المدارس البريطانية المعتمدة في مصر | أهم 7 معلومات

المدارس البريطانية المعتمدة في مصر | أهم 7 معلومات

توجه أولياء الأمور أصبح ناحية المدارس الانترناشونال في مصر بشكل كبير؛ نظرًا لإن المدارس دي بتقدم كتير من المميزات اللي بتفوق المدارس الرسمية.

المدارس البريطانية المعتمدة أصبحت من أشهر المدارس الانترناشونال في مصر، واللي بتهتم بتنمية مهارات الطالب وتأهيله لدخول الجامعات.

من المدارس البريطانية الموجودة في مصر هي المدارس البريطانية الدولية، والمدرسة البريطانية للغات وغيرهم.

بجانب المميزات الموجودة في المدارس البريطانية بنلاقي مجموعة من العيوب اللي بتخلي أولياء الأمور يفكروا أكثر من مرة قبل ما يقدموا لأولادهم فيها؛ عشان يتأكدوا إن المدارس دي مناسبة فعلًا.

في المقال ده هنتعرف أكثر على تفاصيل الدراسة في المدارس البريطانية المعتمدة الموجودة في مصر وأهم مميزاتها وعيوبها، وشروط التحاق الطالب بالمدارس دي.

1. ما هي المدارس البريطانية المعتمدة؟

المدارس البريطانية المعتمدة هي مدارس موجودة في مصر بتتبع المنهج البريطاني، وبيكون في تعاون بين المجلس الثقافي البريطاني ووزارة التربية والتعليم المصرية ووزارة التعليم العالي بشأن المدارس دي.

المجلس الثقافي البريطاني يعتبر المسئول الأول عن الإشراف على المدارس البريطانية المعتمدة في مصر من ناحية المناهج والامتحانات وطريقة التدريس.

المدارس دي بتقدم شهادة في نهاية الدراسة بتعادل شهادة الثانوية العامة، وكمان الشهادة بتكون معتمدة دوليًا، يعني خريج المدارس البريطانية بيكون معاه فرصة لاستكمال الدراسة في الخارج.

المدراس البريطانية بتكون الرسوم المطلوبة فيها أعلى بكتير من الرسوم المطلوبة في المدارس الرسمية -الحكومية-، وبالتالي لازم ولي الأمر يتأكد إن عنده القدرة المالية لسداد المصروفات المطلوبة خلال فترة دراسة الطالب.

2. قائمة بالمدارس البريطانية المعتمدة في مصر

المدارس البريطانية المعتمدة بدأت تنتشر في مصر في الفترة الأخيرة، وبنلاقيها موجودة في كتير من المحافظات.

المدارس البريطانية في القاهرة

في القاهرة بنلاقي:

باقي المدارس البريطانية في محافظة القاهرة اضغط هنا ..

المدارس البريطانية في الإسكندرية

من المدارس المتاحة في الإسكندرية هي:

المدارس البريطانية في الجيزة

باقي المدارس البريطانية بمحافظة الجيزة اضغط هنا..

باقي محافظات مصر

في باقي المحافظات بيكون عدد المدارس البريطانية المعتمدة أقل من الموجودة في القاهرة والإسكندرية، فبنلاقي:

3. نظام الدراسة في المدارس البريطانية المعتمدة

بنلاحظ إن نظام الدراسة في المدارس البريطانية المعتمدة بيكون بنظام الفصل الدراسي زي الموجود في المدارس الرسمية، لكن المناهج وطريقة الدراسة أثناء الفصل الدراسي بتكون مختلفة.

نظام الدراسة بيركز أكثر على البحث العلمي، وده بيعلم الطالب إزاي يوصل للمعلومات اللي محتاجها، وبينمي مهارات الطالب اللي مهتم بالبحث العلمي.

الدراسة في المدارس البريطانية المعتمدة بتتشابه مع الدراسة في المدارس الرسمية في كون إن المناهج طويلة، لكن في المدارس البريطانية بيكون في جانب كبير معتمد على الفهم، وده بيسهل الدراسة على الطالب.

في النظام ده بيكون الطالب عنده قدرة أكثر على الإبداع وتنمية مهاراته مع وجود مناهج حديثة بتساعده على كده.

طريقة تقييم الطالب في نظام المدارس البريطانية المعتمدة في مصر بيكون معتمد على درجاته في الامتحانات على مدار العام الدراسي، أما بالنسبة للأنشطة اللي بيعملها فمش بتكون ضمن التقييم.

في المدارس البريطانية المعتمدة في مصر بيكون في عدة شروط لازم يتم توافرها في الطالب عشان تقدر المدرسة إنها تقبله وتضمه لطلابها، والشروط دي هنتعرف عليها حالًا.

4. شروط الالتحاق بالمدارس البريطانية المعتمدة

المدارس البريطانية المعتمدة في مصر بتفتح أبوابها كل عام للطلبة في مصر للالتحاق بيها، وبيكون في مجموعة من الشروط الواجب توافرها في عشان يتم قبول الطالب في نظام المدارس البريطانية.

بالنسبة للطلبة اللي هيدخلوا رياض الأطفال فالشروط المطلوبة هي إن الطفل يكون أتم عمر 4 سنوات، مع تقديم جميع الأوراق المطلوبة وتسجيل بيانات الطالب على الموقع الإلكتروني.

بعد التقديم بيتم تحديد موعد لعمل اختبار للطفل في حضور ولي الأمر، وفي حالة اجتياز الاختبار ده بيتم قبوله في المدرسة البريطانية.

أما لو الطالب هيدخل بعد مرحلة الإعدادية فشروط الالتحاق هي الحصول على الشهادة الإعدادية، وشرط إن المدرسة الإعدادية للطالب تكون مدرسة لغات.

المدارس البريطانية بتهتم بالشرط الأخير؛ عشان تتأكد إن الطالب هيقدر يتكيف مع نظام الدراسة ويقدر يدرس المناهج باللغة الإنجليزية ويفهمها كويس بدون ما يحصل فجوة بين طريقة دراسته السابقة والطريقة الجديدة.

5. مميزات نظام التعليم البريطاني

اوبن مميزات
مميزات المدارس البريطانية في مصر

اختلاف نظام الدراسة في المدارس البريطانية المعتمدة بيمنحها كتير من المميزات زي:

تقديم شهادة معتمدة دوليًا

المدراس البريطانية المعتمدة في مصر بتقدم شهادة في نهاية الدراسة بتكون معتمدة دوليًا، والشهادة دي بتعادل شهادة الثانوية العامة في المدارس الرسمية.

شهادة الـ IGSCE بتكون بمثابة دليل واضح على تفوق الطالب واستعداده للالتحاق بالجامعات سواء الحكومية أو الدولية.

وبالتالي الطالب بيكون له الأولوية في دخول الجامعات العالمية، وفرصته أعلى من فرصة خريجي المدارس الرسمية في مصر.

 وجود مرونة في نظام الدراسة

النظام البريطاني بيكون أكثر مرونة من باقي الأنظمة التعليمية الموجودة في مصر؛ لإن الطالب هو المسئول عن تحديد المواد اللي هيدرسها خلال العام الدراسي.

وبالتالي الطالب بيدرس بس المواد التابعة لتخصصه اللي حابب يكمل فيه بعد كده، فبيكون مركز أكثر على هدفه.

الاهتمام بقياس مدى فهم الطالب للمادة العلمية

المناهج في المدارس البريطانية المعتمدة بتركز على بالفهم أكثر من الحفظ، على عكس الموجود في المدارس الرسمية، وبالتالي الطالب مش بيكون مضطر إنه يحفظ كل المناهج، لكن بردو بيكون في جانب معتمد على الحفظ.

كمان الامتحانات اللي بيتم إجراؤها خلال العام الدراسي بتقيس مدى فهم الطالب للمادة العلمية اللي تم شرحها، وعلى الأساس ده بيتم تقييم مستوى الطالب.

عدم الحاجة إلى الدروس الخصوصية

في المدارس البريطانية المعتمدة في مصر مش بيكون ضروري أبدًا إن الطالب ياخد دروس خصوصية؛ لإن طريقة التدريس في المدرسة بتساعده على فهم المادة العلمية بشكل كويس.

وزي ما ذكرنا إن الامتحانات اللي بيدخلها بتحدد مدى فهمه للمنهج ومش بتعتمد على قياس إمكانية الطالب على الحفظ، وبكده الطالب هو اللي بيحدد هل هيحتاج للدروس الخصوصية لتحسين مستواه الدراسي أو لأ.

6. عيوب نظام التعليم البريطاني

عيوب 2
عيوب نظام التعليم البريطاني في مصر

المدارس البريطانية المعتمدة في مصر بيكون فيها عدة صفات بيعتبرها البعض عيوب، وبتكون سبب في إن الطالب أو ولي الأمر يختاروا نظام تعليمي تاني مختلف عن النظام البريطاني.

من العيوب الموجودة في نظام التعليم البريطاني في مصر:

الدراسة باللغة الإنجليزية

المناهج الموجودة في المدارس البريطانية المعتمدة بتكون باللغة الإنجليزية، وبيتم شرحها بنفس اللغة، فبعض الطلبة بيلاقوا صعوبة في الدراسة باللغة الإنجليزية وبيعتبروها أحد العيوب الموجودة في المدارس دي.

وبالتالي الطالب هنا بيبدأ يدور على نظام بديل للمدارس البريطانية بيدعم اللغة العربية ظنًا منه إن الدراسة هتكون أسهل.

لكن في الحقيقة الدراسة باللغة الإنجليزية هتكون أفضل بكتير؛ لإنها هتمكن الطالب من إتقان لغة جديدة، ومع الوقت الطالب هيتعود على نظام الدراسة ومش هيلاقي أي صعوبة.

عدم القدرة على تغيير مواد التخصص

في المدارس البريطانية المعتمدة الطالب بيكون عنده حرية يختار المواد اللي حابب يدرسها بناءً على ميوله ورغباته زي ما وضحنا.

بعض الطلبة مش بيكون عندهم القدرة على الاختيار، فبيبدأ ولي الأمر هنا يتدخل ويختار مع الطالب المواد اللي هيدرسها واللي هتساعده يركز أكثر على التخصص اللي حابب يكمل فيه.

وهنا بتحصل مشكلة إن الطالب مش هو صاحب القرار الوحيد، وبعد فترة من الدراسة ممكن يحتاج إنه يختار تخصص تاني، وده للأسف مش بيكون متاح في المدارس البريطانية المعتمدة.

عشان كده لازم ولي الأمر يتأكد إن التخصص اللي تم اختيارها هو ذاته التخصص اللي الطالب حابب يكمل دراسته فيه بعد كده.

الضغط النفسي على الطالب

المناهج في النظام البريطاني بتكون طويلة، وبيكون مطلوب من الطالب دخول جميع الامتحانات اللي بيتم إجراؤها على مدار العام الدراسي عشان يقدر يحصل على درجات كافية تأهله للانتقال للمرحلة اللي بعدها.

وبالتالي الطالب بيكون مجبر إنه يذاكر المناهج في فترة معينة ويدخل جميع الامتحانات المطلوبة، وده بيسبب ضغط نفسي للطالب ممكن يأثر بالسلب على مستواه الدراسي.

الاهتمام بشكل كبير بالبحث

بيتم الاهتمام بالبحث العلمي في المدارس البريطانية المعتمدة بشكل كبير، ودي بتكون ميزة للطلبة المهتمة بالبحث العلمي، فبتنمي مهاراتهم وبيخليهم مركزين أكثر على هدفهم.

أما باقي الطلبة بيلاقوا صعوبة في البحث، وبالتالي الطريقة دي مش بتكون مناسبة لكل طلبة المدارس البريطانية، والبعض بيعتبرها أحد العيوب الموجودة فيها.

7. متوسط مصاريف المدارس البريطانية المعتمدة

متوسط مصاريف بريطاني
متوسط مصاريف المدارس البريطانية المعتمدة في مصر

في المدارس البريطانية المعتمدة بيكون في رسوم إضافية عن المدارس الرسمية زي ما وضحنا، والرسوم دي بتختلف تبعًا للمدرسة، وللمرحلة الدراسية للطالب.

وتبدأ مصاريف المدارس البريطانية المعتمدة في مرحلة رياض الاطفال بحوالي 65 ألف جنيه في السنة بدون مصروفات الباص و الرحلات و كل مايشبه ذلك.

ومتوسط مصاريف مرحلة رياض الأطفال في المدارس  البريطانية المعتمدة إلى 58 ألف جنية في الفصل الدراسي الواحد.

أما بدخول المرحلة الإبتدائية بتبدأ المصاريف المدرسية تزيد، فمثلًا بنلاقي إن مصاريف المدرسة البريطانية الدولية في القاهرة في المرحلة الإبتدائية بتصل إلى ما يقرب من 200 ألف جنية، وطبعًا المصاريف بتختلف من مدرسة لأخرى.

في المرحلة الإعدادية بتوصل المصاريف المدرسية إلى حوالي 226 ألف جنية، ومع دخول المرحلة الثانوية بتكون حوالي 250 ألف جنية.

المصاريف بيحصل فيها اختلاف كل سنة، وبتختلف دايما من مدرسة للثانية، فلازم ولي الأمر يتواصل مع المدرسة اللي حابب يقدم فيها للطالب عشان يتأكد من المصاريف المطلوبة، ويتأكد فعلا إنه يمتلك القدرة المادية لسداد المصاريف دي خلال سنوات دراسة الطالب.

مصاريف المدارس البريطانية المعتمدة في مصر بتكون مرتفعة عن المصاريف المطلوبة في المدارس الرسمية زي ما ذكرنا، لكنها بتقدم العديد من المميزات مقابل المصاريف دي.

الخلاصة

المدارس البريطانية المعتمدة في مصر هي مدارس بتقدم للطالب شهادة معتمدة دوليًا تمكنه من دخول الجامعات العالمية، وبتكون تحت إشراف المجلس الثقافي البريطاني بالتعاون مع وزارة التربية والتعليم المصرية ووزارة التعليم العالي.

الشهادة اللي بتقدمها المدارس دي تعتبر من أهم المميزات الموجودة، بجانب إن المدارس البريطانية المعتمدة بتتميز بالمرونة وبتتيح للطالب فرصة اختيار المواد اللي حابب يدرسها بناءً على ميوله ورغباته.

أما بالنسبة للعيوب فالبعض بيعتبر إن من عيوب المدارس البريطانية المعتمدة في مصر هي الدراسة باللغة الإنجليزية، والاهتمام بشكل كبير بجانب البحث العلمي، بالإضافة إلى عدم وجود إمكانية للتحويل من تخصص لآخر.

وهنا ييجي دور ولي الأمر فإنه يعرف نظام الدراسة في المدارس البريطانية المعتمدة كويس، ويعرف مميزات وعيوب المدارس دي كويس، ويحدد مدى استعداد أولاده للدراسة في النظام ده؛ عشان يضمن لهم مستقبل ناجح.

 

 

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق