صعوبات الحساب هي واحدة من أشهر صعوبات التعلم عند الأطفال والبالغين، واللي بتأثر على الشخص في فهم المفاهيم الرياضية، وأداء العمليات الحسابية.
دا غير إن مادة الرياضيات بتعد جزء مهم جدًا من المنهج الدراسي، وفهم قواعد الرياضيات بيكون ليه دور كبير في تأسيس الطفل من صغره لمواجهة تحديات المستقبل، والتعامل بسهولة أكتر مع التكنولوجيا.
وفي المقال دا هنتكلم عن مفهوم عسر الحساب، وأهم الأنشطة لعلاج صعوبات الحساب عند الأطفال.
ما هو عسر الحساب؟
هو النسخة الرياضية لعُسر القراءة، ودا عبارة عن خلل في مخ الإنسان بيأثر على قدرته على فهم الرياضيات، من أول عد الأرقام، والتعرف على الرموز، وحفظ جداول الضرب، لحد حل المسائل الحسابية، وممكن لأبعد من كدا.
والخلل دا ممكن يستمر مدى الحياة، وبيتشخص في كل الأعمار، لكن على الأغلب بنكتشفه في مرحلة الطفولة، زيه زي باقي أنواع صعوبات التعلم.
أهم أنشطة لعلاج صعوبات الحساب
دور الأهل في ممارسة الأنشطة دي بيكون كبير جداً، ودا لأنها على الأغلب بتكون أنشطة منزلية، أو بيحتاج الطفل فيها مساعدة من الأهل عشان يمارسها.
وبيركز العلاج هنا على استخدام طرق خاصة لتعلم المهارات اللي بيحتاجها الطفل أثناء حل المسائل، وبيتم اختيار أنشطة لعلاج صعوبات الحساب مناسبة لدا، واللي منها:
1- لعبة الدومينو
ممارسة لعبة الدومينو أو الألعاب اللي بتعتمد على استخدام قطع الدومينو بتساعد الطفل على فهم مفاهيم الرياضيات البسيطة بسهولة أكبر.
وقالت الأخصائية “Ronit Bird” إن الطفل لازم يفهم أنماط الأرقام الموجودة على قطع الدومينو، بدلاً من عد النقط الفردية عليها في كل مرة.
وعشان كدا لازم الأول تخلي طفلك يتعود على القطع دي ويفهمها، وبعدها يبدأ يلعب بيها، ودا بحسب اللي اتذكر في مقال “7 طرق عملية لمساعدة الطفل اللي بيعاني من عسر الحساب“.
2- طهي الطعام معًا
هنا بتطلب من الطفل المساعدة في تحضير المكونات وتجهيزها، فمثلاً بتطلب منه يجيب ربع كيلو عدس، وبصلتين، و 6 قطع لحم، واللي كلها مكونات عادية هتستخدمها في تحضير الوجبة، لكنه واحد من أكتر الأنشطة لعلاج صعوبات الحساب اللي هيستفيد منها طفلك، لإنه هيحاول يستخدم مهاراته في الرياضيات في عد المكونات، وتقدير كمياتها.
3- اللعب بالساعة
عادةً الأطفال اللي بيعانوا من عسر الحساب بيعانوا من مشكلة في قراءة الوقت وإدارته، ومن هنا جات فكرة استخدام الساعة في مساعدة الطفل على التغلب على حاجة زي دي.
فبتطلب منه يقرأ الوقت اللي ظاهر على الشاشة من فترة للتانية، أو تفهمه إنه مسؤول عن تبليغك بالوقت لما يوصل لرقم معين متفقين عليه، وكل ما يعمل المهمة دي بشكل صحيح تكافئه كنوع من التحفيز، عشان يكمل في ممارسة النشاط دا من غير ملل.
تقدر تعرف ازاي تدير وقت طفلك بطريقة أفضل من خلال مقال: 5 نصائح لتنظيم وقت الأطفال في المنزل.
4- التسوق سوياً
دا واحد من أفضل الأنشطة لعلاج صعوبات الحساب عند الأطفال اللي بيعانوا من صعوبة في العد، وهنا بتطلب المساعدة من طفلك في إعداد قائمة بالمشتريات الللي هتحتاجوها، وتنزلوا تشتروها سوا، وتخليه مسؤول عن مقارنة عدد الحاجات اللي بتشتروها بالعدد المكتوب في القائمة.
وكمان تخليه يساعدك في عد النقود اللي بتدفعوها، وحساب الفلوس الباقية معاكم.
5- طرح الأسئلة حول الأسعار
ممكن نعتبر دا نشاط تكميلي للنشاط اللي قبله، وهنا بتبدأ تسأل طفلك أسئلة عن أسعار السلع والعروض اللي عليها، وتبدأ تقارن معاه السلع ببعضها، وتخليه يحسب ازاي ممكن يوفر في الفلوس اللي معاه لو أخد عروض معينة.
6- لعبة التخمين
التخمين هو واحد من أهم الأنشطة لعلاج صعوبات الحساب عند الأطفال، لإنه بيرفع عندهم مهارة توقع الحسابات وإدارتها بشكل سريع.
ودا بيحصل عن طريق إنك مثلاً تصنع كومة صغيرة من الصخور، والبسلة، والعملات المعدنية، وتخلي طفلك يخمن أي واحدة منهم فيها عدد أكبر وأيهم عدد أقل، كمان ممكن تسأله عن عدد الصخور مثلاً في الكومة وتجاوب أنت كمان معاه بشكل تقريبي، واللي يقرب منكم أكتر للعدد الصحيح يكسب.
6- لعبة عد الأشياء
دا نوع من أنواع أنشطة لعلاج صعوبات الحساب اللي بيحتاج للخروج من البيت، وتبدأ تتسابق مع طفلك في عد أشياء معينة تتفقوا عليها، زي مثلاً تسأله في كام سيارة حمراء شوفتوها في الشارع، أو كم عدد الأشخاص اللي لابسين أحذية سوداء، أو عدد السلالم اللي طلعتوا عليها سوا .. إلخ.
7- لعبة البحث عن الأرقام
في اللعبة دي بتتفق مع طفلك على رقم معين تدوروا عليه في أي مكان تروحوه، فمثلاً هتتفقوا على الرقم “7” وتدوروا على الرقم دا في عناوين الشوارع أو أرقام لوحات ترخيص العربيات .. إلخ.
واللي يلاقي منكم الرقم دا الأول يكسب، ودا بيعد واحد من أنشطة لعلاج صعوبات الحساب اللي بتنمي قدرات التركيز عند الطفل.
8- لعبة تذكر أرقام الهاتف
اللعبة دي هي واحدة من أهم الأنشطة لعلاج صعوبات الحساب اللي بتعتمد على تقوية ذاكرة الطفل في ترتيب الأرقام ورا بعضها. فعلى سبيل المثال هتتفق مع طفلك إنكم تتصلوا برقم حد من قرايبكم، وتقول أنت النص الأول من الرقم وهو يقول النص التاني أو العكس.
9- لعبة الأدوار
تخيل إن طفلك موظف في محل ومحتاج يختار من المنتجات اللي في البيت الحاجات اللي هيعوز يبيعها للزباين بتاعته، وخليه يحط لكل منتج سعر وعلامة.
وبعد شوية ادخل عليه كأنك زبون وهتشتري منه، وابدأ اختار من المنتجات اللي عنده حاجات عاوز تشتريها واسأله على سعرها وفاصل معاه.
في اللعبة دي الطفل هيتدرب على معرفة الكميات، والجمع، والطرح، وهيتدرب كمان على إدارة الأموال، وبكدا تكونوا قضيتوا وقت ممتع سوا، وفي نفس الوقت الطفل اتعلم وطور من مهاراته.
10- ألعاب الكمبيوتر
بيحتوي الكمبيوتر على ألعاب وأنشطة لعلاج صعوبات الحساب، ويمكن أغلبنا لعب الألعاب دي من غير ما ياخد باله من فوايدها، ومن أشهرهم لعبة “سوليتير”، واللي فيها بيكون قدامك مجموعات من ورق الكوتشينة، وبيكون مطلوب منك ترتب الورق في كل مجموعة تنازلياً حسب قيمته.
ودي لعبة ممتازة لتدريب طفلك على ترتيب الأرقام وحفظها، لكن ضروري تحمي طفلك من الآثار السلبية للتكنولوجيا، ودا اللي بنكلمك عنه في مقال: تأثير التكنولوجيا على الأطفال: أبرز التأثيرات السلبية والإيجابية.
11- مذكرات الجيب
اشتري لطفلك نوتة صغيرة وخليها معاه طول الوقت، واطلب منه يكتب فيها بشكل يومي كل حاجة بيشتريها من مصروفه، وفي آخر كل يوم خليه يفتحها ويقرأها معاك، ويحسب هو صرف كام واتبقى معاه كام.
النشاط دا هو أحد الأنشطة لعلاج صعوبات الحساب اللي ليهم قدرة عالية على تقوية ذاكرة الطفل الحسابية، وتدريبه على عمليات الجمع والطرح.
12- الحصّالة
ودا نشاط تكميلي للنشاط اللي قبله، بحيث هتشتري حصالة لطفلك وتحتفظ بالقفل بتاعها معاك، وتطلب منه في نهاية كل يوم يحوش فيها الجزء اللي اتبقى من مصروفه، وتديله مفتاح القفل بتاعها آخر كل أسبوع وتطلب منه يفتحها ويحسب المبلغ الكلي اللي احتفظ بيه.
وتبدأ تتفق معاه على حاجة هو بيحبها وعاوز يشتريها، بحيث يكون بيحوش فلوسه لهدف معين، وكل ما تحققوا هدف تحطوا سوا هدف جديد، وبكدا تكون قدمت مقدمة لطفلك عن ثقافة ثقافة الإدخار.
ضروري كمان تكون مدرك إن الأنشطة دي تنفع لكل الأطفال لتطوير مهاراتهم بشكل عام، لكن الأفضل إنك تزور طبيب متخصص عشان يحدد حالة طفلك بدقة، ويوجهك لنظام التأهيل الأنسب ليه بجانب الأنشطة.
الخلاصة
لازم ندرك إن تأسيس الأطفال في سن مبكر بيفرق معاهم جداً في التغلب على أي صعوبات تعلم ممكن تواجههم، واللي منهم عسر الحساب، وإن من خلال توفير بيئة إيجابية تحفيزية، وممارسة الأنشطة المناسبة نقدر نطور من مهاراتهم في الرياضيات، ونعزز ثقتهم بنفسهم.
عشان كدا في المقال دا اتكلمنا عن مجموعة متنوعة من أهم الأنشطة لعلاج صعوبات الحساب عند الأطفال، واللي هتفرق مع طفلك في التغلب على عسر الحساب وتزود من مهاراته في التعامل مع المسائل الحسابية.
اقرأ أيضاً: أنشطة لعلاج صعوبات القراءة عند الأطفال.
المصادر
Activities To Help Dyscalculia At Home If Math Seems Impossible.
Dyscalculia Activities: A different take on improving early math skills.
أضف تعليق