مشاكل مدارس ستيم في مصر 2023

مشاكل مدارس ستيم

المرحلة الثانوية من أهم المراحل التعليمية للطالب، وتعد المرحلة الفارقة في مستقبله، وبدايل الثانوية العامة فتحت طرق جديدة للطلاب ومستقبلهم التعليمي والمهني، وأحد أهم البدائل دي هي مدارس ستيم.

وزي ما كل نظام له مميزات، كمان بتتواجد عيوب بتسبب أزمات للطلاب، عشان كدا هنعرض لك من خلال المقال أهم التفاصيل عن النوع دا من المدارس، ومميزات ومشاكل مدارس ستيم

إيه هي مدارس STEM في مصر؟

هي مدارس كان بتُسمى قبل كدا “مدارس المتفوقين”، وبعدين أُطلق عليها مدارس STEM وهي اختصار لـ “Science Technology Engineering Mathematics”. 

هدف المدارس دي هو الاهتمام بالموهوبين في مجال العلوم والرياضيات من خلال البحث العلمي، وتشجيع طلاب المرحلة الثانوية على دخول شعبة علمي بعد دخول أكتر الطلاب شعبة أدبي. 

وهي مدارس تتبع نظام مطبق في أمريكا من سنوات، في البداية كانت عبارة عن منحة مقدمة لمصر من USAID، وكانت تحت إدارة أمريكية، وبعدين اتحولت إدارتها لوزارة التربية والتعليم المصرية.

وبتكون الدراسة فيها مبنية على البحث العلمي، واعتمادها الكلي بيكون على الطالب؛ فبيدخلها الطلاب المتفوقين بعد المرحلة الإعدادية، عشان يكملوا مشوار التفوق والتميز في دراسة العلوم والتكنولوجيا، ودا بعد اجتياز 4 اختبارات مخصصة لتقييم الطلبة من الجهاز القومي للامتحانات، وبعدين بيختاروا الطلبة المتميزين للالتحاق بمدارس ستيم.  

ونظام مدارس ستيم بيتميز باهتمامه بالجانب العلمي للطلبة، وبيساعدهم على تنمية جانب البحث العلمي والتفكير، بالرغم إن بعض أولياء الأمور شايفين إن اهتمامه بالجانب العلمي فقط من ضمن مشاكل مدارس ستيم. 

تاريخ مدارس STEM وإزاي ندخلها؟ 

أول مدرسة للمتفوقين أُنشأت سنة 2011، وهي مدرسة 6 أكتوبر للبنين بمحافظة الجيزة، بعدها سنة 2012 تم إنشاء مدرسة المتفوقات بالمعادي.

وبلغ عدد مدارس ستيم لغاية دلوقتي 21 مدرسة في محافظات مختلفة من جمهورية مصر العربية، منهم: الجيزة، القاهرة، الإسكندرية، كفر الشيخ، الدقهلية، الإسماعيلية، البحر الأحمر، أسيوط، الأقصر، المنوفية، الغربية، القليوبية، الشرقية، قنا، ولسه بيتبني مدارس أكتر في جميع المحافظات.

التقديم في مدارس ستيم بيكون خلال شهر يوليو بعد نتيجة الدور الأول لامتحانات المرحلة الاعدادية، من خلال التسجيل على الموقع الإلكترونى لوزارة التربية والتعليم والتعليم الفني.

بعد كدا بيتم عمل اختبارات بالإدارات التعليمية لقياس السمات الشخصية، والقدرات الإبداعية، بالإضافة لاختبار مستوى الطالب في مادة العلوم والرياضيات، واللغة الإنجليزية. وبعدين بيتم إعلان الطلاب المقبولين ومدارسهم.

فلازم يكون الطالب مجموعه كبير، واجتاز كل الاختبارات المقررة دي عشان يتقبل، ودي واحدة من مشاكل مدارس ستيم اللي بتقابل الطلبة أثناء فترة التقديم. 

شروط القبول بمدارس STEM

أعلنت الوزارة عن فتح التقديم لمدارس ستيم لسنة 2023 – 2024، ودي كانت أهم الشروط:

  • حصول الطالب على الشهادة الإعدادية دور أول للعام الدراسي 2022/2023.
  • حصول الطالب على مجموع 274.5 فأكثر من المجموع الكلي بما يعادل (98%)، ولا يشترط حصوله على الدرجة النهائية في أي مقرر أساسي.
  •  حصول الطالب على مجموع (95%)، ولكن يشترط في الحالة دي حصوله على الدرجة النهائية في مادة واحدة على الأقل من ( اللغة الإنجليزية، الرياضيات، العلوم).
  • حصول الطالب المتقدم لمدرسة ستيم للبنين بعين شمس على مجموع لا يقل عن 292 بما يعادل 90%،
  • سن الطالب ميعديش 18 سنة في أول شهر أكتوبر 2023.
  • اجتياز الكشف الطبي في الإدارة التابعة لمدرسة الطالب.
  • اجتياز الاختبارات المقررة من المركز القومي.

والشروط دي أفادت الطالب بشكل كبير، لإن كان بيشترط السنين اللي فاتت حصول الطالب على الدرجة النهائية في واحد من الـ 3 مواد اللي ذكرناهم بجانب حصوله على مجموع 98%، لكن في طلاب مابيكونوش مستوفين الشرط دا، ودا كان واحد من مشاكل مدارس ستيم اللي بتقابل الطلاب في فترة التقديم.

اقرأ أيضاً: شروط مدارس ستيم.

نبذة عن الدراسة في مدارس STEM

 أغلب المدارس مشتركة، وبتستقبل 75 طالب و75 طالبة، ما عدا مدرسة أكتوبر بتستقبل 150 طالب، ومدرسة المعادي 120 طالبة. على أن يكون عدد الطلاب في كل فصل من 20 لـ 25 طالب. وهي مدارس داخلية يتم الإقامة فيها، والإجازات بتكون يومي الجمعة والسبت.

بيستلم كل طالب في البداية جهاز لاب توب مقابل مبلغ تأميني، ودا بيكون مشكلة من مشاكل مدارس ستيم لبعض أولياء الأمور لزيادة المصاريف عن الثانوية العامة. 

وبتكون دراسة اللغة العربية، والتربية الوطنية، والتربية الدينية باللغة العربية، أمّا باقي المواد باللغة الإنجليزية.

ونظام الدراسة بيكون عندهم 6 مشروعات علمية خلال الـ 3 سنين، يعني في كل ترم مشروع، وعليه النسبة الأكبر من الدرجات (60%)، وللمواد (30%) من الدرجات، و(10%) من الدرجات للسلوك والغياب، ودا  بيخلق ضغط كبير على الطلبة، وبيعد أحد أهم مشاكل مدارس ستيم المتعلقة بنظام الدراسة.

وعلى الطلاب إنتاج 5 جورنالات كل سنة، مع الامتحان قبل التخرج في كل اللي درسه تراكميًا خلال الـ 3  سنين.

وقت التخرج بيُمنح الطالب شهادة الثانوية المصرية في العلوم والتكنولوجيا، وبيكون له تنسيق خاص للقبول بالجامعات معتمدة على النسبة المرنة، والنظام دا بيظلم كتير من الطلبة، وواحد من مشاكل مدارس ستيم اللي بتخوف الطلاب، وأولياء الأمور تجاه مستقبلهم. 

وبيكون متاح لخريجين مدارس STEM الحصول على منح بالخارج، أو بالجامعات الدولية في مصر.

اقرأ أيضاً: ما هي مناهج مدارس STEM في مصر. 

أهم مميزات مدارس STEM

مميزات مدارس STEM

وزي ما ذكرنا قبل كدا كل نظام بيكون له مميزات وعيوب، ودلوقتي هنقول على أهم مميزات ومشاكل مدارس ستيم:

هنبدأ بالمميزات الكتير اللي بيحصل عليها طالب مدارس ستيم، ومنها:

  • اكتساب مهارة القدرة على مواجهة الصعاب، وحل المشكلات والاعتماد على الذات.
  • بناء القوة النفسية للطلاب، وتأهيلهم للعمل تحت ضغط.
  • مفيش تلقين للمعلومات، بيكون إرشاد ومساعدة بس.
  • تكوين علاقات جديدة، وتعلم أسلوب التواصل الفعال.
  • التفكير بحرية بدون تقييد، والتشجيع على الاختراعات.
  • إتاحة الفرص للتقديم على مسابقات ومنح مختلفة.
  • زرع قيمة الإصرار، والمثابرة للوصول لهدف محدد.
  • تأهيل الطلاب عشان يكونوا علماء المستقبل.
  • الإعداد العملي لمجال التكنولوجيا والبرمجة.
  • الشعور بقيمة الفرد، وإضافته، وتأثيره.
  • منح الطلاب براءة اختراع لمشاريعهم.
  • خلق باحث ومثقف مش مجرد طالب.
  • تنمية التفكير المنطقي والإبداعي.

عيوب مدارس ستيم 

أما أبرز العيوب اللي بتظهر لمدارس STEM فبنلاقي:

  • انتظار الأهل من الأبناء التفوق طول الوقت بدون قبول الضعف، ممكن يوصل للطالب فكرة والقبول المشروط بالنجاح فقط.
  • تحمل أولياء الأمور مصاريف دراسية مرتفعة عن الثانوية العامة، بتشمل المواصلات، ونفقات إصلاح اللاب توب. 
  • وجود رسوم إضافية للمسابقات، والامتحانات الإضافية في حالة رغبة الطالب للحصول على منحة من الخارج. 
  • صعوبة التحويل من مدارس ستيم لمدارس أخرى، ويجب تسديد مبلغ لتعويض فترة دراسة الطالب.
  • إهمال باقي جوانب الحياة، واللي ممكن ينتج عنه طلاب منعزلين عن العالم الخارجي.
  • المدرسة داخلية، ودا ممكن يكون مرفوض من بعض الأهالي، ومخيف لبعض الطلاب.
  • المرور باختبارات صعبة ممكن تزيد التوتر ،وتأثر على الطالب ذهنياً وجسدياً.
  • نشأة أسلوب المقارنة جوا عقل الطلاب بسبب التنافس الشرس بينهم.
  • تحمل المسؤولية زيادة في السن دا ممكن ينتج عنه نفور كامل منها.
  • صعوبة الدراسة، واختلافها عن اللي اتعود عليه الطالب من الصغر.
  • الضغط النفسي، والعصبي ممكن يأثر بالسلب على أداء الطالب.
  • محدودية الأماكن المتاحة لطلاب مدارس ستيم في الكليات.
  • حب التباهي والتعالي، بسبب التصنيف الشديد للمتفوقين.
  • كثرة الرسوب في المدارس هيسبب الإحباط وكره الذات.
  • قلة المنح المتاحة بالنسبة لعدد المتفوقين.
  • الحب المرضي والتعلق بالنتائج فقط.
  • دخول كليات غير راغبين بها الطلاب.
  • ظلم نظام النسبة المرنة.
  • عدم وجود قسم أدبي.

ودلوقتي خلينا نتعمق أكتر في أهم مشكلات مدارس STEM اللي بتأثر على الطالب بشكل كبير، وتخليه يواجه صعوبات أكتر من نظام الثانوية العامة. 

مشاكل مدارس STEM

مشاكل مدارس STEM

بعض المشاكل ليها التأثير الأكبر على الطالب وولي الأمر، ومنها:

بُعد السكن عن الطلاب

أحيانًا بيتم تسكين الطلاب الناجحين في الاختبارات في سكن بعيد عن محافظاتهم، ودا بيخلي الأمر تعجيزي على الطالب وأولياء الأمور، وبيخليهم يميلو أكتر للانسحاب، ودخول مدارس ثانوية عامة قريبة.

مفيش شفافية في نتائج الاختبارات

رغم إن اختبار التقديم إلكتروني بالكامل، وبيتم التصحيح إلكترونيًا؛ إلا إن عدد المقبولين قليل جدًا مقارنةً بالمتقدمين، وكلهم في الأصل من المتفوقين في محافظتهم ومدارسهم.

محدودية عدد الطلاب المُتاح قبوله

المدارس بتحتاج عدد محدود جدًا من الطلاب، ودا بيخلي الفرص ضئيلة ومش عادلة بالنسبة لكل المتفوقين، ودا يعد من أكبر مشاكل مدارس ستيم. 

عدم وجود منهج

مفيش منهج وكتب دراسية محددة، لكن في مشاريع قائمة على البحث، والابتكار، والتفكير، والاجتهاد الذاتي. 

وبيعتمد الطلبة طول الوقت على المراجع والكتب العلمية لتحصيل المعلومات، ودا بيكون كم كبير جداً على الطالب، وواحد من مشاكل مدارس ستيم أثناء الدراسة. 

صعوبة الامتحان النهائي

الامتحان الأخير تراكمي للـ 3 سنين الدراسية من غير تحديد المعايير الأساسية للامتحانات النظرية، والعملية المختلفة.

مفيش ضمان للمستقبل قدام كل العناء اللي في مدارس المتفوقين

مفيش نظام محدد لدخول الطلاب الجامعات الحكومية، أو الخاصة بسبب الاعتماد على نظام النسبة المرنة في تنسيق القبول بالجامعات، والنسبة دي هي أكبر مشاكل مدارس ستيم. 

واللي معناها قسمة عدد الطلاب الناجحين بمدارس ستيم على عدد طلاب الثانوية العامة في كليات:

  • الطب
  • الأسنان
  • الصيدلة
  • الطب البيطري
  • الهندسة
  • الحاسبات والمعلومات
  • العلوم

المصروفات الدراسية

المصروفات بتختلف حسب مدرسة الطالب السابقة، فبتكون 1000 جنيه في السنة لطلاب المدارس الحكومية أو التجريبية، و2000 جنيه إقامته، وتأمين لاب توب شخصي له، ولما بيتخرج بيسلم اللاب توب وياخد 1000 جنيه.

أمّا طلاب المدارس الخاصة والدولية فبيدفع نفس المبلغ اللي كان بيدفعه في مدرسته الاعدادية السابقة، واللي بتوصل لـ 40 ألف جنيه في السنة، مع 2000 جنيه تأمين اللاب توب.

منح الدراسة قليلة

أغلب خريجي مدارس ستيم بيكون طموحهم هو السفر والتعليم بالخارج، للحصول على فرص أفضل للبحث العلمي أو للعمل، وبالفعل بتتواجد الفرص دي، لكن بيكون عدد المنح غير كافي لعدد المتفوقين المتخرجين.

الدراسة كلها باللغة الإنجليزية

 لازم يكون الطالب متعود على الدراسة، والفهم باللغة الإنجليزية، وتعد الدراسة مناسبة أكتر للي كان في مدارس لغات مش مدارس عربية عادية.

الاعتماد الكامل على الذات

مفيش نظام التلقين، والكتاب المدرسي، الدراسة بتعتمد على البحث الذاتي عن طريق الانترنت، والمكتبات الإلكترونية العالمية. وبعد كدا يتناقش الطالب مع المعلم عشان يوجهه للطريق الصحيح.

نظام الـ Team Work   

الدراسة بتعتمد على فرق مكونة من عدد طلاب معين حوالي 4 أو 5 طلاب بيساعدوا بعض.

ممكن تكون دي نقطة إيجابية، لكن في نفس الوقت ممكن تهدر وقت الفرد، وممكن تخلي بعض الأشخاص اعتماديين على غيرهم.

نسب الرسوب العالية

وصلت نسبة الرسوب في سنة من السنين لـ (44%) ودي نسبة عالية جدًا بالنسبة للمتفوقين، ووقتها كان في استياء كبير من الطلاب والأهالي.

صعوبة التحويل لمدرسة تانية

لو الطالب قرر يحول من مدارس STEM لمدارس الثانوية العامة فهيكون في تعويض بمبلغ مالي كبير ممكن يوصل لـ 40 ألف جنيه.

وبكدا نكون وضحنا أهم مشاكل مدارس ستيم اللي بتقابل الطالب أثناء التقديم، والدراسة، وبعد التخرج حتى، عشان يقدر  يفهم الصعوبات اللي تواجهه قدام مميزات الدراسة في مدارس ستيم.

هل دخول مدارس المتفوقين قرار صائب؟

هل دخول مدارس STEM قرار صائب؟

مفيش شك إن القرار الصائب بيختلف من شخص لآخر حسب ظروفه واختلاف شخصيته، اللي بيناسب شخص مش ضروري يناسب شخص آخر حتى لو كان متفوق، وحاصل على نفس الدرجات النهائية.

فلازم نحط اعتبارات كتير قبل القرار، والطالب يجاوب على الأسئلة دي:

  • هل بيتأثر جسديًا ونفسيًا لو اتحط تحت ضغط وتوتر؟ 
  • هل بيحب المذاكرة والثقافة، ولا بيُجبر عليهم بس لتحصيل درجات عالية؟
  • هل هو شخص اجتماعي وفضولي، ولا بيميل للهدوء والعزلة أكتر؟
  • هل هو واثق من بنفسه وقراراته، ولأي مدى اعتماده على نفسه؟ 

لازم نحط السمات الشخصية للطالب في أول الاعتبارات، لإنها الحجر الأساسي للطالب عشان يقدر يكمل وينجح، وإلا هيتأثر بمشاكل مدارس ستيم اللي ذكرناها قبل كدا، وهينعكس عليه الأمر، وهيرسب، وبالتالي هيتأثر نفسياً، وهتهتز ثقته في نفسه، وهيتأثر مستقبله رغم تفوقه.

ومفيش مانع من إننا نقرأ عن الطلاب السابقين، وتجاربهم عشان نشوف الصورة كاملة وواضحة. ومن أبرز الطلاب المتفوقين في مدارس STEM الطالبة ياسمين يحيى مصطفى الحاصلة على المركز الأول في معرض إنتل الدولي للعلوم والهندسة عن اختراعها جهاز “القوة الكامنة في قش الأرز”.

وفي النهاية، مدارس ستيم من أفضل بدائل الثانوية العامة، وفرصة للطلاب المتوفين علمياً، والطموحين للوصول لأعلى أماكن البحث العلمي، ولكنها تابعة لنظام تعليم له مميزات وعيوب، و لازم الطالب وولي الأمر ياخد مشاكل مدارس ستيم في الاعتبار  عشان يقدر يقرر، مع تمنياتنا للجميع بالتفوق والتوفيق.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق