جامعة كوفنتري مصر تعتبر من أفضل الاختيارات للطلاب اللي بيدوروا على تعليم بريطاني بجودة عالية من غير ما يسافروا برا. الفرع موجود في العاصمة الإدارية الجديدة، وبيقدّم نفس المناهج والمعايير الخاصة بجامعة كوفنتري الأم في بريطانيا، وده بيضمن شهادة قوية معترف بيها محليًا ودوليًا.
الجامعة بتركّز على الجمع بين الدراسة النظرية والتطبيق العملي، وبتوفر تخصصات مطلوبة في السوق زي الهندسة، علوم الكمبيوتر، الأمن السيبراني، وإدارة الأعمال.
في المقال ده هنعرض أهم المعلومات عن جامعة كوفنتري بمصر، التخصصات المتاحة، شروط التقديم، تنسيق الكليات والمصاريف، وطريقة الالتحاق وبرامج الدراسات العليا.
نبذة عن جامعة كوفنتري مصر
جامعة كوفنتري بمصر هي مشروع كبير بيجمع بين خبرة جامعة كوفنتري البريطانية اللي ليها تاريخ من سنة 1843، وبين رؤية حديثة للتعليم في مصر.
فرع الجامعة هنا بدأ ضمن خطة التوسع العالمي للجامعة الأم، وبالتعاون مع شركة السويدي للخدمات التعليمية وجامعات المعرفة الدولية، وده اللي بيضمن إن كل حاجة فيها ماشية على أعلى مستوى من الجودة والاعتماد.
وبدأت الجامعة استقبال الطلبة في سبتمبر 2019 في أول مرحلة من الحرم الجامعي بالعاصمة الإدارية الجديدة. واللي بيميز جامعة كوفنتري مصر إنها بتطبق نفس المناهج وطرق التدريس ومعايير التقييم اللي موجودة في بريطانيا، وبتدي نفس شهادة التخرج المعتمدة دوليًا ومحليًا.
وده معناه إن الطالب اللي بيتخرج من هنا، شهادته معترف بيها في مصر وفي أي دولة تانية، وممكن يكمل ماجستير أو دكتوراه في جامعات كبيرة بالخارج من غير أي مشكلة.
دا بالإضافة إلى إن جامعة كوفنتري الأم واخدة تصنيفات قوية عالميًا، ومنها الميدالية الذهبية في التميز التعليمي سنة 2017، وده بيعكس قد إيه الجامعة مهتمة بالجودة والتطوير. وفرع مصر ماشي على نفس النهج، خصوصًا إن مكان الجامعة في العاصمة الإدارية الجديدة بيدي الطلاب بيئة حديثة، مجهزة بتقنيات ومرافق تساعدهم على التعلم والتطبيق في نفس الوقت.
ليه جامعة كوفنتري مصر اختيار مناسب للطلاب؟
لأن الجامعة مش بس بتدي تعليم أكاديمي؛ هي بتركّز إن الطالب يكون جاهز فعليًا لسوق العمل. وده من خلال إنهم يربطوا التعليم النظري بالعملي، ويقدموا تدريبات ومشروعات تطبيقية في كل تخصص، عشان الطالب يتخرج وهو فاهم مجاله كويس ومستعد يشتغل فورًا
تخصصات جامعة كوفنتري مصر
الجامعة بتقدّم لطلابها مجموعة كبيرة من التخصصات اللي بتواكب شغل السوق في مصر وبره، وكل البرامج متصممة على نفس المعايير البريطانية اللي شغّالة بيها الجامعة الأم في إنجلترا. وده بيخلي الطالب يذاكر مناهج حديثة، بطرق تدريس متطورة، ويطلع لسوق العمل جاهز ومؤهّل.
أولًا: كلية الهندسة
كلية الهندسة تعتبر واحدة من أقوى الكليات في جامعة كوفنتري مصر، وهدفها إعداد مهندسين فاهمين، وعندهم قدرة يشتغلوا في مشاريع حقيقية. الكلية بتقدّم مجموعة تخصصات مهمة، منها:
الهندسة المدنية
بتركّز على تصميم وتنفيذ المشاريع الهندسية الكبيرة زي الطرق، الكباري، المباني، والبنية التحتية، مع الاهتمام بالاستدامة والابتكار.
الهندسة الميكانيكية
بتغطي تصميم وتشغيل الأنظمة الميكانيكية زي الروبوتات، أنظمة الطاقة، والتصنيع المتقدم.
هندسة الحاسوب
خليط بين هندسة البرمجيات والهاردوير وبتغطي تصميم الأنظمة المدمجة، الشبكات، والأنظمة الذكية.
الهندسة الكهربائية والإلكترونية
بتركّز على تطوير الأنظمة الكهربائية والإلكترونية، وموضوعات زي الطاقة المتجددة والاتصالات والتحكم.
الهندسة المعمارية
مرتبطة بتصميم المباني والمساحات العمرانية مع تركيز على الاستدامة والجوانب الجمالية والوظيفية.
هندسة الميكاترونكس
دمج بين الميكانيكا والإلكترونيات والتحكم وعلوم الكمبيوتر لإنتاج أنظمة ذكية.
الأمن السيبراني والقرصنة الأخلاقية
تخصص جديد ومطلوب جدًا، هدفه تأهيل ناس تقدر تحمي الأنظمة الرقمية من الاختراقات.
ثانيًا: كلية الحاسبات وتكنولوجيا المعلومات
الكلية دي هي قلب الابتكار في الجامعة وبتقدم برامج قوية في التكنولوجيا الرقمية:
علوم الحاسوب
فيها دراسة البرمجة، الخوارزميات، الذكاء الاصطناعي، وتطوير البرمجيات.
نظم المعلومات
بتركّز على إدارة نظم المعلومات داخل المؤسسات وربطها بأهداف البيزنس.
الأمن السيبراني
تأهيل الطلاب لحماية الشبكات والبيانات من الهجمات الإلكترونية.
تصميم الوسائط الرقمية
يشمل الرسوم المتحركة، تصميم الألعاب، وتجربة المستخدم.
ثالثًا: كلية إدارة الأعمال
الكلية دي بتجهز جيل من قادة الأعمال، ببرامج متنوعة تشمل:
إدارة الأعمال الدولية
بتركز على الإدارة في بيئة عالمية وأسواق مختلفة.
التسويق
من التسويق التقليدي للرقمي، وتحليل سلوك المستهلك.
الإدارة المالية
دراسة الأسواق، الاستثمارات، والإدارة المالية للشركات.
إدارة الأعمال في الأزياء
تخصص نادر يجمع بين الإدارة وصناعة الموضة.
تسويق المنتجات
مهتم بتطوير المنتجات وكيفية وضع استراتيجيات تسويق قوية لها.
تخصصات إضافية
علم النفس
لدراسة السلوك البشري، مناسب للمهتمين بالاستشارات النفسية والبحث العلمي.
برامج الدراسات العليا
زي الماجستير في الإدارة الهندسية وإدارة الإنشاءات.
كل برنامج في جامعة كوفنتري بمصر معمول بطريقة توازن بين النظري والتطبيق العملي. الطالب بياخد محاضرات، بيشتغل على مشاريع، وبيتدرب عمليًا، علشان يتخرج مؤهل فعلاً لسوق العمل.
شروط القبول في جامعة كوفنتري مصر
جامعة كوفنتري بتحط شروط واضحة للقبول، سواء لبرامج البكالوريوس أو الدراسات العليا. والهدف إن الطالب يكون جاهز فعلاً للتعامل مع نظام الدراسة البريطاني.
أولًا: شروط التقديم لبرامج البكالوريوس
1. شهادة الثانوية العامة المصرية أو ما يعادلها أو شهادة دولية معتمدة زي: IGCSE، الدبلومة الأمريكية، البكالوريا الدولية، وغيرها.
المهم الشهادة لازم تكون موثقة ومعتمدة بشكل رسمي.
2. الحد الأدنى للمجموع بيختلف من تخصص للتاني؛ فبنلاقي تخصصات الهندسة والحاسبات مثلًا بتحتاج درجات أعلى في الرياضيات والعلوم.
3. إثبات إتقان اللغة الإنجليزية؛ عشان الدراسة كلها بالإنجليزي، الجامعة بتطلب واحدة من الشهادات دي:
- IELTS بدرجة 6.0 على الأقل.
- TOEFL iBT بدرجة معادلة.
ولو الطالب مش محقق الدرجة المطلوبة؛ الجامعة بتوفر برامج تمهيدية للغة.
4. اختبارات القبول والمقابلات: بعض البرامج بتطلب امتحانات إضافية في الرياضيات أو التفكير النقدي، أو مقابلة شخصية مع لجنة القبول.
5. المستندات المطلوبة من الطالب :
- شهادة الثانوية الأصلية
- بيان درجات
- شهادة ميلاد
- صور شخصية
- بطاقة الهوية أو جواز السفر
ثانيًا: شروط التقديم للدراسات العليا (الماجستير)
1. شهادة بكالوريوس معتمدة: لازم تكون من جامعة معترف بيها وفي تخصص مرتبط بالبرنامج اللي هتدرسه.
2. الحد الأدنى للمعدل التراكمي: كل برنامج بيحدد الحد الأدنى للمعدل المطلوب.
3. مستوى اللغة الإنجليزية غالبًا بيكون نفس متطلبات البكالوريوس أو أعلى شوية حسب البرنامج.
4. خطاب توصية من دكتور جامعي أو مدير في الشغل لو عندك خبرة.
5. سيرة ذاتية محدثة لازم تشمل دراستك، شغلك، ودوراتك.
6. مقترح بحثي بيتقدم قبل القبول في بعض برامج الماجستير اللي فيها جزء بحثي.
7. متطلبات إضافية:
- للطلاب الدوليين: لازم يعملوا معادلة لشهاداتهم من وزارة التعليم العالي في مصر، وكمان يهتموا بإجراءات التأشيرة والإقامة.
- الخبرة العملية: بعض برامج الماجستير بتعتبر الخبرة ميزة مهمة أو شرط أساسي.
- الالتزام بالمواعيد: التقديم بيكون بمواعيد محددة، ولازم الطالب يقدم قبل الديدلاين.
التقديم في جامعة كوفنتري مصر
عملية التقديم في جامعة كوفنتري بسيطة وواضحة، ومصممة علشان تساعد الطالب يدخل على نظام تعليم بريطاني وهو في مصر. التقديم بيعدي بكذا خطوة، من التسجيل أونلاين لحد ما الطالب يستلم قبوله ويبدأ إجراءات التسجيل الفعلي. ودي خطوات التقديم خطوة بخطوة:
1. التسجيل على الموقع الإلكتروني
أول خطوة إنك تزور الموقع الرسمي لجامعة كوفنتري مصر أو بوابة التقديم الخاصة بجامعات المعرفة الدولية.
هتعمل حساب جديد، وبعدها تملى استمارة التقديم الإلكترونية بكل البيانات المطلوبة:
بيانات شخصية، تعليمية، وسائل تواصل، المهم تكون المعلومات صحيحة.
2. رفع المستندات المطلوبة
بعد ملء الطلب، هترفع صور واضحة للمستندات دي:
- صورة بطاقة الرقم القومي للمصريين أو الباسبور للطلاب الدوليين.
- سيرة ذاتية أو خطاب توصية (لو البرنامج بيطلب ده).
- شهادة IELTS أو TOEFL لو متاحة.
- شهادة الثانوية أو بيان النجاح.
- صورة شخصية حديثة.
- شهادة الميلاد.
3. دفع رسوم التقديم
التقديم بيكون برسوم بسيطة غير مستردة. الدفع بيكون أونلاين أو بالطريقة اللي الجامعة بتحددها. مش هيتم النظر في الطلب من غير دفع الرسوم.
4. مراجعة الطلب والاختبارات أو المقابلات
بعد ما الجامعة تستلم طلبك، فريق القبول بيراجعه ويتأكد إن كل الشروط الأولية متوفرة. لو اتقبلت مبدئيًا، ممكن يطلبوا منك:
- اختبار قبول في الإنجليزي أو الرياضيات أو قدرات حسب البرنامج.
- مقابلة شخصية سواء حضوري أو أونلاين.
الهدف إنهم يقيموا مستواك ويشوفوا مدى جاهزيتك للبرنامج.
5. نتيجة القبول
بعد كل الخطوات، الجامعة بتبعتلك النتيجة على الإيميل أو من خلال بوابة الطالب. لو اتقبلت، هيوصلك خطاب قبول رسمي يوضح:
- مواعيد التسجيل النهائية
- تفاصيل البرنامج
- المصاريف
6. تأكيد القبول والتسجيل النهائي
لو قررت تكمل، هتدفع أول دفعة من المصاريف علشان تحجز مكانك رسمي. بعدها هتروح الجامعة لإكمال التسجيل:
- استلام كارنيه الجامعة
- استلام الجدول الدراسي
- تسجيل المواد
نصايح تساعدك في التقديم
- لو أنت طالب دولي، ابدأ إجراءات التأشيرة أول ما توصلك رسالة القبول.
- تابع مواعيد التقديم علشان أغلب البرامج ليها Deadlines محددة.
- جهز كل الورق المطلوب بصيغة PDF أو JPG قبل ما تبدأ.
- لو عندك أي سؤال، اتواصل مع مكتب القبولة هما بيردوا بسرعة.
- لو لسه طالب ثانوية، قدم بمجرد ظهور نتيجتك.
هل جامعة كوفنتري مصر معتمدة؟
فرع جامعة كوفنتري في مصر معتمد من أكتر من جهة رسمية مهمة بتمنح شهاداتها الصلاحية والاعتراف:
- وزارة التعليم العالي والبحث العلمي في مصر.
- الجامعة الأم في بريطانيا (Coventry University UK).
- هيئة الاعتماد والجودة في مصر.
- شبكة جامعات Knowledge Hub.
اتعرف على: جامعة الدلتا للعلوم والتكنولوجيا بالمنصورة| المصاريف، شروط القبول، والبرامج الدراسية.
تفاصيل مصاريف جامعة كوفنتري مصر لعام 2026
بالنسبة لمصاريف الجامعة تبعاََ للموقع الرسمي موزعة حسب الكليات والفئات:
كلية الهندسة وعلوم الحاسب والإعلام والتصميم
- الفئة أ: حوالي 3112 جنيه إسترليني
- الفئة ب: حوالي 3337 جنيه إسترليني
- الفئة ج: حوالي 3562 جنيه إسترليني
كلية إدارة الأعمال وعلم النفس
- الفئة أ: حوالي 2557 جنيه إسترليني
- الفئة ب: حوالي 2782 جنيه إسترليني
- الفئة ج: حوالي 3007 جنيه إسترليني
كلية العلاج الطبيعي
- الفئة أ: 1918 جنيه إسترليني
- الفئة ب: 2086 جنيه إسترليني
- الفئة ج: 2255 جنيه إسترليني
المصاريف الإضافية السنوية
- رسوم خدمات غير أكاديمية: حوالي 15,000 جنيه مصرى.
- رسوم التسجيل (مرة واحدة): 1200 جنيه مصري.
- رسوم المعامل والتكنولوجيا: 15,000 جنيه مصري.
- التأمين الطبي: حوالي 2000 جنيه مصري.
- تأمين المرافق: حوالي 10,000 جنيه مصري.
ملاحظات مصاريف الدراسة تُدفع بالجنيه الإسترليني على سعر صرف البنك المركزي في يوم السداد.الجامعة تقدّم خصومات ومنح تصل لـ 40% وتسهيلات وتقسيط في الدفع.
هل تقدم جامعة كوفنتري مصر منح دراسية للطلاب؟
نعم، فرع جامعة كوفنتري في مصر بيقدم منح دراسية للطلاب المتفوقين أو للي عندهم ظروف مالية، وده ضمن دعم الجامعة للطلاب عشان يقدروا يكملوا دراستهم بدون ضغط مالي كبير.
والمنح غالبًا بتكون خصومات تصل إلى 40% على المصروفات، وبتتنوع حسب ترتيب الطالب في التقديم وعدد المنح المتاحة. كمان الجامعة بتوفر خيارات تقسيط ميسرة لفصول المصروفات، بتسمح للطلاب يدفعوا الرسوم على دفعات على مدار السنة الدراسية، مع سداد أقساط منتظمة لتسهيل تحمل المصروفات الكبيرة.
وبالنسبة لمواعيد سداد المصاريف، بتكون مصاحبة لكل فصل دراسي، يعني الطالب بيدفع مصاريف الفصل الدراسي قبل بدايته أو في بداية الأسبوع الأول من الدراسة. الجامعة عادة بتعلن مواعيد محددة للسداد عبر موقعها الإلكتروني وبالتواصل المباشر مع الطلاب.
الطلاب اللي عايزين معلومات دقيقة أكتر عن المنح والتقسيط دايمًا يقدروا يتواصلوا مع مكتب القبول أو الدعم المالي في الجامعة، واللي بيقدموا التفاصيل الكاملة والإرشادات حسب حالة كل طالب.
تنسيق الكليات بجامعة كوفنتري مصر لعام 2025 – 2026
بيختلف التنسيق حسب التخصص ومعدل الثانوية العامة. بشكل عام، دا التقريب للنسب:
- كلية الهندسة (الهندسة المدنية، الميكانيكية، الكهربائية، المعمارية، الميكاترونكس): الحد الأدنى للمجموع حوالي 85% وأعلى.
