أهم 9 معلومات عن المدارس الثانوية العسكرية الجوية في مصر

 

الالتحاق بالمدارس العسكرية بعد الانتهاء من المرحلة الإعدادية والحصول على شهادة إتمامها هو حلم عدد كبير من الطلبة في مصر؛ لأن المدارس دي بتأهلهم للالتحاق بالمعاهد والجامعات العسكرية، وإنهم ينضموا إلى أبناء القوات المسلحة.

المدارس العسكرية لها أكثر من فرع في مصر زي الثانوية الرياضية، والجوية، والتمريض، وتعد المدارس الثانوية العسكرية الجوية هي أشهرهم.

المدارس العسكرية الجوية بتأثر في شخصية الطالب بشكل كبير، وبتعلمه القيادة الناجحة وإزاي يتعامل بسرعة وكفاءة تحت أصعب الظروف، دا غير إنها بتقدم له العديد من المميزات أثناء فترة دراسته.

هنتعرف أكثر على المدارس الثانوية العسكرية الجوية، ونعرف أهم المميزات والعيوب الموجودة فيها.

1_ ما هي المدارس الثانوية العسكرية الجوية

المدارس الثانوية العسكرية الجوية هي مدارس تابعة لوزارة التربية والتعليم المصرية، بتأهل الطالب للالتحاق بالكليات الجوية والحربية عن طريق تدريبه على المهارات المختلفة اللي بيكون محتاجها قبل دخوله الجامعة خلال 3 سنوات دراسية.

المدارس دي بتقدم شهادة معتمدة تشبه شهادة الثانوية العامة بتأهل الطالب للالتحاق بالكليات والمعاهد العسكرية، والحصول على الشهادة دي بيكون متاح لكل الناجحين في الشهادة الإعدادية سواء في المدارس العامة أو الأزهرية.

من أهم أهداف المدارس الثانوية العسكرية الجوية في مصر هي تكوين شخصية يمكن الاعتماد عليها في الدفاع عن الوطن، وقادرة على تحمل المسؤوليات الصعبة ومواجهة التحديات المختلفة بشجاعة وإقدام.

المدارس العسكرية الجوية بتحرص إن الطلبة الملتحقين بيها كل سنة يكونوا فعلا مستعدين لخوض التجربة دي رغم صعوبتها واستكمال دراستهم فيها، فبتضع مجموعة من الشروط اللي لازم تتوافر في الطالب عشان يتم قبوله في أحد المدارس، والشروط دي هنتعرف عليها دلوقت.

2_ شروط الالتحاق بالمدارس الثانوية العسكرية الجوية

التحاق الطالب بالمدارس العسكرية دايما بيكون بعد توافر مجموعة من الشروط فيه، وفي حالة عدم توافر الشروط دي او الالتزام بيها بيتم رفض أوراق التقديم الخاصة بالطالب.

من أهم شروط الالتحاق بالمدارس العسكرية الجوية:

أن يكون الطالب أتم عمر 14 عام، وألا يزيد عمره عن 17 عام

الطالب عشان يتحمل صعوبة التدريبات الموجودة في المدارس الثانوية العسكرية الجوية لازم يكون وصل لعمر معين، وإلا مش هيكون قادر يكمل التدريبات لآخرها، وغالبًا هيفشل في المدارس دي.

حصول الطالب على الجنسية المصرية

المدارس الثانوية العسكرية الجوية بتكون متاحة فقط للطلبة المصريين، وأي طالب غير حاصل على الجنسية المصرية مش بيقدر يلتحق أبدًا بالمدارس دي.

بالتالي بنلاقي إن من شروط الالتحاق إن يكون الأب والأم حاصلين على الجنسية المصرية، وبيتم تقديم أوراق تثبت ذلك.

تقديم موافقة كتابية من ولي الأمر

موافقة ولي الأمر على التحاق الطالب بالمدارس الثانوية العسكرية الجوية شيء أساسي، والمدرسة بتحرص على التأكد من الأمر دا، وبالتالي بتلزم ولي الأمر بتقديم موافقة كتابية تثبت رضاه عن ذلك.

حسن السير والسلوك

المدارس العسكرية زي ما بتهتم بمستوى الطالب الدراسي وتدريبه على الرياضات والتدريبات الجسمانية بتهتم بردو بالمستوى الأخلاقي للطالب الملتحق بيها، فبتشترط حسن سير وسلوك الطالب وولي الأمر، والقائمين على المدارس دي بيتأكدوا من دا قبل قبول أوراق الطالب وأثناء خضوعه للاختبارات كمان.

اجتياز جميع الاختبارات المطلوبة

المدارس الثانوية العسكرية الجوية بتلزم الطالب بدخول العديد من الاختبارات واللي منها:

• اختبارات علمية
• اختبارات كشف الهيئة
• اختبارات المهارة
• اختبارات نفسية
• اختبارات طبية
• اختبارات جسمانية

كل اختبار من الاختبارات دي بيقيس مدى استعداد الطالب لدخول المدارس الثانوية العسكرية الجوية، وبالتالي لازم الطالب يدخل جميع الاختبارات ويجتازها؛ عشان يكون مؤهل فعلًا للالتحاق بالمدارس العسكرية.

3_ الأوراق المطلوبة وطريقة التقديم

فتح باب التقديم للمدارس الثانوية الجوية بيكون بعد إعلان نتيجة الشهادة الإعدادية كل عام، وبيتم وقتها الإعلان عن جميع الأوراق المطلوبة ومواعيد تقديمها.

هنا ولي الأمر بيبدأ يسحب ملف الطالب من المدرسة الإعدادية ويقدمه للمدرسة الثانوية الجوية بعد إرفاق جميع الأوراق المطلوبة بالملف دا.

بالنسبة للأوراق المطلوبة بنلاقي:

• بيان نجاح الطالب في الشهادة الإعدادية
• شهادة ميلاد كمبيوتر للطالب
• 8 صور شخصية
• شهادة صحية مختومة من أقرب مستشفى تفيد خلو الطالب من الأمراض
• وثيقة بوظيفة ولي أمر الطالب
• بيان قيد عائلي
• تقديم صحيفة الحالة الجنائية
• صور بطاقتي الأب والأم
• نموذج 1 جند (فئة متطوع)
• نموذج 9 جند (النموذج مختوم من مندوب التعبئة والتجنيد)

لازم ولي الأمر يعرف جميع الأوراق المطلوبة ويلتزم بتقديمها في الميعاد المحدد؛ عشان يتم قبول الملف، ولازم يكون في اتصال مع المدرسة للتعرف على أحدث القرارات بشأن الأوراق وطريقة التقديم في المدارس الثانوية العسكرية الجوية.

4_ قائمة بالمدارس الثانوية العسكرية الجوية في مصر

المدارس الثانوية العسكرية الجوية موجودة في عدد صغير من محافظات مصر، ولكن أي طالب حصل على الشهادة الإعدادية بيكون معاه حق إنه يلتحق بالمدرسة حتى لو مش موجودة في المحافظة اللي ساكن فيها، ودا طبعا بعد اجتيازه لجميع الاختبارات المطلوبة منه.

من أشهر المدارس الثانوية الجوية بنلاقي:

• المدرسة الثانوية الجوية بألماظة

العنوان: مسكن الشروق
رقم التواصل: 0224706461

• المدرسة الثانوية العسكرية الجوية بالإسكندرية

العنوان: سيدي جابر – محافظة الإسكندرية

• المدرسة الثانوية الجوية بحلوان

العنوان: ورش الطائرات – حلوان – القاهرة
رقم التواصل: 0225564984

• المدرسة الثانوية العسكرية الجوية بمدينة نصر

العنوان: مدينة نصر – بجوار النادي الأهلي
للتواصل: 01232167589

5_ المناهج وأسلوب التدريس

المدارس الثانوية العسكرية الجوية بتطبق نظام التعليم المصري، فبيتم تدريس المواد الموجودة في المدارس الرسمية -الحكومية سابقًا- بنفس المناهج، بالإضافة إلى بعض المواد الأخرى الخاصة بطلبة النظام العسكري زي مادة التربية العسكرية.

المواد اللي بيتم تدريسها هي:

• اللغة العربية
• اللغة الإنجليزية
• التربية الدينية
• الحاسب الآلي
• الكيمياء
• الفيزياء
• الأحياء
• الرياضيات

القائمين على نظام التدريس والمتابعة مع طلبة المدارس الثانوية العسكرية الجوية بيكونوا من أبناء الجيش المصري، وبالتالي بيكون في انضباط أكثر، ودا أحد الفروق بين المدارس العسكرية ومدارس الثانوية العامة.

إلى جانب المواد دي بيتم تدريب الطالب على الرماية والفروسية، وطريقة الاستخدام الصحيحة للأسلحة وغيرهم من التدريبات المختلفة، ودا بيطور من مهاراته الدفاعية بشكل كبير، وبيخليه شخص يمكن الاعتماد عليه في الدفاع عن الوطن فيما بعد.

6_ مميزات المدارس الثانوية العسكرية الجوية

المدارس الثانوية العسكرية الجوية بتتميز عن باقي المدارس في العديد من النقاط، واللي من أبرزها:

تعزيز مبدأ الانضباط

القائمين على تطبيق نظام الثانوية العسكرية الجوية دايما بيحرصوا على تعزيز مبدأ الانضباط عند الطلبة، فأي تدريب بيكون بوقت معين، وكل الحاجات اللي بيقوم بيها الطالب على مدار اليوم بتكون مقننة بأوقات معينة بداية من موعد الاستيقاظ.

كمان بيركزوا على الانضباط السلوكي للطالب وتحسين طريقة تعامله مع اللي حواليه في المدرسة، وبالتالي فالمدارس العسكرية تعتبر أنسب مكان لتعليم الطالب الانضباط والالتزام.

الحصول على شهادة معتمدة من وزارة التربية والتعليم

المدارس الثانوية العسكرية الجوية بتقدم شهادة تعادل شهادة الثانوية العامة، والشهادة دي بتأهل الطالب لدخول المعاهد والكليات الحربية، وانضمامه إلى أبناء القوات المسلحة في مصر بدون ما يحتاج إلى شهادات معادلة أو غيرها، لكن طبعا بيكون في مجموعة من الاختبارات اللي لازم يجتازها عشان يتقبل في المعاهد أو الكليات دي.

الحصول على مكافآت تحفيزية أثناء الدراسة

تحفيز الطالب أثناء دراسته بيخليه يبذل أقصى جهده عشان يتفوق في المدرسة، والمدارس العسكرية بتركز على النقطة دي وبتقدم مكافآت مادية باستمرار للطلبة المتفوقين، ودا بيزود ولاء الطالب للمدرسة، وبيخليهم يكملوا التدريبات الشاقة بنشاط.

وجود إشراف تام من الضباط على سير العملية التعليمية

تواجد الضباط -اللي اتخرجوا من المدرسة الثانوية العسكرية الجوية- على مدار اليوم الدراسي شيء مهم؛ لإنهم مختصين بإلاشراف على اللي بيحصل داخل المدرسة، وبيهتموا بالطلبة وصحتهم ورعايتهم باستمرار.

وبالتالي مستوى رعاية الطلبة داخل المدرسة بيكون عالي.

تأهيل الطلبة للالتحاق بالكليات الحربية

تدريب الطالب على التمارين والأسلحة المختلفة بيساعده على التفوق في الكليات الحربية بجدارة؛ لإنه بيكون كون خلفية كويسة عن الكلية.

وكمان اجتيازه للاختبارات اللي بيدخلها وقت تقديمه في المدارس العسكرية بيزود فرصة قبوله في الجامعات الحربية؛ لإن اختبارات الجامعة بتشبه بشكل كبير الاختبارات اللي اجتازها.

7_ عيوب المدارس الثانوية العسكرية الجوية

رغم المميزات العديدة اللي بتقدمها المدارس الثانوية العسكرية الجوية إلا إننا بنلاحظ قلة عدد المقبلين على المدارس دي كل عام مقارنة بباقي المدارس المصرية؛ ودا بيرجع لوجود بعض العيوب في المدارس العسكرية واللي من أبرزها:

صعوبة توافر الشروط المطلوبة

حرص المدرسة على إن جميع الطلبة الموجودين بيها يكونوا مستعدين فعلا للانضمام إلى أبناء القوات المسلحة بيخليها تضع العديد من الشروط اللي بتعكس الاستعداد دا، والشروط دي بتكون صعبة على بعض الطلبة، وبنلاقي إن أغلبهم مش قادرين يحققوا جميع الشروط، وبالتالي بيتم رفض أوراقهم وحلمهم في الانضمام إلى أبناء القوات المسلحة بيضيع.

وجود تدريبات شاقة على الطالب

التدريبات اللي بيقوم بيها الطالب في المدارس الثانوية العسكرية الجوية بيكون هدفها إعداد قائد قادر على تحمل الصعوبات والتعامل بحكمة في الظروف الصعبة؛ لإن قراراته المستقبلية هيترتب عليها أمن الوطن وسلامته، وبالتالي التدريبات دي بتكون شاقة جدًا ومش كل الطلبة بيقدروا يتحملوها للآخر.

عشان كدا بيرفض بعض أولياء الأمور التقديم لأولادهم في المدارس الثانوية العسكرية الجوية وبيفضلوا الثانوية العامة عن العسكرية.

8_ مستقبل المدارس الثانوية العسكرية الجوية

طلبة الثانوية العسكرية الجوية بيستلموا شهادة الثانوية المعتمدة من وزارة التربية والتعليم في مصر في نهاية دراستهم، ومن هنا بيكونوا مؤهلين للالتحاق بالكليات العسكرية زي الكلية الجوية والكليات الحربية.

الوصول إلى مستوى علمي مرتفع في الكليات دي بيكون سهل؛ لإن الطالب بيكون عنده خلفية كويسة عن الكلية من دراسته في الثانوية العسكرية، وكمان بيكون اتدرب كويس على العديد من التمرينات اللي هتساعده يؤدي تمارين الكلية بسهولة.

9_ مدرسة البنات العسكرية الجوية

معظم المدارس العسكرية في مصر بتشترط إن الملتحقين بيها يكونوا ذكور فقط؛ ودا لإن التمارين اللي بيطلبوها بتكون صعبة على البنات، ولكن من فترة ظهرت مدرسة البنات العسكرية الجوية في ألماظة واللي بتحقق حلم عدد كبير من البنات في مصر.

المدرسة بتتيح فرصة التحاق البنات بيها ولكن بعد الخضوع للعديد من الاختبارات اللي بتعكس استعداد الطالبات الفعلي للانضمام إلى المدرسة.

الشروط اللي بتطلبها المدرسة من الطالبات وقت التقديم هي نفسها اللي بتطلبها باقي المدارس العسكرية، ونظام الدراسة والمناهج بيكونوا واحد في كل المدارس الثانوية العسكرية الجوية.

وفي الختام، المدارس العسكرية الجوية بتقدم العديد من الامتيازات للطلبة والخريجين وبتأهلهم للقيادة والتأثير الايجابي في المجتمع، إلا إن نظامها بيكون صعب على بعض الطلبة، وبالتالي لازم نتأكد إن الطالب فعلا مستعد لخوض التجربة دي واستكمال دراسته في المدارس العسكرية؛ عشان يقدر يتفوق فيها.