كل اللي محتاج تعرفه عن دراسة الطيران في مصر: الأكاديميات، الشروط، التكاليف، وفرص العمل

لو دايمًا حلمك إنك تبقى طيار وتسافر بلاد كتيرة، أو نفسك تشتغل في مجال الطيران وتفهم أكتر عن الدراسة دي، فالمقال ده دليلك الكامل.

هنقولك على كل حاجة تخص دراسة الطيران في مصر من أول الأكاديميات الحكومية والخاصة، مرورًا بالشروط والتكاليف، لحد فرص العمل بعد التخرج، وكمان الفرق بين دراسة الطيران وهندسة الطيران.

خيارات دراسة الطيران في مصر

لو بتفكر تبدأ في دراسة الطيران فالموضوع فيه أكتر من طريق ممكن تختاره حسب هدفك وقدرتك المادية.

فيه أكاديميات حكومية زي الأكاديمية المصرية لعلوم الطيران، وفيه كمان أكاديميات خاصة زي أكاديمية أتيس للطيران، وكل واحدة ليها نظامها وشروطها وتكاليفها الخاصة.

أولًا: الأكاديمية المصرية لعلوم الطيران

تضم الأكاديمية 3 كليات رئيسية معتمدة من سلطة الطيران المدني المصري، واتأسست سنة 1932، وبتعد أقدم لدراسة الطيران في مصر والشرق الأوسط. وبتضم:

1. الكلية المصرية للطيران

وهي الكلية المسؤولة عن تدريب الطيارين وتأهيلهم للحصول على رخص الطيران المعتمدة.

2. كلية المراقبة الجوية

ودي بتأهل الطلاب لإدارة ومتابعة حركة الطيران في المجال الجوي المصري.

3. كلية الدراسات المتخصصة

ودي بتقدّم برامج تدريبية متنوعة في مجالات متقدمة زي صيانة الطائرات وإدارة الطيران.

بالإضافة إلى:

• قسم اللغة الإنجليزية المتخصص في مصطلحات الطيران.
• قسم التدريب في طب الطيران.
• قسم التدريب على البالون الطائر.

 والطلاب اللي بيتخرجوا من الأكاديمية بيحصلوا على شهادات معتمدة دوليًا من:

• سلطة الطيران المدني المصري.
• منظمة الطيران المدني الدولي (ICAO).

كمان الشهادة بتكون معادلة للمؤهل العالي من المجلس الأعلى للجامعات، يعني تقدر تكمل دراساتك العليا أو تشتغل في أي مكان داخل مصر أو براها.

ثانيًا: دراسة هندسة الطيران

من مجالات دراسة الطيران في مصر، دراسة تصميم وصيانة الطيارات مش قيادتها، تقدر تدرس هندسة الطيران في الجامعات الحكومية المصرية زي جامعة القاهرة أو هندسة إمبابة.

مدة الدراسة بتكون خمس سنين (منها سنة إعدادية)، وبيتعلم فيها الطالب كل ما يخص الديناميكا الهوائية، والمحركات، والتكنولوجيا الجوية.

جامعات مصرية بتقدّم تخصصات قريبة من مجال الطيران، زي:

1- جامعة القاهرة: من خلال كلية الهندسة، قسم هندسة الطيران والفضاء.

2- الأكاديمية العربية للعلوم والتكنولوجيا والنقل البحري: ودي عندها فرع في العلمين بيقدّم دراسات متقدمة في هندسة الطيران والفضاء.

ثالثًا: الأكاديميات الخاصة للطيران

ومن مميزات دراسة الطيران في مصو وجود عدد من الأكاديميات الخاصة زي سكاي للطيران، وأتيس، والنيل، وغيرهم اللي بيقدموا برامج تدريب متخصصة بتناسب اللي عايز يختصر الوقت ويركّز على التدريب العملي.

والشروط في الغالب بتشمل:

• الحصول على شهادة الثانوية العامة أو ما يعادلها.
• اجتياز اختبار اللغة الإنجليزية.
• النجاح في اختبار القبول.

اتعرف على: عيوب الكلية الجوية بين الواقع والمتطلبات.. هل هي فعلاََ عيوب؟ 

أهم منظمات الطيران العالمية

دراسة الطيران في مصر بتتطلب منك معرفة معلومات مهمة؛ عشان تكون الصورة أوضح، زي أهم الجهات اللي بتنظم وتمنح رخص الطيران في العالم:

1. هيئة الطيران المدني (CAA)

ودي الجهة المسؤولة عن تنظيم ومراقبة كل ما يخص الطيران المدني داخل كل دولة.

كل بلد ليها سلطة طيران خاصة بيها، حتى الدول الأوروبية رغم إنها تابعة للـ EASA، إلا إن كل واحدة عندها هيئة وطنية مستقلة.

2. المنظمة الدولية للطيران المدني (ICAO)

المنظمة دي تابعة للأمم المتحدة، واتأسست سنة 1947، ومقرها في مدينة مونتريال الكندية.

 مهمتها الأساسية تنظيم الملاحة الجوية بين الدول، وضمان سلامة وأمان الرحلات الجوية،

 وكمان بتضع القواعد اللي بيُستند عليها في التحقيقات الجوية والتشغيل الدولي للطيران.

3. الوكالة الأوروبية لسلامة الطيران (EASA)

هي وكالة تابعة للاتحاد الأوروبي، مقرها في كولون، ألمانيا، واتأسست سنة 2002.

 الوكالة دي بتتولى مسؤوليات مهمة جدًا زي:

• تنظيم تراخيص العاملين في المجال الجوي الأوروبي.
• اعتماد شهادات الطائرات ومكوناتها.
• فحص السلامة الجوية.

4. إدارة الطيران الفيدرالية الأمريكية (FAA)

تابعة لوزارة النقل الأمريكية، وهي المسؤولة عن الإشراف على كل جوانب الطيران المدني داخل الولايات المتحدة. اتأسست سنة 1958، وكانت في الأول اسمها “الوكالة الاتحادية للطيران”، قبل ما يتم تعديل الاسم سنة 1967.

أنواع رخص الطيران حول العالم

قبل ما تبدأ رحلة دراسة الطيران في مصر، لازم تعرف إن في أكتر من نوع من الرخص اللي ممكن تحصل عليها، ودي بتختلف حسب الجهة اللي بتنظمها.

1. رخصة EASA (الوكالة الأوروبية لسلامة الطيران)

دي تعد أقوى وأغلى رخصة طيران في العالم، لأنها معتمدة من الاتحاد الأوروبي. وبتحتاج فترة دراسة أطول (من 18 لـ 36 شهر)، والتركيز فيها بيكون على الجانب النظري بشكل كبير.

ودي هتكوو مناسبة للعمل في أوروبا أو في شركات طيران بتطلب الرخصة الأوروبية، دي هتكون خيارك الأفضل.

2. رخصة FAA (إدارة الطيران الفيدرالية الأمريكية)

دي رخصة الطيران الأمريكية، وسهل الحصول عليها مقارنة بالرخص الأوروبية. ومدة الدراسة بتتراوح من 9 لـ 12 شهر، وبتديك الحق تشتغل في أمريكا، لكن لو حابب تشتغل في بلد تانية، ممكن تحتاج تعمل معادلة بسيطة حسب قوانين الدولة.

3. رخصة ICAO (منظمة الطيران المدني الدولي)

ودي الرخصة اللي بتعتمدها أغلب الدول حول العالم، ومن ضمنها مصر وجنوب أفريقيا.

ومدة الدراسة فيها بتختلف حسب البلد وقدرة الطالب على استيعاب التدريب العملي والنظري.

4. أشهر أنواع الرخص

• SPL) Student Pilot License): رخصة الطالب لبدء التدريب.

• PPL) Private Pilot License) : طيار خاص (طيار فردي/هواة).

• CPL) Commercial Pilot License): طيار تجاري (مؤهل للعمل في شركات).

• IR) Instrument Rating): أهلية الطيران بالعدادات.

• MER) Multi-Engine Rating): رخصة المحركات المتعددة.

• ATPL) Airline Transport Pilot Licence): أعلى رخصة (تؤهل لتولي منصب قائد طائرة نقل جوي) تتطلب عدد ساعات طيران كبيرًا وشروطًا إضافية.

المتطلبات الطبية والنفسية لدراسة الطيران في مصر

من أهم شروط القبول في دراسة الطيران في مصر إن الطالب يجتاز فحص طبي ونفسي شامل، لأن مهنة الطيران بتحتاج تركيز عالي ولياقة بدنية ونفسية ممتازة.

وده بيتم من خلال جهات طبية معتمدة من سلطة الطيران المدني، علشان تضمن إن كل المتقدمين قادرين فعلاً على ممارسة المهنة بأمان.

المتطلبات الطبية

• فحص طبي شامل: لازم الطالب يعمل كشف شامل في مركز معتمد من سلطة الطيران المدني.
• فحص النظر والسمع: علشان يتأكدوا إن الرؤية والسمع في مستوى يسمح بالتحكم الدقيق أثناء الطيران.
• اختبار الاتزان: لتقييم قدرة الطالب على الحفاظ على توازنه في المواقف الصعبة أو التغيرات المفاجئة.
• فحص القلب والجهاز التنفسي: للتأكد إن الجسم بيقدر يتحمل الضغط الجوي ومجهود الطيران.
• اللياقة البدنية: قياس الوزن والطول، والتأكد من عدم وجود إصابات تمنع الطالب من مزاولة المهنة.

المتطلبات النفسية

• الصحة النفسية والعصبية: بيتم عمل تقييم نفسي للطالب علشان يتأكدوا إنه قادر يتعامل بهدوء واتزان في المواقف المختلفة.
• القدرة على تحمل الضغط: لازم الطالب يكون عنده سرعة بديهة وقدرة على اتخاذ قرارات دقيقة وسريعة في أي ظرف.

 متطلبات إضافية

• تقرير طبي معتمد: لازم التقرير يكون حديث ومصدق من جهة طبية معتمدة، وكمان بيتجدد كل فترة أثناء الدراسة.
• اختبارات الذكاء والقدرات: بعض الأكاديميات بتطلب كمان اختبارات ذهنية أو مهارية علشان تقيس مدى استعداد الطالب للمجال.

أهم التفاصيل عن أكاديمية مصر لعلوم الطيران

من أهم وجهات دراسة الطيران في مصر، والكلية المصرية للطيران تعتبر من أهم وأعرق الأماكن اللي ممكن تحقق لك الحلم ده، لأنها المكان الوحيد في مصر المعتمد رسميًا من سلطة الطيران المدني المصري.

واللي بيميزها إنها تابعة لوزارة الطيران المدني المصري، وبتعتبر من الشركات الحكومية، مش قطاع خاص، ودي نقطة بتميزها عن أي أكاديمية تانية.

الرخص

الطالب بعد ما يخلص دراسته بياخد 3 رخص معترف بيهم دوليًا، وهما:

• رخصة طيار خاص (PPL).
• رخصة طيران بالعدادات (IR).
• رخصة طيار تجاري (CPL).

ودي كلها معتمدة من المنظمة الدولية للطيران المدني (ICAO)، وده بيدي للخريج فرصة يشتغل في مصر أو بره بسهولة.

نظام الدراسة

كل الدراسة سواء النظرية أو العملية بتكون داخل مصر بالكامل، والتدريب العملي بيتم في 3 مطارات:

• مطار أكتوبر
• مطار الطور
• مطار أسيوط

وبيتم التدريب على طائرات حديثة متعددة المحركات على إيد مدربين معتمدين وخبراء في المجال.

التقديم متاح لمين؟

1- حابب يتعلم الطيران كهواية بس، يقدر يدرس رخصة الطيار الخاص (PPL) من غير ما يكمل باقي الرخص.

2- طالب شغال أو عنده دراسة تانية، الأكاديمية عاملة أكتر من نظام دراسي يناسب وقته وظروفه.

3- متاح التقديم لكل الجنسيات، يعني ممكن المصريين وغير المصريين يقدموا.

4- كمان الأكاديمية بتقبل البنات، مش مقتصرة على الذكور فقط.

مميزات الدراسة

• خصم 50% على دورة الـ Type Rating لطائرة Airbus A320 بالتعاون مع أكاديمية مصر للطيران للتدريب لعام 2025.
• الالتحاق بالأكاديمية مش بس تعليم نظري، لكن فيه مميزات قوية جدًا بتفرقها عن أي جهة تانية.
• شهادة معتمدة من المجلس الأعلى للجامعات تعادل المؤهل العالي.
• الطالب بيُعفى من رسوم معادلة الرخصة بعد التخرج.
• تدريب عملي على طائرات حديثة ومتطورة.

البرامج الدراسية المتاحة

الأكاديمية المصرية لعلوم الطيران بتقدّم برنامجين أساسيين:

1. البرنامج المنتظم (ECAR 141): مدته من 14 لـ 18 شهر متواصل، وده مناسب للطلبة المتفرغين تمامًا.
2. البرنامج الحر (ECAR 61): الطالب بيدرس كل مرحلة على حدة حسب وقته وإمكانياته.

عدد ساعات الطيران بيختلف حسب البرنامج:

• برنامج ECAR 141: 190 ساعة طيران.
• برنامج ECAR 61: 250 ساعة طيران.

