ما هي المدارس السيمي انترناشونال في مصر؟

ما هي المدارس السيمي انترناشونال؟

ما هي المدارس السيمي انترناشونال؟

بالتأكيد سمعت قبل كدا عن مصطلح المدارس الناشونال الرسمية، والمدارس الانترناشونال اللي بيحصُل منها الطالب على شهادات دولية معتمدة، والمدارس الخاصة لغات، بس مصطلح المدارس السيمي انترناشونال دا جديد شوية. 

النوع دا من المدارس ظهر في مصر من حوالي 12 سنة، وهي مدارس بتصنف نفسها إنها وسطية بين المدارس الناشونال والانترناشونال، لإنها بتدرس مناهج المدارس الرسمية، لكن بمميزات كتير من المدارس الانترناشونال.

فإيه هي المدارس دي؟ وإيه مميزاتها؟ وإيه أهم المدارس اللي بتقدم النوع دا من التعليم؟

دا اللي هنعرضه من خلال المقال، تابع معنا.

ما هي المدارس السيمي انترناشونال؟ 

هي مدارس بتعتمد في تدريسها على المناهج المصرية  المحلية، لكن بتدرسها باللغة الإنجليزية زي مدارس اللغات الخاصة، وكمان بتضيف بعض مناهج اللغات المتقدمة، وغالباً بيكون واحد من مناهج اللغات الدولية، بالإضافة لتدريس لغة ثانية وثالثة من سن مُبكر، وبتمنح الطلاب شهادة الثانوية العامة المصرية زي المدارس الرسمية.

والفكرة اللي بيعتمد عليها النوع دا من التعليم هي التوسط بين التعليم الناشونال والانترناشونال، من حيث الجودة، والاهتمام باللغة الإنجليزية، وإتقان الطالب ليها، بالإضافة للغات تانية تنمي من مهاراته.

أما بالنسبة لمصطلح السيمي انترناشونال فأول ظهوره كان في مصر، وهو فكرة من القطاع الخاص لتدعيم التعليم للطبقة المتوسطة، والجمع بين مميزات النظامين الناشونال والانترناشونال، بتكاليف أقل من الانترناشونال. 

لكن كشهادة فهو غير معترف بيه في مصر أو خارج مصر، ودا لإن الشهادات المعترف بيها هي الحكومية التابعة للمدارس الناشونال، والشهادات الدولية للمدارس الانترناشونال. 

ودلوقت بنلاقي إن قسم السيمي انترناشونال بقى جزء داخل بعض المدارس اللي بتدرس المناهج البريطانية، والأمريكية، وغيرهم. 

وبعد ما ذكرنا ما هي المدارس السيمي انترناشونال، هنشوف الفرق بينها وبين التعليم الانترناشونال.

الفرق بين التعليم السيمي انترناشونال والانترناشونال

رغم إن نظام السيمي انترناشونال قائم على بعض النقاط القوية للنظام الانترناشونال، إلا إن بتظهر بعض الفروقات ما بينهم، منها: 

نظام التعليم

هنلاقي إن نظام التعليم الدولي بيتدرس في مدارس مصرية معترف بيها من وزارة التربية والتعليم، ولكنها بتنفرد بمنهج خاص بدولة أجنبية مُعينة، زي: المنهج البريطاني، أو المنهج الفرنسي، أو المنهج الأمريكي، أو المنهج الكندي.

واستكملًا للإجابة عن سؤال ما هي المدارس السيمي انترناشونال وتفاصيل نظام التعليم فيها فبنلاقي إن مفيش نظام واضح، ولكن هي مدارس بتدرس نفس منهج المدارس الرسمية لكن باللغة الإنجليزية، وبتضيف لغة تانية، وتالتة.

وبتضيف كمان بعض الأجزاء من مناهج دولية لزيادة استفادة الطالب، لكن بتختلف من مدرسة للتانية حسب الإضافة دي، ونوع التعليم اللي اختارته المدرسة 

نوع الشهادة

تمنح مدارس الانترناشونال الطلاب شهادات دولية مُعتمدة زي: الشهادة البريطانية، والدبلومة الأمريكية، والبكالوريا الفرنسية، والدبلومة الكندية وغيرها، اللي بتؤهلهم للدراسة بالجامعات بالخارج.

وبالنسبة لمدارس السيمي انترناشونال فهي بتمنح الطالب شهادة الثانوية العامة معتمدة من وزارة التربية والتعليم زي المدارس الرسمية. 

المصاريف الدراسية

مصاريف المدارس الانترناشونال متفاوتة، وبتختلف من مدرسة للتانية، والبعض منها بيكون مرتفع، وبيوصل لأكتر من 300 ألف مصاريف لسنة دراسية، وعشان كدا هي مش مناسبة لكل فئات أولياء الأمور. 

وعلى ذكر ما هي المدارس السيمي انترناشونال ومصاريفها، فبنلاقي إن المصاريف بتتراوح من 45 – 60 ألف للسنة الدراسية، ودا أكتر من مصاريف المدارس الخاصة، ولكن في نفس الوقت بتكون أقل بكتير من المدارس الدولية

الشكل العام للمدارس

تتميز المدارس الدولية بإنها مدارس على أعلى مستوى من حيث جودة الفصول، والمعامل، دا غير حرصها الشديد على وجود أنشطة مختلفة تساعد الطالب في تنمية مهاراته، من أنشطة رياضية، وعلمية، ومسابقات؛ لتحفيز الطلبة وزيادة تعلقهم بالمدرسة، وترفيههم. 

وبنلاقي إن المدارس السيمي انترناشونال حرصت بردو على وجود مميزات كتير من مدارس النظام الدولي؛ عن طريق:

  • توفير أماكن للأنشطة الرياضية، من حمام سباحة، وملاعب لممارسة كافة الأنشطة. 
  • تقليل الكثافة الطلابية بالفصول، يتراوح العدد من 25 – 30 طالب بالفصل. 
  • تجديد المدارس، ووجود أحدث الأجهزة التعليمية، وتجهيز المعامل بشكل جيد. 

اقرأ كمان: الفرق بين المدارس الناشونال والانترناشونال في مصر

مميزات التعليم السيمي انترناشونال 

مميزات التعليم السيمي انترناشونال

وبعد ما عرفت ما هي المدارس السيمي انترناشونال، محتاج كولي أمر تكون مدرك مميزاتها وعيوبه عشان تحدد إذا كانت مناسبة لابنك ولا لأ.

ومن أبرز مميزاتها بنلاقي:

الاهتمام باللغات

المدارس دي بتهتم باللغات من خلال تدريس المناهج الرسمية باللغة الإنجليزية، وإضافة كتاب لمادة اللغة الإنجليزية لتنمية اللغة عند الطالب بمستوى يشبه المدارس الانترناشونال، دا غير تدريس لغة تانية وتالتة؛ زي الألماني، الفرنساوي.

توفير منهج دراسي قوي

رغم إن المدارس السيمي انترناشونال بتدرس نفس منهج المدارس الناشونال، إلا إنها بتضيف وحدات دراسية من مناهج دولية، لخلق مستوى تعليمي قوي للطلاب، وزيادة وعيهم وتفكيرهم. 

الاهتمام بالأنشطة

ودا بيكون عن طريق وجود أكاديميات رياضية مختلفة بالمدارس، زي؛ السباحة، كرة القدم، كرة السلة، وغيرها من الأنشطة، لتنمية مهارات الطالب.

وجود جميع المراحل الدراسية

بتوفر المدارس السيمي انترناشونال جميع المراحل الدراسية، وبتستقبل أطفال من سن سنتين و6 شهور لمرحلة Pre- KG.

ودا مهم لكل أولياء الأمور اللي بتسأل عن ما هي المدارس السيمي انترناشونال، وهل بتستقبل أطفال في مراحل قبل رياض الأطفال.

عيوب نظام السيمي انترناشونال

عيوب نظام السيمي انترناشونال

كل نظام دراسي زي ما بيكون ليه مميزات بيكون ليه عيوب، وبنلاقي إن من عيوب نظام السيمي انترناشونال:

تقديم شهادة غير معتمدة دوليًا

المدارس السيمي انترناشونال مش بتتشابه مع المدارس الدولية في تقديم شهادة دولية معتمدة تؤهل الطالب لدخول الجامعات بالخارج، وبيحصل الطالب على شهادة الثانوية العامة.

التعليقات السلبية من بعض الخبراء

بعض خبراء التعليم بيشوفوا إن نظام مدارس السيمي انترناشونال مش واضح، وغير متكامل زي المدارس الدولية، وإنها مش بتضيف حاجة للطالب، وإنها مجرد مسمى يجذب أولياء الأمور بمصاريف متوسطة للي بيحلموا يدخلوا أولادهم مدارس دولية. 

دا غير إنها لحد دلوقتي مش معروفة بين أولياء الأمور، ومش واضح بالنسبالهم طبيعة الدراسة فيها. 

المصاريف المرتفعة

البعض بيشوف إن مصاريفها عالية، ومش مناسبة للي بتقدمه للطالب، لإنه بيدرس نفس المناهج الرسمية، ومبيحصلش على شهادة أعلى، أو بتوفر له أي فرصة زي المدارس الدولية. 

دا غير إن بعض المدارس منها؛ زادت المصاريف فيها بنسبة أعلى من 7٪ المقررة من وزارة التربية والتعليم، ما بين السنة اللي فاتت والسنة دي، ودا أثار غضب أولياء الأمور، لإن المصاريف كانت متوسط 25 ألف، ودلوقتي في بعض المدارس وصلت 60 ألف. 

قائمة بالمدارس السيمي انترناشونال في مصر 

بعد ما ذكرنا مميزات وعيوب التعليم السيمي انترناشونال في مصر، وجاوبنا على سؤال ما هي المدارس السيمي انترناشونال؟ وفّرنا لك قائمة بتضم أفضل مدارس السيمي انترناشونال اللي ليها سمعة جيدة بناءً على تجارب أولياء أمور، وهي:

  1. مدرسة مودرن سكول المتكاملة اي ام اس – IMS – Integrated Modern School 
  2. مدرسة نيو جينيريشن مودرن سكول – New Generation Modern School 
  3. مدرسة طيبة المتقدمة – (Thebes Advanced School (TAS
  4. مدرسة سيدز للغات – Seeds Language School – SLS 
  5. مدرسة بروفانس للغات – Provence Language School 
  6. مدرسة ستانفورد للغات – stanford integrated school 
  7. مدرسة جرين فالي – Green Valley School – GVS 7
  8. مدرسة انجلو امريكان – Anglo American School 
  9. مدرسة البشائر – Albashaer School 
  10. سمارت سكول – Smart School 

دي كانت أهم المدارس المتعارف عليها المعتمدة على نظام السيمي انترناشونال، وفي مدارس تانية تقدر توصلها من خلال موقعنا دليل المدارس المصرية – Egypt Schools.info.

واللي من خلاله هتعرف تفاصيل أكتر عن أنواع المدارس المختلفة، كل اللي عليك إنك تبحث باسم منطقتك، ونوع المدارس، وهتظهر أمامك قائمة فيها كل المدارس القريبة منك، وإيه نوع التعليم اللي بتقدمه. 

الخلاصة

مدارس السيمي انترناشونال هي مدارس بتتوسط بين المدارس الناشونال والانترناشونال، وبتتبع مناهج المدارس الرسمية وبتدرسها باللغة الإنجليزية، بجانب إنها بتدرس جزء من المناهج الدولية لزيادة استفادة الطالب.

لكن في نفس الوقت هي مدارس غير معتمدة من وزارة التربية والتعليم، ولا يحصل الطالب منها إلا على شهادة ثانوية مصرية زي باقي المدارس الناشونال، ولكن بتحافظ على وجود نظام تعليمي أفضل وأنشطة عن المدارس الرسمية.

وبكدا نكون جاوبنا عن سؤال ما هي المدارس السيمي انترناشونال، وأهم مميزاتها وعيوبها، وأهم المدارس المتعارف عليها بتقدم النظام التعليمي دا.

وتقدر تسأل عن تجارب أولياء الأمور لمدارس السيمي انترناشونال، وتستفيد من خبراتهم  من خلال جروب دليل المدارس المصرية إيجيبت سكولز على فيسبوك.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق