الجامعات الأهلية في مصر 2025: تعليم حديث بأسعار مناسبة

مع بداية موسم التنسيق كل سنة؛ بيبدأ آلاف الطلاب وأولياء الأمور يدوروا على أفضل الجامعات الأهلية في مصر، خصوصًا بعد ما أصبحت خيار مثالي يجمع بين جودة التعليم الجامعي وسعر في المتناول.

الجامعات الأهلية دلوقتي أصبحت منافس قوي للجامعات الحكومية والخاصة، لأنها بتقدّم مناهج حديثة، وشهادات معتمدة، ونظام دراسة قريب من الجامعات الدولية، وفي نفس الوقت بأسعار أقل بكتير من الجامعات الخاصة.

في المقال ده هنعرف مع بعض كل التفاصيل عن الجامعات الأهلية في مصر وأسعارها، من أول قائمة الجامعات المعتمدة، لحد المصروفات، شروط القبول، وأنظمة التقسيط للعام الدراسي 2025 / 2026.

ما هي الجامعات الأهلية في مصر؟

الجامعات الأهلية هي نوع من الجامعات شبه الحكومية، وبتستهدف شريحة معينة من الطلبة اللي بيدوروا على تعليم عالي الجودة بسعر معقول.

الجامعات دي مش هدفها الربح، لأن كل الإيرادات اللي بتدخلها بيتم إعادة ضخها تاني لتطوير المعامل، والمباني، والمناهج، وتقديم خدمات تعليمية أحسن للطلاب.

واللي بيميز الجامعات الأهلية في مصر إنها بتقدّم مناهج حديثة بالتعاون مع جامعات وهيئات دولية، وبتوفّر تجربة تعليم قريبة جدًا من الجامعات العالمية لكن بتكلفة أقل بكتير من الجامعات الخاصة.

ورغم إنها بتخضع لإشراف المجلس الأعلى للجامعات زي الجامعات الحكومية، إلا إن في شوية فروق مهمة؛ تنسيق الجامعات الحكومية بيكون أعلى شوية، وعدد الطلبة فيها كبير جدًا، أما الجامعات الأهلية بتتميز بقلة الأعداد وجودة أعلى في المتابعة والتعليم.

وبالنسبة للمصاريف، فهي وسط بين الحكومي والخاص مش قليلة زي الحكومي، ولا مرتفعة زي الجامعات الخاصة.

أما عن الفرق بينها وبين الجامعات الخاصة، فالمجلس الأعلى للجامعات وضّح إن الجامعات الأهلية بتتبع نفس قانون الجامعات الخاصة لكن من غير هدف ربحي، يعني مفيش مالك فرد بيستفيد منها، وكل المصروفات بترجع تاني لتطوير العملية التعليمية والمرافق.

ببساطة، الجامعات الأهلية هي نموذج حديث بيجمع بين جودة التعليم الخاص واستقرار النظام الحكومي، وده اللي خلّاها في السنين الأخيرة من أهم اختيارات الطلاب بعد الثانوية العامة.

أنواع الجامعات الأهلية في مصر

الجامعات الأهلية مش نوع واحد، لكن بتتقسم حسب نظامها وطريقة إدارتها.

فيه جامعات أهلية دولية ودي بتتبع نموذج التعليم العالمي، وبتكون شراكة بين مصر وجامعات أجنبية عشان تقدم برامج معترف بيها دوليًا.

وفيه كمان جامعات أهلية حكومية، ودي بتكون تابعة للجامعات الحكومية الكبيرة زي القاهرة والمنصورة وأسيوط، يعني نفس الكادر الأكاديمي لكن بإدارة مستقلة ومناهج أحدث.

أما النوع التالت فهو الجامعات الأهلية التابعة للقوانين الخاصة، ودي بتكون مستقلة إداريًا ومالية لكن تحت إشراف المجلس الأعلى للجامعات.

دلوقتي عدد الجامعات الأهلية في مصر وصل لـ 32 جامعة معتمدة، وده بعد التوسع الكبير اللي حصل مؤخرًا وإنشاء 12 جامعة جديدة في مختلف المحافظات، ودي خطوة بتأكد إن التعليم الجامعي في مصر ماشي بخطة واضحة للتطوير والتنوع.

قائمة الجامعات الأهلية في مصر لعام 2025

العدد اللي وصلتله الجامعات الأهلية حالياََ بيسهّل على الطلبة إنهم يختاروا مكان قريب من محافظتهم من غير ما يضطروا يسافروا بعيد.

ودي قائمة بالجامعات الأهلية المعتمدة في مصر حتى الآن:

1. الجامعة المصرية للتعلم الإلكتروني الأهلية.

2.  الجامعة الأهلية الفرنسية في مصر.

3. جامعة الملك سلمان الدولية.

4. جامعة المنصورة الجديدة.

5. جامعة جنوب الوادي الأهلية.

6. جامعة مدينة السادات الأهلية.

7. جامعة شرق بورسعيد الأهلية.

8.جامعة الإسماعيلية الجديدة الأهلية.

9. جامعة العلمين الدولية.

10. جامعة الأقصر الأهلية.

11. جامعة النيل الأهلية.

12. جامعة مصر للمعلوماتية.

13. جامعة حلوان الأهلية.

14. جامعة كفر الشيخ الأهلية.

15. جامعة بنها الأهلية.

16. جامعة المنوفية الأهلية.

17. جامعة بني سويف الأهلية.

18. جامعة أسيوط الأهلية.

19. جامعة المنيا الأهلية.

20. جامعة الإسكندرية الأهلية.

21. جامعة الزقازيق الأهلية.

22. جامعة السويس الأهلية.

23. جامعة دمنهور الأهلية.

24. جامعة القاهرة الأهلية.

25. جامعة عين شمس الأهلية.

26. جامعة سوهاج الأهلية.

27. جامعة المنصورة الأهلية.

28. جامعة الوادي الجديد الأهلية.

29. جامعة الفيوم الأهلية.

30. جامعة طنطا الأهلية.

31. جامعة دمياط الأهلية.

32. جامعة الجلالة.

اتعرف على: أهم 8 معلومات عن جامعة زويل للعلوم والتكنولوجيا. 

الفئات التي تقبلها الجامعات الأهلية في مصر

الجامعات الأهلية مش مقتصرة على طلاب الثانوية العامة فقط، لكن كمان بتفتح أبوابها لفئات تانية كتير من خريجي التعليم قبل الجامعي.

فطبقًا لقرارات مجلس الجامعات الأهلية، بيستمر القبول للطلاب الحاصلين على:

• خريجي الثانوية العامة المصرية والشهادات المعادلة داخل مصر وخارجها.
• شهادة الثانوية الفنية سواء نظام الـ 5 سنين أو الـ 3 سنين.
• خريجي المعاهد المتوسطة (عامين دراسيين).
• خريجي مدارس المتفوقين STEM.
• شهادة الثانوية الأزهرية.

كمان الجامعات الأهلية بتستقبل الطلاب الوافدين الحاصلين على شهادات فنية أو دبلومات معاهد، وده بيدي فرصة أكبر للطلاب من داخل مصر وخارجها إنهم يكملوا تعليمهم الجامعي في بيئة حديثة ومنظمة.

تنسيق الجامعات الأهلية في مصر 2025

أعلن المجلس الأعلى للجامعات رسميًا عن الحد الأدنى لتنسيق القبول في الجامعات الأهلية لعام 2025:

• كليات التكنولوجيا الحيوية – العلوم الصحية – التمريض – العلوم الأساسية: 53%
• كلية طب الأسنان: 73%
• كلية العلاج الطبيعي: 72%
• كلية الطب البيطري: 64%
• كلية علوم الحاسب: 58%
• كلية الهندسة: 64%
• كلية الصيدلة: 68%
• كلية الطب: 74%
• باقي الكليات: 52%

وأوضح المجلس إن النسب دي بتُطبق كمان على طلاب مدارس النيل، مدارس المتفوقين STEM بعد معادلة مجموعهم عن طريق معامل STEM اللي بيتحسب كده: (1.25 × مجموع الطالب ÷ 700)

يعني باختصار، التنسيق في الجامعات الأهلية والخاصة في مصر بقى أكتر مرونة شوية عن الجامعات الحكومية، وده بيدي فرصة أكبر للطلاب اللي مجموعهم أقل شوية إنهم يدخلوا الكلية اللي نفسهم فيها، بس في بيئة تعليمية متطورة ومعترف بيها محليًا ودوليًا.

شروط وخطوات الالتحاق الجامعات الأهلية في مصر 2025

طبقًا لموقع الجامعات الأهلية (المجلس الأعلى للجامعات)، الطالب يمشي على الخطوات دي بالترتيب:

1- تسجيل حساب على الموقع الرسمي للجامعات الأهلية باستخدام الإيميل وبطاقة الرقم القومي.

2- إدخال الرغبات حسب تنسيق السنة الحالية.

3- اختبارات القبول:

• اختبار عام لكل المتقدمين.
• اختبار تاني “تخصّصي” على حسب البرنامج اللي مقدّم عليه الطالب.

4- إرسال إيميل للطالب بالتفاصيل: مكان/موعد الاختبار ومدة أدائه.

5- سداد رسوم الاختبار الإلكتروني (القيمة بتختلف من جامعة للتانية).

6- طريقة التقييم بمجموع اعتباري حسب التخصص + 25% للاختبار العام + 5% لاختبار التفكير النقدي.

7- وللطلاب المصريين المتقدمين من خارج مصر: بيتم عقد لجان إلكترونية لهم بشرط تقديم ما يثبت وجودهم خارج البلاد وقت الاختبارات.

8- إرسال بريد إلكتروني لمكتب التنسيق يتضمن:

• اسم الجامعة والبرامج المُتقدَّم لها.
• الاسم الرباعي.
• الرقم التعريفي.
• الرقم القومي.

موعد إعلان نتيجة القبول في الجامعات الأهلية في مصر

بيتم الإعلان عن نتائج القبول في الجامعات الأهلية في نفس توقيت إعلان نتيجة المرحلة التالتة لتنسيق الثانوية العامة.

يعني أول ما تظهر نتيجة التنسيق الحكومي، بتعلن الجامعات الأهلية في مصر عن نتائج القبول على موقعها الإلكتروني الرسمي، وبمجرد ما الطالب يعرف إنه اتقبل، بيبدأ في تنفيذ شوية خطوات ضرورية لتأكيد القبول:

• دخول اختبار تحديد مستوى اللغة الإنجليزية عشان يتحدد مستوى الطالب الأكاديمي.
• إجراء الكشف الطبي في المراكز أو المستشفيات اللي بتعلن عنها الجامعة.
• سداد باقي مصروفات الجامعة قبل بداية الدراسة بـ 14 يوم على الأقل.
• سداد 25% من مصاريف الكلية اللي تم ترشيحه ليها.

المستندات المطلوبة للتقديم في الجامعات الأهلية في مصر

بعد ما الطالب ينجح في اختبارات القبول ويعرف الكلية اللي اتقبل فيها، بيروح بنفسه لمقر الجامعة الأهلية اللي هيكمل فيها، ومعاه مجموعة أوراق ضرورية، وهي:

• صورة من بطاقة الرقم القومي (وللوافدين صورة من جواز السفر).
• إيصال سداد المصروفات الدراسية لتأكيد القبول بشكل نهائي.
• شهادة باجتياز اختبار اللغة العربية للطلاب الأجانب.
• أصل شهادة الثانوية العامة أو ما يعادلها.
• نموذج جند (2، 6، أو 7) للطلاب الذكور.
• عدد 4 صور شخصية بخلفية بيضاء.
• شهادة أصلية بنتيجة اختبار TOEFL أو IELTS للطلاب المصريين+ نتائج اختبار الكفاءة في اللغة الفرنسية للحصول على البكالوريوس في اللغات التطبيقية (اختبار الكفاءة DELF أو المعهد الفرنسي في مصر)، ودا خاص بالجامعة الفرنسية الأهلية.

نصيحة مهمة: مهم تجهز الأوراق بدري وتتأكد إنها مختومة ومُعتمدة، لأن أي نقص في المستندات ممكن يأخّر التسجيل في الجامعات الأهلية.

ودا بوست توضيحي بكل الأوراق المطلوبة تبعاً لنوع الشهادة.

مصاريف الجامعات الأهلية في مصر لعام 2025

وزي ما قلنا قبل كدا مصاريف الجامعات الأهلية متوسطة بين الخاصة والحكومي، وكمان متقاربة من بعض، ودلوقتي هنشير لأبرز الجامعات الأهلية في مصر وأسعارها لعام 2025:

1- جامعة القاهرة الأهلية

• الطب البشري: 155000 جنيه.
• طب الفم والأسنان: 125000 جنيه.
• الصيدلة، العلاج الطبيعي: 110000 جنيه.
• الطب البيطري، الهندسة، الحاسبات والذكاء الاصطناعي: 80000 جنيه.
• التمريض، إدارة الأعمال، الاقتصاد والعلوم السياسية، العلوم: 60000 جنيه.
• القانون، الإعلام: 50000 جنيه.
• التربية للطفولة المبكرة: 30000 جنيه.

2- جامعة بني سويف الأهلية

• الطب البشري: 150000 جنيه.
• طب الفم والأسنان: 125000 جنيه.
• العلاج الطبيعي: 115000 جنيه.
• الصيدلة: 110000 جنيه.
• الهندسة، الحاسبات والذكاء الاصطناعي: 75000 جنيه.
• التمريض: 70000 جنيه.
• علوم الملاحة: 65000 جنيه.
• العلوم “برنامج كيمياء حيوي وميكروبيولوجي”، الآداب “قسم علم النفس الاكلينيكي”، الحقوق: 60000 جنيه.
• الحاسبات والذكاء الاصطناعي “برنامج المعلوماتية الطبية” : 55000 جنيه.
• التجارة، الإعلام، الآداب “برنامج الأرشيف ونظم المعلومات”: 50000 جنيه.

3- جامعة المنيا الأهلية

• الطب البشري: 150000 جنيه.
• طب الفم والأسنان: 120000 جنيه.
• الصيدلة، العلاج الطبيعي: 95000 جنيه.
• الهندسة: 70000 جنيه.
• الحاسبات والذكاء الاصطناعي: 60000 جنيه.
• العلاقات العامة والإعلام: 40000 جنيه.

4- جامعة العلمين الدولية

• طب الفم والأسنان: 128000 جنيه.
• الصيدلة: 110000 جنيه.
• العلاج الطبيعي: 100000 جنيه.
• الهندسة، علوم وهندسة الحاسب: 81000 جنيه.
• علوم الصحة العامة: 63000 جنيه.
• العلوم، الفنون والتصميم: 62000 جنيه.
• الأعمال: 59000 جنيه.

5- جامعة طنطا الدولية

• الطب البشري: 155000 جنيه.
• طب الفم والأسنان: 125000 جنيه.
• الهندسة، الحاسبات والذكاء الاصطناعي : 80000 جنيه.
• الألسن: 50000 جنيه.
• الأعمال: 45000 جنيه.
• العلوم الاجتماعية والإنسانية: 40000 جنيه.

6- جامعة سوهاج الدولية

• الطب البشري: 140000 جنيه.
• الصيدلة الإكلينيكية: 90000 جنيه.
• الصيدلة فارما دي: 80000 جنيه.
• الحاسبات والذكاء الاصطناعي : 60000 جنيه.
• الهندسة، تكنولوجيا العلوم الصحية: 50000 جنيه.
• العلوم: 40000 جنيه.
• الإعلام والآداب: 35000 جنيه.

7- الجامعة الفرنسية بالقاهرة

• الهندسة والعمارة: 175000 جنيه.
• الإدارة ومعلوماتية الأعمال: 156000 جنيه.
• اللغات التطبيقية، العلوم الاجتماعية والإنسانية: 126000 جنيه.

8- جامعة بنها الأهلية

• الطب البشري: 155000 جنيه.
• الأسنان: 125000 جنيه.
• العلاج الطبيعي: 110000 جنيه.
• الطب البيطري: 80000 جنيه.
• الهندسة، علوم الحاسب: 75000 جنيه.
• الفنون البصرية والتصميم: 60000 جنيه.
• الاقتصاد وإدارة الأعمال: 50000 جنيه.
• علوم الطاقة: 45000 جنيه.

9- جامعة الإسكندرية الأهلية

• الطب البشري: 155000 جنيه.
• الأسنان: 136000 جنيه.
• الصيدلة “كلينيكال”: 120000 جنيه.
• الهندسة: 89300 جنيه.
• علوم الحاسب والبيانات: 73000 جنيه.
• الاقتصاد وإدارة الأعمال، العلوم: 60000 جنيه.
• الإعلام: 57000 جنيه.
• العلوم الاجتماعية والإنسانية: 55000 جنيه.

10- جامعة جنوب الوادي الأهلية

• الطب البشري: 150000 جنيه.
• الصيدلة “كلينيكال”، العلاج الطبيعي: 100000 جنيه.
• التمريض، الحاسبات والذكاء الاصطناعي: 60000 جنيه.
• الهندسة: 58000 جنيه.
• العلوم الإدارية إنجليزي: 45000 جنيه.
• العلوم الإدارية عربي: 39000 جنيه.
• الألسن لغة إنجليزية وترجمة: 35000 جنيه.
• الألسن لغة فرنسية وترجمة: 30000 جنيه.

دا غير المصاريف الإدارية، ورسوم الالتحاق الخاصة بكل جامعة، وتقدر تتعرف على باقي مصاريف الكليات من خلال منشور على صفحة نتائج الامتحانات على الفيس بوك. 

مصاريف سكن الجامعات الأهلية في مصر 2025

الجامعات الأهلية مش بس مميزة في المناهج والتدريس، لكن كمان في مستوى السكن والخدمات اللي بتوفرها للطلاب.

السكن الجامعي فيها أشبه بـ شقق فندقية متكاملة الخدمات، فيها كل اللي الطالب محتاجه من راحة وأمان ومرافق حديثة زي الملاعب والمكتبات وصالات الأنشطة، ودي نماذج للأسعار :

سكن جامعة الجلالة

جامعة الجلالة من أكتر الجامعات اللي مهتمة بتوفير بيئة معيشية مريحة للطلاب، وفيها أكتر من 600 غرفة سكنية، بتتنوع ما بين سكن فردي وجماعي.

أما عن الأسعار فهي بتبدأ من 3000 لـ 5000 جنيه شهريًا للفرد الواحد، بالإضافة إلى تكلفة الوجبات اليومية اللي بتتراوح ما بين 200 لـ 500 جنيه حسب نوع الوجبة.

سكن جامعة المنصورة الجديدة

أما جامعة المنصورة الأهلية فموفرة سكن مخصص للطلاب من أول يوم في الدراسة، وكمان متعاقدة مع شركات نقل لتوفير أتوبيسات خاصة تسهّل حركة الطلبة من وإلى الجامعة.

تكلفة الإقامة هناك بتكون حوالي 10,000 جنيه للفصل الدراسي الواحد، وبيُضاف عليها مبلغ 4,000 جنيه كتأمين مسترد في حالة عدم وجود أي تلفيات.

وبكدا يكون السكن في الجامعات الأهلية في مصر بيجمع بين الراحة، والأمان، والخدمات الحديثة، لكنه بيكون أغلى شوية مقارنةً بالسكن الحكومي، وده راجع لمستوى التجهيز العالي والموقع المميز.

الخاتمة

أصبحت الجامعات الأهلية في مصر فرصة حقيقية لكل طالب نفسه يكمّل تعليمه في بيئة متطورة ومنظمة، تجمع بين جودة التعليم الأكاديمي والانضباط العملي.

واللي بيميزها إنها بتفتح أبواب جديدة قدام الشباب، سواء عايز يدرس في مجال حديث أو يطور مهاراته بشكل يواكب متطلبات السوق.

ومع إن مصاريف الجامعات الأهلية ممكن تبان أعلى شوية من الحكومية، لكنها بتوفر تجربة تعليم مختلفة تستحق واستثمار حقيقي في مستقبل إبنك.