- كلية علوم الحاسب وتكنولوجيا المعلومات (نظم المعلومات، الأمن السيبراني): بتحتاج معدل في حدود 85% وأعلى، حسب التخصص.
- كلية إدارة الأعمال وعلم النفس: الحد الأدنى للمجموع بين 75% و80%.
- كلية الإعلام والتصميم: حوالي 75% إلى 80%، حسب التخصص الدقيق داخل الكلية.
- كلية العلاج الطبيعي: حوالي 80% وأعلى.الجامعة بتقبل الطلاب بناءً على نتائج الثانوية العامة، وفي بعض التخصصات ممكن يكون فيه اختبارات قبول إضافية أو مقابلات شخصية.
مواعيد التقديم السنوية لجامعة كوفنتري مصر
المواعيد النهائية لتقديم طلبات التقديم للسنة الدراسية 2025/2026 في فرع جامعة كوفنتري مصر غالباً بتبدأ في شهر يوليو وبتستمر لحد منتصف سبتمبر سنويًا. يعني التقديم بيكون خلال الصيف بعد ظهور نتيجة الثانوية، ويفضل التقديم المبكر عشان تلحق في اختبار القبول وتجهز كل الورق قبل بداية الدراسة.
الدراسة بتبدأ يوم 21 سبتمبر 2025، وأسبوع التعريف للطلبة الجدد بيكون من 14 لـ 18 سبتمبر 2025. فيه كمان فترة تسجيل متأخرة من 21 لـ 25 سبتمبر لو اتأخرت في الإجراءات، لكن الأفضل تقدم بدري عشان تضمن مكانك وتكون جاهز مع بداية السنة.
لو عندك أي استفسار ممكن تسأل على جروب كل ما يخص الجامعات الخاصة والأهلية في مصر على الفيسبوك.
هل في مواعيد مختلفة للتقديم للبكالوريوس والدراسات العليا؟
مواعيد التقديم للبكالوريوس والدراسات العليا في فرع جامعة كوفنتري مصر غالباً بتكون متقاربة، لكن في بعض التخصصات للدراسات العليا بتكون لها مواعيد خاصة أو فترة تمديد حسب البرنامج والمقابلات المطلوبة.
- برامج البكالوريوس: التقديم بيبدأ من يوليو ويستمر لحد منتصف سبتمبر، ويُنصح دايماً التقديم بدري لأن القبول بيكون بالأسبقية وفيه اختبارات ومقابلات لبعض الكليات.
- برامج الدراسات العليا: التقديم عادة بيبدأ تقريباً في نفس وقت البكالوريوس بس ساعات يبقى فيه تمديد لبعض البرامج لما بعد بدء السنة الدراسية، وده بيعتمد على نوع الماجستير أو الدبلوم.
- بعض برامج الماجستير بتسمح بقبول في فصل الربيع، وبرامج تانية بتغلق باب التقديم قبل البكالوريوس بأسابيع أو تفتح باب إضافي وقت تسجيل الطلاب الجدد.
هل توجد دورات تحضيرية أو شروط قبول منفصلة للدراسات العليا؟
نعم، فيه شروط قبول خاصة وبرامج تمهيدية لبعض تخصصات الدراسات العليا في فرع جامعة كوفنتري مصر.علشان تقدر تقدم على برامج الدراسات العليا لازم يكون معاك شهادة بكالوريوس معتمدة ومعدلك التراكمي مناسب حسب تخصصك.
في بعض البرامج لازم يكون عندك خبرة عملية أو تدريب سابق، وده بيكون ميزة إضافية لبعض الماجستير.شهادة إجادة لغة إنجليزي مطلوبة زي IELTS أو TOEFL، وفي بعض البرامج لازم درجة أعلى من البرامج العادية.
ساعات الجامعة تطلب منك رسالة دافع (Motivation Letter) وسيرة ذاتية (CV) وممكن خطاب توصية. ولو نظام دراستك مختلف أو محتاج تقوية في مادة معينة، الجامعة بتوفر أحياناً كورسات تحضيرية (Preparatory Courses) أو دورات تمهيدية في بداية برنامج الدراسات العليا، عشان الطالب يكون جاهز أكاديمياً.
الدورات التحضيرية دي بتساعدك تتأقلم مع طريقة الدراسة البريطانية وتحسن مستواك قبل بداية الكورس الأساسي. المهم تتابع صفحة كل برنامج في الجامعة لأن كل تخصص له شروط مختلفة ودورات تحضيرية حسب الحاجة.
ما هي البرامج التحضيرية المتاحة للماجستير والدكتوراه؟
البرامج التحضيرية المتاحة للماجستير والدكتوراه في جامعة كوفنتري مصر تشمل:
- برامج تحضيرية في اللغة الإنجليزية زي دورات IELTS مكثفة عشان ترفع مستوى اللغة وتهيئ الطالب لدراسة الماجستير أو الدكتوراه، خصوصاً لو اللغة الإنجليزية مش هي اللغة الأم.
- دورات تمهيدية أكاديمية في التخصصات المطلوبة، بتساعد الطالب يتعرف على أساسيات البحث العلمي والمنهجيات اللي هتواجهها في الدراسات العليا.
- برامج تحضيرية للماجستير موجودة في مجالات متعددة زي إدارة الأعمال، الهندسة، القانون، والعلوم الطبية، بهدف تجهيز الطالب أكاديمياً وعملياً لتحديات الماجستير.
- برامج تحضيرية للدكتوراه بتركز على تطوير مهارات البحث والتفكير النقدي والكتابة العلمية، بالإضافة لتدريبات متخصصة بتساعد في إنجاز رسائل الدكتوراه.
الكورسات التحضيرية دي مهمة جداً عشان الطالب يكون جاهز للنجاح في دراسته العليا، وبتتم تحت إشراف الجامعة وبمناهج مطابقة للجامعة الأم في بريطانيا.
اتعرف على: كل ما تريد معرفته عن الجامعة الألمانية بالقاهرة.
مميزات التعليم في برامج جامعة كوفنتري مصر
جامعة كوفنتري بتوفر تسهيلات وفوايد مختلفة بتعود على الطالب بفوايد كتير، ومن أبرز مميزاتها:
شهادة معترف بيها دولياً
الدراسة في فرع جامعة كوفنتري مصر بتمنحك نفس الشهادة البريطانية الأصلية، يعني بتقدر تشتغل أو تكمل دراستك بالخارج أو في مصر بدون مشاكل.
مناهج حديثة مرتبطة بسوق العمل
كل البرامج الدراسية مصممة عشان تكون عملية وحديثة، وفيها مشاريع وتدريبات عملية وورش عمل عشان الطالب يخرج جاهز لسوق العمل مش بس حفظ نظري.
تعليم تفاعلي ومتطور
الجامعة مهتمة أوي بفكرة ورش العمل والجروبات والمشاركة، وكمان بتستخدم أحدث وسائل التكنولوجيا في التدريس، وبتشجع الطلبة يشتركوا في البحث العلمي والأنشطة العملية والعروض التقديمية.
تدريب وشغل أثناء الدراسة وبعدها
في فرص تدريب صيفي مع الشركات والمؤسسات الشريكة للجامعة في نفس التخصص، وده بيسهل جداً على الطالب يدور على شغل وقت التخرج ويفهم إزاي السوق شغال.
دعم أكاديمي وشخصي قوي
كل طالب ليه Academic Advisor بيكون معاه خطوة بخطوة وبيتابعه وبيساعده في العقبات الدراسية أو الشخصية، وده بيخلي نسبة نجاح الطلبة أعلى ومستواهم أحسن.
تنوع التخصصات وتوافر البرامج الجديدة
في تخصصات نادرة ومش هتلاقيها في حتت تانية بتجمع ما بين التكنولوجيا، الفن، إدارة الأعمال، الهندسة والشغل الإبداعي.
حرم جامعي حديث وخدمات كاملة
الجامعة فيها معامل وورش ومكتبات وأماكن للمذاكرة ومناطق للراحة عشان توفر للطلبة تجربة جامعية متكاملة وحديثة.
خاتمة
لو بتفكر تدخل جامعة كوفنتري مصر، دي فرصتك تبدأ رحلة تعليمية هتفتح لك أبواب كتيرة في مستقبلك المهني والعلمي. الجامعة مش بس بتقدم شهادة معترف بها محليًا ودوليًا، لكن كمان بتوفر بيئة تعليمية حديثة ومتطورة بتجمع بين الدراسة العملية والنظرية.
ودا بجانب العروض والمنح والتقسيط اللي بتقدمها الجامعة بتساعدك تركز على دراستك بدون ضغط مادي، والبرامج متنوعة بتناسب طموحاتك.
ما تضيعش وقت، استغل الفرصة وابدأ خطوة التقديم فورًا لتكون جزء من جيل المستقبل وتحقق أحلامك وتضع قدمك على أول طريق النجاح.
أضف تعليق