لما تيجي تختار لطفلك نوع التعليم المناسب، هتلاقي إن التعليم الأزهري الابتدائي من الاختيارات اللي بتلفت نظر كتير من الأهالي، خصوصًا لو بيدوروا على بيئة تعليمية تجمع بين العلوم الدراسية والناحية الدينية.
وأكيد دايمًا فيه سؤال بييجي في بالك: “إيه الفرق بين التعليم الأزهري والتعليم العام؟” وهل الطفل هيلاقي نفس الفرص بعد كدا؟
والإجابة؛ إن فيه فروق واضحة بين التعليم العام والتعليم الأزهري سواء في المواد اللي بيتعلمها الطالب أو في طبيعة المكان نفسه. كل نظام ليه المناهج بتاعته ومميزاته وتحدياته، وعلشان كدا مهم كل ولي أمر يكون فاهم الفرق بينهم قبل ما يختار الطريق المناسب لأولاده.
في المقال دا هنتعرف على الفرق بين النظامين، وإيه المميزات اللي ممكن تخلّي التعليم الابتدائي الأزهري هو الأنسب لطفلك.
ما هو التعليم الأزهري الابتدائي؟
هو جزء من التعليم قبل الجامعي تحت رعاية الأزهر الشريف، وبيشمل الصفوف من الأول حتى السادس الإبتدائي. بيدرس الطلاب في المرحلة دي مواد التعليم العام بالإضافة لمواد دراسية خاصة بالتعليم الأزهري زي القرآن الكريم كمادة منفصلة.
وبيكون التعليم الأزهري الابتدائي وباقي المراحل سواء الإعدادية أو الثانوية في المعاهد الأزهرية فقط.
وبتتوفر المعاهد الأزهرية بأنواعها:
- المعاهد العادية اللي بتدرس المناهج باللغة العربية.
- المعاهد النموذجية اللي بتدرس بعض المناهج باللغة الإنجليزية.
- المعاهد الخاصة.
ويشترط للقبول في التعليم الأزهري الابتدائي أن يكون الطفل تم الـ 6 سنوات في الأول من أكتوبر من العام الدراسي، وبيكون التقديم إلكتروني من خلال بوابة الأزهر الإلكترونية.
الفرق بين التعليم الأزهري والتعليم العام
التعليم الأزهري والتعليم العام هما نظامين تعليميين مختلفين في مصر. التعليم العام هو النظام التعليمي الحكومي اللي بيشمل المراحل الابتدائية والإعدادية والثانوية والجامعية، وبيركز على المواد الدراسية المقررة من جهة وزارة التربية والتعليم والتعليم العالي.
أما التعليم الأزهري فهو نظام تعليمي ديني يتبع الأزهر الشريف، وبيركز على العلوم الشرعية بجانب المواد الدراسية العامة، وبيهدف لتخريج علماء متخصصين في الشريعة الإسلامية.
فنقدر نقسم الاختلافات الرئيسية بينهم لـ:
المنهج الدراسي
التعليم الأزهري بيركز على المواد الشرعية زي: (الفقه، التفسير، الحديث، التوحيد)، بالإضافة للمواد الدراسية العامة، لكن التعليم العام بيركز على المواد الدراسية المقررة من جهة وزارة التربية والتعليم ووزارة التعليم العالي بالنسبة للتعليم الجامعي.
فبيكون الزيادة في التعليم الأزهري الابتدائي مثلاً هي مادة القرآن الكريم فقط، وكل ما بتزيد المرحلة بتزيد المواد الدينية أكتر، والمواد دي بتكون داخل المجموع مش مواد فرعية، ففي المرحلة الإعدادية الطالب بيبدأ يدرس مواد زي:
- المطالعة والنصوص
- الحديث الشريف
- السيرة النبوية
- تفسير القرآن
- علم التوحيد
- الصرف
- الفقه
- النحو
أما المعاهد الأزهرية النموذجية فبتدرس اللغة الإنجليزية بمستوى رفيع مع تدريس العلوم والرياضيات باللغة العربية، في حين إن المعاهد الأزهرية الخاصة بتدرس مادة العلوم ومادة الرياضيات باللغة الإنجليزية.
دا بالإضافة إن المعاهد الأزهرية مش بتدرس مادة التربية الموسيقية.
ومن الجميل في التعليم الأزهري الابتدائي إن القرآن الكريم بيتعامل كـ مادة مستقلة، والطالب بيبدأ يحفظ من بدري، لحد ما يوصل لـ 18 جزء في المرحلة دي.
التركيز
التعليم العام بيركز على إعداد الطلاب لمختلف التخصصات في التعليم العالي والمجالات الوظيفية المختلفة، أما التعليم الأزهري بيركز على إعداد الطلاب للدراسات الشرعية والعلوم الإسلامية.
والهدف من وجود مادة القرآن الكريم في التعليم الأزهري الابتدائي بجانب مواد التعليم العام؛ تعزيز الجانب الديني والشرعي للطلاب.
أما بالنسبة لباقي المراحل التعليمية في التعليم الأزهري (الإعدادية والثانوية)، تنقسم المواد لـ 3 مجموعات رئيسية:
- المواد الشرعية (المكون الشرعي).
- مواد اللغة العربية (المكون اللغوي).
- المواد الثقافية (المكون الثقافي).
يعني إجمالاً طالب الأزهر بيدرس جميع المواد اللي بيدرسها زميله في التعليم العام من غير حذف، بالإضافة للمواد الشرعية والعلوم العربية.
الجهات المسؤولة
زي ما ذكرنا التعليم الأزهري الابتدائي وباقي المراحل التعليمية تابعة للأزهر الشريف، دا غير إن مفيش مديرية تعليمية في التعليم الأزهري على عكس التعليم العام، لكن فيه المنطقة الأزهرية اللي بتمثل المحافظة التابعة لها المعاهد.
والمعاهد الأزهرية بتعتمد على مجلس آباء الطلاب مش مجلس الأمناء.
الامتحانات والشهادات
نظام الامتحانات في التعليم الأزهري الابتدائي والإعدادي بنظام الفصلين الدراسيين، أما في الشهادة الثانوية الأزهرية، فبيؤدي الطالب الامتحان بنظام العام الدراسي الكامل، ودا مشابه للتعليم العام.
والاختلاف بيكون في مسمى الشهادات في التعليم الأزهري عن التعليم العام. فبنلاقي إن طلاب التعليم الأزهري بيحصلوا على الشهادة الثانوية الأزهرية، أما طلاب التعليم العام بيحصلوا على شهادة الثانوية العامة.
القبول في الجامعات
يختلف تنسيق القبول في الجامعات بين التعليم الأزهري والتعليم العام. ويتاح لطلاب الثانوية الأزهرية الالتحاق بكليات جامعة الأزهر، وكمان يقدروا يلتحقوا بكليات تانية في الجامعات الحكومية بعد إجراء معادلة للشهادة.
البيئة التعليمية
التعليم الأزهري بيكون محافظ أكتر، مع التركيز على القيم والأخلاق الإسلامية، أما التعليم العام بيكون متنوع أكتر في بيئته التعليمية.
طبيعة المدارس
- المدارس الأزهرية مفصولة، يعني الولاد لوحدهم والبنات لوحدهم.
- المدارس العامة، فالنسبة الأكبر بتكون مختلطة.
والاختلافات دي بتساعد كل أسرة تختار الأنسب لطفلها حسب القيم اللي حابة تربيه عليها ونمط التعليم اللي شايفاه مناسب ليه.
مميزات وعيوب التعليم الأزهري والتعليم العام
لما نقارن بين التعليم الأزهري الابتدائي والتعليم العام، هنلاقي إن كل نظام له مميزاته وعيوبه. والفرق دا بيساعد ولي الأمر إنه يختار الأفضل لابنه أو بنته حسب احتياجاتهم وطريقة تفكيرهم.
مميزات التعليم الأزهري الابتدائي وباقي المراحل
التعليم الأزهري نوع مفضل لأهالي كتير لإنه بيحقق غرض تقوية أطفالهم دينيًا من سن صغير، ومن أهم مميزاته:
المواد الدينية
يتيح للطلاب فرصة التعمق في العلوم الشرعية وفهم الإسلام بشكل أفضل.
دا بالإضافة لتحفيظ القرآن وتفسيره؛ فبنلاقي الأطفال في الأزهر بيبدأوا يحفظوا القرآن من صغرهم، ودا بيساعدهم على فهمه بشكل أفضل.
البيئة المحافظة
بعض الأهالي بيفضلوا البيئة المحافظة اللي بيوفرها التعليم الأزهري الابتدائي عن التعليم العام وبالتالي الطفل بيكبر وبيتعود على النظام دا.
ودا بيكون من خلال عدم الاختلاط بين الولاد والبنات.
التركيز على القيم والأخلاق
بيساهم التعليم الأزهري في غرس القيم والأخلاق الإسلامية في نفوس الطلاب.
مصاريف أقل
في بعض الأوقات بتكون مصاريف التعليم الأزهري أقل من التعليم العام.
التواجد في مختلف المدن
المعاهد الأزهرية موجودة في كل مكان سواء في المدن أو القرى، تقدر تلاقي معهد أزهري قريب منك.
وكمان مش محتاج شروط صعبة علشان تقدم لابنك في الأزهر، بالعكس التقديم سهل ومتاح لأي طالب.
