مع اقتراب العام الدراسي الجديد؛ بيبدأ أولياء الأمور والطلاب في البحث عن تفاصيل مصاريف الجامعات الأهلية، وخاصةً جامعة حلوان اللي تعتبر من الخيارات المتميزة حاليًا.
في المقال دا؛ هنعرض مصاريف جامعة حلوان الأهلية 2025، وإيه التخصصات المتوفرة في الجامعة ومميزاتها؛ علشان تقدر تاخد قرارك بناءً على ميزانيتك واهتمامات ابنك الدراسية.
نبذة عن جامعة حلوان الأهلية
هي جامعة غير هادفة للربح، اتأسست سنة 2022 بقرار جمهوري، ومكانها داخل حرم جامعة حلوان في مدينة حلوان على مساحة كبيرة بتوصل لحوالي 52 فدان.
جامعة حلوان الأهلية بدأت تفرض اسمها بقوة، ودا لإنها بتقدم أكتر من 22 برنامج في مجالات متنوعة: طبية، هندسية، علمية، إنسانية وفنية، والبرامج دي مصممة عشان تجهّز الطالب لسوق العمل سواء جوا أو برا مصر.
والجامعة فيها حوالي 10 آلاف طالب موزعين على 10 كليات، وبعض الكليات بتضم عدد من البرامج، ومن وقت ما بدأت وهي بتقدّم تعليم مختلف بيجمع بين الدراسة والتدريب العملي، وكمان عندها شراكات دولية زي التعاون مع جامعة Uninettuno الإيطالية في برنامج “هندسة النظم الذكية”، اللي بيمنح الطالب شهادة مزدوجة.
دا كله بالإضافة لـ الحياة داخل الجامعة مش بس دراسة، فيها أنشطة، ورش، رحلات، وتشجيع على الابتكار وريادة الأعمال، وكمان بتقدّم منح وخصومات للطلبة المتفوقين.
مصاريف جامعة حلوان الأهلية 2025 – 2026 وتفاصيل التخصصات
أعلنت جامعة حلوان الأهلية بشكل رسمي عن مصاريفها لعام 2025 – 2026، وكمان وضّحت كل الكليات والتخصصات المتاحة فيها.
ودي قائمة المصاريف السنوية لكل كلية في الجامعة:
1- برنامج طب الأسنان
لو بتدور على كلية تجمع بين العلم العملي والتقنيات الحديثة، فـ برنامج طب وجراحة الفم والأسنان في جامعة حلوان الأهلية هيكون هو اختيارك الصح.
الكلية هدفها تخرج دكاترة أسنان شاطرين يقدروا يشتغلوا في أي مكان داخل مصر أو بالخارج، سواء في القطاع الحكومي أو الخاص، ودا من خلال برنامج دراسي مدته 5 سنين (197 ساعة معتمدة).
ووصلت مصاريف جامعة حلوان الأهلية طب أسنان 2025 لـ 130 ألف جنيه.
2- برنامج العلاج الطبيعي
العلاج الطبيعي بقى من التخصصات المطلوبة بقوة، والبرنامج هنا بيعتمد على أساس علمي قوي وتدريب عملي واسع. مدة الدراسة 5 سنين (200 ساعة معتمدة)، بيتعلم فيها الطالب إزاي يعالج ويساعد المرضى على استرجاع حياتهم الطبيعية سواء بعد إصابات أو أمراض.
ومصاريف برنامج العلاج الطبيعي في جامعة حلوان الأهلية 2025 وصلت لـ 105 آلاف جنيه.
3- برامج الهندسة
الكلية مناسبة للطلاب المهتمين بالتكنولوجيا والابتكار، فكلية الهندسة في جامعة حلوان الأهلية بتفتح مجالات كتير من خلال برامج حديثة زي:
- التصميم العمراني المستدام وتنسيق المواقع.
- هندسة الروبوتات والميكاترونيات.
- هندسة الإلكترونيات التطبيقية.
- هندسة المصانع الرقمية.
- العمارة والتصميم البيئي.
- هندسة الأنظمة الذكية.
الهدف الأساسي إنهم يخرجوا مهندسين جاهزين لسوق العمل ومؤهلين للتعامل مع أحدث الأنظمة الذكية وتكنولوجيا الروبوتات.
مصاريف جامعة حلوان الأهلية 2025 (كلية الهندسة) هي 70 ألف جنيه.
4- برنامج الفنون والفنون التطبيقية
مصمم للطلبة الشغوفين بالتصميم والإبداع، ودا لإنه بيأهل الطالب يكون مصمم محترف يقدر يشتغل على التصميم الداخلي البيئي، أو في مجال الرسوم المتحركة والمؤثرات البصرية، أو حتى تصميم الميديا البصرية.
مصاريف جامعة حلوان الأهلية 2025 (كلية الفنون والفنون التطبيقية) هي 60 ألف جنيه.
5- برنامج العلوم
مناسب للطلاب المهتمين بمجال الجينات والتقنيات الحيوية الحديثة، ودا لإنه قايم على برنامج التكنولوجيا الحيوية والهندسة الوراثية؛ اللي بيركز على التدريب العملي بجانب الدراسة الأكاديمية، علشان الطالب يخرج لسوق العمل جاهز ومؤهل.
والدراسة فيها بتتضمن مواد زي: بيولوجيا الخلية، الجينات، الكيمياء الحيوية، المناعة، الهندسة الوراثية، زراعة الأنسجة، الخلايا الجذعية، والنانوتكنولوجي، وكمان بيكون في مواد عن التسويق وريادة الأعمال الحيوية.
والبرنامج مؤهل إنه يفتح مجالات شغل كتير زي العلاج الجيني، إنتاج الأدوية، وتحاليل الـ DNA.
مدة الدراسة 4 سنين، وفيهم 8 فصول دراسية بنظام الساعات المعتمدة بإجمالي 136 ساعة.
وبنلاقي مصاريف جامعة حلوان الأهلية 2025 كلية العلوم 60 ألف جنيه، واللي تعتبر من الكليات اللي مصاريفها مناسبة مقارنة بالتخصص المميز اللي بتقدمه.
6- برامج العلوم الإنسانية والتجارة وإدارة الأعمال
لو بتفكر تدخّل ابنك مجال البيزنس بس بشكل عصري، الكلية دي بتقدم برامج حديثة زي معلوماتية الأعمال، اللوجستيات، الاقتصاد الرقمي، ونظم الذكاء؛ كلها تخصصات بتواكب التحول الرقمي وسوق العمل الحديث.
البرامج هنا مش بس بتزود الطالب بالمعلومات، لأ دي كمان بتساعده يفكر بشكل مختلف ويشتغل على أفكار ومشروعات تساعده يكون مميز في مجاله.
ولو بتسأل عن مصاريف جامعة حلوان الأهلية 2025، فكلية العلوم الإنسانية والتجارة وإدارة الأعمال تعد من الكليات اللي بتقدم قيمة قوية بسعر مناسب للطلبة اللي عايزين يتعلموا بيزنس بشكل عملي وحديث ومصاريفها 60 ألف جنيه.
7- برنامج علوم الحاسب وتكنولوجيا المعلومات
لو مهتم بالمجال اللي اتعرّف بإنه مجال المستقبل حاليًا، فكلية علوم الحاسب في جامعة حلوان الأهلية هتكون اختيار ممتاز لابنك. الكلية بتقدم برامج حديثة؛ زي برمجيات الإنسان الآلي وعلوم البيانات، واللي عليهم طلب كبير جدًا في السوق المحلي والدولي.
البرنامج دا مش بيكون تعليم نظري بس، دا كمان بيساعد الطالب إنه يشتغل على تطبيقات عملية حقيقية، ويفهم إزاي يواكب التطور التكنولوجي اللي بيحصل كل يوم.
وبالنسبة لـ مصاريف جامعة حلوان الأهلية 2025 حاسبات ومعلومات فهي 80 ألف جنيه.
8- برنامج تكنولوجيا العلوم الصحية التطبيقية
لو بتفكر تدخّل ابنك مجال طبي تطبيقي وله مستقبل، كلية تكنولوجيا العلوم الصحية التطبيقية في جامعة حلوان الأهلية بتقدملك برامج قوية زي برنامج تكنولوجيا المختبرات الطبية.
الكلية دي بتركز على إنه يتعلم بشكل عملي، ويكتسب مهارات حديثة تساعده يشتغل كفني محترف في مجالات مهمة زي التحاليل الطبية، والتصوير الطبي، والأجهزة الحيوية.
والبرامج مصممة على أعلى مستوى علشان تجهزه لسوق العمل المحلي والدولي. ودا بيخلي مصاريف جامعة حلوان الأهلية 2025 في التخصص دا استثمار حقيقي في مستقبل ابنك، لأنه هيدرس تخصص مطلوب ومليان فرص، ومصاريفها 55 ألف جنيه.
9- برنامج الطب البشري
أضيفت حديثًا لجامعة حلوان الأهلية عام 2024، وبتضم كلية الطب البشري برنامج “الطب والجراحة”، ودا بيخليها من الكليات الأهلية الأعلى في استقبال الطلبة.
وأعلنت الجامعة مصاريف جامعة حلوان الأهلية طب بشري بقيمة 150 ألف جنيه.
10- برنامج الترجمة
بتقدم الجامعة درجة الليسانس في الترجمة المتخصصة باستخدام التكنولوجيا. البرنامج دا تابع لكلية العلوم الإنسانية، وبيركّز على تأهيل الطلاب في اللغة الإنجليزية والترجمة في مجالات مختلفة، وكمان بيعلمهم إزاي يستخدموا أدوات وتقنيات حديثة في الترجمة علشان يكونوا جاهزين لسوق العمل.
وقيمة المصاريف بتكون 60 ألف جنيه.
11- برنامج الحقوق
كلية العلوم الإنسانية في جامعة حلوان الأهلية بتقدّم برنامج الدراسات القانونية باللغة العربية، ودا بنظام الساعات المعتمدة.
وبيشمل مواد وتخصصات زي: الشريعة الإسلامية، القانون الجنائي، القانون المدني، التجاري، وقانون العمل، وكمان مواد زي الاقتصاد وفلسفة القانون.
ووصلت المصاريف حاليًا لـ 60 ألف جنيه في السنة.
ودا دليل شامل لجامعة حلوان الأهلية وتفصيل لكل البرامج الموجودة فيه.
مين يقدر يقدم في الجامعات الأهلية في مصر؟
الجامعات الأهلية فتحت باب التقديم لطلاب كتير من خلفيات مختلفة بس بشروط معينة. أهم الفئات اللي تقدر تقدم:
- طلاب الثانوية العامة المصرية والشهادات المعادلة من داخل أو خارج مصر.
- خريجي بعض الدبلومات الفنية زي التمريض والسياحة والزراعة.
- خريجي مدارس الأزهر الثانوية.
- طلاب مدارس المتفوقين STEM.
إيه هي شروط القبول؟
ودي أهم خطوات القبول بجامعة حلوان الأهلية:
1. التسجيل على موقع الجامعات الأهلية الرسمي.
2. كتابة الرغبات حسب التنسيق.
3. إجراء اختبارين: واحد عام، والتاني حسب التخصص اللي مقدّم عليه الطالب.
4. انتظار نتائج الامتحان على الإيميل.
5. دفع رسوم الامتحان (بتختلف حسب الجامعة).
وبتكون النتيجة بناءََ على حساب المجموع ودرجات الاختبار، ولازم تفهم إن القبول مش بس بالمجموع، لكن كمان بالاختبارات اللي الجامعة بتعتمدها علشان تضمن إن ابنك مؤهل للبرنامج اللي اختاره.
امتى بتظهر نتيجة القبول في الجامعات الأهلية؟
نتيجة القبول في الكليات الأهلية بتظهر مع نتيجة تنسيق المرحلة التالتة للثانوية العامة، وبتكون متاحة على موقع الجامعات الأهلية الرسمي. بعد ما تتأكد إن الطالب اتقبل بتبدأ خطوات مهمة:
- يسدد الطالب 25% من مصاريف جامعة حلوان الأهلية 2025 أو أي جامعة أهلية تانية اتقبل فيها.
- يُعرض الطالب على الكشف الطبي في الأماكن اللي الجامعة هتعلن عنها.
- يدخل الطالب اختبار تحديد مستوى في اللغة الإنجليزية.
- يسدد الطالب باقي المصاريف قبل الدراسة بأسبوعين على الأقل.
الورق المطلوب للتقديم في جامعة حلوان الأهلية 2025
لما بتضمن قبول ابنك هتحتاج تجهز الورق دا:
- صورة بطاقة الرقم القومي أو جواز السفر للوافدين.
- نموذج 2 أو 6 جند للطلبة الذكور.
- شهادة اجتياز اللغة العربية للأجانب.
- شهادة التوفل أو الآيلتس (لو مطلوبة).
- إيصال دفع المصاريف الدراسية.
- أصل شهادة الثانوية العامة.
- صور شخصية بخلفية بيضا.
باب التقديم المبكر في جامعة حلوان الأهلية 2025/2026
جامعة حلوان الأهلية فتحت باب التقديم المبكر للطلاب اللي حابين يبدأوا مشوارهم الجامعي من بدري، ودا من يوم 1 مايو 2025. التقديم دا بيكون فرصة كويسة للطلاب اللي عايزين يحجزوا مكانهم في كليات وتخصصات مطلوبة في سوق العمل.
ودا الرابط الخاص بالتقديم، وصفحة الفيس البوك الخاصة بيهم لمتابعة نتايج القبول.
اتعرف على: شروط قبول طلاب الـ IGCSE في الجامعات المصرية 2024-2025
تنسيق جامعة حلوان الأهلية
لو بتدور على تنسيق كليات جامعة حلوان الأهلية للعام الجديد 2025، فغالبًا هيكون قريب من تنسيق السنة اللي فاتت. ودا ملخص تنسيقات الكليات التقريبية:
- كلية الطب البشري: 80%
- كلية طب الأسنان: 78%
- كلية العلاج الطبيعي: 76%
- كلية الهندسة: 68%
- كلية علوم الحاسب: 62%
- كلية الحاسبات والمعلومات: 62%
- كلية تكنولوجيا العلوم الصحية: 53%
- كلية الفنون التطبيقية: 53%
- كلية العلوم الإنسانية: 53%
إيه الفرق بين الجامعات الأهلية والجامعات الخاصة؟
ناس كتير بتتلخبط بين الجامعات الأهلية والجامعات الخاصة بس في فرق مهم بينهم. والمجلس الأعلى للجامعات وضّح إن:
- الجامعات الأهلية بتخضع لنفس القانون اللي بينظم الجامعات الخاصة، لكن الفرق الكبير إنها مش بتهدف للربح ومش ملك شخص معين.
- الفلوس اللي بتدفعها في الجامعة الأهلية بترجع تتصرف تاني على تطوير الجامعة والمناهج والخدمات اللي بتقدمها.
يعني وإنت بتفكر في مصاريف جامعة حلوان الأهلية 2025 مثلًا، اعرف إن المبلغ اللي بتدفعه بيرجعلك في شكل تعليم أفضل لابنك وخدمات متميزة.
في النهاية، تعد جامعة حلوان الأهلية من الجامعات الحديثة اللي بتقدّم تجربة تعليمية متميزة بتواكب احتياجات سوق العمل سواء على المستوى المحلي أو الدولي.
ومع تنوع البرامج الدراسية والتخصصات المتاحة بتبقى فرصة قوية لطلاب الثانوية العامة اللي بيدوروا على تعليم عالي بجودة كويسة وتكلفة مناسبة. وعلشان كدا مهم إنك تراجع مصاريف جامعة حلوان الأهلية 2025 والتخصصات المتوفرة المتوافقة مع ميول ابنك خصوصًا إن الجامعة بتوفر خيارات كتير ما بين الكليات الطبية والهندسية والحاسبات والعلوم الإنسانية.
أضف تعليق