أهم 11 طريقة لتعليم الطفل القراءة ونصائح لتعلم أسهل

11 طريقة لتعليم الطفل القراءة

المسار التعليمي للطفل أشبه ما يكون بطريق طويل، لازم يمشيه خطوة بخطوة، والقراءة هي الخطوة الأولى في المسار دا!

ولأن الخطوة الأولى دايمًا بتكون هي الأصعب، فبالتالي مرحلة تعلم القراءة هي الأشق في مسار تعلم طفلك، رغم كدا فاتباع الطرق الصحيحة لتعلمها، واختيار الوقت المناسب؛ هيسهلها عليكي وعليه كتير.

ودا اللي هنوضحه ليكي في المقال، وهنشارك معاكي أهم 11 طريقة لتعليم الطفل القراءة، وأهم النصائح للتعلم، فتابعي معانا.

السن الأنسب لتعليم الطفل القراءة

وفقًا للأبحاث ولعلماء النفس والتربويين؛ فالسن الأنسب لتعليم الطفل القراءة هو ما بين 6 – 8 سنوات، ودا لأن القراءة عملية معقدة، عشان ينجح الطفل في تعلمها بيحتاج قدر معين من النمو والاستعداد العقلي، والإدراك البصري، وبناءً على كلام بعض السيكولوجيين ومن بينهم “جان بياجيه” فالطفل مش بيوصل للاستعداد دا غير بعد سن 6 سنوات.

وهنا بيُطرح سؤال مهم: ازاي بعض الأطفال بيقدروا يتعلموا القراءة في سن 3 أو 4 سنوات؟

في الغالب، الطفل اللي بيتعلم القراءة في سن مبكر؛ بيكون التعلم عنده مرتبط بالحفظ والتكرار دون فهم للكيفية نفسها، ودون ربط بين المعاني، وكمان مش بيقدر يبني على اللي تعلمه سابقًا.

يعني عملية القراءة عنده بتكون عبارة عن حفظ وتلقين وتكرار فقط، وبالتالي بتظهر مشاكل كتير للأطفال في السن دا، زي:

  • صعوبة الربط بين شكل الحرف وصوته.
  • رؤية بعض الحروف بشكل مقلوب، زي: الـ b و الـ d.
  • صعوبة التفرقة بين الحروف المتشابهة في الشكل، زي: الـ ب والـ ت.

والمشاكل دي بتحصل لأن النمو العقلي والإدراك البصري عند الطفل بيكون لسه ما اكتملش.

ولأن الطريقة الصحيحة لتعلم القراءة بتعتمد على الفهم، وبتحتاج لاكتمال الإدراك العقلي والبصري؛ ودا مش بيتم غير بعد الخمس سنوات، وبيمتد مع بعض الأطفال لعمر 6 سنوات؛ كان السن الأفضل للبدء بتعليم الطفل القراءة بعد سن السادسة.

الانتظار للسن المناسب هو الخطوة الأولى عشان نعلم طفلنا صح، لكنه مش النهاية؛ فلازم نراعي معاه اتباع الطرق المناسبة لتعليم الطفل القراءة.

11 طريقة لتعليم الطفل القراءة

11طريقة لتعليم الطفل القراءة

تعليم الطفل القراءة بيحتاج صبر ومجهود من الأهل في البداية، وكمان اتباع الخطوات الصحيحة للتعليم، واللي منها:

1- البدء بتعليم الصوتيات

أول طريقة لتعليم الطفل القراءة إنه يعرف شكل الحرف، ويربط بينه وبين صوت الحرف.

والمقصود بالصوت هنا مش اسم الحرف، لكن طريقة نطقه، بمعنى: حرف (أ) مش هنقول للطفل ألف؛ لكن هنقول: (أَ – إِ – أُ)

وبالتالي الطفل هيربط بين الصوت اللي سمعه، والشكل اللي شافه، وهيسترجع المعلومات دي في ذاكرته بعدين كل ما يشوف شكل الحرف داخل أي كلمة.

2- تعليم الكلمات وبدء التهجي

بعد ما يتقن الطفل مرحلة الحروف ويتخطاها؛ بنبدأ وقتها نعلمه بعض الكلمات البسيطة، ونمزج بينها وبين الحروف، على سبيل المثال: كلمة (أَكَل)؛ ممكن في البداية نقسمها لمقاطع كالتالي: (أَ كَـ ـل)، عشان الطفل يستوعبها، ويربطها باللي اتعلمه قبل كدا، ويبدأ في مرحلة التهجي بسهولة.

3- البدء بالمألوف

يُفضل نبدأ بالكلمات المألوفة للطفل؛ لأنها بتكون أسهل ليه في التعلم، زي: البدء بتعليمه أسماء الحاجات اللي بيشوفها في يومه، أو بيستخدمها، أو بيفضلها.

على سبيل المثال تعليمه:

  • أفعال زي: الأكل، والشرب، والمشي، وغيرهم.
  • أسماء الخضروات والفواكه المفضلة ليه.
  • قراءة أسماء الألعاب وتهجيها، لإن دا هيزود شغفه تجاه التعلم.

4- استخدام القصص والكتب المناسبة

إحضار الكتب والقصص المناسبة لعمر طفلك ومستواه وقراءتها معاه طريقة لتعليم الطفل القراءة بصورة ممتعة جدًا، لأن قراءتك مع طفلك بصوت عالي هتساعده يحسن من مفرداته، وهتخليه يربط بين الحرف وطريقة نطقه بشكل أكبر.

لكن احرصي على القراءة ببطء، والإشارة بإصبعك على كل كلمة وحرف بتنطقيه، وخلي طفلك يتابع دا ببصره، ولو مستوى طفلك اتحسن مع الوقت؛ ممكن تتبادلوا الأدوار.

5- الاستعانة بالتطبيقات الإلكترونية

نقدر نستغل الوقت اللي بيقضيه الطفل قدام الشاشات الإلكترونية، ونحوله لطريقة لتعليم الطفل القراءة، من خلال تطبيقات القراءة المختلفة، واللي بتسمح للطفل يسمع قصص مسلية ومفيدة، وممكن يشارك في القراءة، بالإضافة لبعض الأنشطة والألعاب اللي هتشجعه على التعلم.

6- استغلال بطاقات التعلم

سادس طريقة لتعليم الطفل القراءة هي بطاقات التعلم، ممكن تصممي البطاقات دي بسهولة في البيت حسب مستوى طفلك، أو حتى تشتريها من أي مكان، لكن حاولي قدر الإمكان تكون البطاقات بأشكال مميزة يحبها الطفل، وكل بطاقة فيها كلمة مكونة من ثلاث حروف، وركزي مع طفلك وهو بيقرأ على صوت الحرف مش اسمه.

المميز في البطاقات كمان إنك ممكن تاخديها معاكي لأي مكان بسهولة؛ وبكدا تقدري تضيفي المتعة للقراءة، وتخليها نشاط غير مرتبط بمكان محدد.

7- استخدام الملصقات

ممكن نطبع ملصقات للكلمات مع الأشكال اللي بتعبر عنها، وتتعلق في غرفة الطفل، مثلًا: طباعة ملصق لصورة الأسد وتحته الكلمة بالتشكيل الخاص بيها (أَسَد)، وبعد ما يتعلمها نستبدلها بغيرها، وهكذا.

الفكرة دي ممكن تتطبق على الفواكه، والخضروات، وأي حاجة ملموسة بيتعرضلها الطفل، زي: السيارات، والألعاب، وغيرهم.

8- استخدام البيئة المحيطة

لو خرجتي مع طفلك في نزهة ممكن تستغليها كطريقة لتعليم الطفل القراءة، من خلال استغلال الأشياء المحيطة، زي: الأشجار، والحيوانات، والسيارات، وحتى مظاهر الطبيعة.

فمثلًا: ممكن تنطقي صوت حرف معين؛ وتسألي الطفل: إيه اللي حوالينا بيبدأ بالصوت دا؟
ولو طفلك أكبر ممكن تخليه يقرأ اللوحات الإعلانية، أو اللافتات، وتكون طريقة لتعليم الطفل القراءة بشكل مختلف.

9- ممارسة القراءة الجماعية

لو شارك عدد من الأطفال القراءة مع بعض، أو أطفال البيت الواحد وطبقوا فكرة القراءة بشكل جماعي؛ دا هيعزز عندهم حب القراءة، في نفس الوقت هيقضوا وقت لطيف مع ناس بيحبوهم.

ممكن يكون في جلسة أسبوعية للأسرة تقرؤوا فيها سوا، وكل فرد يقرأ حسب استطاعته وسنه، مع مراعاة الأطفال.

الفكرة دي مش بس هتكون طريقة لتعليم الطفل القراءة، لكنها كمان وسيلة إن الأسرة تقضي وقت ممتع ومفيد.

10- استغلال الألعاب

بما إن الطفل بيحب اللعب والمرح، فتقديم القراءة ليه على إنها نشاط مسلي في شكل لعبة هيخليه يحبها ويتعلمها بشكل أفضل.

ممكن استخدام السبورة مع الحروف المغناطيسية لتكوين كلمات بسيطة والطفل يقرأها، أو اعتماد ألعاب مختلفة تصنع يدويًا بحاجات بسيطة من المنزل، لأن الطفل هيحب يلعب بيها، في نفس الوقت اللي هيتعلم فيه قراءة بعض الكلمات.

11- تعويد الطفل على الإمساك بالكتب

أهم عادة ممكن يكتسبها الطفل إنه يتعود يمسك الكتاب، حتى لو لسه مش متمكن من القراءة، لكن غرس العادة دي فيه هيسهل الأمر، وحتى لو دي ما كانتش طريقة لتعليم الطفل القراءة بصورة مباشرة، فهي من ضمن الأسس اللي بتعتمد عليها عملية تعليم القراءة.

المهارات الأساسية اللازمة لتعليم الأطفال القراءة

المهارات الأساسية اللازمة لتعليم الأطفال القراءة

بيحتاج جميع الأطفال لتعلم عدد من المهارات عشان يتقنوا القراءة ويتعلموها بنجاح، أهمها:

  • الوعي الصوتي، وهو قدرة الطفل على سماع ومعالجة الأصوات المختلفة في الكلمة الواحدة.
  • الصوتيات، وهي إن الطفل يعرف العلاقة بين شكل الحرف، والصوت اللي بيصدره الحرف دا.
  • المفردات، وهي فهم معاني الكلمات، وتعريفها، والسياق اللي بتستخدم فيه.
  • فهم معنى النص المقروء سواءً في القصص، أو كتب المعلومات، أو غيرهم.
  • الطلاقة، وهي قدرة الطفل على القراءة بسرعة وفهم دقيق للكلام اللي قرأه.

فمهم الأهل يعرفوا المهارات دي، ويسعوا لتعليمها للطفل، وتنميتها فيه، عشان يكون قارئ ناجح.

نصائح أثناء تعليم الطفل القراءة

رغم صعوبة تعلم القراءة؛ إلا أن قدرات الطفل على الاستيعاب مذهلة! وغالبًا لو انتظرتي وصول طفلك للسن المناسب للتعلم، واتبعتي الـ 11 طريقة لتعليم الطفل القراءة اللي ذكرناها؛ طفلك هيتعلم في شهور قليلة جدًا.

لكن لو لسه بتواجهي مشكلة مع طفلك؛ فالنصائح دي ممكن تساعدك:

  • ابدئي بخطوات صغيرة، وراعي طبيعة الأطفال، وإن مقدار انتباههم هو عمرهم زائد ثلاث دقائق، فخطوات صغيرة مستمرة هنقدر نلمس أثرها على المدى الطويل.
  • ماتخليش هدفك إنك تعلميه بسرعة، وبالتالي تضغطي عليه عشان يتعلم، لكن ركزي على إنك تحببيه في التعلم وتعلميه صح، حتى لو أخد وقت أطول شوية.
  • اسمحي ليه يختار بعض الكتب اللي يحب يقرأها، أو اختاريها بالأشكال والألوان اللي هو بيحبها.
  • عززي عنده حب التعلم، من خلال جلوسك معاه ومشاركتك ليه في وقت القراءة، وشجعيه بهدية بسيطة من اختياره كل ما يخلص مرحلة من مراحل التعلم.
  • اصبري عليه، لأن أفضل طريقة لتعليم الطفل القراءة هو صبرك عليهم، وتفهمك لطبيعتهم، ومعرفتك قدراتهم؛ عشان تقدري تستغليها صح.
  • ضيفي المرح لعملية التعلم، من خلال استخدام الألعاب والقصص التعليمية الممتعة كطريقة لتعليم الطفل القراءة، وما تخليهاش مهمة ثقيلة على نفس الطفل.

اقرئي أيضًا: صعوبات القراءة عند الأطفال وكيفية التغلب عليها.

في النهاية، القراءة هي الخطوة الأهم لتعليم طفلك، واللي هتأثر على مستقبله بشكل كبير، فلازم تبدئيها معاه صح.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • No comments yet.
  • Add a comment