أهم 14 طريقة تعليم الأطفال القراءة ونصائح لتعلم أسهل

أهم 14 طريقة تعليم الأطفال القراءة ونصائح لتعلم أسهل

المسار التعليمي للطفل بيكون طويل، لازم يمشيه خطوة بخطوة، والقراءة هي الخطوة الأولى في المسار دا! 

ولإن الخطوة الأولى دايمًا بتكون هي الأصعب، وبالتالي مرحلة تعلم القراءة هي الأشق، ورغم كدا فاتباع الطرق الصحيحة لتعلمها، واختيار الوقت المناسب؛ هيسهلها عليكي وعليه كتير. 

ودا اللي هنوضحه ليكي في المقال، وهنشارك معاكي أهم 14 طريقة تعليم الأطفال القراءة، وأهم النصائح للتعلم، فتابعي معانا. 

السن الأنسب لتعليم الطفل القراءة 

وفقًا للأبحاث ولعلماء النفس والتربويين؛ فالسن الأنسب لتعليم الطفل القراءة هو ما بين 6 – 8 سنوات، ودا لإن القراءة عملية معقدة، عشان ينجح الطفل في تعلمها بيحتاج قدر معين من النمو، والاستعداد العقلي، والإدراك البصري.

وبناءً على كلام بعض السيكولوجيين ومن بينهم “جان بياجيه” فالطفل مش بيوصل للاستعداد دا غير بعد سن 6 سنوات.

ودا أكدته دراسة اتنشرت على موقع JSTOR بتعمل مقارنة بين مجموعتين من الأطفال، مجموعة في سن رياض الأطفال، والمجموعة التانية في الصف الأول الابتدائي، وكانت النتيجة إن الأطفال الأكبر تفوقوا في اكتساب وفهم القراءة عن الأطفال الأصغر سنًا. 

وهنا بيُطرح سؤال مهم: إزاي بعض الأطفال بيقدروا يتعلموا القراءة في سن 3 أو 4 سنوات؟ 

في الغالب، الطفل اللي بيتعلم القراءة في سن مبكر بيكون التعلم عنده مرتبط بالحفظ والتكرار من غير فهم للكيفية نفسها، ولا ربط بين المعاني، وكمان مش بيقدر يبني على اللي تعلمه قبل كدا. 

يعني عملية القراءة عنده بتكون عبارة عن حفظ وتلقين وتكرار فقط، وبالتالي بتظهر مشاكل كتير لبعض الأطفال في السن دا، زي: 

  • صعوبة التفرقة بين الحروف المتشابهة في الشكل، زي: الـ ب والـ ت. 
  • رؤية بعض الحروف بشكل مقلوب، زي: الـ b و الـ d. 
  • صعوبة الربط بين شكل الحرف وصوته. 

والمشاكل دي بتحصل لإن النمو العقلي، والإدراك البصري عند الطفل بيكون لسه ما اكتملش. 

ودا لإن الطريقة الصحيحة لتعلم القراءة بتعتمد على الفهم، ودا مش بيتم غير بعد الخمس سنوات، وبيمتد مع بعض الأطفال لعمر 6 سنوات؛ وعشان كدا السن الأفضل للبدء بتعليم الأطفال القراءة بعد سن السادسة. 

وبترجع أهمية تعليم القراءة للأطفال لتنمية مهاراتهم اللغوية الرئيسية، وتطوير قدرتهم على الكلام، وبناء المفردات، بجانب تعزيز الإيجابية عند الطفل تجاه القراءة والكتابة ودا اللي أظهرته دراسة عن تأثير تعلم القراءة في سلوك الطفل

دا غير إن قضاء الوقت مع طفلك للقراءة بيعزز من الترابط العاطفي بينك وبينه. 

14 طريقة تعليم الأطفال القراءة 

تعليم الطفل القراءة بيحتاج صبر ومجهود من الأهل في البداية، وكمان اتباع الطرق الصحيحة للتعليم، واللي منها: 

1- البدء بتعليم الصوتيات 

يعني يعرف شكل الحرف، ويربط بينه وبين صوت الحرف، والمقصود بالصوت هنا مش اسم الحرف، لكن طريقة نطقه، بمعنى: حرف (أ) مش هنقول للطفل ألف؛ لكن هنقول: (أَ – إِ – أُ). 

وبالتالي الطفل هيربط بين الصوت اللي سمعه، والشكل اللي شافه، وهيسترجع المعلومات دي في ذاكرته بعدين كل ما يشوف شكل الحرف داخل أي كلمة. 

2- تعليم الكلمات وبدء التهجي 

التهجي يعد أهم طريقة تعليم الأطفال القراءة، ودا بعد ما يتقن الطفل مرحلة الحروف ويتخطاها؛ بنبدأ وقتها نعلمه بعض الكلمات البسيطة، ونمزج بينها وبين الحروف، على سبيل المثال: كلمة (أَكَل)؛ ممكن في البداية نقسمها لمقاطع كالتالي: (أَ كَـ ـل)، عشان الطفل يستوعبها، ويربطها باللي اتعلمه قبل كدا، ويبدأ في مرحلة التهجي بسهولة. 

3- البدء بالمألوف 

يُفضل نبدأ بالكلمات المألوفة للطفل؛ لإنها بتكون أسهل ليه في التعلم، زي: البدء بتعليمه أسماء الحاجات اللي بيشوفها في يومه، أو بيستخدمها، أو بيفضلها، زي: 

  • قراءة أسماء الألعاب وتهجيها، لإن دا هيزود شغفه تجاه التعلم. 
  • أفعال زي: الأكل، والشرب، والمشي، وغيرهم. 
  • أسماء الخضروات، والفواكه المفضلة ليه. 

4- استخدام القصص والكتب المناسبة 

إحضار الكتب والقصص المناسبة لعمر طفلك ومستواه وقراءتها معاه بيكون ممتع جدًا ليه، لإن قراءتك مع طفلك بصوت عالي هتساعده يحسن من مفرداته، وهتخليه يربط بين الحرف، وطريقة نطقه بشكل أكبر. 

لكن احرصي على القراءة ببطء، والإشارة بإصبعك على كل كلمة وحرف بتنطقيه، وخلي طفلك يتابع دا ببصره. 

ودا أثبتته دراسة اتنشرت على موقع ResearchGate إن تدريس القراءة باستخدام القصص القصيرة ساعد بشكل كبير في تطور القراءة عند الأطفال.

5- الاستعانة بالتطبيقات الإلكترونية 

نقدر نستغل الوقت اللي بيقضيه الأطفال قدام الشاشات الإلكترونية، ونحوله لطريقة تعليم الأطفال القراءة، من خلال تطبيقات القراءة المختلفة، واللي بتسمح للطفل يسمع قصص مسلية ومفيدة، وممكن يشارك في القراءة، بالإضافة لبعض الأنشطة والألعاب اللي هتشجعه على التعلم. 

ودا اللي بتؤكده دراسة اتنشرت على موقع Caltech اتنفذت على مجموعة من الأطفال في سن من 3 – 5 سنوات عن تأثير تطبيقات القراءة الإلكترونية على التعلم للأطفال، ووجدوا إن كان ليها تأثير إيجابي في تحسين نتائج التعلم والسلوك عندهم.

6- استغلال بطاقات التعلم 

ممكن تصممي البطاقات دي بسهولة في البيت حسب مستوى طفلك، أو حتى تشتريها من أي مكان، لكن حاولي قدر الإمكان تكون البطاقات بأشكال مميزة يحبها الطفل، وكل بطاقة فيها كلمة مكونة من ثلاث حروف، وركزي مع طفلك وهو بيقرأ على صوت الحرف مش اسمه. 

واطلبي منه يقول الحرف الأول اللي سمعه في الكلمة، وبعدين التاني والتالت، هتلاقي النشاط دا بيبني عنده مهارة الصوتيات، وتحليل الكلمات، وبالتالي بتعلمه كيفية نطق الكلمات، ولو كان طفلك لسه بادئ يتعلم الحروف الأبجدية ركزي على صوت الحرف أكتر من اسمه. 

7- استخدام الملصقات 

تفتكري إزاي ممكن الملصقات تكون طريقة تعليم الأطفال القراءة؟

تقدري تطبعي ملصقات للكلمات مع الأشكال اللي بتعبر عنها، وتتعلق في غرفة الطفل، مثلًا: طباعة ملصق لصورة الأسد وتحته الكلمة بالتشكيل الخاص بيها (أَسَد)، وبعد ما يتعلمها نستبدلها بغيرها، وهكذا. 

الفكرة دي ممكن تتطبق على الفواكه، والخضروات، وأي حاجة ملموسة بيتعرضلها الطفل، زي: السيارات، والألعاب، وغيرهم

8- استخدام البيئة المحيطة 

الخروج في نزهة ممكن يكون طريقة تعليم الأطفال القراءة، من خلال استغلال الأشياء المحيطة، زي: الأشجار، والحيوانات، والسيارات، وحتى مظاهر الطبيعة. 

فمثلًا: ممكن تنطقي صوت حرف معين؛ وتسألي الطفل: إيه اللي حوالينا بيبدأ بالصوت دا؟ 

ولو طفلك أكبر ممكن تخليه يقرأ اللوحات الإعلانية، أو اللافتات، وتكون طريقة تعليم الطفل القراءة بشكل مختلف. 

9- ممارسة القراءة الجماعية 

لو شارك عدد من الأطفال القراءة مع بعض، أو أطفال البيت الواحد وطبقوا فكرة القراءة بشكل جماعي؛ دا هيعزز عندهم حب القراءة، وفي نفس الوقت هيقضوا وقت لطيف مع ناس بيحبوهم. 

ممكن يكون في جلسة أسبوعية للأسرة تقرؤوا فيها سوا، وكل فرد يقرأ حسب استطاعته وسنه، مع مراعاة الأطفال. 

الفكرة دي مش بس هتكون طريقة تعليم الأطفال القراءة، لكنها كمان وسيلة إن الأسرة تقضي وقت ممتع ومفيد. 

10- استغلال الألعاب 

استكملًا للكلام عن طريقة تعليم الأطفال القراءة بنلاقي إن تقديم القراءة للطفل على إنها نشاط مسلي في شكل لعبة هيخليه يحبها ويتعلمها بشكل أفضل. 

فممكن نستخدام السبورة مع الحروف المغناطيسية لتكوين كلمات بسيطة والطفل يقرأها، أو نعتمد ألعاب مختلفة تصنع يدويًا بحاجات بسيطة من المنزل، لإن الطفل هيحب يلعب بيها، في نفس الوقت اللي هيتعلم فيه قراءة بعض الكلمات. 

بالإضافة لاستخدام الألغاز في تعلم القراءة واللي أثبت فعاليته، ودا أكدته دراسة اتنشرت على موقع Unimas اتنفذت على مجموعتين من الأطفال والمعلمين، ووجدوا إن المجموعة اللي استخدمت لعبة الألغاز لتعلم القراءة كانت فعالة أكتر، وساعدت في فهم وتعلم القراءة عند الأطفال.

11- تعويد الطفل على الإمساك بالكتب 

أهم عادة ممكن يكتسبها الطفل إنه يتعود يمسك الكتاب، حتى لو لسه مش متمكن من القراءة، لكن غرس العادة دي فيه هيسهل الأمر.

وحتى لو دي ما كانتش طريقة تعليم الأطفال القراءة بصورة مباشرة، فهي من ضمن الأسس اللي بتعتمد عليها عملية تعليم القراءة. 

12- بناء وعي صوتي للطفل

ودا بيكون من خلال الاستماع لأغاني الأطفال اللي بتساعدهم في تعلم القافية، وتعد نشاط مرح لتعليم الأطفال القراءة. 

13- استخدام لعبة الكلمات

ركزي مع طفلك على ممارسة الألعاب اللي بتشجع على الاستماع، والتعرف على أصوات الحروف في الكلمات والتلاعب من خلالها. 

زي اسأليه مثلًا؛ إيه الصوت اللي بتبدأ بيه الكلمة ديه؟ وإيه الصوت اللي بتنتهي بيه؟ 

14- اعتماد القراءة الحوارية

ما تخليش الطفل طول الوقت متلقي وبيسمع بس، وحاولي تشركيه في القصة، قوليله إيه رأيك في التصرف دا، أو تعتقد إيه اللي هيحصل بعد كدا؟ وهكذا. 

وأهم حاجة بعد ما اتعرفنا على أهم 14 طريقة تعليم الأطفال القراءة، هتكون اختيار الطريقة الأنسب لطفلك لإنها بتساهم بشكل كبير في استيعابه للقراءة.

ودا تبعًا لدراسة اتنشرت على موقع ResearchGate إنك لازم تختاري الطريقة اللي تناسب وضع طفلك وقدراته واهتماماته، وبالتالي تزيد استيعاب طفلك، واهتمامه بالقراءة، ومش هيحس بملل.

ما هي مراحل القراءة للأطفال؟

بعد ما اتكلمنا عن طريقة تعليم الأطفال القراءة خلينا نقولك إن مهارات تطور القراءة بتختلف من طفل للتاني، ولكن المراحل الأساسية هي:

من الولادة لحد 18 شهر

أول ما بيبدأ الطفل النطق بيفهم بعض الجمل البسيطة، وبيكرر الكلام، وبيقدر ينظر للكتب ويقلب صفحاتها، ومع بلوغه سنة بيقدر يقول كلمة أو أكتر. 

من 18 شهر لحد سن 3 سنوات

 مع بلوغ الطفل السنتين بينطق من 250 – 350 كلمة، ومن 800 – 1000 لما يوصل 3 سنوات. 

وبيلاقي متعة كبيرة في الاستماع للكتب المألوفة ليه، ويقول جمل متكررة من كتبه المفضلة، ويقلد الأصوات، ويطلب حد يقرأ له. 

من سن 3 – 5 سنوات

  • يتعلم من الكتب اللي بتتقرأ له بصوت عالي
  • يتسع إدراك الطفل للحروف المألوفة
  • يحاول يكتب الحروف
  • يحدد كلمات متناغمة

المهارات الأساسية اللازمة لتعليم الأطفال القراءة 

المهارات الأساسية اللازمة لتعليم الأطفال القراءة

بيحتاج جميع الأطفال لتعلم عدد من المهارات عشان يتقنوا القراءة ويتعلموها بنجاح، أهمها: 

  • الصوتيات، وهي إن الطفل يعرف العلاقة بين شكل الحرف، والصوت اللي بيصدره الحرف دا. 
  • الوعي الصوتي، وهو قدرة الطفل على سماع ومعالجة الأصوات المختلفة في الكلمة الواحدة. 
  • فهم معنى النص المقروء سواءً في القصص، أو كتب المعلومات، أو غيرهم. 
  • المفردات، وهي فهم معاني الكلمات، وتعريفها، والسياق اللي بنستخدمها فيه. 
  • الطلاقة، وهي قدرة الطفل على القراءة بسرعة، والفهم الدقيق للكلام اللي قراه. 

اقرئي أيضًا: كيف أعاقب طفلي إذا أخفق في الدراسة. 

نصائح أثناء تعليم الطفل القراءة 

رغم صعوبة تعلم القراءة؛ إلا أن قدرات الطفل على الاستيعاب مذهلة!

وغالبًا لو استنيتي وصول طفلك للسن المناسب للتعلم، واتبعتي الـ 14 طريقة تعليم الأطفال القراءة اللي ذكرناها طفلك هيتعلم القراءة بسرعة.

لكن لو لسه بتواجهي مشكلة مع طفلك؛ فممكن تتبعي النصائح دي: 

  • ابدئي من سن صغير تتكلمي معاه، وتشرحيله كل حاجة بتعمليها، لإن دا بيحسن الإدراك عنده، وبتتخزن عنده مفردات كتير بتساعده في تعلم القراءة أسرع. 
  • ضيفي المرح لعملية التعلم، من خلال استخدام الألعاب والقصص التعليمية الممتعة، وما تخليهاش مهمة تقيلة على الطفل.
  • ما تخليش هدفك إنك تعلميه بسرعة، وبالتالي تضغطي عليه عشان يتعلم، لكن ركزي على إنك تحببيه في التعلم وتعلميه صح. 
  • عززي عنده حب التعلم، من خلال جلوسك معاه ومشاركتك ليه في وقت القراءة، وشجعيه بهدية بسيطة من اختياره تحفيزًا ليه. 
  • خليكي قدوة لطفلك، بإنه يشوفك بتقرئي بشكل منتظم، دا هيساعده في إنه يقلدك، ويبعده عن الشاشات لفترة.
  • انصتي لطفلك، واعرفي المواضيع اللي بيحبها زي الديناصورات، والطيور، وغيرها، اقرئي له كتب عنها. 
  • ابدئي بخطوات صغيرة، وراعي طبيعة الأطفال، وإن مقدار انتباههم هو عمرهم زائد ثلاث دقائق. 
  • اسمحيله يختار بعض الكتب اللي يحب يقرأها، أو اختاريها بالأشكال والألوان اللي هو بيحبها.
  • اصبري عليه، وافهمي طبيعته،وحدود قدراته، عشان تقدري تستغليها صح. 
  • خلي القراءة روتين يومي معتاد من خلال تثبيت وقت معين زي قبل النوم. 
  • بدلي معاه الأدوار، يعني اطلبي منه يقرأ هو جزء. 

اقرئي أيضًا: صعوبات القراءة عند الأطفال وكيفية التغلب عليها.

في النهاية، القراءة هي الخطوة الأهم لتعليم طفلك، واللي هتأثر على مستقبله بشكل كبير، فلازم تبدئيها معاه صح من خلال أفضل 14 طريقة تعليم الأطفال القراءة اللي ذكرناها. 

ومن أهم المهارات الأساسية لتعلم القراءة هي الوعي الصوتي، والصوتيات، وفهم المعاني، والطلاقة. ولو واجهتي مشكلة مع طفلك في التعلم اصبري عليه، واتبعي خطوات بسيطة، وحفزيه من خلال الهدايا عشان يفضل متحمس ويتعلم القراءة. 

وطبعًا لو عندك أي استفسار بخصوص طريقة تعليم الأطفال القراءة ما تتردديش تسيبي استفسارك في التعليقات عشان نجاوبك.

المصادر

9 Tips to teach a child to read: fun and easy methods

How to teach kids to read: 10 easy steps

What is the best way to teach kids to read?

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق