ما تريد معرفته عن مدرسة التمريض بعد الإعدادية 2024-2025

بعبع الثانوية العامة بيلاحق مجموعات كبيرة من الطلبة وأولياء أمورهم. 

الأهالي بيخافوا على ولادهم لو مجابوش مجموع عالي يدخلوا بيه كليات قمة! ظنًا منهم إن دا السبيل الوحيد عشان يلاقوا وظيفة كويسة يعيشوا منها كويس بعد كدا، لكن في جزء تاني من الأهالي بيحس إن الثانوية العامة تقيلة على ابنه أو بنته، والأفضل تكون دراستهم مهنية أكتر، لأن الطلبة قدراتهم في الدراسة مختلفة. 

وهنا جت المدارس الفنية بعد الإعدادية كحل بديل للثانوية العامة، والاختيارات فيها متنوعة، وبتوافق كتير من قدرات ورغبات الطلبة، ومن أكتر المدارس أهمية كانت مدرسة التمريض بعد الإعدادية بنظام الخمس سنوات، واللي بيتخرج منها الطالب حاصل على شهادة دبلوم فني تمريض، وكمان بتضمن له وظيفة في مستشفى حكومية أو خاصة، يعني مدرسة أسهل في تعليمها، وأضمن لفرصة عمل تابعة للحكومة. 

في المقال دا هنوضح لكم كل ما يخص مدارس التمريض بعد الإعدادية، ونعرض شروط القبول والاختبارات اللي المفروض الطالب يعديها، وهنذكر التنسيق بتاعها. 

ما هي مدرسة التمريض بعد الإعدادية؟

تُعد من ضمن المدارس الفنية البديلة للثانوية العامة، واللي يقدر الطالب يقدم فيها بعد نجاحه في المرحلة الإعدادية، وبتكون مدة الدراسة فيها 5 سنوات، متقسمة لـ 3 سنوات دراسة في المدرسة، وسنتين دراسة في معهد تمريض، والسنتين دول بيكونوا إجباري “الرابعة، والخامسة”. 

دا غير 6 شهور امتياز، ومش هيقدر الطالب يمتهن مهنة التمريض إلا بعد الـ 5 سنين دول، وبعدها بيحصل على مؤهل “دبلوم فني تمريض”. 

وللعلم، فمؤسسات تعليم التمريض في مصر بعد الشهادة الإعدادية بتنقسم لنوعين: 

1. مدارس التمريض، ودي للطلاب اللي حصلوا على الشهادة الإعدادية العادية، أو اللي بيعادلها للالتحاق بالثانوية الفنية للتمريض. 
2.  كليات التمريض ومعهد فني صحي، ودول للطلاب الحاصلين على الثانوية العامة. 

ومن أهم مميزات مدرسة التمريض بعد الإعدادية اللي بيحصل عليها الطالب خلال دراسته وبعدها إنه: 

• بيحصل على وظيفة بتوفرها له وزارة الصحة والسكان بمستشفى حكومي بعد ما يخلص دراسته. 
• بيحصل على تدريب عملي للتعامل حالات مختلفة من المرضى في المستشفيات الحكومية. 
• بيقدر يقدم ويلتحق بعد التخرج بأي كلية تمريض على مستوى الجمهورية. 
• بيدرس الطالب فيها كل المقررات الدراسية، والفنية الكافية لتأهيله. 

وعشان كدا تعد مدرسة التمريض بعد الإعدادية فرصة حقيقية ومميزة لطلبة الإعدادية، وكمان لإنها بتقبل من مجاميع مش عالية، وتوزيعها الجغرافي كبير، فبيفتح الباب لعدد كبير من الطلبة يدخلوها، والأهم هو ضمان وظيفة بعد الدراسة. 

