الأخوات هما أول ناس الطفل بيتعلم معاهم إزاي يتعامل مع الناس، يشارك، يتخانق ويتصالح، ويتفاهم. فالعلاقة دي رغم إنها قوية وطويلة العمر، بس ساعات بيبقى فيها توتر وصراع.
كتير من مشاكل الغيرة بين الأخوات الأطفال مش بيكون سببها الحقيقي لعبة ولا حاجة حلوة؛ لكن ممكن تبقى راجعة لترتيب الولادة، أو شعور الطفل إن أخوه واخد اهتمام أكتر، أو اختلاف في طريقة المعاملة.
وفِهمك للسبب الأساسي بيكون أول خطوة في حل أي مشكلة من النوع دا، وبالتالي هيساعدك تقللي التوتر بينهم وتخلي العلاقة بينهم صحية أكتر.
دا هيكون موضوع مقالنا هنوضح فيه مفهوم الغيرة بين الأخوات، وإيه أهم الأسباب لدا، وأهم الطرق الفعالة لتقليل الغيرة بينهم والحفاظ على علاقتهم قوية وصحية.
ما هي الغيرة بين الأخوات الأطفال؟
هو نوع من الغيرة والمنافسة اللي بتحصل طبيعي بين الأولاد في البيت، وبتظهر أكتر لما يكونوا قريبين في السن، بس دا مش معناه إنها مش بتحصل لو في فرق سن كبير. أوقات بيحصل التنافس دا حتى بين إخوات بالتبني أو أولاد مش من نفس الأب والأم.
الموضوع مش مجرد خلاف على لعبة أو قطعة شوكولاتة، دا بيكون إحساس مستمر إن كل واحد فيهم عايز يكون الأحسن أو ياخد اهتمام أكتر، وبيوصل أوقات لمشاكل بتتكرر من غير سبب واضح.
طيب ليه الكبير بيغير؟
الطفل البِكر بيكون متعود إن اهتمامك كله ليه، بيحس بالأمان والحب من وجودك حواليه. بس أول ما بييجي أخ أو أخت جديدة، بيبدأ يحس إن في منافسة على حبك واهتمامك. حتى لو إنتِ مش قصدك تغيّري حاجة، هو ممكن يلاحظ أبسط فرق في طريقتك معاه، ويعتبره تهديد.
الغيرة بين الأخوات الأطفال ساعات بتطلع من الإحساس بالمنافسة، ودا طبيعي. والحقيقة إن مش كل منافسة وحشة بالعكس، ساعات بتشجع الطفل يطوّر نفسه. بس لو المنافسة دي بقت دايمة، أو حس إنك بتقارني بينهم، ساعتها التنافس ممكن يتحول لحاجة سلبية.
فارق السن، اختلاف الشخصيات، أو حتى التغيير في انتباهك، كلها حاجات بتغذّي الغيرة وسوء التفاهم. وطبعًا مش هينفع نغيّر الفروق دي بس نقدر نخفف من تأثيرها.
اتعرفي على: كيفية التعامل مع الطفل العصبي في عمر سنتين من خلال 7 طرق فعالة
أسباب الغيرة بين الأخوات الأطفال
تبعاََ لدراسة اتنشرت على موقع NC State university أوضحت إن الأطفال بيلاحظوا كويس جدًا تصرفات أهاليهم، وكانت أكتر الأسباب اللي بتوصل شعور الأطفال بالغيرة:
وصول مولود جديد
بيخلي الطفل الأول يحس إنه اتزاح من مكانه، وإن كل الحب والاهتمام راح لحد غيره.
شعور الطفل بالنقص
لما يقارن نفسه بغيره في اللبس أو الشكل، بيحس إنه أقل منهم، ودي بعض الممارسات للأهل بتزود الشعور دا:
- يقضوا وقت أطول مع أخ على حساب التاني.
- ينحازوا لواحد وقت الخلاف.
- يعطوا لطفل هدية والتاني لأ.
- يهتموا بموهبة أخ عن التاني.
قسوة الوالدين
لما الأهل يعاملوا الطفل بشدة مقارنة بغيره أو بزمايله، الغيرة بتتولد.
الأنانية والعزلة
الطفل الوحيد لفترة طويلة ممكن يتعود على الاهتمام الكامل، فبيرفض المشاركة بعد كدا.
قلة التقدير والمدح
لما يسمع دايمًا مديح لإخواته أو صحابه وهو لأ، بيحس إنه أقل منهم.
المفاضلة بين الأبناء
سواء تفضيل ولد على بنت، أو الصغير على الكبير، بيسبب مشاعر غيرة قوية.
