أساسيات النظافة الشخصية للأطفال وكيفية تعليمها لهم

النظافة الشخصية للأطفال حاجة ضرورية وأساسية للحفاظ على صحتهم وحمايتهم من الأمراض، دا غير إنها بتحافظ على مظهرهم الخارجي كمان، وبتزود من ثقتهم في نفسهم، وبتحميهم من التعرض للتنمر.

وفي المقال دا، هنتكلم عن أهمية نظافة الأطفال الشخصية، وإزاي نقدر نعلمهم العادات الصحية للنظافة، وكمان هنسلط الضوء على بعض الممارسات الجيدة في النظافة الشخصية.

أهمية النظافة الشخصية للأطفال

وفقًا لدراسة اتنشرت على موقع ResearchGate بنلاقي إن ممارسات النظافة غير السليمة بتسبب الإصابة بأمراض معدية زي: الإسهال، والتهابات الجهاز التنفسى.

والعدوى المتكررة دي بتؤدي لسوء التغذية، ونقص العناصر الغذائية، ودا بدوره بيأثر على النمو المعرفي للأطفال. 

ودا لإن الأطفال بطبيعة الحال في سن صغير معرضين للجراثيم والعدوى بشكل كبير نتيجة للعب والجري، ولمس كل حاجة حواليهم سواء نظيفة أو لأ.

ومن أبرز الإيجابيات لتعليم طفلك قواعد النظافة الشخصية للأطفال، هي؛

1. الوقاية من الأمراض

أكدت دراسة اتنشرت على موقع CDC إن غسل اليدين بطريقة صحيحة وعناية بيساعد بشكل كبير في تقليل خطر الإصابة بالأمراض.

وإن الأطفال اللي بيتعلموا يغسلوا أيديهم بانتظام وخصوصًا بعد اللعب أو استخدام الحمام، بيكونوا أقل عرضة للالتهابات.

2. تعزيز الثقة بالنفس

النظافة الشخصية للأطفال مهمة لتعزيز الثقة في نفسهم؛ فالحفاظ على شكلهم نظيف ومهندم بيحميهم من التنمر أو الاستقصاء؛ وبالتالي بيكون عندهم استعداد أكتر للاندماج مع الآخرين في المدرسة أو مع الأصدقاء. 

3. تقليل التوتر والقلق

بعض الأبحاث بتقول إن الأطفال اللي عندهم عادة النظافة الشخصية بيشعروا براحة أكبر، وبتقلل من مستوى التوتر عندهم. 

اقرأ أيضًا؛ أهم 14 طريقة تعليم الأطفال القراءة ونصائح لتعلم أسهل. 

10 عادات صحية لتعليم النظافة الشخصية للأطفال

هنوضحلك أهم عادات للنظافة الصحية اللي لازم تعودي طفلك عليها من سن صغير وتفهميه مدى أهميتها وتأثيرها عليه في مواقف كتير، وهي:

1. غسل اليدين

الإيدين هي الوسيط الأساسي لدخول الجراثيم لجسم الإنسان، وفي حالة لمس الطفل لفمه بإيديه متسخة، فدا بيعرضه للإصابة بالمرض بسرعة نتيجة التلوث البكتيري والفيروسي.

ومن أبرز الإصابات هي التلوث البكتيري المسبب للقيء والإسهال، وعشان طفلك يتعلم غسيل الإيدين بطريقة صحيحة؛ نفذي دا قدامه بشكل صحيح خلال الخطوات دي:

1. استخدمي ماء الصنبور الجاري.
2. بللي الإيدين كويس بالماء.
3. ضعي الصابون أو سائل الغسيل على إيديكي كويس.
4. افركي عشان تتشكل رغوة.
5. نظفي كويس بين الأصابع وتحت الأظافر. 
6. اغسلي لمدة لا تقل عن 30 ثانية. 
7. اشطفي الرغوة بالماء النظيف. 
8. جففي إيديكي بفوطة نظيفة.

مهم كمان تعلمي طفلك أوقات غسل الإيدين وتعملي الفعل دا قدامه على طول، ومنها:

• بعد اللعب في الهواء الطلق. 
• بعد زيارة أي شخص مريض. 
• بعد الوصول للبيت فوراً. 
• بعد العطس أو السعال. 
• بعد استخدام المرحاض. 
• بعد تنظيف المنزل. 
• بعد لمس الحيوانات. 
• قبل وبعد الأكل.

غسل الإيدين من العادات الحيوية المهمة اللي تعودي طفلك عليها، ومهم تتأكدي من استخدام طفلك للصابون في غسل إيديه، لإن المياه مش كفاية لقتل الجراثيم.

2. تنظيف الأسنان

بيتولد الطفل من غير أسنان وبمجرد ما بيوصل لعُمر السنة بتظهر له أسنان، ويُفضل تهتمي بيها من البداية لحمايته من تسوس أسنان الرضع نتيحة لتراكم اللبن عليها من الرضاعة الليلية.

وبعدين ابدئي عوديه على تنظيف أسنانه بفرشاة صغيرة ومعجون مناسب لعمره من سن سنتين، واشرحي له أهمية تنظيف الأسنان مرتين يوميًا، لإنها بتحميه من التسوس، والتعرض لألم الأسنان الشديد، ورائحة الفم الكريهة والإلتهابات في اللثة، وغيرها من المشاكل الناتجة عن إهمال تنظيف الأسنان.

فتبعًا لإحصائية اتنفذت على الأطفال في سن المدرسة على موقع BMC بنلاقي إن صحة أسنان الأطفال قبل سن المدرسة كانت قليلة جدًا، ودا لعدم الاهتمام بيها بالشكل المطلوب، ولقلة تنظيفها يوميًا.

دا غير إن كانت نسبة صحة الفم واللثة مُتغيرة نتيجة لاختلاف المعجون والفرشاة ومدة التنظيف، فدا بيخليكي تحافظي إن طفلك ينظف أسنانه لمدة من 30-60 ثانية على الأقل وبالاتجاهات الصحيحة. 

ودي بعض النقط اللي لازم تنفذيها:

• علميه التقنية الصحيحة لتنظيف أسنانه بحيث تكون الفرشاة في زاوية 45 درجة، ويحركها رايح جاي بالراحة وببطء، وينظف كل الجوانب والسطح.
• عوديه ينظف أسنانه بالخيط لما يكبر شوية للتخلص من بقايا الأكل بين الأسنان للحفاظ عليها من التلوث قدر الإمكان.
• شجعيه يتمضمض كويس بعد الأكل لو مش متاح يغسل أسنانه، لتخفيف تركيز بقايا الطعام على أسنانه.
• احرصي على شرب طفلك كمية مياه مناسبة للحماية من رائحة الفم الكريهة، والمحافظة على جسمه بشكل عام.
• وفر له غسول فم يحميه من التهاب اللثة، ويقلل من الجراثيم، ويحميه من رائحة الفم.
• علميه يستعمل فرشاة مناسبة له من عمر السنتين من خلال التقليد.
• استخدمي له المكشط لإزالة أي بكتريا من منطقة اللسان.
• استخدمي فرشاة ناعمة ومعجون يناسب عمره.
• استخدمي فرشاة أصابع سيليكون في السنة الأولى.

3. الاهتمام بنظافة المرحاض

الجراثيم بأنواعها بتنمو بسهولة على سطح المرحاض، وممكن أطفال كتير تمرض بسببها، وبالتالي لازم نعلم الأطفال الطريقة الصحيحة للحفاظ على نظافته لتجنب الأمراض.

ودي أهم قواعد النظافة الشخصية للأطفال للحفاظ على المرحاض وحماية نفسهم من العدوى:

• علميه كيفية تنظيف المرحاض بعد استخدامه، واشرحي له إن غسل إيديه مهم بعد استخدام الحمام.
• افضلي معاه في المراحل المبكرة، وتابعي كل حاجة بيعملها لحد ما يتعلم.
• علمي طفلك كيفية المسح والغسل بعد مسح المرحاض.
• علمي الحفاظ على مقعد المرحاض نظيف خاصةً الأولاد.

4. الاستحمام بانتظام

من أهم طرق الحفاظ على النظافة الشخصية للأطفال هي الاستحمام وغسل أجزاء جسمه كلها بطريقة صحيحة.

وبالتالي لازم نأكد على ضرورة الاستحمام بانتظام، ويكون مرتين أو ثلاثة في الأسبوع كافيين عشان يحافظ على نظافته. 

ومش شرط الطفل يستحمى كل يوم؛ المهم يكون كل جزء من جسمه نظيف، فممكن نقسم العملية دي إلى:

غسل الجسم

شجعي طفلك على الاستحمام الكامل كل يومين -على سبيل المثال-، ويغير طقم البيت، وفهميه طريقة الاستحمام الصحيحة كالتالي:

• اطلبي منه يفرك جسمه بلطف خاصةً تحت الإبطين والقدمين والساقين.
• علميه كيفية تنظيف الأجزاء الخاصة من جسمه.
• اتأكدي من استخدام ليفة خاصة وصابون.

غسل القدمين

حافظي على غسل طفلك لقدميه خاصةً بعد اللعب أو الخروج لساعات طويلة للحماية من رائحة الأقدام الكريهة، والتخلص من تراكم الأوساخ عليها، ودي أهم النقط اللي تركزي فيها مع طفلك:

• علميه يغسلها كويس بالماء والصابون، ويستخدم فوطة خاصة بيه.
• علمي طفلك ينظف الحذاء الخاص بيه ويغسله لو متاح.
• اتأكدي إنه بيغسل قدميه كويس أثناء الاستحمام.
• اطلبي منه لبس جوارب نظيفة يوميًا.

العناية بالشعر

أمهات كتير بتعاني من إصابة الأطفال بحشرات الشعر من المدرسة والحضانات، فمهم تهتمي بغسل شعر الطفل بانتظام وفحصه بشكل كويس، لإن دا من أهم عادات النظافة الشخصية للأطفال.

وفي العادي يفضل غسيل الشعر مرتين بالماء والشامبو، وممكن يغسله بالماء فقط في بعض الأوقات في حالة اللعب والرجوع عرقان أو تمرينات السباحة اليومية، المهم تأكدي عليه بعض النقاط، وهي:

• غسيل الشعر بالشامبو يكون مرتين أسبوعياً للتخلص من الزيوت والأوساخ.
• التحذير من مشاركة الأشياء الشخصية للشعر زي المشط، أو الوسادة، أو الفوطة.
• تجفيف شعره بمنشفة أو مجفف لو متاح.
• استخدام علاج فوري في حالة الإصابة بالقمل.
• الحفاظ على ربط شعر طفلتك خاصةً لو طويل.

5. تقليم الأظافر

تنمو الأظافر بانتظام ولما بتطول بيتراكم فيها الأوساخ والجراثيم بسبب اللعب في الخارج؛ عشان كدا لازم تحافظي على قص أظافره مرة كل أسبوع.

حددي يوم معين في الأسبوع للعناية بأظافره، بداية من غسل إيديه كويس، واستخدام قصافة خاصة بيه لقص أظافره والتخلص منها في النفايات لإنها مؤذية، ورشي كحول على القصافة أو اغسليهها بعد كل استخدام، وعودي الطفل على الخطوات دي.

والقاعدة دي مهم تعودي طفلك عليها، لإن من العادات السيئة للأطفال هي قضم أظافرهم، ودا بيسبب لهم العدوى بالإضافة لبعض الالتهابات للأصابع.

فحافظي على العادة دي من عمر صغير، وساعديه عشان ميأذيش نفسه لحد ما تتأكدي إنه قادر يعملها لوحده. 

6. غسل الطعام جيدًا

تناول الفاكهة أو الخضروات غير المغسولة ممكن يسبب تسمم غذائي، ودا بسبب التصاق الجراثيم على السطح، فاتأكدي من نقع الفواكه والخضروات في الماء وفركها للتخلص من الأوساخ، وفهميه دا وبتعملي كدا ليه، ووقت لما تتأكدي من وصول طفلك للحوض عوديه على غسلهم كويس قبل الأكل.

7. اختيار الملابس النظيفة

من أهم قواعد النظافة الشخصية للأطفال والكبار هي الملابس النظيفة للابتعاد عن الروائح الكريهة، أو مظهر البقع والأتربة اللي بيسبب إحراج للشخص، والتعرض للانتقاد.

وعرفيه أهمية إنه الملابس النظيفة وامتى يغير هدومه، وامتى يطلب منك تنظيفها لإنه لاحظ إنها مش نظيفة.

8. الاهتمام بظافة مكان النوم

النوم مهم جداً لنمو وتطور الأطفال، ولازم تضمني مكان نظيف لنوم طفلك والحفاظ على سريره؛ يعني فهميه إن مكان النوم مش للاكل أو اللعب، ومهم نحافظ عليه نظيف ومخصص للنوم بس.

9. الاهتمام بتغطية الأنف والفم عند العطس

العطس من الأمور اللي بتنقل أمراض، حاولي تفهميه دا براحة وعن طريق فيديوهات توضيحية للفكرة، وامنعيه من العطس من غير مناديل أو على الأقل مش تجاه شخص قاعد لإنه هيعديه.

وشجعيه على لبس الكمامة في الأماكن المزدحمة أو لو تعبان.

10. تنظيف الغرفة باستمرار

من قواعد النظافة الشخصية للأطفال هي الحفاظ على غرفته نظيفة وألعابه مرتبة، والحفاظ على شكل البيت وترتيبه.

بالإضافة إنك تخليه مسؤول عن حاجات على قد سنه زي لم الألعاب، وترتيب الكتب، ووضع الملابس في مكانها الصحيح، ورفع الأطباق بعد الأكل، والتخلص من بقايا الطعام في سلة المهملات.

ولو وقع حاجة على الأرض أو السرير علميه التصرف السليم، وإزاي ينضف المكان قدر الإمكان.

اقرئي أيضًا: أسباب التنمر عند الأطفال وكيفية التغلب عليه. 

10 نصائح لتعليم النظافة الشخصية للأطفال

وفقًا لدراسة اتنشرت على موقع NIH بتؤكد إن تعلم الأطفال لعادات النظافة الشخصية في سن أصغر بيبقى له تأثير أكبر في تغيير السلوك وتعلم العادات الصحية. 

ومن أهم النصائح عشان تعلميه من غير ما تقعي في خطأ:

1. ما تعاقبيش طفلك لو لاحظتي مرة إنه عمل حاجة مش صحيحة، والأفضل توضحي له إزاي العواقب هتكون مؤذية.
2. ابدئي بالأساسيات؛ يعني ركزي على غسل الإيدين الأول والاستحمام مثلًا، وبعدها فهميه العادات التانية واحدة واحدة.
3. ابعدي عن تعليم عادات النظافة الشخصية للأطفال بطريقة الدروس، والعبي واتكلمي معاه بطريقة مرحة عشان يتقبل.
4. ما تقارنيش بين طفلك وأي حد تاني، وخليه يتعامل بالطريقة المناسبة له.
5. علميه صح، العادات دي مش هيكتسبها بالكلام بس، لازم تعمليها قدامه وتركزي عليها وتشجعيه يعملها.
6. اشرحي الغرض؛ في حاجات لازم تشرحي أهميتها للطفل ونتيجة فعل العكس عشان يفهم بيعمل كدا ليه.
7. شجعي طفلك لما بيعمل أي عادة من قواعد النظافة الشخصية للأطفال وحفزيه على الاستمرار.
8. دربيه على العادة أكتر من مرة لحد ما يتقنها، ويتعود عليها ماتستعجليش من مرة واحدة.
9. متأنبيش الطفل لو غلط أو نسي، وفكريه أفضل وعيدي الكلام أو الخطوات قدامه تاني.

أفكار لتعليم النظافة الشخصية للأطفال

زي ما ذكرنا في الفقرة اللي فاتت حاولي تكون طريقة التعلم مرحة ودخلي فيها حاجات الطفل بيحبها، ومن أهم الأفكار لتنفيذ دا:

1. النموذج الشخصي

 الأطفال بيحبوا يقلدوا الكبار؛ فلو خدتي بالك من نظافتك الشخصية، هيتعلموا منك، وممكن تخليه يشوفك أنتي وباباه بتغسلوا إيديكوا وأسنانكم إزاي، وهو هيقلدكم ويتعلم.

2. التعليم باللعب

استخدام الألعاب أو القصص لتعليم الطفل عادات النظافة بيسرع من التعلم؛ مثلًا، ممكن تقرئي له كتاب عن غسل اليدين بطريقة ممتعة، أو تخليه يشوف فيديوهات مرحة بتحكي عن أهمية النظافة.

3. تحديد الروتين اليومي

حددي وقت معين من اليوم لنظافة اليدين أو تنظيف الأسنان، مثلاً بعد الأكل وقبل النوم، واعمليها معاه.

4. استخدام الأغاني والرسوم المتحركة

الأطفال بيحبوا الموسيقى والرسوم المتحركة، فممكن تستخدمي أغنية بدون موسيقى عن غسل اليدين وتخليه يغني معاكي، ويتدرب على الطريقة وهو سامعها.

5. تشجيعهم بالمكافآت

لو الطفل غسل إيده أو نظف أسنانه، ممكن تكافئيه بملصق أو نقطة ليه في دفتر بتسجلي فيه نقاط عشان تجيبيله مكافآة كبيرة.

ومع مرور الوقت، هيتعلم إنه يستمر في العناية بنفسه، ويتعلم أهم قواعد النظافة الشخصية للأطفال.

خلاصة

عادات النظافة الصحية للأطفال موضوع مهم جدًا، ولازم يكون جزء من حياتهم اليومية، ودا بيكون من خلال تعليمهم قواعد النظافة الشخصية للأطفال بأسلوب ممتع.

ومن أبرز القواعد دي؛ غسل الإيدين، وتنظيف الأسنان، والاهتمام بنظافة المرحاض، العناية بالجسم، تنظيف الغرفة، وغيرهم زي ما ذكرنا.

والنتيجة مش هتكون بس شيء ظاهر، لكن كمان هتأثر على صحته النفسية، وهتزود عنده احترام الذات، والثقة بالنفس، وهتحميه من التعرض للتنمر والانتقاد من الآخرين.

وافتكري إن طريقة التعلم لو كانت ممتعة وشيقة، هتسرع من استجابة الطفل، والأهم إنكم كأسرة تكونوا قدوة حسنة بيتعلم منها كل السلوكيات الصحيحة.