المصروفات ونظام السداد

الأكاديمية بتوفر نظام مريح لتقسيط المصروفات على 4 دفعات، وده بيسهّل كتير على الطلاب.

مواعيد التقديم والدراسة

التسجيل في الأكاديمية مفتوح طول السنة، وبتبدأ الدراسة حسب الجدول الدراسي الداخلي لكل برنامج.

شروط التقديم والقبول

علشان تقدم في الكلية المصرية للطيران، لازم:

• اجتياز اختبارات القبول اللي بتشمل الكشف الطبي، المقابلة الشخصية، اختبار اللغة الإنجليزية، واختبار الحاسب الآلي.
• تكون حاصل على الثانوية العامة أو ما يعادلها (الدبلومة الأمريكية أو الـ IG).
• يكون سنك مش أقل من 17 سنة.

الكشف الطبي بيتم في المجلس الطبي الجوي بوزارة الطيران المدني، وهو الجهة الوحيدة المسؤولة عن تحديد المعايير المطلوبة للطول والوزن.

تفاصيل لسهولة الوصول

• الأكاديمية شغالة يوميًا من 8:30 صباحًا لحد 2:30 ظهرًا، ما عدا الجمعة والسبت.
• العنوان: مطار أكتوبر – طريق الواحات – السادس من أكتوبر – الجيزة.
• للتواصل: 01008295527 – 01022271280 – 01022271281
• البريد الإلكتروني: eaa_marketing@eaaegypt.com

معلومات عن أكاديمية أتيس للطيران الخاصة

ومن أهم الوجهات لدراسة الطيران في مصر “الأكاديميات الخاصة”، وأكاديمية أتيس للطيران تعتبر واحدة من الأكاديميات المميزة في مصر لدراسة الطيران المدني والتجاري، وبتقدّم برامج تدريب معتمدة ومعترف بيها دوليًا.

الأكاديمية بدأت نشاطها سنة 2010، وقدرت خلال السنوات الأخيرة تكون اسم معروف بين الأكاديميات اللي بتأهّل الطيارين على أعلى مستوى، وده بفضل اعتمادها الرسمي من هيئات الطيران في مصر وجنوب أفريقيا.

معلومات عن الأكاديمية

• سنة التأسيس: بدأت الأكاديمية عملها في مصر سنة 2010.
• الاعتماد: معتمدة من الهيئة العامة للاستثمار في مصر، ومسجّلة رسميًا في جنوب أفريقيا، وبتتعاون مع هيئات طيران دولية معروفة.
• المقر: عندها فروع ومراكز تدريب في مصر، وجنوب أفريقيا، والإمارات.
• العنوان: مبنى 8 و، بجوار المنطقة التكنولوجية، أمام نادي الاتصالات – المعادي الجديدة، القاهرة.

البرامج التدريبية

أكاديمية أتيس للطيران بتقدّم برامج تدريب شاملة بتغطي كل مراحل دراسة الطيران، من أول:

• رخصة الطيار التجاري (CPL) وتأهيل العدادات الجوية.
• رخصة الطيار الخاص (PPL).

الطلاب بيتدربوا على أجهزة محاكاة حديثة بتساعدهم يعيشوا تجربة الطيران الحقيقي قبل ما يطلعوا فعلاً للطيران العملي، وكمان بتوفّر الأكاديمية تدريب عملي في جنوب أفريقيا بيشمل الطيران الليلي لتأهيل الطيارين بشكل احترافي.

مميزات أكاديمية أتيس للطيران

• تدريب عملي في جنوب أفريقيا ضمن بيئة جوية مناسبة للتدريب طول السنة.
• أجهزة محاكاة حديثة جدًا بتوفّر تجربة واقعية للتدريب.
• برامج تدريب مرنة ومصممة حسب احتياجات الطالب.
• إمكانية تعلم اللغة الإنجليزية ضمن فترة الدراسة.
• بيئة تعليمية مريحة وبنية تحتية متطورة.

شروط القبول

علشان تتقدّم لأكاديمية أتيس للطيران لازم:

• الحصول على الثانوية العامة أو مؤهل جامعي معادل.
• اجتياز الكشف الطبي الخاص بسلطة الطيران المدني.
• العمر يكون بين 18 و32 سنة.

أكاديمية سكاي للطيران

أكاديمية سكاي للطيران من الأكاديميات الخاصة المعروفة في مصر، وبتقدّم برامج تدريب معتمدة للحصول على رخصة الطيار الخاص (PPL) والطيار التجاري (CPL).

مدة الدراسة بتتراوح ما بين 12 لـ16 شهر حسب نظام التدريب وعدد ساعات الطيران، وبيتم التدريب العملي في مطار أكتوبر باستخدام طائرات تدريب حديثة.

الأكاديمية بتوفّر بيئة تعليمية مريحة للطلاب مع مدربين ذوي خبرة، لكن رخصتها بتحتاج معادلة دولية في بعض الدول لو الطالب حابب يشتغل خارج مصر.

تكلفة الدراسة فيها بتتراوح ما بين 5000 و6000 دولار سنويًا.

تكاليف تقريبية لدراسة الطيران في مصر

1- تكلفة سنوية متوسطة في بعض الأكاديميات المحلية: تقريبًا 55,000 إلى 90,000 جنيه مصري في السنة (تختلف حسب البرنامج والخدمات).

2- تكلفة كاملة لبرنامج متكامل للوافدين: 50,000 – 60,000 دولار للبرنامج الكامل (تختلف باختلاف الأكاديمية وعدد ساعات الطيران).

3- تكاليف إضافية مهم احتسابها: رسوم التسجيل، رسوم محاكاة، تكلفة الساعة الطيرانية (Hour rate)، فحوصات طبية، تأمين صحي، إقامة، مواصلات، ورسوم إدارية.

4- هندسة الطيران (جامعات حكومية): رسوم سنوية مفترضة تختلف؛ في بعض الجامعات تكون التكلفة للطالب المصري أقل بكتير من التكلفة للطالب الأجنبي.

ملاحظة مهمة: الأرقام السابقة تقريبية؛ لازم تتواصل مباشرة مع الأكاديمية اللي ناوي تقدم فيها للحصول على عرض تكلفة مفصل (رسوم ساعات الطيران، رسوم المحاكاة، سياسات الدفع، والرسوم الإضافية).

ليه تختار دراسة الطيران في مصر؟

لإن في توازن بين جودة التدريب وتكلفة معقولة مقارنة ببريطانيا أو الولايات المتحدة. دا غير توافر أكاديميات رسمية زي (الأكاديمية المصرية لعلوم الطيران / الكلية المصرية للطيران) مع اعتماد من جهات رسمية ومحاكيات حديثة، وعدد من الأكاديميات الخاصة المعتمدة كمان.

بالإضافة إن المناخ في مصر يسمح بالتدريب على مدار السنة بدرجة أفضل من دول موسمها محدود.

والأهم هي إمكانية الحصول على رخص معترف بها دوليًّا بعد إجراءات المعادلة أو الاعتراف (زي ICAO، بعض برامج مرتبطة بمعايير EASA/FAA حسب الأكاديمية).

فرص العمل ورواتب الطيارين في مصر

وإنت بتفكر في دراسة الطيران في مصر بيكون عندك تساؤل عن رواتب الطيارين، ودي بتختلف حسب مستوى الخبرة ونوع الشركة والطائرة. والأرقام دي تقريبية مأخوذة من بيانات سوقية محلية:

• الطيار المبتدئ (Junior / First Job): تقريبًا 15,000–25,000 جنيه شهريًا (تختلف بشدة).
• الطيار ذو الخبرة المتوسطة (First Officer): تقريبًا 30,000–50,000 جنيه شهريًا.
• قائد الطائرة (Captain): يبدأ من 60,000 جنيه وقد يصل إلى 120,000 جنيه أو أكثر حسب الشركة والطائرة.

سوق العمل الدولي / الخليج: رواتب أعلى بكثير (مثال: رواتب في شركات خليجية قد تبدأ من 40,000 دولار سنويًا أو أعلى)، لذلك كثير من الطيارين المصريين ينتقلون للعمل في الخارج لزيادة الدخل.

مزايا وظيفية إضافية: بدل سفر، سكن أو بدل سكن، تغطيات صحية، تذاكر مجانية أو مخفضة، وبدلات عند العمل في وجهات بعيدة.

دراسة الطيران في مصر للوافدين

لو إنت من الطلبة العرب أو الأجانب وبتفكر تدرس طيران في مصر، فده اختيار ممتاز، لأن مصر بتقدّم تعليم بجودة عالية وتكاليف مناسبة مقارنة بدول تانية.

الأكاديميات المعتمدة زي الأكاديمية المصرية لعلوم الطيران وأكاديمية أتيس للطيران بتستقبل طلبة من دول كتير، وبتوفّر تدريب عملي على أحدث أجهزة المحاكاة والطائرات، بجانب دراسة باللغة الإنجليزية وشهادات معترف بيها دوليًا.

علشان تقدم، لازم:

• تكون حاصل على شهادة ثانوية عامة أو ما يعادلها بنسبة لا تقل عن 65%.
• يكون معاك جواز سفر ساري، وتوثّق أوراقك من السفارة المصرية.
• تجتاز الكشف الطبي والفحص النفسي.
• عمرك ما يقلش عن 17 سنة.

تكاليف دراسة الطيران في مصر للوافدين بتتراوح بين 5000 و6000 دولار سنويًا حسب الأكاديمية، وبتختلف مصروفات التدريب العملي وساعات الطيران من مكان للتاني.

كمان مصر بتسهّل جدًا استخراج تأشيرة الدراسة، والطلاب الوافدين بيلاقوا دعم كامل من الأكاديميات في السكن، التنقل، والإجراءات الإدارية.

أهم النصائح لاختيار الأكاديمية المناسبة لدراسة الطيران في مصر

بكدا تكون عرفت أهم المعلومات عن دراسة الطيران ودي أهم النصائح لتحديد الوجهة المناسبة ليك:

1- اتحقق من الاعتماد

اتأكد من اعتماد الأكاديمية عند سلطة الطيران المدني (ECAA) ومن اعتراف الشهادات دوليًا (ICAO وغيرها).

2- اسأل عن محتوى الباقة

عدد ساعات الطيران الفعلية، ساعات المحاكاة، نوع الطائرات المستخدمة، ونسبة التدريب العملي.

3- اطلب جدول تكلفة واضح

سعر الساعة الطيرانية، متى تُطلب الدفعات، وهل توجد رسوماً مخفية.

4- القي نظرة على السجل الوظيفي للخريجين

فين اشتغلوا الخريجون؟ هل في شركات محلية/دولية.

5- اسأل عن التمويل والمنح

استفسر عن وجود منح أو خطط تقسيط (بعض الأكاديميات أو جهات طرف ثالث توفر قروض أو منح جزئية).

5- جرب الزيارات الميدانية

لو تقدر تزور الأكاديمية وتشوف الطائرات والمحاكيات بنفسك؛ ده أحسن اختبار للقرار.

هل مهندس الطيران ممكن يبقى طيار؟

السؤال ده بيتكرر كتير، والإجابة باختصار: لأ، مهندس الطيران مش بيكون طيار تلقائيًا.

لإن دراسة هندسة الطيران بتركّز على تصميم وتطوير الطيارات وأنظمتها، أما الطيران نفسه فبيتعلق بقيادة وتشغيل الطيارة أثناء الرحلة، وده مجال مختلف تمامًا.

يعني المهندس دوره بيبدأ من الأرض قبل ما الطيارة تطير؛ بيهتم بالأجزاء الميكانيكية، والديناميكا الهوائية، والتصميم، أما الطيار شغله يبدأ من لحظة تشغيل الطيارة لحد الهبوط بأمان.

لكن لو مهندس الطيران حابب يكمّل طريقه ويبقى طيار، الموضوع مش مستحيل؛ بس هيحتاج يدرس كورسات إضافية وياخد رخص طيران معتمدة، زي: PPL, CPL, ATPL.

يعني مهندس الطيران ممكن يبقى طيار، بس لازم يدخل في تدريب متخصص ورحلة تأهيل جديدة مختلفة عن دراسة الهندسة.

خاتمة

دراسة الطيران في مصر خيار عملي وواقعي لو عايز تكون طيار أو تدخل مجال الطيران بشكل عام، ومفاتيح النجاح للوصول للمهنة دي؛ هي اختيار مؤسسة معتمدة، الاستعداد المالي والبدني، والتزام بالتدريب.

ومصر بتوفر مسارات مختلفة زي؛ أكاديميات حكومية، خاصة، أو هندسة طيران جامعية. كل طريق له مميزاته وشروطه، والتكلفة بيتحكم فيها عدد ساعات الطيران ونوعية البرنامج.

المهم قبل ما تاخد القرار النهائي، اجمع عروض (قوائم تكلفة مفصلة) من 2 – 3 أكاديميات، احسب إجمالي المصاريف (رسوم + سكن + معيشة + طوارئ)، واتأكد إنك متوافق مع الشروط وجاهز طبيًّا ونفسيًّا.

وافتكر إن الاستثمار في التدريب الجيد اليوم هو المدخل لراتب أعلى وفرص عمل أوسع في المستقبل.