الفرق بين المدارس اليابانية والمدارس الحكومية

الفرق بين المدارس اليابانية والمدارس الحكومية

مع نمو الطفل؛ بيبدأ ولي الأمر يوفر له كل الاحتياجات والمتطلبات اللي هتساعده يكبر بأفضل شكل، وبمرور الوقت بتكبر الاحتياجات دي وما بتبقاش مجرد احتياجات، ولكنها بتتحول لقرارات مصيرية هتفرق بشكل أساسي في تربيته وتعليمه عشان يخرج للمجتمع شخص سوي من كل الجوانب، ومن أهم القرارات دي اختيار المدرسة اللي هيقدم فيها عشان يبدأ مسيرته التعليمية.

ومن المدارس اللي بتيجي في المقدمة بخصوص الجزء دا هي المدارس اليابانية ودورها الكبير في إنها تخرج جيل مختلف ومميز، عشان كدا هنعرف كل ما له علاقة بيها وكافة تفاصيلها في المقال دا.

ما هو نظام التعليم الياباني أو ما يعرف بنظام الـ “توكاتسو”؟

كلمة “توكاتسو” بتشير لمفهوم تنمية الطفل بشكل كامل من كافة جوانب شخصيته ،ودا بيحصل عن طريق تقويم سلوكياته وتنمية مهاراته المختلفة سواء من الناحية اللغوية والمعرفية أو من الناحية الاجتماعية والحركية، بجانب تهذيب قيّمه واتجاهاته بدرجة الأهمية نفسها لتنمية خبراته ومعلوماته ومهاراته العقلية، وبكدا هو ما بيهدفش إلى تعليم الطفل بشكل أكاديمي وبس؛ وإنما هدفه الأساسي هو تحقيق التنمية الشاملة لذاته من الألف للياء قدر الإمكان.

ما الأنشطة الخاصة بالـ “توكاتسو” التي يتم تطبيقها في المدارس اليابانية؟

أشكال الأنشطة الخاصة بنظام الـ “توكاتسو” كتيرة ومتنوعة وبتختلف في طريقة تنفيذها، ولكن من أهمها:

أولًا: أنشطة الفصل

الأنشطة دي بتتعلق بمشاركة التلاميذ في تكوين وتنظيم الحياة داخل الفصل والمدرسة، وأنشطة إضافية هدفها الأساسي هو التفاعل مع الحياة اليومية والدراسة والتنمية الذاتية، مع أنشطة الصحة والسلامة، بجانب أنشطة تناوب الممارسات اليومية المختلفة في الفصل.

ثانيا: أنشطة مجلس التلاميذ

من خلال الأنشطة دي بيتم تأسيس مجالس للتلاميذ وإدارة وتخطيط الأنشطة اللي حابين يقوموا بيها أو اللي مدرسينهم طلبوها منهم، إلى جانب التبادل الثقافي اللي بيتم فيها بين فئات مختلفة في السن داخل المدرسة.

ثالثا: المناسبات المدرسية

أنشطة بتهدف لتنمية الشعور بالانتماء والتكافل مع الآخرين عند الطفل، إضافة للشعور بالعمل للمصلحة العامة من خلال أنشطة تطبيقية بيقوم بيها التلاميذ على مستوى المرحلة الدراسية أو المدرسة بشكل عام لما يكون في مناسبات متعلقة بالمدرسة أو مناسبات عامة.

الأسس التي تقوم عليها الممارسات الخاصة بالمدارس اليابانية

الأسس التي يقوم عليها الممارسات الخاصة بالمدارس اليابانيةتعتمد الأنشطة الخاصة بنظام الـ “توكاتسو” على عدد من الأسس، من أبرزها:

تحول دور المعلم من مدرس إلى ميسر

في النظام الخاص بالمدارس اليابانية بيتحول دور المعلم من مدرس ومٌلقن لتعليم المفاهيم والوصول إلى إجابة صحيحة فقط إلى ميسر وموجه لتسهيل عملية التعلم الاجتماعي، واللي بيكون فيها الطالب هو الأساس والمحور عن طريق تنمية مهاراته من خلال التجربة والمحاولة والخطأ بدلًا من إن المعلم هو اللي يكون المحور أو اللي بتعتمد عليه العملية التعليمية بشكل كامل.

المدرسة هي المجتمع الصغير

المدرسة بالنسبة للأطفال هي مجتمعهم الصغير اللي بيقدروا يتعايشوا فيه بكل فعالية، ودا بدوره بيكون سبب لتطوير مهاراتهم الشخصية والاجتماعية، لأنهم بيقضوا وقت طويل سوا، والحياة دي هي أساس نظام الـ “توكاتسو” لأنها بتتطلب من الأطفال إنهم يشاركوا المهام مع بعض ويتعاونوا في المسئوليات المطلوبة منهم.

بذل أقصى جهد والشعور بالإنجاز

مع ممارسة أنشطة الـ “توكاتسو” في المدارس اليابانية دا بيكون سبب في إن الأطفال يبذلوا قصارى جهدهم، ودا عشان الغايات والأهداف اللي بتكون مطلوبة منهم بتتجاوز أحيانًا قدراتهم، ومن هنا يظهر دور الميسرين فإنهم يوجهوهم ويساعدوهم ويشجعوهم عشان الطريق يبقى أسهل بالنسبالهم إنهم يحققوا نجاحات مختلفة، ودا بيزود عندهم الرغبة في التحدي والشعور بالإنجاز بعد تحقيق الأهداف اللي كانت مطلوبة منهم.

منح الأطفال ثقة أكبر

من أهم أهداف المدارس اليابانية هي منح الطفل ثقة أكبر بذاته وقدراته في كل حاجة، ودا بيحصل عن طريق إن الميسر بيتيح للأطفال الفرص في تنمية قدراتهم على حل المشكلات عشان يقدروا يعتمدوا على نفسهم ويواجهوا المشاكل اللي بيتعرضوا ليها بصلابة نفسية، سواء كانت المشاكل دي داخل بيئة المدرسة أو خارجها، ومع الوقت الثقة دي بتنعكس في كافة تعاملاتهم الحياتية والدراسية.

التقييم الذاتي

في التقييم الذاتي بيقوم الأطفال بمراجعة ومناقشة السلوكيات الناتجة عن مشاركتهم في أنشطة الـ “توكاتسو” بكافة أنواعها، ودا بيساعدهم بشكل كبير في معرفة نقاط قوتهم ونقاط ضعفهم، وبالتالي بيديهم دفعة على تحسين أدائهم في التجارب المستقبلية وتطوير قدراتهم.

شروط القبول في المدارس اليابانية

قبل التقديم للأطفال في المدارس اليابانية لازم ولي الأمر يلتزم بعدة شروط عشان تتم عملية التقديم بشكل واضح وسليم، ومن أهم الشروط دي:

1- التقديم للالتحاق بالمدارس اليابانية بيتم من خلال البوابة الإلكترونية فقط.

2- لازم يكون الطفل المتقدم مصري الجنسية، وبالنسبة للطلاب الحاصلين على شهادة ميلاد صادرة من مصلحة الأحوال المدنية، وليهم رقم قومي بجنسية غير مصرية، فللأسف ما بيتمش قبول أوراقهم ولا بيتم قبول قيدهم بالمدارس المصرية اليابانية.

3- يشترط أن يكون سن الطفل مناسب للشريحة العمرية المحددة للمرحلة التعليمية اللي هيتم التقدم ليها حسب ترتيب سن المتقدمين للمدرسة في أول أكتوبر من عام 2022 بناء على قاعدتين أساسيتين هما:

التنسيق الأول: بعد إغلاق باب التقديم هيتم ترتيب الأطفال بناءً على أكبر طفل اتقدم للمرحلة.
التنسيق الثاني (ودا الأساس في الاختيار): ودا بيبقى بناءً على نتيجة المقابلة الشخصية للطفل.

أما بقى بالنسبة للشريحة العمرية المحددة لكل مرحلة تعليمية فبتبدأ من:

  • المستوى الأول رياض الأطفال من 4 سنوات إلى 5 سنوات ما عدا يوم واحد.
  • المستوى الثاني رياض الأطفال من 5 سنوات إلى 6 سنوات ما عدا يوم واحد.
  • الصف الأول الابتدائي من سن 6 سنوات إلى 7 سنوات ما عدا يوم واحد.
  • الصف الثاني الابتدائي من سن 7 سنوات إلى سن 8 سنوات ما عدا يوم واحد.
  • الصف الثالث الابتدائي من سن 8 سنوات إلى 9 سنوات ما عدا يوم واحد.

4- لا يجوز الاستثناء من شرط السن، يعني مهم جدًا الالتزام بالسن المحدد للأطفال.

5- المدارس اليابانية بتقبل عدد محدد فقط خلال السنة، ودا لأنها بتعتمد على كثافة قليلة.

6- يشترط الالتزام بالإقامة في المنطقة المحيطة بالمدرسة أو النطاق الجغرافى اللي الطفل متقدم ليه، ودا اعتمادًا على العنوان المثبت ببطاقة الرقم القومى لولي الأمر أو أي مستند رسمي يرجع تاريخه إلى ما قبل الإعلان بمدة لا تقل عن ستة أشهر.

7- في حالة عدم اكتمال الكثافة المقررة للمدرسة من المتقدمين من داخل النطاق الجغرافي المحيط بيها، بيتم قبول الطلاب من مناطق جغرافية أبعد.

