التربية والتعليم والتعليم الفنيفي السنوات الأخيرة، بدأ أولياء الأمور والطلاب يدوروا على بدائل حقيقية للثانوية العامة تكون بتفتح أبواب لمستقبل مضمون وتعليم حديث بيواكب احتياجات سوق العمل.
ومن بين النماذج اللي أثبتت نجاحها في المجال ده، ظهرت مدرسة توشيبا العربي كواحدة من أهم مدارس التكنولوجيا التطبيقية في مصر.
المدرسة بتقدّم نموذج مختلف في التعليم الفني، لأنها بتجمع بين الدراسة النظرية والتدريب العملي داخل مصانع مجموعة العربي، وده بيدي الطالب فرصة يكتسب مهارات مهنية حقيقية قبل التخرج.
في المقال ده، هنعرف سوا كل التفاصيل اللي تهمك عن مدرسة توشيبا من مميزات المدرسة وشروط القبول، لحد الأوراق المطلوبة وفرص العمل بعد التخرج، تابع معانا.
نبذة عن مدرسة توشيبا العربي
تُعد مدرسة توشيبا واحدة من أبرز نماذج التعليم الفني المتطور في مصر، وهي ثمرة شراكة استراتيجية بين مجموعة العربي وشركة توشيبا اليابانية. تم تأسيسها بهدف تقديم تجربة تعليمية متكاملة تجمع بين الدراسة النظرية والتدريب العملي داخل المصانع، ودا بيقدم للطلاب فرصة مهمة لفهم بيئة العمل الفعلية.
وتقع مدرسة توشيبا العربي بمحافظة المنوفية تحديدًا في كفور الرمل المنطقة الصناعية بقويسنا، قريبة من مصانع شركة توشيبا العربي، والموقع دا بيمنح الطلاب ميزة التعلم العملي المباشر، وبيزود من فرصهم في الالتحاق بسوق العمل بعد التخرج.
وبتعتمد المدرسة على نظام 3 سنوات؛ بيدمج بين المناهج الأكاديمية والتدريب العملي المستمر داخل مصانع العربي، ودا بيقوي من مهارات الطلاب التقنية وبيؤهله للحصول على شهادة دبلوم معتمدة دوليًا.
ودي أهم المجالات اللي بتركز عليها المدرسة في مجالات الصناعة المختلفة زي الكهرباء، الميكانيكا، التبريد والتكييف، واللوجستيات.
ورؤية المدرسة هو إعداد جيل من الفنيين المهرة المدربين على أحدث التقنيات الصناعية، بشكل يساهم في سد الفجوة بين التعليم وسوق العمل، ويعزز من فرص الشباب المهنية في المستقبل.
اعرف أكتر عن: مدارس التكنولوجيا التطبيقية الدولية.
تخصصات مدرسة توشيبا العربي
المدرسة بتضم مجموعة من التخصصات اللي بتأهل الطالب لمجالات الصناعة المختلفة، وهي:
- تكنولوجيا التبريد والتكييف
- تكنولوجيا اللوجستيات
- تكنولوجيا الكهرباء
- تكنولوجيا الميكانيكا
- تصنيع منتجات البلاستيك
وأعلنت الوزارة عن توافر تخصص تصنيع وصيانة الاسطمبات (تخصص جديد للعام الدراسي 2025/2026) ودا لإن المدرسة بتسعى دايمًا لتطوير مناهجها وتوسيع تخصصاتها علشان تواكب احتياجات سوق العمل المحلي والعالمي.
مناهج مدرسة توشيبا العربي للتكنولوجيا التطبيقية
مدة الدراسة في مدرسة توشيبا 3 سنوات، بيقضي الطالب خلالها فترة من التعليم النظري، وبعدها يبدأ التدريب العملي داخل مصانع العربي.
في مدرسة العربي، المناهج مش بس كتب ونظري، لأ دي كمان بتعتمد على 3 حاجات أساسية:
- علوم أساسية وثقافية زي الرياضة والفيزياء والمواد العامة اللي بتقوي الأساس.
- علوم فنية متخصصة حسب المجال اللي الطالب بيدرسه.
- تدريب عملي داخل المصانع علشان الطلبة يتعلموا بإيديهم.
والنظام ده بيساعد الطالب يكتسب خبرة ميدانية حقيقية، ويفهم طبيعة الشغل قبل ما يدخل سوق العمل.
طب وبعد التخرج؟ المسارات قدام الطالب كتير لإنه ممكن:
- يشتغل على طول في سوق العمل لو حابب يبدأ بدري.
- يلتحق بالجامعات المصرية بعد ما يعمل معادلة.
- يلتحق بالجامعات التكنولوجية.
- يكمل في المعاهد الفنية.
يعني المدرسة بتفتح أكتر من طريق، والطالب بيختار الأنسب ليه حسب طموحه وقدراته، وتقدر تعرف كل القرارات اللي تخص نظام المعادلة لكلية الهندسة على الفيس بوك.
مميزات مدرسة توشيبا العربي
تعد مدرسة توشيبا للتكنولوجيا التطبيقية من أفضل مدارس التعليم الفني في مصر، لأنها بتقدّم مميزات استثنائية للطلاب، منها:
- إعداد وتأهيل المعلمين تبعاََ لأحدث النظم والمعايير الدولية؛ ودا من خلال تدريبات معتمدة على يد خبراء من داخل وخارج مصر.
- إمكانية الالتحاق بالجامعات التكنولوجية بعد التخرج للطلاب المتفوقين.
- توفير فرص تعيين مضمونة في مصانع توشيبا العربي بعد التخرج.
- اهتمام خاص بغرس السلوك الإيجابي والانضباط وبناء الشخصية.
- توفير أتوبيسات لنقل الطلاب من وإلى المدرسة والمصانع.
- تدريب عملي داخل مصانع العربي طوال فترة الدراسة.
- مكافآت مالية شهرية أثناء فترة التدريب العملي.
- توفير وجبة غداء وزي مدرسي موحد للطلاب.
- شهادة مصرية معترف بيها دوليًا.
- الدراسة تعتبر مجانية.
اعرف كل الأخبار الجديدة عن المدرسة من خلال الصفحة الرسمية للمدارس التكنولوجية التطبيقية علي الفيسبوك.
شروط القبول في مدرسة توشيبا العربي
كل سنة بتعلن الوزارة عن شروط القبول للمدارس التكنولوجية، ودي الشروط اللي حددتها لعام 2025:
- اجتياز المقابلة الشخصية والكشف الطبي اللي بتنظمه وزارة التعليم بالتعاون مع الشريك الصناعي “مجموعة العربي”.
- اجتياز اختبارات القبول في المواد : اللغة العربية، اللغة الإنجليزية، الرياضيات.
- الحصول على مجموع لا يقل عن 240 درجة في الشهادة الإعدادية.
- القبول حاليًا مقتصر على البنين فقط.
- عمر الطالب لا يزيد عن 18 سنة.
الأوراق المطلوبة للتقديم
علشان تقدم لابنك في مدرسة توشيبا العربي، جهّز الأوراق دي قبل فتح باب التقديم:
1. صورة من بطاقة الرقم القومي للأب والأم( مكتوب عليها 3 أرقام رقم الأب – رقم الأم – رقم الطالب).
2. إحضار الإيميل الموحد للطالب من المدرسة الإعدادية وكلمة المرور.
2. صورة استمارة النجاح في الإعدادية للعام الحالي فقط.
3.أصل استمارة النجاح للصف الثالث الإعدادي للإطلاع عليها.
4. صورة شخصية حديثة للطالب.
5. صورة بطاقة الطالب ألوان إن وجدت.
6. فايل بلاستيك لحفظ الأوراق.
7. صورة شهادة ميلاد مميكنة حديثة.
وبيكون التقديم إلكتروني من خلال موقع وزارة التربية والتعليم والتعليم الفني في شهر يوليو من كل عام، أو من خلال الرابط الرسمي للمدرسة، مع إمكانية التواصل عن طريق الهاتف للاستفسار.
يمكن التواصل مع إدارة المدرسة من خلال الأرقام: 01100761361 – 01146879196
معلومات مهم تعرفها عن مدرسة توشيبا العربي
1- المدرسة مش بتوفر نظام داخلي، يعني الطالب بيروح ويرجع كل يوم وعشان كدا بتستقبل الطلبة من محافظتي المنوفية إدارة قويسنا وشبين الكوم، ومحافظة القليوبية إدارة بنها التعليمية.
2- الطالب بيدرس المواد الثقافية زي الثانوية العامة، بجانب المواد الفنية الخاصة بالتخصص.
3- أقسام الكهرباء والميكانيكا من أكتر الأقسام المطلوبة داخل وخارج مصر.
4- متطلبات امتحان المعادلة لدخول كلية الهندسة، بتعادل ثانوية عامة علمي رياضة؛ المهم يكون مجموع الطالب في الدبلوم 70% أو أكتر، ومواد الامتحان بتكون في:
- رياضة 1 (جبر وهندسة)
- رياضة 2 (تفاضل وتكامل)
- فيزياء
- كيمياء
- إنجليزي
- ميكانيكا
والامتحان بيكون في جامعة القاهرة كل سنة، غالبًا في شهر 8، وفي حالة نجاح الطالب بيدخل هندسة حكومية زي أي طالب ثانوي عام.
في النهاية، مدرسة توشيبا العربي للتكنولوجيا التطبيقية مش مجرد مدرسة فنية، لكنها تجربة تعليمية متكاملة بتأهل الطالب لحياة مهنية ناجحة من أول يوم.
المدرسة بتربط التعليم بسوق العمل الحقيقي، وده بيخليها اختيار ذكي لكل أسرة بتدور على مستقبل مضمون لأولادها بعيدًا عن ضغط الثانوية العامة.
شجّع ابنك على اختيار الطريق اللي يناسب ميولهم ومواهبهم. التعليم الفني التطبيقي هو مستقبل الصناعة في مصر، ومدرسة توشيبا العربي واحدة من أفضل الأبواب اللي ممكن تفتح لهم الطريق ده بثقة.
أضف تعليق