرصة تقضي مع طفلك وقت ممتع ومفيد، ويزود التقارب بينكم.

4- امنعي الإلكترونيات

احتكاك الطفل أوقات طويلة بشاشات التلفزيون أو الأجهزة الذكية بيأثر عليه تأثير سلبي، وبيضر نموه؛ عشان كدا يفضل إن الطفل يستمتع بطفولته بطرق طبيعية، ويتفاعل مع البيئة من حواليه، ودا هيوفر ليه فرص أحسن لنموه الجسدي والعقلي.

امنعي عنه الإلكترونيات بكافة أشكالها بأكبر قدر ممكن، ولو اضطريتي يتعرض لها يبقى تأكدي إنه بيشوف محتوى هادف وليه قيمة يستفيد منه، ويكون وقتها محدد وقصير.

5- غنوا أغاني

أغاني الأطفال واحدة من أكثر الطرق الفعالة في تعليم النطق للأطفال ثلاث سنوات؛ ودا بسبب السجع اللي فيها والقافية، وتشابه الكلمات، الحاجة اللي بتسهل على الطفل حفظ جمل مترابطة ببعضها بطريقة مسلية وسهلة، وهتلاقيه هو بيحب يكررها.

حاولي تختاري أغاني مفيدة يقدر الطفل يطلع منها بمعاني أو يتعرف على معلومات جديدة، وبكدا تكوني جمعتي ما بين زيادة حصيلته اللغوية والفائدة ليه.

6- أظهري الاهتمام

لما الطفل يتكلم ويحكي موقف ركزي معاه، وخليه يحس إنك مهتمه بالموضوع حتى لو أنتي عارفة الموضوع أو حاسة إنه ملوش لازمة.

اهتمامك وإنك بتسمعي كويس وتركزي في عين الطفل وهو بيتكلم هيخليه يحب يتكلم ويعبر حتى لو كان بكلمات بسيطة، لكن مع الوقت هيطور، ودي من أسهل طرق تعليم النطق للأطفال ثلاث سنوات.

7- جربي تستخدمي معاه لعبة التصنيفات

جربي تجيبي صور لمجموعة حاجات ضمن فئات مختلفة زي: الخضروات، والفواكه، والحيوانات، وغيرها، وخلي الطفل يصنف كل فئة مع بعضها، وساعديه في نطق ومعرفة معلومات عن كل صورة زي: اللون، والحجم، والملمس، وغيرها، دا هيوسع مداركه، ويزود من معلوماته، ويطور لغته.

8- اسمحي لطفلك بالخطأ

مهم واحنا بنبحث ونطبق طرق تعليم النطق للأطفال ثلاث سنوات نراعي إنه هيخطئ أكيد، وفي كلمات وجمل هينطقها خطأ، فحاولي تصححي لكن اختاري إيه اللي تبذلي فيه مجهود وتصححيه زي: إن كل حاجة تكون بمُسماها الصحيح-، وإيه اللي ممكن تتغاضي عنه زي: نطق حرف مثلًا، لإن مع تكراره الصحيح في كلمات مختلفة هيقدر يصححه.

لو طفلك كان بيتكلم وأخطأ في التفاصيل ما تقطعيش، وخليه يكمل كلامه للنهاية، وبعدها تقدري تصححي، وتخلقي حوار كمان من كلامه دا هيكون أفضل، ولازم تكوني صبورة؛ هو مش هينطق ويقول كل حاجة صحيحة، لأنه محتاج وقت.

متى يحتاج الطفل المساعدة؟

قبل ما يبحث الأهل عن طرق تعليم النطق للأطفال ثلاث سنوات ويشعروا بقلق على طفلهم محتاجين يعرفوا الأول إن الطفل في عمر الثلاث سنوات عادة ما بتكون حصيلته اللغوية عبارة عن ما يقرب من 200 كلمة، ويقدر يكون جمل من كلمتين أو ثلاث كلمات، وسهل يعمل حوار مع أي شخص يسأل ويرد في حوار مكون من جملتين، واللي قدامه قادر يفهم أغلب الكلمات اللي بيقولها بسهولة.

لو كان طفلك حصيلته اللغوية أقل من 50 كلمة، أو صعب الناس اللي حواليه يفهموه معظم الوقت، أو مش بيتفاعل بمستوى طبيعي فيفضل إنك تستشيري طبيب متخصص؛ عشان تطمني على طفلك وتتأكدي من سلامة السمع عنده، وإنه مش بيعاني من أي اضطرابات تانية تأثر على مهاراته اللغوية، أو السمع والكلام عنده.

الخلاصة

أهم حاجة بيحتاجها الطفل هي الحب والحنان والرعاية، وكل ما أظهرتي مشاعر إيجابية نمو الطفل هيكون أفضل، عشان كدا أفضل طريقة في تعليم النطق للأطفال ثلاث سنوات هي الاهتمام والتنويع في طرق التعليم والتطبيق، وما تستعجليش على النتائج، لأنها بتحتاج صبر وبذل مجهود، ولو ظهرت أعراض اضطراب الكلام اعرضي طفلك على طبيب مختص، وهيساعدك في العلاج لو في مشكلة طبية، أو يوجهك بالطرق المناسبة للتعامل معاه.

يمكنك أيضًا قراءة: تنمية مهارات الطفل عمر سنتين | 16 فكرة فعالة لتنمية مهارات طفلك