تعد المدارس الدولية الحكومية مشروع تجريبي وطني غير هادف للربح، بيسعى إلى المساهمة في تطوير التعليم في مصر.
فبدأت وزارة التربية والتعليم في عام 2014 في توفير مدارس دولية حكومية، بمصروفات مخفضة مقارنةً بمصروفات المدارس الدولية الخاصة، وفتحت فروع مختلفة ليها في مختلف المحافظات باسم “المدارس المصرية الدولية” و “المدارس الرسمية الدولية”.
وكترت الأسئلة حول الفرق بين المدارس المصرية الدولية والمدارس الرسمية الدولية، عشان كدا في المقال دا هنتعرف الفرق بينهم بالتفصيل، فتابع معانا.
المدارس المصرية الدولية – EIS
المدرسة المصرية الدولية، هي مدرسة دولية حكومية لتدريس مناهج البكالوريا الدولية (IB)، وموجود من المدارس دي 3 فروع، وهي:
- المدرسة المصرية الدولية بالشيخ زايد – Egyptian International School El Sheikh Zayed – EI Zayed
- المدرسة المصرية الدولية بالمعراج – The Egyptian International School In El-Marg
- المدرسة المصرية الدولية بالتجمع الخامس – Egyptian International School Fifth Settlement – EIS
وكل من المدارس المصرية الدولية بالشيخ زايد، والمصرية الدولية بالمعراج، والمصرية الدولية التجمع الخامس، أخدوا الاعتماد من منظمة البكالوريا الدولية لتدريس الثلاث برامج التعليمية للمنظمة، وهم:
- برنامج المرحلة الابتدائية (Primary Years Programme (PYP)).
- برنامج المرحلة المتوسطة (Middle Years Programme (MYP)).
- برنامج مرحلة الدبلومة او الثانوية (The Diploma Programme (DP)).
والمدارس المصرية الدولية تقع تحت إشراف 3 جهات وهم:
- وزارة التربية والتعليم.
- منظمة البكالوريا الدولية.
- المدارس الراعية، زي: مدرسة جرين لاند بالشيخ زايد و مدرسة واحة المعادي الدولية.
وكثافة الفصل بتكون 25 طالب، والحد الأقصى بيكون 30 طالب، كمان الدراسة بتكون باللغة الإنجليزية بجانب اللغة العربية، والتربية الدينية، والدراسات الاجتماعية.
والمدرسين اللي بيدرسولهم هم مدربين من قبل هيئات تابعة للمنظمة، وبيتم التعامل في المدرسة المصرية الدولية والمدارس الرسمية الدولية زي بعض، فليهم نسبة 5% من مقاعد الجامعات الحكومية لحد دلوقتي.
مواعيد التقديم وسن القبول
بيفتح التقديم الالكتروني في شهر فبراير لفرعي الشيخ زايد والتجمع، وبيفتح باب التقديم لفرع المعراج في شهر يونيو من كل سنة.
وسن القبول بالمدرسة من سن 4 سنوات لـ 6 سنوات إلا يوم في 1 أكتوبر من كل عام تقديم, ودا للقبول في رياض الأطفال واحد (PYP 2) لإنه ما بيتوفرش ليهم مرحلة التمهيدي وهي (PYP 1).
وبتبدأ المصاريف من 14000 جنيه لحد 22000، حسب كل مرحلة عمرية، وممكن يتم دفعها على أقساط.
المدارس الرسمية الدولية – IPS
استكمالًا للكلام عن الفرق بين المدارس المصرية الدولية والمدارس الرسمية الدولية بنلاقي إن المدارس الرسمية الدولية، هي مدارس حكومية دولية بتطبق المناهج البريطانية (IG) تحت اشراف وزارة التربية والتعليم، ومؤسسة المدارس الدولية.
وبتقدم شهادة الـ” IG” الشهادة البريطانية زيها زي أى شهادة دولية موجودة فى مصر، والمدرسة بتتبع نفس المؤسسة الدولية اللي بتعتمد الشهادات.
بداية العام الدراسي الأول للمدراس الرسمية الدولية كان في 2018-2019، وفروع المدرسة الرسمية الدولية في القاهرة والجيزة، هي:
- المدرسة الرسمية الدولية بمصطفي النحاس – International Public School Mostafa El Nahas
- المدرسة الرسمية الدولية بزهراء مدينة نصر – International Public School – Zahraa Nasr City
- المدرسة الرسمية الدولية بالشروق – International Public School El Shorouk
- المدرسة الرسمية الدولية بالعبور – International Public School El Obour
- المدرسة الرسمية الدولية 6 أكتوبر – International public school 6 October
- المدرسة الرسمية الدولية اكتوبر منطقة الـ 800 فدان – International Public School 6 October
- المدرسة الرسمية الدولية أكتوبر 3 – International Public School October 3 – IPS
مواعيد التقديم وسن القبول
بتختلف المصرية الدولية والمدارس الرسمية الدولية في مواعيد فتح باب التقديم لكل عام، فكان التقديم للمدارس الرسمية الدولية في يونيو للعام الدراسي 2020/2021، وفي فبراير للعام الدراسي 2021/2022.
وكان من يوم 30 أبريل 2022 لحد 1 يونيو 2022 في العام الدراسي 2022/2023.
أما عن السنة دي فأعلنت وزارة التربية والتعليم والتعليم الفني، إن فتح التقديم للمستوى الأول (FS1) بمرحلة رياض الأطفال لجميع فروع المدارس الرسمية الدولية (IPS) للعام الدراسي 2024/2023 إنه من يوم 1 مارس 2023 حتى 15 أبريل 2023.
كمان وضحت الوزارة إن التقديم بيتم بالخطوات دي:
- الدخول على شروط الالتحاق عن طريق QR Code الخاص بكل فرع.
- الدخول على لينك التقديم من الـ QR code.
- كتابة البيانات المطلوبة.
وسن القبول بالمدارس لرياض الأطفال (FS1) من سن 4 سنوات لـ 5 سنوات إلا يوم.
مصاريف المدارس الدولية الرسمية
بتختلف مصاريف المدارس المصرية الدولية والمدارس الرسمية الدولية، فبتبدا الدولية الرسمية من 15000 جنيه، ومصاريف مرحلة رياض أطفال ومرحلة الابتدائي هي:
- رياض الأطفال (FS1): 15460 جنيه.
- رياض الأطفال (FS2): 16510 جنيه.
- الصف الأول الابتدائي: 19715 جنيه.
- الصف الثاني الابتدائي: 20765 جنيه.
- الصف الثالث الابتدائي: 21815 جنيه.
- الصف الرابع الابتدائي: 23095 جنيه.
شروط التقديم في المدارس الرسمية الدولية 2023
- سن الطفل ميقلش عن 4 سنين وميزدش 5 سنين إلا يوم، في أول أكتوبر سنة 2024.
- الطالب يكون سليم جسمانيًا ونفسيًا من أي إعاقات نفسية أو ذهنية، تخليه محتاج معاملة خاصة.
- حصول الوالدين على مؤهل جامعي مع تقديم الإثبات؛ عشان يقدروا يواكبوا منهج الطفل ويساعدوه في المذاكرة جوه البيت.
- اجتياز اختبارات الذكاء والاختبارات النفسية للطفل قبل القبول.
- حضور موعد المقابلة الخاص بولي الأمر -بعد اجتياز الطفل الاختبارات-، ولازم حضور الأب والأم مع بعض عشان يتم التقييم.
ملحوظة: لو أعداد الطلاب المقدمين كتير هيتم تطبيق نظام الأولوية، وقائمة الانتظار، حسب الأماكن المتاحة في كل فرع من فروع المدرسة، ولو الطلاب كلهم متساويين في الاختبارات هيتم الاختيار حسب السن، فيتم قبول الطفل الأكبر في السن ولكن ميتعداش ال 5 سنين إلا يوم زي ما اتكلمنا.
وهنا بيتضح الفرق بين المدارس المصرية الدولية والمدارس الرسمية الدولية في العديد من النقاط.
اختبارات يخضع إليها الطالب عند التقديم في المدارس الرسمية الدولية
- المعلومات العامة المناسبة لسن الطفل.
- المظهر والسلوك الشخصي.
- مهارات التفكير الإبداعي.
- مهارات الرياضيات.
- المهارات الحركية.
الخلاصة
وبكدا نكون وضحنا الفرق بين المدارس المصرية الدولية والمدارس الرسمية الدولية، فبنلاقي إن المدارس الدولية في مصر بتعمل وفق مناهج دولية معترف بها عالميًا زي: البرنامج الدولي للبكالوريا (IB)، وبتتميز بتوفير بيئة تعليمية متعددة الثقافات، تعزز التفاهم العالمي، ومهارات التفكير النقدي، والإبداع للطلاب.
أما المدارس الرسمية المصرية فهي مدارس حكومية دولية بتطبق المناهج البريطانية (IG) تحت إشراف وزارة التربية والتعليم، ومؤسسة المدارس الدولية، وبتشمل جميع المراحل التعليمية بداية من رياض الأطفال وحتى الثانوية العامة.
ولإن المدرسة بتلعب دور حاسم في تطوير الأجيال فاحرص إنك تختار المدرسة المناسبة لابنك بعناية.
أضف تعليق