عيوب المدارس العسكرية في مصر 2023 – 2024

عيوب المدارس العسكرية في مصر

عدد كبير من طلبة المدارس الإعدادية بيكون هدفهم الالتحاق بالمدارس العسكرية في مصر، عشان يقدموا بعدها في الكليات العسكرية ويكونوا من أبناء القوات المسلحة.

بس الهدف لوحده مش كفاية؛ لإن التقديم في المدارس دي بيحتاج شروط معينة لازم تتوفر في الطالب عشان يقدر يلتحق بيها.

ورغم المميزات اللي بتوفرها إلا إن الطالب لازم يفهم كويس نظام الدراسة، ويعرف عيوب المدارس العسكرية، أو الالتزامات اللي هتكون مطلوبة منه قبل ما يقدم أوراقه فيها، عشان يقرر هل هيقدر يستحمل ظروفها أو لأ.  

وعشان كدا هنعرض لك من خلال المقال أهم التفاصيل عن الثانوية العسكرية، ومميزاتها وعيوبها.

ما هي الثانوية العسكرية؟ 

ما هي الثانوية العسكرية

الثانوية العسكرية هي منظومة دراسية متاحة لجميع الطلبة المصريين الحاصلين على الشهادة الإعدادية سواء العامة أو الأزهرية، ونظامها قريب من نظام الثانوية العامة في كذا حاجة. 

الفرق بين الثانوية العسكرية والثانوية العامة

نقدر نقارن بين النظامين من ناحية:

1- الشهادة المقدمة للطالب

بيحصل الطالب في نهاية الدراسة بالمدارس العسكرية على شهادة إتمام معتمدة من وزارة التربية والتعليم بتؤهله للالتحاق بأي كلية متاحة لخريجي الثانوية العامة بشرط توافق مجموع درجاته مع تنسيق الكليات. 

دا غير إن الثانوية العسكرية كمان بتؤهل الطالب للالتحاق بالكليات الحربية، والمعاهد العسكرية التابعة للقوات المسلحة، وفرصة نجاحهم في الاختبارات اللي بتتطلبها الكليات دي بتكون أكبر من غيرهم. 

2- المواد الدراسية

مواد الثانوية العسكرية هي نفسها المواد اللي بيدرسها طالب الثانوية العامة زي: الكيمياء، والفيزياء، والأحياء، واللغات وغيرهم.

وبجانب المواد دي، بيتضاف مواد التربية العسكرية خارج المجموع، ودي بتعلم الطالب طريقة استخدام الأسلحة، وطريقة التعامل في الحرب، ومنها بيتعلم الانضباط والالتزام.

3- عدد سنوات الدراسة

الدراسة في المدارس العسكرية في مصر بتستمر لمدة 3 سنوات، بس من أحد عيوب المدارس العسكرية في رأي البعض إن الدراسة بتكون مستمرة على مدار اليوم مش ساعات بسيطة زي نظام الثانوية العامة؛ عشان يقدروا يخلصوا التمرينات المطلوبة منهم، ودا بيضطر الطلبة للمبيت في السكن اللي بتوفره الدولة لهم.

4- الإشراف الوزاري

الدراسة في المدارس العسكرية بتكون تحت إشراف وزارة التربية والتعليم المصرية، وهي المسؤولة عن وضع المناهج،والامتحانات وغيرهم.

لكن الفرق هنا بين الثانوية العسكرية والثانوية العامة إن القائمين على النظام بيكونوا من أبناء الجيش المصري، سواء المشرفين على الطلبة والمسؤولين عن رعايتهم، أو المعلمين حتى، ودي ميزة مهمة بسببها أولياء الأمور بيتغاضوا عن عيوب المدارس العسكرية الأخرى. 

والنقطة دي بتوضح إن المنظومة الدراسية في المدارس العسكرية بتكون منضبطة جدًا، وقائمة على الالتزام، عشان كدا بيكون في مجموعة شروط للالتحاق بالمنظومة دي، للتأكد من استعداد الطالب للتكيف مع نظامها.

اقرأ أيضاً: أهم 9 معلومات عن المدرسة العسكرية الرياضية

شروط الالتحاق بالمدارس العسكرية

شروط الالتحاق بالثانوية العسكرية

بيحتاج التقديم في منظومة الدراسة العسكرية توافر مجموعة من الشروط عشان يتم قبول الطالب، وفي حالة عدم توافر شرط واحد بيكون الطالب غير مؤهل للالتحاق بالنظام.

وكثرة الشروط دي بيعتبرها البعض واحدة من عيوب المدارس العسكرية في مصر، لكنها شروط مهمة زي ما هنعرف، وهي:

1- الجنسية المصرية للطالب والأبوين

يتاح الالتحاق بنظام المدارس العسكرية في مصر فقط للطلبة المصريين، ومفيش صلاحيات لأي طالب غير مصري تمكنه من التقديم، أو القبول في النظام.

كمان الوالدين لازم يكونوا مصريين، وبيقدموا أوراق توضح جنسيتهم للتأكد من توافر الشرط دا. 

 2- حسن السير والسلوك

وقت تقديم الأوراق في المدارس العسكرية بيتعمل مجموعة من التحريات حول الطالب وأسرته؛ للتأكد من حسن السير والسلوك، ودا لإن نظام المدارس العسكرية في مصر بيكون قائم بشكل كبير على الانضباط زي ما قولنا.

وطبيعي في حالة وجود مشكلة في البيانات الخاصة بالطالب، أو أحد أفراد أسرته بتترفض أوراقه.

 3- تقديم موافقة من ولي الأمر

القائمين على نظام المدارس العسكرية في مصر حريصين على موافقة ولي الأمر على التحاق الطالب بالمدرسة، وعشان كدا بيكون مطلوب تقديم أوراق رسمية تثبت الموافقة.

 4- اللياقة البدنية للطالب

من شروط القبول في المدارس العسكرية، إن الطالب يكون لائق بدنيًا ورياضيًا، وطوله متناسب مع وزنه، وبيكون في حد أدنى للطول.

ودا لإن طلبة المدارس العسكرية بيعملوا تمارين رياضية كتيرة جداً على مدار اليوم، وبالتالي لو في طالب غير لائق مش هيقدر يكمل التمارين عشان كده المدرسة مش بتقبل بيه من الأول.

 5- اجتياز الاختبارات

قبل ما الطالب يتقبل في المدارس العسكرية لازم يدخل مجموعة من الاختبارات المختلفة، وينجح فيهم كلهم؛ ودا لإن الاختبارات دي بتوضح مدى استعداد الطالب للانضمام  للنظام الدراسي دا.

 6- تقديم جميع الأوراق المطلوبة

تقديم الملفات للمدارس العسكرية بيكون في أوقات معينة من السنة، وبيتحدد فترة قبول الملفات من قِبل وزارة الدفاع في مصر.

في الفترة دي لازم الطالب يقدم كل الأوراق المطلوبة، واللي أُعلن عنها زي: الصور الشخصية للطالب، وشهادة ميلاده، وصور للقيد العائلي، وغيرهم.

اختبارات القبول بالمدارس العسكرية

الاختبارات المطلوبة في المدارس العسكرية بيعتبرها البعض واحدة من أكبر  عيوب المدارس العسكرية،  لإنها مش بس بتقيس اللياقة البدنية للطالب، دي كمان بتختبر قوة شخصيته وثباته، وبتتسم بصرامتها، ومن أهمها:

  • الاختبار البدني، ومعرفة مدى لياقة الطالب للقبول في المدرسة.
  • اختبار مهاري بيقيس لياقة الطالب في بعض الألعاب الرياضية.
  • اختبار طبي لقياس مدى قدرة الطالب، وتأهيله للمدرسة.
  • اختبار نفسي لقياس مستوى ذكائه، وثباته الانفعالي.
  • اختبار  علمي لقياس مستوى الطالب العلمي.
  • اختبار الهيئة لمعرفة، وبيان شخصية الطالب.

اقرأ أيضاً: مستقبل الثانوية العسكرية في مصر. 

مميزات المدارس العسكرية

المدارس العسكرية مميزاتها كتير، وبتوفر مستقبل جيد للطلاب الخريجين منها على المستوى المهني والاجتماعي، لكن للحصول على المميزات دي لازم الطلاب يستحملوا عيوب المدارس العسكرية اللي بيكون معظمها في الالتزام بالضوابط، والنظام الصارم في التعليم، لكن غير كدا يقدر الطالب يستفيد من مميزاتها الكتير زي:

  • حصول الطالب على الشهادة العسكرية المعادلة للثانوية العامة اللي بتؤهله للالتحاق بجميع الكليات المدنية.
  • تدريب الطلاب، والحفاظ على لياقتهم البدنية، وتحفيزهم للالتحاق بالكليات الحربية بالقوات المسلحة.
  • تأهيل خريجيها للالتحاق بالكليات العسكرية والحربية، وبيكون لهم الأولوية للقبول.
  • تيسير الالتحاق بالمعاهد العسكرية تحت إشراف وزارة الدفاع.
  • توفير مكافآت بتتصرف للطلاب المتفوقين دراسياً وأخلاقياً.
  • توفير تأمين صحي، وسكن داخلي للمدرسة، وطعام فاخر.
  • صرف زي عسكري رسمي للطلاب.

عيوب المدارس العسكريةعيوب المدارس العسكرية

بعض أولياء الأمور بيرفضوا يقدموا لأولادهم في المدارس العسكرية لإنهم شايفين مجموعة عيوب هتصعب على الطالب دراسته، وبكدا الطالب مش بيقدر يحصل على ورقة موثقة من ولي الأمر بموافقته، وهنا بتكون أوراق الطالب ناقصة، ومش بيتقبل.

ومن عيوب المدارس العسكرية في مصر، واللي بتكون سبب في عدم موافقة ولي الأمر على الالتحاق بيها:

صعوبة توافر جميع الشروط المطلوبة للقبول

من أهم عيوب المدارس العسكرية هي إن التقديم في المدارس العسكرية بيتطلب مجموعة من الشروط، زي: اجتياز الاختبارات الصحية، وعدم وجود إعاقة، واجتياز اختبار الهيئة، والاختبارات العلمية وغيرهم.

وبيكون في احتمالية كبيرة لعدم اجتياز الطالب كل الاختبارات، أو اجتيازها مع عدم توافر باقي الشروط، وفي الحالتين بيعتمد القائمين على النظام إن الطالب دا لا يصلح للالتحاق بنظام المدارس العسكرية.

التدريبات الشاقة

الطلبة في المدارس العسكرية بتعمل أنواع كتيرة من التمارين الرياضية، والتدريبات على مدار اليوم، وبعض التمارين دي بتكون صعبة على الطلاب، مع وجود احتمالية حدوث إصابات للطلبة.

كمان التدريبات الكتيرة مش بتناسب الطالب الكسول؛ لإن النظام بيتطلب الاستعداد الدائم لأداء التمارين والتدريبات، دا غير التدقيق في مواعيد الحضور والانصراف للتمارين.

لكن رغم إن البعض بيعتبر التمارين الكتيرة من عيوب المدارس العسكرية، إلا إن التمارين دي بتساعد الطالب يتفوق في الألعاب الرياضية، وينافس على بطولات كبيرة بعد كده.

ومن إيجابيات الألعاب الرياضية إنها بتؤهل الطالب للتعامل مع الظروف الصعبة بصمود، وبدون استسلام، وبتخليه شخص يُعتمد عليه بعد كده في الحروب.

ضرورة اللياقة البدنية

من أهم الشروط المطلوبة للقبول في المدارس العسكرية هي اللياقة البدنية للطالب، وإن يكون طوله مناسب لوزنه زي ما قولنا، والنقطة دي بيتم تحديدها في الاختبارات البدنية اللي بيعملها الطالب.

وفي حالة عدم اجتياز الطالب الاختبارات دي بيترفض، مع عدم إمكانية للطعن على نتائج الاختبارات إلا عن طريق جهات عسكرية، وهنا بيسقط حق الطالب في الالتحاق بالمدارس العسكرية، ودا من أصعب عيوب المدارس العسكرية.

الخلاصة

الثانوية العسكرية هي مرحلة بعد الشهادة الإعدادية بتمنح خريجيها شهادة معتمدة من وزارة التربية والتعليم المصرية بتؤهلهم للالتحاق بأي كلية مدنية؛ بشرط الحصول على الحد الأدنى من الدرجات اللي بتطلبها للكليات دي.

بالإضافة لكونها بتؤهل الطلبة لدخول الكليات الحربية، والمعاهد العسكرية التابعة للقوات المسلحة المصرية؛ لإنها بتعلم الطلبة طريقة استخدام الأسلحة الحربية، وإزاي يقدروا يتعاملوا في الحروب.

وبتتطلب المدارس العسكرية في مصر مجموعة من الشروط للتقديم، والقبول؛ زي إن الطالب يكون مصري، ولائق بدنيًا، ويجتاز جميع الاختبارات المطلوبة زي ما وضحنا.

 أما عن عيوب المدارس العسكرية، فهي صعوبات بيواجهها الطالب في مرحلة التقديم، ومنها شروط كتيرة وارد تكون مش متوفرة عند عدد كبير من الطلبة.

ومن هنا لازم كولي أمر تكون على دراية بمميزات وعيوب المدارس دي عشان تقدر تاخد قرار مناسب لابنك.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق