اختبارات اكتشاف مواهب الأطفال | تعرف على أهم 9 منهم

إيه هي أشهر اختبارات اكتشاف مواهب الأطفال؟

كل طفل ليه بصمة خاصة بيه، موهبة معينة، أو مهارة هو شاطر فيها، أو هواية لو استغلها هتطلّع أفضل إمكاناته، واللي بيقدر يساعدنا نكتشف دا كويس هي اختبارات معرفة مواهب الأطفال.

في المقال دا هنعرض لك أهم وسائل تساعدك على اكتشاف قدرات طفلك، تابع معنا.

ما العلامات التي تدل على موهبة الطفل؟

قبل ما ناخد خطوة في البحث على اختبارات اكتشاف مواهب الأطفال، لازم نعرف إن في مؤشرات مبدئية بتوضح لنا إن الطفل فعلًا موهوب، ومحتاج نركز معاه أكتر، وطبعًا كل سن ليه علامات معينة، زي ما هنوضح لك في النقاط التالية:

علامات الموهبة في الأطفال الأصغر سنًا

• القدرة اللغوية، واللفظية العالية، واكتسابه لمصطلحات مختلفة وكتيرة على الرغم من عمره الصغير.
• الفضول الزائد، وسؤاله المتكرر عن معلومات أكبر من سنه، واستمتاعه وهو بيسمع الإجابات.
• القدرة على التفكير، ومواجهة العقبات اللي بتواجهه مهما كانت بسيطة بطريقة مميزة.
• القدرة العالية على التركيز على شيء لفترة طويلة.
• سرعة البديهة، وملاحظة التفاصيل بشكل كبير.

تعرف على: كيفية تنمية مهارات الطفل عمر سنتين.

علامات الموهبة في الأطفال الأكبر سنًا

• الفضول المستمر للمعرفة، والاطلاع، وتميزه في أنواع التفكير المختلفة زي: التفكير الإبداعي، أو النقدي.
• امتلاك قوة ملاحظة شديدة، بالإضافة لقدرته على الربط بين الأفكار بشكل مدهش.
• سرعة تعلم المهارة الجديدة، والقدرة على إتقانها في وقت قليل جدًا.
• تقدير عالي للقيم، والأخلاق، وبيظهر دا في سلوكه، وأفعاله.
• تمتعه بروح دعابة، وفكاهة عالية.
• التفوق الأكاديمي.

مش لازم الطفل يظهر كل السلوكيات دي، ودا لإنها بتختلف من طفل لغيره، لكن لو قارنت الطفل بطفل زيه في نفس العمر، ونفس الجنس، ونفس الثقافة هتلاقيه بيظهر مهارات ،وكفاءات أعلى.

اقرأ أيضًا: أهم ألعاب ذكاء للأطفال 13 سنة: 13 لعبة لتنمية أنواع الذكاء المختلفة

خطوات مهمة لاكتشاف مواهب الأطفال

في خطوات مهمة جدًا لازم نتبعها قبل ما نبدأ في إجراء اختبارات اكتشاف مواهب الأطفال، واللي هتساعدنا نتعرف على قدراتهم بشكل دقيق، ونفهم كويس إيه الاختبارات المناسبة ليهم. 

مراقبة الطفل أثناء اللعب

لعب طفلك مش مجرد لعب بلا هدف، أو تضييع للوقت، بالعكس دا بينمي مهاراته المختلفة، ويسمح لك بفرصة اكتشاف اهتماماته، وقدراته الفردية، وايه اللي بيميز لعبه، وطريقته في اللعب لما حد تاني بيلعب معاه، هل عنده سلوك قيادي، وبيشجع غيره إنه يكتشف زيه ولا لأ؟ ولا بيلعب في هدوء، وبيحب التنظيم، والترتيب؟

مراقبته بتساعدك تحط النقاط الرئيسة اللي على أساسها هتعرف إيه الاختبار اللي يناسبه.

تجربة أنشطة مختلفة

سجل طفلك في أنشطة مختلفة سواء كانت رياضية، أو ثقافية، أو فنية، وشوف إيه النشاط اللي هيحبه،  وهيظهر ليه حماس، وميول أكبر من غيره.

مهم ما تجبرش طفلك أنه يمارس نشاط محدد، لكن خليه يختار، ويجرب بنفسه، واتأكد إن البيئة اللي بيلعب فيها مناسبة، وبتوفر الدعم، وهيقدر يختلط عن طريقها مع أطفال في سنه، من ثقافات، وبيئات مختلفة، لإن دي كلها عوامل أساسية هتساعدك على اكتشاف موهبته.

التحدث مع الطفل عما يحبه

أفضل حاجة ممكن تعملها قبل ما تسعى لمعرفة إيه هي اختبارات اكتشاف مواهب الأطفال، هو إنك تساعد طفلك يعبر عن نفسه، ودا عن طريق إنك تسمح ليه بمساحة حرة يتكلم فيها عن ذاته، واللي بيحبه، وتخليه يناقشك فـ إيه أفضل حاجة هو بيعملها، وبيستمتع بيها.

كمان ممكن تسأله عن أفضل المواد الأكاديمية اللي بيفضلها، والرياضة اللي بيحب يمارسها، وغيرها من الأنشطة، وكل ما تتكلم معاه أكتر، وتشاركه تفاصيله، هتقدر توصل للقدرة اللي بتميزه، واللي محتاجة حد يركز عليها، ويستغلها بشكل صحيح.

التحدث مع معلميه

لو طفلك في مرحلة الحضانة، أو المدرسة، لازم تكون بتتابع مع مدرسينه متابعة دورية، لإنه أكيد بيظهِر سلوكيات، وتفاعلات مختلفة عن اللي بتصدر عنه في البيت، ودا بسبب اختلاف البيئة المدرسية عن البيئة المنزلية.

حديثك مع معلميه، وسؤالهم عن أفعاله، وسلوكياته اليومية، وإيه الأنشطة اللي بيتميز فيها هيعرفك إيه اللي أنت محتاج تركز عليه أكتر معاه.

ومش بس كدا، أنت كمان تقدر تعرف من خلالهم إيه نقاط الضعف اللي عنده، وتاخد منهم نصائح تربوية عشان تساعده.

مراقبة علاماته الدراسية

الموهبة مش بتكون في الهوايات بس، هي كمان ممكن تظهر في المواد، ودا اللي هتعرفه من خلال مراقبة علامات طفلك الدراسية، فممكن الطفل يكون بيمتلك موهبة في اللغة، وعنده قدرة عالية على اكتساب اللغات المختلفة بدون أي صعوبة، أو عنده شغف بالعمليات الحسابية، وسرعة بديهة في حل أي مسائل رياضية.

فمهم جدًا تكون متابع باستمرار علامات طفلك الدراسية، وتعرف إيه المواد اللي بيحقق فيها نجاحات كبيرة، وتساعده على تقوية قدراته في المواد دي.

ما هي اختبارات اكتشاف مواهب الأطفال؟

عشان تتعرف على موهبة طفلك، في عدد من الاختبارات هتساعدك توصل لأكتر إجابة دقيقة على إيه هي القدرات اللي متميز فيها، إليه أبرزها:

1- اختبار الـ (IQ)

نفذ لطفلك لاختبار ذكاء معتمد لقياس الـ IQ الخاص بالطفل، وهو هيديك فكرة عامة عن ذكاء طفلك، وهل معدل ذكائه متناسب مع أقرانه، ولا هو أعلى منهم، ومن خلاله هتقدر تتعرف على قدراته المعرفية.

لكن خلي بالك إنه بيقيس جانب واحد من جوانب الطفل المتعددة، ومش شرط يكون مؤشر دقيق لموهبة طفلك، عشان كدا لازم تجرب طرق مختلفة بجانب اختبار الذكاء.

من أشهر اختبارات اكتشاف مواهب الأطفال، بالتحديد اختبارات قياس الذكاء، اختبار ستانفورد بينيه، واختبار وكسلر، واللي بيقدر يطبقهم هو أخصائي القياس النفسي اللي ممكن تلجأ له في مراكز الاستشارات النفسية، أو مراكز تنمية المهارات.

2- اختبار الاستعداد (Aptitude test)

الاختبار دا هيقيس بعض من قدرات طفلك، ومدى إمكانية تطوير مهاراته في مجال محدد، وقدرته على إتقان مهارات معينة، وطرق تفكيره.

عشان كدا مهم تراجع درجات طفلك في الاختبارين، وتراقبه على فترات متفاوتة، وتشوف إيه الأجزاء اللي أظهر فيها تميز، وخلي بالك من الظروف المختلفة اللي مر طفلك بيها مع كل اختبار عشان تقدر تقيّمه صح.

3- اختبار الذكاءات المتعددة

من أشهر نظريات الذكاء “نظرية الذكاءات المتعددة”، وهي عبارة عن نظرية وضعها العالم هاورد غاردنر، مبنية على تقسيم الذكاء إلى أنواع متنوعة.

ابتدأت النظرية وتأسست بسبع أنواع للذكاء وهم:

1. الذكاء الموسيقي، والإيقاعي.
2. الذكاء الرياضي المنطقي. 
3. الذكاء البدني الحركي.
4. الذكاء الطبيعي.
5. الذكاء البصري. 
6. الذكاء اللغوي.
7. الذكاء الذاتي.

بتوضح النظرية دي نوع الذكاء اللي الطفل بيتمتع بيه، ولو امتلك أكثر من نوع، فهو بكدا طفل نابغة.

4- اختبار قدرات الطفل البصرية، والمكانية

بيركز الطفل صاحب موهبة الذكاء البصري، والمكاني على الأنشطة المرئية، وبيتمتع بعدة مهارات زي:

• التصميم، والرسم، والقدرة على التعلم بالخرائط، والصور.
• تنظيم الغرف، وتنسيق الملابس باحترافية.
• القدرة العالية على التخيل، ورواية القصص.
• التخيل، وحفظ الطرق، وأماكن الأشياء.
• الحساسية العالية للألوان، وتنسيقها. 
• إنشاء النماذج، أو اللعب بالمكعبات.
• التنسيق بين القطع، والأشكال.

5- اختبارات اكتشاف مواهب الأطفال الاجتماعية

لو لقيت طفلك بيظهر قدرات أقوى في التواصل مع غيره، سواء الأطفال في سنه، أو حتى أشخاص أكبر منه، وعنده المهارة في التعامل مع الآخرين بشكل فعال، بالإضافة إلى إنه بيميل لتكوين صداقات بشكل كبير، فبكدا هو بيتمتع بمهارات اجتماعية عالية.

من العلامات اللي بتدل بردو على تمتع الطفل بالمهارات الاجتماعية، هو إن عنده:

• قابلية للنقاش، وإجراء العصف الذهني بشكل جماعي.
• قدرة على حل المشكلات، وتقديم الدعم، والنصح.
• شعبية وسط أصحابه، وأفراد عيلته.
• قدرة على فهم، وإدراك مشاعر غيره.
• قدرة عالية على التفاوض.

وفي الحالة دي، مهم نسمح للطفل بالتعبير عن أفكاره، ونشجع تفاعله مع غيره، ونعزز ذكائه الاجتماعي، ودا من خلال توجيهه ازاي يتصرف في المواقف الاجتماعية المختلفة، وازاي ممكن يتعامل مع الخلافات بشكل عقلاني، وواعي، وندربه على دا باستمرار، وهنلاحظ إنه بيستجيب بكل سهولة.

6- اختبارات اكتشاف مواهب الأطفال المنطقية، والحسابية

يعد الذكاء المنطقي، والحسابي أحد أهم أنواع الذكاءات اللي بيظهرها الطفل، فهنلاقي عنده القدرة على:

• الربط، والاستنتاج، بالإضافة إلى الملاحظة بشكل ممتاز.
• تحليل المواقف، والمشكلات تحليلًا منطقيًا.
• التفوق في حل المسائل الرياضية.

وبيعرّف النوع دا من القدرات الذكائية بـ “سر العباقرة”، والمنطقيين، وهنلاقي الطفل اللي بيتمتع بيُفضل التعلم بخطة، وتعليم ممنهج عشان يظهر كفاءة، وقدرة أعلى في استقبال المعلومة. 

تطوير الذكاء المنطقي، والحسابي عند الطفل هيزيد من ثقته بنفسه، وهيطلق العنان لأفكاره، وإبداعه في الجزء دا بالتحديد بشكل أكبر.

7- اختبارات اكتشاف مواهب الأطفال الجسدية

بيميز الطفل اللي عنده قدرات ومواهب جسدية الآتي:

• التعلم بشكل أفضل من خلال ألعاب الحركة، والمشاهد.
• حب التمثيل، والحركة، والنشاط الزائد.
• التعبير عن ذاته من خلال لغة الجسد.
• مهارة عالية في التعامل مع الأدوات.
• مهارة عالية في التحكم في جسده.
• حب بناء الأشكال اليدوية.

وهنا احنا بنوصل لاختبارات اكتشاف مواهب الأطفال الجسدية من خلال مراقبة الطفل، ومعرفة سلوكه الحركي، أو الرياضة اللي ميال ليها، أو الأنشطة اليدوية اللي بيُبدع فيها زي التشكيل بالطين الصلصال، وغيره.

يمكنك أيضًا قراءة: كيف تختار الرياضة المناسبة للطفل | 10 اعتبارات أساسية

8- اختبار الذكاء اللغوي

بيُظهِر الطفل اللي بيتمتع بقدرات ذكاء لغوي عالية ما يلي: 

• الميل للكلام، والتحدث أمام غيره بفصاحة.
• حب التعلم من خلال القراءة، والاستماع.
• استخدام اللغة، والمفردات بشكل مبدع.
• قوة في التعبير عن نفسه، وأفكاره.
• استمتاع بترتيب الجمل، والعبارات.
• حب التواصل مع الآخرين.

وهنا بنقدر نكتشف موهبة الطفل لما نلاقي اهتمامه باللغة زائد عن غيره من الأطفال، بل وكمان بيتعلمها بسرعة، وعنده شغف في التعرف على لغات تانية، وبيظهر قدرة تعلم عالية.

فدورنا هنا إننا نوفر ليه قصص، وكتب ونسمح له بالمشاركة، ورواية القصص في مكان يعزز من نشاطه اللغوي، والأدبي.

ممكن كمان نجرب نقدم له بداية لقصة، ونخليه هو يكملها بالاعتماد على خياله، وإبداعه في استخدام المفردات، وممكن كمان يسجلها بصوته؛ عشان يوظف مختلف مهاراته في استغلال الموهبة دي، ويظهرها بشكل مميز.

اقرأ: أهم 11 طريقة لتعليم الطفل القراءة ونصائح لتعلم أسهل

9- اختبار الذكاء السمعي

في أطفال بتنجذب جدًا للأصوات، وبيكون عندهم حساسية عالية غير باقي الأطفال للأصوات، والإيقاعات، فممكن تلاقي طفلك بيصدر إيقاعات باستخدام أدوات بسيطة زي الأدوات المكتبية، أو أدوات المطبخ، وغيرهم.

كمان بنلاقيه:

• بيميز أصوات البشر، ونبراتهم المختلفة، وعنده ذاكرة سمعية كويسة جدًا.
• بيميز أصوات الحيوانات، وغيرهم، من سن صغير.
• بيميز أصوات الأجهزة، والأدوات.
• بيقلد الأصوات بطريقة دقيقة.

ودورنا مع الطفل السمعي هو إننا هنكتشف قدرته دي من خلال طريقته المفضلة للتعلم، فممكن نلاقيه بيحب التعلم بالسمع أكتر، وممكن نستغل قدرته دي فإننا نعلمه الدوبلاج، أو التعليق الصوتي، أو التجويد، كل دا هيأهله قدام إنه يستخدم مهارته دي بشكل كويس جدًا.

اقرأ: أنماط التعليم الأربعة | الطريقة الأشهر لمعرفة نمط التعلم المفضل لطفلك

في النهاية بكدا نكون وضحنا أغلب اختبارات اكتشاف مواهب الأطفال، وازاي ممكن نلاحظ من البداية علامات الطفل الموهوب.

ضروري نكتشف مواهب أطفالنا من بدري، ونسعى بكل الطرق لدعمهم، ونصبر على عملية تعلمهم وتطويرهم عشان يوصلوا للمكان الصح اللي يستحقوه في المستقبل بإذن الله.