ما هي مواد نظام الـ IGCSE في مصر؟

نظام الـ IGCSE في مصر

كتير من أولياء الأمور بيفضلوا إنهم يقدموا لأولادهم في نظام الـ IGCSE في مصر عن النظام الحكومي؛ عشان يزودوا فرصة قبولهم في المنح الدراسية والجامعات بره مصر.

لكن لو لاحظنا هنلاقي إن عدد طلاب الثانوية البريطانية في مصر أقل بكتير جدًا من طلاب الثانوية العامة رغم المميزات الكثيرة الموجودة في نظام الـ IG، وهنا لازم نعرف إيه السبب.

في المقال ده هنتكلم عن المميزات والعيوب الموجودة في نظام الـ IGCSE (الثانوية البريطانية)، وإيه المستويات اللي بيدرسوها بالتفصيل.

كمان هنوضح مواد نظام الـ IG اللي بتأهل طلبة نظام الـ IGCSE في مصر لدخول الكليات العلمية أو الأدبية اللي حابين يكملوا دراستهم فيها بعد كده.

مميزات وعيوب الشهادة الثانوية البريطانية

نظام الـ IGCSE في مصر بيختلف عن نظام الثانوية العامة المصرية في أكثر من نقطة، وده بيخليه مميز بشكل كبير، إلا إنه بجانب المميزات دي بيكون في بعض العيوب اللي لازم تدرسها كويس وتخلي بالك منها قبل ما تقدم لولادك فيها.

أهم مميزات نظام الـ IGCSE

مميزات IG

من الحاجات اللي بتميز الشهادة الثانوية البريطانية عن الثانوية العامة:

شهادة نظام الـ IGCSE في مصر معتمدة

اعتماد الشهادة بيتيح لطلبة الثانوية البريطانية فرصة دخول الجامعات الحكومية والخاصة في مصر بدون الحاجة لأي شهادات تانية.

كمان ممكن الطالب يدخل بالشهادة دي أي جامعة في أي مكان في العالم في حالة توافر الإمكانيات بدون إجراء معادلات بجانب شهادته؛ لإن المواد اللي بيكون درسها هي نفسها اللي بتتدرس للطلبة خارج مصر.

المرونة العالية

في نظام الـ IGCSE بيكون في صلاحيات للطالب إنه يقسم المواد على أكثر من سنة، ويوزعها على حسب قدراته، فمش لازم ياخد المقرر كله في وقت محدد.

الميزة دي بتساعد الطالب إن يركز جهده على عدد معين من المواد اللي يقدر يدرسها ويتفوق فيهم بشكل أسهل.

كمان عنده قدرة إنه يختار المواد المتعلقة بالكلية اللي حابب يدخلها، وده بيساعده إنه يكَون عنده خلفية كويسة من المعلومات عن المواد اللي هيحتاجها في سنين دراسته بعد كده.

المناهج معتمدة على الفهم أكثر من الحفظ

المناهج الموجودة في نظام الـ IGCSE في مصر بتركز أكثر على التفكير والإبداع، وتنمية مهارات الطالب، بدون التطرق إلى طرق الحفظ التقليدية أوالحشو الكتير اللي ممكن يكون موجود في النظام الحكومي.

ممكن تكون الطريقة دي صعبة شوية على بعض طلبة نظام الثانوية البريطانية، إلا إنها بتوسع آفاقهم وتخليهم يهتموا بالبحث، ويعرفوا إزاي يوصلوا للمعلومة بطريقة صح.

والنقطة دي بتكون مفيدة أكثر للطلبة اللي مهتمة بمجالات البحث العلمي المختلفة.

المراقبين بيكونوا من المجلس البريطاني

المجلس البريطاني هو المسئول الأول عن تطبيق نظام الـ IGCSE في مصر، وهو المشرف على نظام الامتحانات والتنسيق الخاص بالجامعات المختلفة.

بالتالي جميع المراقبين بيكونوا تابعين للمجلس البريطاني، يعني بكده مش هيكون في مجال أبدًا للغش.

كمان الامتحانات بتكون من بره مصر، وبتتعمل بأكثر من شكل زي الامتحانات التحريرية، والشفوية، وغيرهم، وبيتم تصحيحها بردو بره مصر، فمش بيكون في تحيز لأي طالب.

يعني الدرجات اللي بياخدها الطالب هي درجاته اللي بتعبر عن مستواه الدراسي الفعلي، والمدرسة مش مسئولة عن أي درجات إضافية لأعمال السنة الخاصة بالطالب.

مفيش إلزام إن الطالب ياخد دروس خصوصية

الطالب هو اللي بيحدد هو محتاج دروس خصوصية في المواد ولا لأ بناءً على قدراته؛ لإن نظام الـ IGCSE في مصر مختلف تمامًا عن النظام الحكومي زي ما قولنا.

الامتحانات في نظام الثانوية البريطانية مش بتختبر قدرة الطالب على الحفظ والتسميع، لكن بتقيس قدرته على التفكير السريع، ومدى استيعابه للمعلومات المقررة.

كمان عادةً بيكون في مساعدين مع كل مدرس داخل الفصل بيساعدوا الطلبة إنهم يستوعبوا الجزء اللي بيتشرح، ويجاوبوا على أسئلتهم، وبكده احتياجهم للدروس الخصوصية إلى حد ما بيقل.

تعرف علي مدارس بريطانية في القاهرة اضغط هنا

عيوب نظام الـ IGCSE في مصر

أما عن عيوب النظام ده فهي:

التكلفة العالية

مصاريف نظام الـ IGSCE في مصر بتكون أعلى بكتير جدًا من النظام الحكومي، وده بيخلي ولي الأمر في بعض الأحيان يتراجع عن قراره في التقديم للطالب في النظام ده رغم مميزاته الكتيرة؛ لعدم إمكانيته سداد الرسوم المطلوبة.

ولو اضطر الطالب إنه ياخد دروس خصوصية وقتها التكلفة بتزيد على ولي الأمر، لإن بيكون في رسوم إضافية للدروس دي بجانب الرسوم الأساسية للمدرسة.

عدم إمكانية تغيير المواد التأهيلية للكليات بعد اختيارها

الطالب بيبدأ يختار المواد اللي هيدرسها بعد المستوى العادي -O level- بناءً على الكلية اللي حابب يدخلها، وفي المرحلة دى بيدرس مواد متعلقة بالمجال اللي هيكمل فيه.

بعدها الطالب مش بيكون عنده قدرة يغير المواد اللي اختارها لو حابب يدخل كلية في مجال تاني غير اللي حدده في البداية.

التركيز على البحث بشكل أكبر

نظام الـ IGCSE في مصر بيعتمد على البحث أكثر من التلقين، وده بيكون مناسب جدًا للطلبة اللي عندها شغف البحث للوصول للمعلومات.

أما بالنسبة للطلبة اللي بتحب تتعلم بطريقة الحفظ والتلقين لكل المعلومات المطلوبة بيكون النظام صعب عليهم، والمجهود اللي محتاجين يبذلوه بيكون كبير إلى حد ما.

مستوى الطالب في اللغة الإنجليزية لازم يكون قوي

نظام الثانوية البريطانية بيحتاج طالب مستواه مرتفع بشكل كبير في اللغة الإنجليزية عشان يقدر يدرس المواد المطلوبة كويس؛ لإن الدراسة في النظام ده بتكون باللغة الإنجليزية بس.

وبكده لو مستوى الطالب ضعيف في اللغة الإنجليزية مش هيقدر يكمل في نظام الـ IG، والأفضل إنه يختار نظام تاني للدراسة.

لكن النقطة دي ممكن بسهولة يتم التغلب عليها بإننا نشجع الطالب إنه يبدأ يطور من نفسه أكثر في اللغة الإنجليزية قبل ما يقدم في نظام الـ IG عشان يقدر يتميز فيه.

إجبار الطلاب على أداء امتحانات في كل فصل دراسي

طلاب مدارس نظام الـ IGCSE لازم يلتزموا بأداء الامتحانات اللي بتتعمل في كل فصل دراسي، لإن مجموع الدرجات اللي بيجيبوها في الامتحانات دي بتكون هي درجاتهم في آخر السنة.

وبكده بيكون عليهم ضغط نفسي كبير؛ لإن مطلوب منهم يجمعوا درجات معينة في الامتحانات دي عشان يوصلوا لمجموع كويس في آخر السنة.

مستويات دراسة نظام الـ IG

مواد الـ O level

مستويات الدراسة في نظام الـ IG عبارة عن 3 أقسام:

المستوى العادي Ordinary level

المستوى العادي هو المستوى اللي بيدرس فيه الطالب المواد الأساسية اللي لازم يكون كل الطلاب عندهم خلفية عنها مهما كان مجال الدراسة اللي هيكملوا فيه.

مواد الـ O level بتكون زي:

  1. اللغة العربية
  2. اللغة الإنجليزية
  3. الأحياء
  4. الفيزياء
  5. الكيمياء
  6. الرياضيات

والمستوى ده بيساعد الطلبة إنهم يفهموا نظام الدراسة قبل ما يتنقلوا للمستوى المتقدم عشان يكونوا مؤهلين كويس للمستوى الجديد، وطبيعي الـ O level يكون أسهل شوية من المستوى المتقدم.

المستوى المتقدم Advanced level

في المستوى ده الطالب بيبدأ يحدد المواد اللي هيكمل فيها حسب الكلية اللي هيدخلها؛ وده لإن المواد دي هي اللي هتأهله لدخول الكلية بعد كده، واللي لازم يحقق فيها درجات معينة عشان يقدر يدخل الجامعة اللي عايزها.

بكده الطالب مش هيدرس كل المواد الأساسية تاني، بمعنى إنه لو اختار إنه يدخل كلية طبية مش هيضطر يدرس المواد اللي لها علاقة بالكليات الأدبية، والعكس صحيح.

هنا الطالب هيركز أكثر على المواد اللي تبع مجال الكلية اللي حددها، وهيختار المواد سواء من نظام الدراسة التابع لكامبريدج -Cambridge- أو نظام إدكسل -Edexel-.

نظام كامبريدج  Cambridge أو نظام إدكسل Edexel

هم أنظمة لمناهج تعليمية متعارف عليها ومعتمدة، وبيتم التحكم في اختيار نظام منهم عن طريق المدرسة، ومدرس المادة، وكمان الطالب له الحق إنه يختار النظام اللي يحبه.

لكن بعض المواد ممكن تكون موجودة في نظام كامبريدج ومش موجودة في نظام إدكسل أو العكس، وفي الحالة دي بيكون النظام إجباري.

المستوى المتقدم بينقسم لمرحلتين؛ مرحلة AS ومرحلة A2، وفي النهاية بتتجمع درجات المرحلتين مع بعض ويتحدد على أساسها مستوى الطالب وإمكانية تقديمه في الجامعات البريطانية من عدمها.

المستوى التكميلي Advanced subsidiary

الطلبة في المستوى ده بتدرس أساسيات متعلقة بشكل أكبر بالكليات اللي هيدخلوها، مش مجرد مواد للشعبة، ودي بتساعدهم في تكوين خلفية كويسة عن مواد الكليات.

تخصيص شعبة معينة لدراستها بيتم بردو في المدارس الحكومية، لكن مش بيتم دراسة أساسيات للمواد اللي هيام دراستها في الجامعات زي ما بيحصل في نظام الـ IGSCE في مصر.

تعرف علي المدارس البريطانية في محافظة الجيزة اضغط هنا

المواد الدراسية المؤهلة للكليات في نظام الـ IG

طلبة نظام الثانوية البريطانية IG بيبدءوا يختاروا المواد اللي حابين يدرسوها في المستوى المتقدم على حسب المجال اللي هيكملوا فيه زي ما وضحنا.

لو اتكلمنا عن المواد التأهيلية للجامعات هنلاقي:

مواد نظام الـ IG المؤهلة للكليات الطبية

بالنسبة للطلبة اللي بيكون هدفهم دخول الكليات الطبية لازم يدرسوا بعض المواد الأساسية في الـ O level وهي:

  • اللغة الإنجليزية
  • الفيزياء
  • الكيمياء
  • المحاسبة
  • الأحياء

بالنسبة للأحياء فبيتم دراستها كمان في الـ A level لإنها أكثر مادة لها علاقة بالكليات الطبية، وفي النهاية بيكون مطلوب تقدير معين في كل مادة حسب التنسيق عشان الطالب يقدر يلتحق بالكلية الطبية.

مواد نظام الـ IG المؤهلة لكليات الهندسة

هنا بيكون مطلوب نفس المواد المؤهلة للكليات الطبية ما عدا الأحياء بيكون مكانها Maths.

وفي الحالة دي بتكون دراسة الـ Maths A level إجبارية.

مواد نظام الـ IG المؤهلة للكليات النظرية والأدبية

نظام الIGCSE مش خاص بس بالطلبة اللي مهتمين بالمجالات العلمية، ففي مرونة إن الطالب يختار المجال الأدبي ويدخل كلية نظرية زي في حالة الثانوية العامة.

هنا مش بيكون إجباري إن الطالب يدرس مواد محددة في الـ A level، فممكن يدخل كلية نظرية بعد دراسته 8 مواد أساسية بس في الـ O level ونجاحه فيهم بتقدير معين بتحدده لجنة التنسيق.

الخلاصة

نظام الـ IGCSE في مصر بيتميز عن النظام الحكومي في حاجات كتيرة زي إنها بشهادة معتمدة بتمكن الطلبة يدخلوا أي كلية داخل أو خارج مصر.

بالإضافة إلى مرونة النظام بشكل أكبر من النظام الحكومي وإمكانية تقسيم المواد المقررة على أكثر من سنة دراسية بناءً على رغبة وإمكانيات الطالب.

كمان بتركز في مناهجها على التفكير والإبداع بدون حشو أو تلقين، ودرجة الطالب بتعبر في النظام ده عن مستواه الحقيقي لإن مش بيكون في مجال للغش.

أما عيوب نظام الـ IGCSE في مصر فهي تكلفته العالية واعتماده بشكل كلي على اللغة الإنجليزية.

الطالب في النظام ده بيحدد المواد اللي حابب يدرسها على حسب الكلية اللي مهتم يدخلها، ففي حالة إنه حابب يدخل كلية طبية هيدرس المواد المتعلقة بالكليات الطبية فقط بدون تطرق إلى المواد الأدبية، والعكس صحيح.

قولنا لو لسه عندك أي استفسارات بخصوص نظام الثانوية البريطانية -IGSCE- في مصر.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

ورك شيت للاطفال Worksheet For Kids
انضم إلي جروب دليل المدارس المصرية

إقرأ أكثر..

شروط مدارس STEM لعام 2021

شروط مدارس ستيم لعام 2021

مدارس STEM بتفتح أبوابها كل سنة لجميع الطلبة الحاصلين على الشهادة الإعدادية اللي بيهتموا بتطوير نفسهم في العلوم والتكنولوجيا؛ عشان تساعدهم على تنمية مهاراتهم، وتأهلهم

إقرأ الموضوع »
mood_bad
  • لا توجد تقييمات/تعليقات.
  • اضف تعليق