كل دي عوامل ممكن تزود الغيرة بين الإخوة لو ما اتعالجتش بشكل سليم.
أعراض الغيرة بين الأخوات الأطفال
لما بييجي أخ أو أخت جديدة في العيلة، الطفل الكبير ممكن يحس بشوية مشاعر مش مفهومة، زي الغيرة أو الحزن. والغيرة بين الأخوات الأطفال حاجة طبيعية، بس مهم نلاحظ أعراضها عشان نقدر نساعدهم.
أهم الأعراض اللي ممكن تظهر:
- التصرفات الطفولية: ممكن يرجع يتصرف زي الأطفال الأصغر، زي إنه يطلب رضاعة أو يبلل نفسه.
- السلوك العدواني: زي لما الطفل يحاول يضرب أو يزعق لأخوه أو أخته الصغيرين.
- الكلام السلبي: زي لما يقول “نفسي أخويا يمشي” أو “مش بحبه”.
- محاولة جذب الانتباه: يعمل حاجات غلط عشان ياخد بالك منه.
- الانسحاب: يبقى ساكت ومش عايز يلعب أو يتكلم مع حد.
- الشعور بالظلم: يحس إنك بتحبي أخوه أو أخته أكتر منه.
اتعرفي على: أبرز أسباب الغيرة عند الأطفال ونصائح فعالة للتغلب عليها.
طرق فعالة لتقليل الغيرة بين الأخوات الأطفال
تبعاََ لدراسة اتنشرت على موقع NIH اتعملت في الصين وقت جائحة كوفيد-19، وركزت على الغيرة بين الأخوات عند الأطفال البكر وعلاقتها بالمزاج وتنظيم العاطفة.
ووجدوا إن الغيرة بتقل كل ما كبر الطفل وزاد فرق السن بينه وبين أخوه، وإن المزاج الصعب بيزود الغيرة وتنظيم العاطفة بيقللها. كمان، الأطفال البكر اللي مزاجهم صعب بيكون عندهم صعوبة في ضبط مشاعرهم وغيرة أكتر من إخواتهم.
ودا بيثبت أهمية التعامل بطريقة خاصة لتقليل المشاعر دي عند أطفالك، ومن أهم الطرق اللي هتساعدك:
1- خليكي دايمًا هادية ومسيطرة
حاولي تتابعي تصرفات ولادك من بدري، عشان لو في مشكلة بتبدأ تقدري تتدخلي قبل ما تكبر. لما بيشوفوكي بتتصرفي بهدوء، هما كمان هيتعلموا يتعاملوا بنفس الطريقة.
2- شجعي التعاون مش التنافس
بلاش تقارني بين ولادك أو تميّزي حد فيهم، لأن دا بيزود الغيرة بين الأخوات الأطفال. جربي تخليهم يعملوا حاجات سوا، يلعبوا مع بعض، وكل واحد يكتشف اهتماماته بطريقته. دا هيخليهم يحسوا إنهم فريق مش خصوم.
وإنتِ كمان قدوة. يعني لو شافوكي إنتِ وباباهم بتزعقوا أو بتتخانقوا هيعملوا زيكم. لو شافوا الاحترام والتفاهم هيقلدوكم.
3- شجعي كل واحد يكوّن شخصيته
الغيرة بين الأخوات الأطفال بتقل لما كل واحد يحس إن له قيمة عندك. خصصي وقت لكل طفل لوحده، واعملي معاه حاجة بيحبها. لو في واحد بيحب الجري انزلي معاه يتمشى. والتاني بيحب الكتب اقري معاه شوية. خليه يحس إن له وقت ومساحة خاصة من غير مقارنة بحد.
4- ماتحطيش ولادك في منافسة “بلاش تصنيفات”
لما تبدأي توصفي ولادك بتصنيفات زي “دا الرياضي” و”دا الشاطر” من غير ما تحسي بتخلقي بينهم مقارنة ممكن تزود الغيرة بين الأخوات الأطفال.
الطفل اللي دايمًا بيتقال عليه إنه “رياضي”، ممكن يحس إنه مش شاطر زي أخوه والعكس صحيح.
فبدل ما تلزقي في كل طفل صفة ثابتة، اتكلمي عن مميزاته وشخصيته بشكل أوسع. يعني بدل ما تقولي “ليلى فنانة”، قولي “ليلى بتحب الرسم وبتبدع فيه، وكمان بتراعي مشاعر اللي حواليها وبتذاكر كويس”.
كدا بتشجعي كل واحد فيهم يكون على طبيعته من غير ما تحطيه في مقارنة أو تحسسيه إنه لازم يتفوق على أخوه عشان يلفت نظرك.
5- قضّوا وقت لطيف كعيلة
جربي تجمعي العيلة على العشا وتلعبوا مع بعض ألعاب بسيطة، تخرجوا الحديقة أو تعملوا أنشطة ممتعة. اللحظات دي بتخلي الجو أهدى وتقلل الغيرة بين الأخوات الأطفال، لأنهم بيقضوا وقت حلو سوا بدل ما يتخانقوا أو يحاولوا يجذبوا انتباهك بالمشاكل.
6- عامليهم بعدل
تبعاََ لدراسة اتنشرت على موقع NIH شملت 200 شاب بالغ، وركزت على تأثير التفرقة في معاملة الأهل بين الإخوة. ووجدوا إن اللي حسّوا بعدل في العاطفة من الأهل كان عندهم غيرة أقل بين الأخوات، وتقدير ذات أعلى، وتعلّق آمن أكتر.
أما اللي اتعرضوا لمعاملة تفاضلية، سواء كانوا المفضلين أو لا، اتكونت عندهم نظرة سلبية للذات والآخرين، ودا أثر على علاقاتهم العاطفية بالسلب في الكبر.
والعدل مش معناه تدي لكل واحد نفس الحاجة، لكن تدي كل طفل اللي يناسبه. يعني لو واحد بيحب الرسم والتاني بيحب الكرة مش لازم تجيبلهم نفس اللعبة، بس كل واحد ياخد حاجة تناسب اهتمامه. ودا بيقلل الغيرة بين الأخوات الأطفال لإن كل واحد حاسس إنك شايفاه وفاهماه.
7- اتحققي من أي خلاف
مش دايمًا بتشوفي اللي حصل قبل ما أطفالك يتخانقوا، فبلاش تروحي تلومي حد على طول. خدي وقتك واقعدي معاهم بهدوء، وخلي كل واحد يعبر عن إحساسه واسأليهم: “كنت حاسس بإيه؟”، “إيه اللي كنت تتمنى يحصل بدل كدا؟”.
الطريقة دي بتخلي الطفل يحس إن صوته مسموع ودا بيفرق كتير في تهدئة الغيرة بين الأخوات الأطفال.
8- اسمعيهم بجد
أوقات المشاحنات دي الولاد بيكونوا متضايقين ومتوترين، ودا بيخليكي كأم تقلقي وتحاولي تفهمي كل تفصيلة. بس ساعات مجرد إنك تسمعي لطفلك وتحسسيه إنك شايفاه وسامعاه بيفرق جدًا حتى لو كان سلوكه غلط، مشاعره مهمة والاعتراف بيها مش معناه إننا بنبرر التصرف.
ولما ابنك يحس إنك فاهمة هو حاسس بإيه، هيبدأ يهدا ويتعاون أكتر، ودا بيقلل الغيرة بين الأخوات الأطفال.
9- علميهم يحلوا مشاكلهم بنفسهم
الخناقات فرصة تعلمي فيها ولادك إزاي يحلوا خلافاتهم. اشرحي لهم يعني إيه يتنازلوا شوية، أو يشاركوا، أو يتعاملوا مع الموقف بشكل أنضج.
كدا هما بيتعلموا يبقوا أهدى في المرات الجاية بدل ما كل حاجة تتحول لصراع.
10- عاقبي في السر
لو فيه حد من أولادك غلط ما تعاقبيهوش قدام إخواته، لأن دا ممكن يحرجه ويزود التوتر والغيرة بينهم.
العقاب هدفه التعليم مش الإهانة. خدي ابنك على جنب واتكلمي معاه، كدا هيوصل له الدرس بدون ما يحس بالضعف قدام أخواته.
11- اعملي اجتماع عائلي
اجمعي العيلة كل شوية واتكلموا سوا عن اللي مضايق كل واحد. كدا كل طفل هياخد فرصة يعبر عن نفسه، وتحطوا قواعد سوا تمشوا عليها كعيلة.
وحطي القواعد دي في مكان واضح زي ورقة كبيرة مثلًا على الحيطة، علشان الكل يفتكرهم، ودا هيكون زي قواعد واضحة للتعامل ويقلل المشاكل والغيرة بين الأخوات الأطفال بشكل كبير.
12- خلي توقعاتك واقعية من الكبير
متحمليش على ابنك الكبير أكتر من طاقته، ومتفترضيش إنه لازم يعتني بأخوه أو أخته من أول يوم. لما تحسسيه إنك فاهماه، هيحس بالأمان وهيقل عنده الإحساس بالمنافسة.
13- حضريه نفسيًا قبل ما البيبي يوصل
- احكي له إن في بيبي جديد جاي، وفسري له الأمور ببساطة.
- اقري له كتب عن الإخوات عشان يتعود على الفكرة.
- اسأليه عن مشاعره وادّيه فرصة يعبّر عنها.
- استخدمي اللعب بالعرائس ممكن تعكس اللي حاسس بيه.
14- شاركي ابنك في تجهيزات البيبي
خليه يختار اسم، أو يجهز هدومه. دا هيخليه حاسس إنه جزء من التغيير مش متفرج عليه.
وبعد الولادة:
1- لو أمكن، خلي حد من العيلة يساعدك شوية عشان تلاقي وقت تقعدي معاه لوحدكم.
2- لما يساعد في حاجة بسيطة، اشكريه وقولي له قد إيه إنتِ فخورة بيه.
3- اسأليه كل فترة عن شعوره، وطمنيه إن أي إحساس جواه طبيعي.
فوائد وجود الإخوات في حياة الطفل
وجود الإخوات مش بس بيخلّي البيت مليان حياة، لكنه كمان ليه تأثير نفسي إيجابي كبير على ولادك. يعني حتى لو بينهم غيرة بين الأخوات الأطفال، وجودهم مع بعض بيعلّمهم حاجات مهمة بتفضل معاهم طول العمر.
التعاطف والاهتمام بالغير
الطفل اللي عنده أخ أو أخت بيتعلّم إزاي يحس بمشاعر اللي حواليه، ودا بيخليه أحن وأنضج نفسيًا.
الدعم النفسي طول العمر
حتى لو في بينهم اختلافات، دايمًا هيكون في حاجة مشتركة بتربطهم، ودا بيخلي كل واحد فيهم سند للتاني.
التعامل مع الناس بره البيت
وجود إخوة بيساعد الطفل يتعلم يتعامل مع زمايله في المدرسة أو النادي بطريقة أنسب.
حل الخلافات وتنظيم المشاعر
لما بيتخانقوا وبيتعلّموا يصالحوا بعض، دا بيدّيهم مهارات في التفاوض، وفهم الطرف التاني، وإزاي يهدوا نفسهم من غير ما يخرجوا عن شعورهم.
رغم إنك ممكن تواجهي شوية غيرة بين الأخوات الأطفال، بس لو عرفتي توجهي المشاعر دي صح، هتقدري تخلّي العلاقة بينهم قوية ومليانة حب وتفاهم.
هل فعلاً الغيرة بين الأخوات الأطفال بتخلص؟
كل مرة الخناقة بتخلص بتحسي إنك كسبتي الجولة… بس فجأة تلاقي الجولة اللي بعدها بدأت. بس الحقيقة إن الغيرة بين الأبناء مش هتفضل طول العمر، لو بدأتي تتدخلي بحكمة ووعي من بدري.
كل ما كنتي واعية لطريقة تربيتك، كل ما بقى سهل عليكي تسيطري على الخلافات دي. ولادك دايمًا واخدين بالهم من كل تصرفاتك حتى اللي بتحسي إنها بسيطة. لما تبقي قدوة ليهم، وتقضي وقت معاهم، وتحاولي تحلي المشاكل بينهم بهدوء، هيبدأوا يتعلموا إنهم يبقوا سند لبعض بدل ما يبقوا في منافسة طول الوقت.
ومحاولتك لتقليل الغيرة دي حاجة هتفرح قلبك بمرور الوقت لما تشوفي ولادك متفاهمين. والخبر الحلو إن في بيوت كتير قدرت تتجاوز الغيرة والمشاحنات، وتحوّلها لعلاقة قوية ومتينة بين الأخوات.
في النهاية، الغيرة بين الأخوات الأطفال أمر طبيعي وممكن يحصل في أي بيت، خصوصًا مع التغيرات في ترتيب الأسرة أو توزيع الانتباه.
دورك كأم مش بس تلاحظي السلوك، لكن كمان تفهمي أسبابه وتتعاملِي معاه بحكمة. لو قدرتي توفري لكل طفل مساحة خاصة، واهتمام يناسب احتياجه، وتبعدي عن المقارنات، هتقدري تخففي كتير من الغيرة وتخلقي جو صحي بينهم.
فدايمًا افتكري إن اللي بنزرعه النهاردا في علاقتهم ببعض هو اللي هيكبر معاهم بكرة.
المصادر
What causes Sibling Rivalry and what to do about it.
Tips for Dealing With Sibling Rivalry.
أضف تعليق