شروط التقديم في مدرسة التمريض بعد الإعدادية

بعد ظهور الشهادة الإعدادية بيروح الطالب لأقرب مدرسة تمريض في محافظته عشان يسحب الملف، ويعرف الشروط المطلوبة، ومواعيد التقديم، والشروط هي: 

• يتعهد الطالب بعدم الانتقال من محافظة لمحافظة أو من مدرسة لأخرى أثناء فترة الدراسة. 
• يكون الطالب حاصل على الشهادة الإعدادية في نفس السنة اللي بيقدم فيها للمدرسة. 
• يتعهد الطالب أو الطالبة بالتفرغ للدراسة، بموجب إقرار مصدق عليه من ولي أمره. 
• تكون الشهادة الإعدادية للطالب من نفس المحافظة اللي مقدم فيها للتمريض. 
• يُشترط اجتياز الطالب للاختبارات المطلوبة، بنسبة ماتقلش عن 70% لكل مادة. 
• مايقلش سن الطالب أو الطالبة في بداية العام الدراسي عن 15 سنة. 
• يكون الطالب درس قبل كدا اللغة الإنجليزية كلغة أولى أو تانية. 
• يكون الطالب مصري الجنسية، ويمتاز بحسن السير والسلوك. 
• ماتكونش الطالبة متزوجة، وتتعهد بعدم الزواج أثناء الدراسة. 

ضروري جدًا بعد ظهور الشهادة الإعدادية إن الطالب يتوجه مع ولي الأمر لأقرب مدرسة تمريض، عشان يعرف شروط التقديم ومواعيدها، لأنها بتكون فترة بسيطة جداً، وفي ناس ما بتلحقش لو متابعتش كويس. 

اطلع على: أبرز 8 مراكز التدريب المهني في القاهرة وعناوينها وأرقام تليفوناتها. 

الاختبارات المطلوبة بمدارس التمريض

مدرسة التمريض بعد الإعدادية زيها زي كل المدارس البديلة للثانوية العامة ليها اختبارات لازم الطالب يعديها عشان يتقبل بالمدرسة، والاختبارات دي هي: 

1- اختبارات قدرات

الاختبارات دي بيؤديها الطالب أثناء كشف الهيئة، وبتشمل: 

اللغة العربية

الامتحان بيكون عبارة عن قطعة إملاء جواها أخطاء إملائية، والطالب لازم ياخد باله هنا من التنوين، وأنواع الهمزات، والتاء المربوطة، والهاء المربوطة، إلخ. 

اللغة الإنجليزية

هنا بيخضع الطالب لامتحان مكون من سؤالين، والامتحان دا بيشمل نوعين أسئلة من الأنواع دي: 

• قطعة ترجمة. 
• صوب الخطأ. 
• سؤال اختيار. 
• محادثة. 

التعامل مع الحاسب الآلي

امتحان الحاسب الآلي المطلوب قبل دخول مدرسة التمريض بعد الإعدادية بيكون عبارة عن معلومات درسها الطالب في المدرسة عن مكونات جهاز الكمبيوتر، والويندوز، والوورد، والإكسيل .. إلخ. 

كشف الهيئة

بيكون قدام لجنة بتقيم مظهر الطالب ولباقته في الكلام، وبيتسأل أسئلة زي: 

• ايه الاسم، والسن؟ 
• ليه اختار مدرسة تمريض؟ 
• رأيه في المنظومة الصحية في مصر؟ 
• هل مستعد للسهر في المستشفيات؟ 

الامتحانات التحريرية لازم نتيجة الطالب فيها ماتقلش عن 7 درجات من 10 في كل واحد فيهم، وبالنسبة للشفوي لازم يكون صوته مسموع، وواثق من نفسه، ومحضر نفسه كويس للإجابات. 

2- اختبارات نفسية

الاختبار هنا بيكون مع أخصائي نفسي، وبيكون الهدف منه قياس أكتر من حاجة عند الطالب، زي: 

• رد فعل الطالب، وسرعة استجابته. 
• المعلومات العامة. 
• اللباقة في الحديث. 
• مهارات التواصل. 
• قوة الملاحظة. 
• سلامة النطق. 
• اللياقة البدنية. 

3- اختبارات طبية

مدرسة التمريض بعد الإعدادية بتحرص إن الطالب المتقدم يكون سليم جسدياً، عشان يقدر يتحمل فترات العمل الطويلة، والسهر في المستشفيات، ومن هنا بتعمل الاختبارات الطبية للتأكد من صحة الطالب، وقوة بنيته، وقدرته على التحمل، عشان يقدر يباشر عمله بشكل كويس، وما يأثرش عليه صحياً. 

الاختبار بيتم من خلال القومسيون الطبي بالمحافظة، وبيشمل: 

• كشف لياقة طبية. 
• اختبار مخدرات. 
• كشف باطنة. 
• كشف النظر. 

في حالة اجتياز الطالب أو الطالبة للاختبارات دي، بيضمن قبوله بشكل كبير فيها، بس بيتطلب منه بعض الإقرارات. 

الإقرارات المطلوبة بعد اجتياز اختبارات مدرسة التمريض بعد الإعدادية

بيلتزم الطالب أو الطالبة ببعض الأمور لقبوله بالمدرسة، وفي حالة رفضه للإمضاء على الإقرارات فمش بيتقبل فيها.

والإقرارات دي بتكون: 

• إقرار من ولي الأمر بعدم قبول الطالب في المدرسة إلا بعد انتهاء عملية التنسيق، وظهور النتيجة. 
• تعهُّد بقبول الوظيفة بعد التخرج في المواقع الطبية في مختلف المحافظات حسب حاجة العمل. 
• تعهد بعدم الانتقال من محافظة لأخرى، أو من مدرسة تمريض لأخرى أثناء فترة الدراسة. 
• تعهُّد الطالبة بالتفرغ التام، وعدم الزواج أثناء الدراسة. 

بيتم قبول النقل من مدرسة للتانية خلال فترة الأجازة بس، ودا طبعًا بعد نجاح الطالب في السنة اللي كان فيها، وقبول الجهتين المنقول منها وإليها. 

وبكدا يكون الطالب عدى كتير وفاضل خطوات بسيطة ويتقبل، وفي حالة إن مجموع الطالب عالي، بتكون فرصته أكبر للقبول، لأن المدارس بتقبل المجاميع الأعلى في الأول، وعلى حسب حاجة المدرسة بتاخد مجاميع أقل، وهكذا. 

الأوراق المطلوبة للتقديم بمدرسة التمريض بعد الإعدادية

أعلنت وزارة الصحة والسكان عن شروط التقديم والأوراق المطلوبة من الطلاب في جميع المحافظات، واللي بتكون عبارة عن: 

• إقرار جنسية الطالب + شهادة من المدرسة التابع ليها الطالب تفيد بحسن السير والسلوك. 
• دمغات (2 جنيه دمغة فئة 30 قرش، 1 جنيه دمغة زرقاء فئة 10 قروش، 3 دمغة مهن طبية). 
• بيان نجاح الشهادة الابتدائية، أو صورة من الشهادة نفسها مختومة طبق الأصل. 
• صورة البطاقة الشخصية لولي الأمر، وعليها رقم الموبايل الخاص بيه. 
• الاستمارة الأصلية لنجاح الطالب في الإعدادية + عدد 3 صور منها. 
• عدد 8 صور شخصية حديثة للطالب 4*6 بخلفية بيضاء. 
• شهادة ميلاد كمبيوتر حديثة + عدد 3 صور منها. 
• ملف تقديم للتمريض من أي مكتبة. 

اقرأ كمان عن: شروط الالتحاق بمدارس البترول بعد الإعدادية. 

قواعد القبول بمدرسة التمريض بعد الإعدادية

نظام القبول والتقديم بالمدارس الثانوية الفنية للتمريض بيختلف في كل مركز إداري عن التاني على حسب استيعابه للطلبة، وولي الأمر هو اللي بيقدم لابنه أو بنته، ولازم يتابع كل جديد لمدرسة التمريض التابعة له، ومن قواعد القبول بنلاقي: 

ومن قواعد القبول بنلاقي إن كل مدرسة بتقسم الطلبة على حسب مجامعيهم، وكل درجات متشابهة بتتقسم لمجموعات، وبتبدأ بالأعلى، وبيكون كل مجموعة على 3 أيام منفصلة بشكل متتابع، لحد ما تقبل العدد اللي المدرسة ممكن تستوعبه. 

بعد كدا بيتم فحص ملفات الطلبة، وتحديد ميعاد اختبار الإملاء، وكشف الهيئة لكل 30 طالب لوحدهم، ثم

بيتم استكمال باقي الاختبارات تباعاً، لحد ما توصل للأعداد المطلوبة، وبالتالي ما تقبلش ملفات جديدة. 

وفي الآخر بيتم تجهيز الفصول لإجراء الامتحانات، بتطبيق كل الإجراءات الاحترازية، وترك مسافات بين الطلبة أثناء الامتحان، وطبعًا غير مسموح لأي طالب مش مقدم للمدرسة بدخول الاختبارات دي. 

أماكن مدرسة التمريض بعد الإعدادية

مدارس التمريض الثانوية موجودة في مختلف محافظات مصر  بشكل كبير، ومن الأفضل لولي الأمر إنه يروح لأقرب مستشفى حكومي، ويسأل على أقرب مدرسة تمريض للطالب عشان يقدم فيها. 

ودي المحافظات اللي بتضم مدارس التمريض بعد الإعدادية في مصر: 

• الوادي الجديد. 
• الإسكندرية. 
• بني سويف. 
• كفر الشيخ. 
• الدقهلية. 
• القليوبية. 
• الشرقية. 
• سوهاج. 
• القاهرة. 
• الغربية. 
• الأقصر. 
• أسوان. 
• دمياط. 
• الجيزة. 
• المنيا. 

مدرسة التمريض بعد الإعدادية بتستقبل أعداد كبيرة عن المدارس الفنية الأخرى، ودا بسبب تواجدها في معظم محافظات مصر، والمحافظة الواحدة بتضم عدد كبير من المدارس. 

هل التمريض العسكري مختلف عن التمريض العادي؟

مدارس التمريض العسكري كانت موجودة لحد فترة قريبة في مصر، لكن حاليًا اتلغت والتمريض العسكري بقى مقتصر بس على الطلاب الحاصلين على الشهادة الثانوية، وبيكون اسمه “المعهد الصحي العسكري” أو “معهد صحي قوات مسلحة“، وبيكون لطلاب الثانوية العامة، أو الأزهرية قسم علمي علوم، ومتاح للبنين والبنات. 

مدة الدراسة في معهد صحي قوات مسلحة سنتين، وبيحصل الطالب بعد تخرجه على دبلوم صحي، ورتبة رقيب متطوع في القوات المسلحة، وبيتدرج في الرتب الأعلى بمرور الوقت، وبيحصل على كل الامتيازات والخدمات اللي بتقدمها القوات المسلحة. 

مصروفات مدرسة التمريض بعد الإعدادية

مصروفات مدارس التمريض بعد الإعدادية لا تتعدى 400 جنيه مصري في السنة الواحدة، وتعد مصاريفها ورسومها قريبة من المدارس الحكومية التانية، ودا لأن الهدف منها هو توفير ممرضين على كفاءة عالية للعمل بالأماكن الحكومية، وسد الاحتياج للتمريض في المستشفيات الحكومية المختلفة. 

تنسيق مدرسة التمريض بعد الإعدادية

بيختلف التنسيق من محافظة للتانية، وكمان بيختلف من مدرسة للتانية فبيكون لكل مدرسة تنسيق لوحدها، وبيتراوح الحد الأدنى للقبول من 220-270 درجة. 

اختلاف التنسيق بالمحافظات بيكون على حسب المؤشرات الأولية، وعدد الطلبة اللي قدموا، وعدد الأماكن المتاحة في المدرسة، واستيعاب الفصول كمان، لكن كل ما يكون مجموعك أعلى بتكون فرصتك أكبر للقبول بمدارس التمريض بعد الإعدادية. 

الخلاصة

مدرسة التمريض بعد الإعدادية فرصة كويسة جداً للطلبة على المستوى العلمى والتدريبي، لإنها بتأهلهم بشكل كبير للعمل، والدولة بتوفر لهم فرص عمل بعد التخرج بالمستشفيات الحكومية والخاصة، وبيقدر الطالب يقدم ويلتحق بعد التخرج بأي كلية تمريض على مستوى الجمهورية. 

وعشان تتعرف على مدارس تانية بعد الإعدادية يكون ليها مستقبل كبير، غير المدارس الثانوية العامة، افتح دليل المدارس المصرية وهيساعدك في كدا.