الفرق بين صعوبات التعلم وبطء التعلم والتأخر الدراسي| الأعراض وأهم الأسباب وطرق العلاج

كتير من الأهالي والمدرسين بيلاحظوا أطفال عندهم صعوبة في استيعاب المناهج الدراسية أو تحصيلهم بيكون أقل من زملائهم، وهنا تبدأ التساؤلات: هل المشكلة دي مرتبطة بصعوبات التعلم؟ ولا الطفل بطيء التعلم؟ ولا الموضوع كله مجرد تأخر دراسي؟

والحقيقة إن كل مصطلح من دول ليه تعريف وأسباب مختلفة تماماً عن غيره، ومعرفتهم بتفرق جداً في اختيار طريقة التعامل الصحيحة.

وعشان كدا هنشرحلك من خلال المقال الفرق بين صعوبات التعلم وبطء التعلم والتأخر الدراسي بشكل تفصيلي، وهنوضح أعراض كل حالة، وطرق التدخل المناسبة، عشان نساعد الأهالي والمدرسين على فهم أفضل للحالة، ودعم حقيقي للأطفال.

ما هي صعوبات التعلم وأشهر أسبابها؟ 

تبعاً لإحصائية نشرها موقع ResearchGate فنسبة ذوي صعوبات التعلم بلغت 30% لعام 2023، ويُمكن تعريفها إنها حالة بتظهر عند الأطفال ومش شرط يكون ليها علاقة بنسبة ذكاء الطفل؛ يعني ممكن يكون الطفل ذكي جداً، لكن عنده مشاكل في إنه يفهم أو يتعامل مع مهارات أساسية زي القراءة، أو الكتابة، أو الحساب. 

بمعنى تاني دماغ الطفل بتشتغل بطريقة مختلفة عن الأطفال العاديين، ودا بيخليه يواجه صعوبة في إنه يتعلم بالطريقة التقليدية.

والحالة دي مش بسبب كسل أو تقصير من الطفل، ولا بسبب تقصير من الأهل أو المدرسة؛ فالحقيقة إن صعوبات التعلم غالباً بترتبط بحاجات داخلية زي اختلاف في طريقة عمل الجهاز العصبي أو الدماغ، وبتختلف من طفل للتاني، يعني ممكن طفل يكون عنده مشكلة في القراءة بس، وطفل تاني في الكتابة، وطفل تالت في الحساب.

يعني بتظهر في مهارات محددة؛ بمعنى إن الطفل ممكن يكون متميز في الرسم أو عنده مواهب رياضية، لكن بيواجه مشاكل في القراءة أو الكتابة. ودي واحدة من أبرز الاختلافات اللي بتوضح الفرق بين صعوبات التعلم وبطء التعلم والتأخر الدراسي؛ لإنها مش مرتبطة بضعف شامل في القدرات.

والحاجة المهمة كمان إن صعوبات التعلم مش بتختفي من نفسها، وعلشان كدا لازم الأهل والمدرسين يتدخلوا بدعم خاص زي برامج تعليمية مخصصة أو وسائل تعليمية مختلفة تساعد الطفل إنه يتغلب على الصعوبات دي ويقدر يتعلم بطريقة تناسبه.

تقدر تتعرف أكتر  على أنواع صعوبات التعلم عند الأطفال وطرق علاجها. 

ما هو بطء التعلم وأهم أعراضه وأسبابه؟ 

بطء التعلم هو حالة بيعيشها الطفل اللي مش قادر يواكب أقرانه في التحصيل العلمي بسبب صعوبة في فهم المعلومات أو اكتساب المهارات الأكاديمية.

 فبنلاقي إن الطفل بطيء التعلم ممكن يكون عنده مشاكل في استيعاب المعلومات اللي بتتقدمله، ودا مش بسبب أي إعاقة ذهنية، لا دا مجرد بطء في التعلم مقارنة باللي حواليه من نفس العمر والصف الدراسي.

أعراض بطء التعلم

بيظهر الفرق بين صعوبات التعلم وبطء التعلم والتأخر الدراسي في أعراض كل مشكلة منهم، ففي حالة بطء التعلم بتكون الأعراض:

• عدم القدرة على الاندماج مع الأطفال من نفس فئته العمرية، وبيحب يميل لأصدقاء أصغر سناً، وأحياناً بيتصنف كطفل انطوائي.
• صعوبة في تلقي واستيعاب المعلومات الأكاديمية، وبيحتاج وقت أطول لفهم نفس المعلومات اللي غيره بيفهمها بسرعة.
• صعوبة في التعامل مع المشاكل اليومية، وغالباً ما بيشعر بالقلق والتوتر، وأحيانًا يعاني من قلة تقدير الذات.
• تأخر  الكلام عرض مهم وغالباً بيكون بسبب مشاكل في اللغة والنطق، ودا بيؤدي لتأخر تطور اللغة.

أسباب بطء التعلم

المدرسة هي المكان الأول اللي بيتعرف على حالة بطء التعلم لإنه بيحدد مستوى الطفل بالنسبة للمرحلة الدراسية وعُمره، سواء كان بطيء أو متوسط أو عالي، ومن أبرز الأسباب لبطء التعلم:

1- عوامل شخصية

زي مثلاً لو الطفل عنده مرض مزمن أو غاب عن المدرسة لفترة طويلة؛ كمان لو في مشاكل صحية جسمانية عند الطفل مش واضحة، أو لو معدل ذكائه بشكل عام أقل من المتوسط.

2- عوامل بيئية

ظروف في المنزل: زي إنه عايش في مكان سيء، زي منزل مفيهوش مرافق كويسة، دا بيأثر على تطور مهاراته التعليمية، أو لو جودة الأكل قليلة أو مش كافية، أو ما بينامش كويس، أو لو الوالدين مش بيدعموه وبيحبطوه من التعليم. 

ظروف المدرسة: وجود طبقات اجتماعية مختلفة في المدرسة بيأثر على مستوى الطفل، أو التعليم نفسه ضعيف، أو فيه مشاكل في الموازنة بين المدرسة والمنزل.

وكمان لو فيه تغييرات مستمرة في المناهج الدراسية وأساليب التدريس.

3- عوامل عاطفية

زي كراهية الطفل لطريقة المعلم في التدريس، أو عدم تقبله لشخصيته. كمان لو الطفل حاسس بالنقص مقارنةً بزملائه، أو لو ثقته في نفسه قليلة، أو حتى لو بيشعر بالخجل والقلق طول الوقت.

طرق تعليم طلاب بطء التعلم

طرق التعليم المُتبعة واحدة من النقط البارزة اللي بتبين الفرق بين صعوبات التعلم وبطء التعلم والتأخر الدراسي، فتبعاً لدراسة اتنشرت على موقع Edict عن أهم الاستراتيجيات المستخدمة لتحسين مهارات التواصل للطلاب اللي بيعانوا من بطء التعلم، واللي من أهمها التكرار، والتدريب المستمر بجانب بعض الطرق التانية، زي:

1. دمج الوسائل البصرية والسمعية في الشرح، زي استخدام الفيديوهات أو الأشرطة السمعية، لأن الطفل بطيء التعلم ممكن يستفيد أكتر من الرؤية أو السمع بدلًا من القراءة فقط.
2. توفير خدمات التعليم الفردي ودا فعلاً بدأت مدارس في تنفيذه، ويُسمى برنامج التعليم الفردي IEP، ودا بيركز على نقاط القوة والضعف للطالب، وبيشتغلوا عليها.
3. توفير دروس تقوية إضافية والتركيز على نقاط الضعف في تعلمه، بحيث نساعده يتحسن في الحاجات اللي بيواجه فيها صعوبة.
4. مراعاة الفروق الفردية بين الأطفال، يعني المعلم يخصص أسلوب تدريس يناسب الطفل ويمكّنه من التفاعل مع زملائه.
5. التنويع في طرق الشرح زي الدمج بين الشرح النظري والعملي عشان نقدر نلفت انتباه الطفل بطرق مختلفة.

وبنكمل في دليل التعرف على الفرق بين صعوبات التعلم وبطء التعلم والتأخر الدراسي، ونتعرف على معنى مصطلح التأخر الدراسي وأسبابه وأعراضه. 

تعرف أيضاً على الفرق بين صعوبات التعلم واضطرابات التعلم.

ما هو التأخر الدراسي؟

التأخر الدراسي بيظهر لما يكون مستوى التحصيل العلمي للطالب أقل من المتوقع ليه بناءً على عمره أو صفه الدراسي، أو لما يكون فيه تراجع في مستواه مقارنةً بالتحصيل السابق.

ودا ممكن يحصل لأسباب كتير، سواء نفسية أو اجتماعية أو جسدية أو عائلية. يعني الطالب المتأخر دراسياً بيكون غالباً أقل من زملائه في نفس الصف، ودا مش دايمًا مرتبط بمشكلة عقلية أو إعاقة، ودا من الأمور المميزة في الفرق بين صعوبات التعلم وبطء التعلم والتأخر الدراسي، إنه بيكون أكتر بسبب صعوبات في التركيز أو عوامل تانية بتأثر على أدائه الدراسي.

أسباب التأخر الدراسي

التأخر الدراسي بيكون ليه أسباب كتير، منها: 

1- العوامل النفسية

• القراءة البطيئة أو صعوبة في التعامل مع الأرقام.
• صعوبة في تذكر المعلومات وربطها ببعضها.
• صعوبة التركيز والتشتت الذهني.
• انخفاض معدل الذكاء.

2- العوامل الاجتماعية

• مشاكل أسرية زي الخلافات بين الوالدين أو فقدان أحدهم.
• قلة التشجيع من الأسرة أو ضعف الطموحات.
• عدم توافر بيئة مناسبة للدراسة في البيت.
• انخفاض دخل الأسرة أو ضعف قدراتها.
• انشغال الطالب بالعمل.

3- العوامل النفسية والعاطفية

• اضطرابات عاطفية زي: القلق، والخوف، أو ضعف الثقة بالنفس.
• كراهية المادة الدراسية أو كراهية المعلمين.

4- عوامل شخصية

• سوء استخدام الوقت أو عدم الاهتمام بالدراسة.
• تأجيل المذاكرة أو الغياب المتكرر.
• قلة الدافعية للتعلم.

5- العوامل المدرسية

• قلة الاهتمام من المعلمين أو الإدارة المدرسية.
• طريقة تعامل المعلمين مع الطلاب.
• صعوبة الواجبات المدرسية.

أنواع التأخر الدراسي

فيه أنواع مختلفة للتأخر الدراسي، زي:

• التأخر الدراسي العام: دا بيكون في كل المواد الدراسية، ومعدل الذكاء بيكون بين 70  – 85.
• التأخر الدراسي الواضح: دا بيكون لأسباب غير منطقية، زي عدم التركيز أو إهمال في الدراسة.
• التأخر الدراسي الظرفي: دا بيحصل بسبب موقف معين زي وفاة أحد أفراد الأسرة مثلًا.
• التأخر الجماعي: لما يكون في ضعف عام عند كل الطلاب في فصل أو مدرسة.
• التأخر الدراسي الخاص: لما يكون في مادة واحدة زي الرياضيات أو القراءة.
• التأخر الفردي: لما يتأخر طالب أو مجموعة من الطلاب في فصل معين.
• التأخر الدراسي الدائم: لما يتراجع المستوى الدراسي لفترة طويلة.

خصائص طالب التأخر الدراسي 

ودي أهم الخصائص لطالب التأخر الدراسي: 

1- الخصائص الجسدية 

الطلاب المتأخرين دراسياً غالبًا ما بيكونوا أقل نشاط وحيوية من زملائهم، وعندهم مشاكل صحية زي فقر الدم وضعف السمع أو البصر. 

2- الخصائص العقلية 

الفرق بين صعوبات التعلم وبطء التعلم والتأخر الدراسي بيظهر بوضوح في نقطة الصحة العقلية في كل مشكلة، وطفل التأخر الدراسي مش بيعاني من أي مشكلة عقلية، فبيكون عنده صعوبة في التفكير الاستنتاجي وحل المشكلات، والذاكرة ضعيفة، وبالتالي بيكون صعب عليه حفظ المعلومات لفترة طويلة. 

3- الخصائص العاطفية 

الطلاب المتأخرين دراسياً بيشعروا بالفشل والإحباط، وغالبًا بيكون عندهم مشاعر سلبية تجاه المدرسة وأقرانهم. وبيكونوا عُرضة للإحساس بالنقص أو العدائية تجاه الآخرين. 

4- الخصائص الاجتماعية 

فيه ميل للعزلة والانطواء، وعدم الرغبة في تكوين صداقات؛ كمان بيكونوا عرضة للانجذاب للأصدقاء السيئين أو اللي ليهم سلوكيات منحرفة. 

التدخل الصحيح لمشكلة التأخر الدراسي

طريقة العلاج والتعامل من أبرز النقاط لمعرفة الفرق بين صعوبات التعلم وبطء التعلم والتأخر الدراسي، وعشان نحل مشكلة التأخر الدراسي عند الطالب، لازم الأهل والمدرسين يشتغلوا مع بعض علشان يحددوا السبب الحقيقي للتأخر، وبعدين يتخذوا الخطوات المناسبة عشان يعالجوا المشكلة بشكل سريع وفعّال.

ومن أبرز الطرق اللي ممكن تساعد في العلاج تبعاً لدراسة اتنشرت تابعة للـ US Department of Education إن العلاج المثالي للمشكلة دي؛ هو تنفيذ مجتمع تعليمي متوازن والاهتمام ببعض النقاط زي:

1. علاج أي أمراض ممكن تكون سبب في التأخر الدراسي، زي المشاكل الصحية اللي بتأثر على قدرة الطالب على الفهم والاستيعاب.
2. متابعة الطالب بشكل مستمر من الأهل والمدرسين، وتحفيزه على تطوير قدراته الحسية، والذهنية زي: مهارات التركيز والانتباه.
3. إشراك الطالب في دروس تقوية عشان يقدر يواكب زملائه في الدراسة.

اقرأ أيضاً: 7 من أشهر مراكز صعوبات التعلم في مصر.

الفرق بين صعوبات التعلم وبطء التعلم والتأخر الدراسي 

ودلوقتي نقدر نحدد النقاط الأساسية واللي نقدر بناءً عليها نحدد إيه المشكلة اللي بيعاني منها الطفل:

1- التحصيل الدراسي

1. صعوبات التعلم: بيكون قليل في المواد اللي بتعتمد على المهارات الأساسية زي: القراءة، والكتابة والحساب، ودا بيأثر على أدائهم بشكل عام.
2. بطء التعلم: قليل في كل المواد مع قدرة استيعاب أقل من غيره، وبالتالي بيتأخر في اكتساب المفاهيم والمهارات.
3. التأخر الدراسي: بيظهر التأخر في مواد متعددة، ودا بيكون مرتبط أحياناً بإهمال واضح أو مشكلة صحية.

2- أسباب التدني في التحصيل

الفرق بين صعوبات التعلم وبطء التعلم والتأخر الدراسي بتظهر في الأسباب المؤدية لانخفاض التحصيل الأكاديمي، زي:

1. صعوبات التعلم: بتكون بسبب صعوبة في العمليات الذهنية زي: التركيز، والإدراك، والانتباه، والذاكرة.
2. بطء التعلم: انخفاض مستوى الذكاء، ودا بيأثر على سرعة التعلم.
3. التأخر الدراسي: غالباً بسبب قلة الحافز والرغبة في التعلم.

3- نسبة الذكاء

1. صعوبات التعلم: غالباً بيكون عندهم ذكاء متوسط أو فوق المتوسط من 90 درجة فيما فوق، رغم الصعوبة في التعلم.
2. بطء التعلم: نسبة الذكاء بتكون من (70 – 84 درجة) ودا بيأثر على سرعة التعلم.
3. التأخر الدراسي: ممكن يكون عندهم ذكاء متوسط أو أعلى من 90 درجة فيما فوق، لكن بيأثر عليهم عوامل تانية.

4- المظاهر السلوكية

الفرق بين صعوبات التعلم وبطء التعلم والتأخر الدراسي مش بيكون واضح أوي في المظاهر السلوكية، ودا بيتطلب معرفة خصائص كل مشكلة للتشخيص السليم. 

1. صعوبات التعلم: السلوك ممكن يكون طبيعي، وأحياناً فيه نشاط زائد أو اندفاعية.
2. بطء التعلم: بيواجهوا صعوبة في التكيف مع بيئة الدراسة والبيت زي (التعامل مع المواقف اليومية، والتعامل مع الأقران، ومهارات الحياة اليومية).
3. التأخر الدراسي: غالباً مرتبط بسلوكيات إحباط ومشاعر فشل بسبب عدم النجاح الدراسي.

الخلاصة

الفرق بين صعوبات التعلم وبطء التعلم والتأخر الدراسي بيظهر بشكل كبير لما نفهم طبيعة كل حالة؛ فصعوبات التعلم بتكون مشكلة في مهارات معينة زي القراءة أو الكتابة أو الحساب، وبتحصل بسبب اختلاف طريقة عمل دماغ الطفل، مش بسبب قلة الذكاء أو ضعف التركيز.

أما بطء التعلم، فهو حالة الطفل اللي معدل ذكائه أقل من المتوسط، ودا بيأثر على استيعابه لكل المواد الدراسية بشكل عام، لكن بطريقة بطيئة مش مرتبطة بمشكلة معينة.

أما بالنسبة للتأخر الدراسي، فهو ناتج عن ظروف خارجية زي مشاكل في البيت، أو ضغوط نفسية، أو حتى ضعف في تدريس المواد، ودا بيأثر على مستوى الطفل الدراسي بشكل مؤقت.

وبيظهر الفرق بين صعوبات التعلم وبطء التعلم والتأخر الدراسي في التدخل وطريقة العلاج؛ فبنلاقي إن صعوبات التعلم بتحتاج تدخل خاص، وبطء التعلم مرتبط بمعدل الذكاء فبيتطلب طريقة تدريس مختلفة، والتأخر الدراسي غالباً بيتصلح لما تتحسن الظروف حوالين الطفل.