مع تطور التكنولوجيا التعليم مابقاش مجرد كتب وكراسات، لكن بقى في أدوات رقمية تساعد الأطفال يتعلموا بطريقة تفاعلية وممتعة. تطبيقات تعليمية للأطفال واحدة من أهم الوسائل اللي بتساعدهم على اكتساب مهارات جديدة، سواء في القراءة، الحساب، أو حتى التفكير الإبداعي.
بس السؤال اللي ممكن يدور في بالك: هل فعلًا التطبيقات دي مفيدة؟ الحقيقة إن الإجابة بتعتمد على اختيار التطبيق المناسب وطريقة استخدامه.
في المقال دا، هنوضح لك إزاي تختاري التطبيق المناسب لطفلك، وإيه أفضل التطبيقات لكل سن، تابعي معانا.
تطبيقات تعليمية للأطفال: إزاي تختاري الأنسب لسن ابنك؟
مش كل التطبيقات التعليمية مناسبة لكل الأطفال، لأن كل سن ليه احتياجاته وطريقة تعلم مختلفة. علشان كدا قبل ما تحمّلي أي تطبيق، خدي بالك من الحاجات دي:
الفئة العمرية
لازم تختاري تطبيق مناسب لعمر طفلك، لإن بعض التطبيقات بتكون معقدة على الأطفال الصغيرين أو بسيطة زيادة عن اللزوم للكبار.
الأهداف التعليمية
حددي إنتِ عايزة ابنك يتعلم إيه؟ قراءة، حساب، لغات، ولا مهارات إبداعية؟ كل مجال له تطبيقات متخصصة.
الواجهة والتفاعل
الطفل محتاج تطبيق سهل وجذاب عشان يفضل مهتم وما يزهقش بسرعة.
التقييمات والمراجعات
شوفي رأي الأهالي التانيين في التطبيق قبل ما تنزليه، واتأكدي من إن المحتوى آمن ومفيد فعلًا.
وبعد ما تحددي التطبيق المناسب، كمان مهم تتابعي استخدام طفلك له، علشان تضمني إنه بيستفيد بجد ومش مجرد لعب.
أشهر تطبيقات تعليمية للأطفال لكل مهارة
التطبيقات التعليمية كتيرة ومتنوعة في محتواها، ولإن الهدف الأساسي من استخدامها هو تطوير مهارات الطفل فلازم تركزي في نوع المهارة اللي التطبيق هينميها ويشتغل عليها، وعشان كدا بتنقسم التطبيقات لـ:
تطبيقات لتعليم الحروف والقراءة
من أكتر المنصات المفيدة للأطفال في سن ما قبل المدرسة، لإنها بتقويهم وتأسسهم في سن صغير بشكل مناسب للأعمار دي، ووجود تطبيقات قصصية لمختلف الأعمار بيقوي من اللغة عند الطفل، ومن أبرزها:
1- تطبيق Epic
واحد من أفضل تطبيقات تعليمية للأطفال الخاصة بالقراءة، والتطبيق دا عبارة عن مكتبة كتب إلكترونية ضخمة بتوفر أكتر من 35 ألف كتاب للأطفال.
ومن أبرز مميزاته هي “القراءة لي”، اللي بتساعد الأطفال الصغار اللي لسة بيتعلموا القراءة، دا غير إنه كمان مناسب للأطفال اللي بيعتمدوا على الشاشات لقضاء وقتهم، وهو عملي جدًا للعائلات اللي عندها أطفال بأعمار مختلفة.
2- إيه بي سي ماوس
تطبيق “إيه بي سي ماوس” (ABCmouse.com) هو واحد من أفضل تطبيقات تعليمية للأطفال في سن ما قبل المدرسة، ودا لإنه يعتبر بديل رائع لو الطفل مش بيدخل حضانة أو مدرسة تمهيدية، لأنه بيجهّزه للمرحلة الابتدائية.
والتطبيق بيسمح للوالدين بمتابعة تقدم الطفل، وبيوفر أكتر من 10 آلاف نشاط تعليمي، زي الألعاب التعليمية في الرياضيات والعلوم وفنون اللغة، بالإضافة للأنشطة الفنية والأغاني والألغاز.
والتطبيق متاح على الكمبيوتر والموبايل، وبيوفر 30 يوم تجربة مجانية، وبعدها بيكون الاشتراك بـ 13 دولار في الشهر.
3- تطبيق أقرأ بالعربية
هو برنامج متكامل هدفه تقوية اللغة العربية وتطوير مهارات القراءة والكتابة والمحادثة والاستماع عند الأطفال.
وبيحتوي على أقسام زي مستواي اللي بيتكون من مواضيع مختلفة زي أيام الأسبوع، والتعرف على المشاعر، وغيرها من المواضيع، وكل موضوع بيكون فيه اختيار الكتابة، والاستماع، والاختبار.
كل المواضيع متاحة بألوان زاهية وشكل قصصي ممتع، وبيتوفر قسم الفيديو اللي بيجمع موضوعات تعليمية مختلفة، دا غير قسم الفنون والمكتبة وغيرها، وهدفهم كلهم تعليم الأطفال بشكل ممتع.
4- تطبيق عدنان معلم القرآن
هو تطبيق تفاعلي لتعليم الطفل القرآن والأذكار وحروف الهجاء.
فيه قسم القرآن بيعرض السور بالترتيب ويقرأها أكتر من مرة بشكل صحيح ويمكن إعادتها أو وقف التلاوة، ويمكن تحديد عدد مرات تكرار الآيات بما بتناسب مع الطفل.
وقسم الأذكار عبارة عن غرفة تفاعلية للطفل بتفيده في الاستكشاف، فمن خلال الضغط على أي جزء بيطلع ذكر يخصه؛ زي أذكار النوم والمنزل.
وقسم حروف الهجاء بيعتمد على ربط الحروف بالصورة والكلمة.
5- تطبيق حدثني
من أفضل تطبيقات تعليمية للأطفال وبيضم مجموعة قصص مفيدة، متقسمة لمجموعات كل واحدة فيها بتضم مجموعة من القصص، وبتكون متوفرة قراءة واستماع باستخدام الصور، وبتتيح تسجيل صوت قراءتك فممكن تحفظيه لو الطفل بيحب يسمعها منك.
دا بالإضافة إنه بيمكن المستخدم من إضافة قصة خاصة بيه، ويختارلها عنوان ويسجلها بصوته وتتحفظ.
تطبيقات لتنمية المهارات الحسابية
الحساب من أكتر المهارات المهمة للطفل من سن صغير، وتعلمه ليها بشكل ممتع بيفرق معاه جداً في المراحل الدراسية بعد كدا.
6- تطبيق Prodigy
تطبيق “برودجي” (Prodigy) هو واحد من أفضل تطبيقات تعليمية للأطفال الخاصة بالرياضيات في المرحلة الابتدائية. ودا لإنه مصمم على شكل لعبة فيديو خيالية، وبيغطي مواضيع الرياضيات من الصف الأول حتى الصف الثامن.
والتطبيق بيختبر معرفة الأطفال في الرياضيات بدل ما يعلمهم من الصفر، وبيسمح لهم بكسب نقاط من خلال الإجابة الصحيحة على الأسئلة، والمشاركة في معارك مع وحوش خيالية.
التطبيق الأساسي مجاني، لكن الاشتراك المدفوع بيوفر مميزات إضافية وبيكلّف حوالي 60 دولار سنويًا.
7- تطبيق Elephant Learning Math Academy لتعليم الرياضيات
هو تطبيق متخصص في تعليم الرياضيات للأطفال من سن سنتين لـ 16 سنة. وبيوفر التطبيق محتوى تعليمي ممتع وتفاعلي، بيشمل تمارين وألعاب لتعليم الجمع، الطرح، الضرب، القسمة، الكسور، والنسب.
8- تطبيق 3 2 1
عبارة عن ألعاب تعليمية بتركز بشكل أساسي على تعليم الطفل الأرقام لكن بطريقة مسلية، وكل رقم بيتعرض بطريقة تفاعلية، وبدون أي تكرار عشان مايحسس بأي ملل.
ومرة بتكون بتوصيل الأشكال في مكانها المناسب، و مرة باختيار الرقم الصحيح، وكمان بالكتابة وغيرها من الألعاب التفاعلية، وكل الأرقام بتكون بنفس المبدأ لكن برسومات وبطريقة تقديم مختلفة.
تطبيقات لتنمية الإبداع والتفكير النقدي والمهارات الاجتماعية
وجود تطبيقات تعليمية للأطفال خاصة بالمهارات بأنواعها سهّل المهمة دي على الأهالي وبيوحيلهم بأفكار إبداعية يطبقوها مع أطفالهم لتنمية مهاراتهم، ومن أشهرها:
9- تطبيق Busy Shapes
تطبيق “بيزي شيبس” (Busy Shapes) مناسب للأطفال من سن 3 لـ 7 سنوات، وبيستغل حب الأطفال الصغار في تحريك الأشكال وترتيبها في أماكنها المحددة.
والتطبيق دا بيعلّم الأطفال الوعي بالمكان وحل المشكلات من خلال اللعب، ودا من غير ما يحسوا إنهم بيتعلموا. وبيتوفر بـ 8 لغات، وبيتماشى مع طريقة “مونتيسوري” اللي بتشجع على التعلم الذاتي والتفاعلي.
دا غير إن التطبيق مصمم علشان ينمّي مهارات التفكير المنطقي عند الأطفال، وبيعلّمهم إزاي الأشياء بتكون مرتبطة ببعضها وبيمكنهم من التحكم فيها.
10- تطبيق Google Arts and Culture
من أشهر تطبيقات تعليمية للأطفال هو تطبيق “غوغل آرتس آند كاليتشر” اللي بيسمح للطلاب باستكشاف الفن والتاريخ والجغرافيا والثقافات من كل أنحاء العالم؛ من خلال توفير جولات افتراضية في المتاحف، وبيعلّم الأطفال عن الأطعمة العالمية والثقافات المختلفة.
بيتوفر التطبيق بشكل مجاني، وبيحتوي على كم هائل من المعلومات عن المتاحف والفنانين والمسرح والأحداث التاريخية. ودا بيخلّيه مصدر قيم للمراهقين اللي بيعملوا أبحاث أو مشاريع مدرسية، لأنه بيوفر معلومات غنية بالصور والفيديوهات.
11- توقف وتنفس وفكر
تطبيق “توقف وتنفس وفكر” (Stop, Breathe and Think) هو تطبيق ممتاز لتعليم الأطفال اليقظة الذهنية وإدارة المشاعر.
وبيبدأ بطلب من الأطفال ياخدوا نفس عميق، وبعدها بيطلب منهم يعبّروا عن مشاعرهم باستخدام الرموز التعبيرية. بناءً على الردود، وبيقترح تمارين تأمل موجهة تستغرق أقل من 10 دقائق.
دا غير إن التطبيق دا بيعلّم الأطفال كيفية التعامل مع مشاعرهم بطريقة صحية، وبيعزز التعلم الاجتماعي العاطفي.
12- تطبيق Bini Drawing for Kids Games لتعليم الرسم
بيُساعد الأطفال على تعلم الرسم وتحويل رسوماتهم لرسوم متحركة، ودا بيزيد من متعة التعلم. وبيشمل كتاب تلوين مدمج وأنشطة متنوعة علشان ينمّي مهارات الأطفال الأساسية.
كمان الأطفال يقدرُوا يحفظوا رسوماتهم ويشوفوها في أي وقت.
تطبيقات شاملة
بعض التطبيقات التعليمية للأطفال بتشمل تعلم أكتر من مهارة، ومن أشهرهم:
13- أكاديمية خان (Khan Academy)
أكاديمية خان هي منظمة غير ربحية تهدف لنشر العلم بأساليب مبتكرة وغير تقليدية. وبتوفر مجموعة ضخمة من الدورات التعليمية المجانية المناسبة لكل الأعمار.
وبتشمل فيديوهات تعليمية بتغطي كل المستويات وبتشمل مواضيع متنوعة زي الرياضيات، العلوم، الهندسة، الفنون، التاريخ، الاقتصاد، والعلوم الإنسانية.
علشان كدا أكاديمية خان بتعتبر من أفضل تطبيقات تعليمية للأطفال، سواء على أندرويد أو آيفون. فبمجرد تحميل التطبيق بيكون فيه 5 شخصيات بتوجه الأطفال خلال مكتبة كبيرة من الكتب التفاعلية، الدروس، الفيديوهات، المقالات، والخرائط، علشان تساعدهم على تطوير مهاراتهم الدراسية والاجتماعية.
14- تطبيق Tiny Tap
واحد من أبرز تطبيقات تعليمية للأطفال، وبيضم مسارات تعليم متنوعة وكتيرة في مختلف المجالات، بيطلب فالبداية اسم الطفل واللغة اللي بيتكلم بيها وبعدها بيحدد عمره، وبيوفر محتوى من عمر سنتين وحتى 14 وفوق.
وبعد ما يفتح التطبيق بيكون فيه أقسام كتيرة منها الحساب، والعربية، والإنجليزية، وتعلم الرياضيات وغيرها، وفي قسم خاص لتعلم الرسم بخيارات متنوعة للحروف والأشكال والأرقام وغيرها، وكلها بتكون بطريقة بسيطة عشان يتعلم الطفل طريقة الكتابة.
أما اقسام التعليم فبتقدم المحتوى بطريقة مسلية وممتعة للطفل، اللعبة بتكون عبارة عن مراحل، وفي كل مرحلة بتقدم له تحدي مناسب لعمره من خلال توصيل الأشكال، أو حسب الألوان وغيرها.
والتطبيق غني بكل أنواع الألعاب وفي كل المجالات حسب رغبة الطفل، وبيتحمل من خلال الضغط على علامة التحميل وبتفتح اللعبة مباشرة.
تطبيقات لتعلم اللغات
نشأة الطفل في وجود أكتر من لغة بيتعامل بيها من أكتر المهارات اللي بتفيده بعدين، وبتحسن من شخصيته وثقته بنفسه، فلو اللغات واحدة من المهارات اللي هتركزي عليها مع طفلك فتطبيق دولينجو من أفضل التطبيقات اللي ممكن تساعدك في كدا.
15- تطبيق Dinolingo لتعليم اللغات
تطبيق Dinolingo بيُساعد الأطفال في تعلم لغات جديدة من خلال ألعاب، فيديوهات، وأوراق عمل.
وبيركز التطبيق على تعليم الأطفال مواضيع يومية زي الأدوات المنزلية، أجزاء الجسم، الملابس، والأفعال الأساسية.
والمحتوى التعليمي بيتقدّم بطريقة جذابة وممتعة، علشان يكون الطفل عنده الرغبة في تكرار الدروس من غير ما يمل.
التطبيق مناسب للأطفال من سن سنتين لـ 12 سنة، وبيدعم 51 لغة، منها العربية، الإنجليزية، الإسبانية، والألمانية.
تطبيقات تعلم البرمجة للأطفال
البرمجة واحدة من أهم المهارات اللي لازم تعلميها لطفلك بمختلف الوسائل المتاحة، والتطبيقات التعليمية هتفيدك جداً في الرحلة دي، ومن أهمهم:
16- هوب سكوتش
تطبيق “هوب سكوتش” (Hopscotch) هو واحد من أفضل تطبيقات تعليمية للأطفال الخاصة بالبرمجة خصوصًا للمبتدئين.
والتطبيق مناسب للأطفال من سن 9 لـ 11 سنة، وبيعلّمهم البرمجة وحل المشكلات والمهارات المنطقية من خلال إنشاء مشاريع ممتعة.
وبيتوفر التطبيق بشكل مجاني، لكنه مش متاح على أجهزة أندرويد، ودا يعتبر من عيوبه.
وبنلاقي إن التطبيق بيشبه برنامج “سكراتش”، وبيساعد الأطفال على تعلم أساسيات البرمجة من غير ما يتعرضوا للتعقيدات التقنية.
17- تطبيق Scratch
تطبيق Scratch هو واحد من أسهل تطبيقات تعليمية للأطفال الخاصة بالبرمجة. وبيستخدم التطبيق واجهة بسيطة قائمة على سحب وإسقاط الكتل البرمجية، ودا بيسمح للأطفال ببرمجة قصص وألعاب تفاعلية.
وبيناسب التطبيق الأطفال من سن 5 لـ 16 سنة، وبيساعدهم على تطوير مهارات حل المشكلات والإبداع.
ومن مميزات تطبيق Scratch:
- مناسب للأطفال الصغار والمراهقين.
- ممتع في طريقة تعليمه للبرمجة.
- متاح مجانًا لأجهزة أندرويد وآيفون.
اقرأ أيضاً: منصات تعليمية مجانية للأطفال | أفضل 12 منصة مجربة.
أفضل التطبيقات التعليمية للأطفال لكل مرحلة عمرية
اختيار التطبيق الصح بيعتمد على سن الطفل واحتياجاته التعليمية، فبتتقسم التطبيقات المناسبة لـ:
للأطفال من 2 – 4 سنوات
تطبيقات تركز على التعرف على الألوان، الأشكال، والحروف، زي Endless Alphabet و Baby Shark Best Kids Songs.
للأطفال من 4 – 6 سنوات
تطبيقات تعلم أساسيات القراءة والرياضيات بطريقة ممتعة، زي Khan Academy Kids و ABCmouse.
للأطفال من 6 – 9 سنوات
تطبيقات تعلم البرمجة المبسطة، العلوم، وتنمية مهارات التفكير، زي Scratch Jr و Toca Lab: Elements.
للأطفال من 9 – 12 سنة
تطبيقات متطورة زي Duolingo لتعلم اللغات، وThinkrolls اللي بتنمي مهارات التفكير المنطقي.
المهم هو اختيار التطبيقات اللي تناسب احتياجات طفلك وتشجعه على التعلم من غير ما يحس إنه مجبر.
اتعرف على: أكثر من 20 دورة لتعليم الذكاء الاصطناعي للأطفال 2024.
إزاي تخلي التطبيقات التعليمية مفيدة لطفلك؟
مجرد تحميل التطبيق مش كفاية، المهم هو إزاي الطفل يستخدمه ويستفيد منه فعلًا. جربي النصائح دي:
حددي وقت الاستخدام
مش كل الوقت لازم يكون على التابلت أو الموبايل، خليه وقت محدد عشان يفضل متحمس وما يتعودش على الكسل.
شاركيه التعلم
جربي تقعدي معاه وتلعبوا سوا في التطبيق، دا هيحفزه ويخليه يستفيد أكتر.
اختاري التطبيقات التفاعلية
التطبيقات اللي بتطلب من الطفل المشاركة والتفكير أفضل من اللي مجرد بتعرض محتوى ثابت.
راقبي تقدم طفلك
بعض التطبيقات بتوفر تقارير عن أداء الطفل، استخدميها عشان تعرفي إيه الحاجات اللي محتاجة تحسين.
وأخيراً، التكنولوجيا مصدر متنوع ومهم لتنمية مهارات طفلك، ومن أسهل الطرق اللي تقدري تستخدميها لبناء شخصيته بشكل مختلف.
ومن وسائل التكنولوجيا دي تطبيقات تعليمية للأطفال اللي تقدري بسهولة تحمليها على موبايلك أو الكمبيوتر في البيت وتخلي وقت طفلك مشجع وممتع وبيتعلم فيه كمان.
تقدري تختاري التطبيق الأنسب من اللي ذكرناهم في المهارات المختلفة، وخصصي وقت معين ليه وركزي على تطبيق واحد لكل مهارة، وراقبي تطور طفلك مع الوقت عشان تاخدي نتايج مثمرة منها.
أضف تعليق