8- بالنسبة للطلاب ذوي الاحتياجات الخاصة فبيتم التقديم ورقيًا عن طريق إن ولي الأمر بيقدم كافة المستندات المطلوبة شاملة التقارير الطبية اللازمة لحالة الطفل، عشان يتم دراستها وعرضها على لجنة مختصة لدراسة وطلب أي مستندات أخرى وتقرير قبول الطفل أو لأ تبعًا للقوانين واللوائح والقرارات الوزارية المقررة بخصوص ذوي الإعاقة.

9- أثناء التقديم مهم إن ولي الأمر يسجل للطفل مرة واحدة بس، لأن في حالة تسجيل البيانات أكتر من مرة دا هيتسبب في حرمان الطفل من فرصته وهيتم استبعاد الطلب بشكل كامل، وللأسف مش هيكون لولي الأمر حق إعادة التقديم مرة تانية أو الرجوع للوزارة بأي حق قانوني.

10- عند توقيع ولي الأمر على إقرار بيتضمن قبوله إن ابنه يطبق النموذج الياباني بكافة أعبائه داخل وخارج المدرسة؛ دا بيتضمن قبول ولي الأمر تقديم خدمة تطوعية للمدرسة لمدة عشرين ساعة سنويًا.

11- في حالة وجود مشكلة في نقل الملف الإلكتروني للطفل من المدرسة المقيّد بيها قبل القبول في المدارس اليابانية بتقع المسؤولية بشكل كامل على ولي الأمر، وفي حالة عدم حل المشكلة في خلال 15 يوم من تاريخ الطلب الرسمي بيتم رفض الملف والانتقال للطفل التالي اللي على لائحة الانتظار من غير الرجوع لولي الأمر عشان يتم الحفاظ على فرصة الطفل التالي.

12- في حالة فتح باب التقديم لمراحل تعليمية أعلى من المستوى الأول لرياض الأطفال يشترط التقديم للمدرسة ببيان قيد معتمد بختم النسر من الإدارة المعنية يوضح قيد التلميذ في مدرسة رسمية لغات أو خاصة لغات أو راجع من خارج مصر بإفادة معتمدة من الإدارة التعليمية، وتعد أي إفادة مخالفة للكلام دا ضرر على الطفل وعلى قبوله بالمدرسة.

الفرق بين المدرسة المصرية اليابانية والمدرسة الحكومية

مع وجود هدف أساسي ألا وهو تعليم وتربية الطفل بشكل مثالي، بتتبع كل مدرسة نظام خاص بيها عشان تحقق الهدف دا، ورغم أن الهدف واحد إلا إن في اختلافات كبيرة بين المدارس وبعضها، ومن ضمن المدارس دي هي المدارس الحكومية، عشان كدا مهم جدًا نعرف الفرق بينها وبين المدارس اليابانية:

الفرق بين المدارس اليابانية والمدارس الحكومية

مصاريف المدارس اليابانية

وزارة التربية والتعليم أعلنت عن قيمة مصاريف المدارس اليابانية لعام 2022 بداية من مبلغ 13700 جنيه، مقسمة على 3 أقساط في الترمين، مع توضيح إن قيمة الزي المدرسي إجبارية لبداية كل مرحلة وللمستجدين (طقم كامل 5 قطع) بإجمالي 1300 جنيه، وبيتم تسديدها إلكترونيًا وعدم دفع المصروفات في المواعيد المقررة بيعد مخالفة للقرار الوزاري، وبيتم إيقاف القيد لحين سدادها.

وطبعًا المصاريف ما بتبقاش ثابتة وبنفس السعر طول الوقت، ولكنها بتتغير سنويًا وبتختلف كمان من مكان لمكان، فعشان كدا لو قررت تقدم لطفلك في المدرسة من المهم إنك تتواصل الإدارة الخاصة بيها بشكل مباشر عشان تعرف تكلفة المصاريف كام بالظبط، وإزاي بيتم تسديد الأقساط، مع العلم إن المدرسة بتتيح التسديد عن طريق البنوك العاملة في القطاعات المصرفية المصرية.

الخلاصة

المدارس اليابانية ليها نظام مختلف بتنفرد بيه دونًا عن أي مدرسة تانية، ودا اللي بيخليها وجهة مثالية لأولياء الأمور عشان يقدموا لأولادهم فيها ويستفيدوا من الخدمات والمميزات اللي بتقدمها، مصاريف المدرسة مش غالية نسبيًا مقارنةً بمدارس تانية خاصة أو دولية، ولكن وجب التنويه إن ممكن المدرسة تكون مناسبة لفئة وغير مناسبة لفئة تانية خالص، ولكن المدارس اليابانية أثبتت جدارتها مؤخرًا في واقع التدريس والتعليم المصري، وإزاي هدفها الأساسي هو إخراج جيل سوي وسليم صحيًا ونفسيًا في آن واحد.

تقدر تعرف تفاصيل أكترعن  المدرسة المصرية اليابانية القاهرة الجديدة 

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية

إقرأ أكثر..

  • No comments yet.
  • Add a comment