مميزات التعليم العام
بتظهر مميزات التعليم العام في نقاط كتير أهمها:
تنوع التخصصات
يتيح التعليم العام للطلاب فرصة اختيار مجموعة واسعة من التخصصات في التعليم العالي.
المنافسة في سوق العمل
في الغالب بيكون خريجي التعليم العام عندهم قدرة أكبر على المنافسة في سوق العمل.
المرونة في الاختيار
يمنح الطلاب مرونة أكبر في اختيار مسارهم التعليمي والوظيفي.
التكلفة بسيطة
التعليم العام متوفر لكل الأطفال برسوم رمزية جدًا أو بدون مصروفات خالص، ودا بيخليها في متناول أي أسرة مهما كان دخلها.
والتقديم سهل مش بتطلب شروط معينة، أي طفل في السن المناسب يقدر يقدم ويتقبل بسهولة.
المدارس متاحة في كل مكان
بيتفوق التعليم العام عن التعليم الأزهري الابتدائي وباقي المراحل إنه منتشر في كل المدن والقرى بشكل أكبر وعدد أكبر من المعاهد الأزهرية؛ فـ مش هتتعب عشان تدور على مدرسة قريبة.
عدد المواد أقل
المنهج في التعليم العام أخف شوية من التعليم الأزهري، ودا بيخلي الطفل يقدر يركز بسهولة ومينساش بسرعة.
وبعد ما ذكرنا مميزات كل من التعليم العام والأزهري هنذكر العيوب لكل نوع فيهم عشان تكون الصورة كاملة وتاخد القرار الأصح لابنك.
عيوب التعليم الأزهري
عيوب التعليم الأزهري بتختلف من وجهة نظر شخص للتاني، لكن دي أهم النقاط اللي بتظهر كعيوب للغالب:
قلة عدد المعاهد بالنسبة للمدارس العامة
صحيح موجودة في معظم المناطق، بس عددها مش كبير أوي، ودا بيخلي بعض الأهالي يضطروا يبعتوا أولادهم لمسافة بعيدة شوية.
كثرة المواد
من أوضح الفروق بين التعليم الأزهري والتعليم العام إن المناهج الأزهرية فيها مواد شرعية زيادة، زي الفقه والتفسير، ودا بيزود الحمل على الطفل.
قلة الجامعات الأزهرية
بعد المرحلة الثانوية، الطالب هيلاقي اختيارات أقل شوية في الكليات الأزهرية، لأنها مش متنوعة زي كليات التعليم العام.
عيوب التعليم العام
كمان التعليم العام ليه شوية عيوب، مهم نعرفها زي ما عرفنا مميزاته، ودا بيساعد الأهالي يقارنوا بينه وبين التعليم الأزهري الابتدائي بشكل أوضح:
عدم ثبات جودة التعليم
في مدارس كتير بتعاني من قلة الموارد، ودا بيأثر على مستوى التدريس والمتابعة.
تزاحم الفصول
عدد الطلاب الكبير في الفصول ممكن يأثر على تركيز الطالب واستيعابه.
قلة الدعم
ضعف الإمكانيات وعدم كفاية الميزانية الحكومية بيخلّي المدارس العامة أحيانًا مش قادرة تواكب التطور أو توفر وسائل تعليم حديثة.
جهود الدولة لتحسين التعليم الأزهري
بدأت وزارة التربية والتعليم في وضع خطة استراتيجية للتعليم قبل الجامعي بالأزهر الشريف 2022 – 2030، وهي خطة شاملة بتغطي كل الجوانب العلمية والإدارية بهدف رفع جودة وفاعلية التعليم الأزهري.
وبتركز الخطة بشكل خاص على تطوير التعليم الأزهري الابتدائي ومرحلة رياض الأطفال لضمان تأسيس قوي للطلاب من البداية، وتحقيق تطور مستدام في منظومة التعليم داخل الأزهر.
ومن أهم أهداف الاستراتيجية:
- توفير فرص تعليمية ودعم شامل للتلاميذ ذوي الاحتياجات الخاصة في جميع معاهد التعليم الأزهري مع تقديم التوعية والدعم لأسرهم لضمان استمرارية ونجاح العملية التعليمية.
- الاستيعاب الكامل لجميع الأطفال الراغبين في الالتحاق بالتعليم الابتدائي الأزهري في جميع المحافظات.
- تطوير وتحسين نظام الاختبارات وطرق التقويم لضمان تقييم دقيق وعادل لمستوى الطلاب.
- تقديم برامج تعليمية مخصصة للفئات الخاصة زي الموهوبين وأطفال صعوبات التعلم.
- ترشيد تكلفة طباعة الكتب وتحسين نظام تسليمها للمعاهد لضمان وصولها بفعالية.
- توفير الكوادر التعليمية المؤهلة من معلمين وأخصائيين في جميع الفصول الدراسية.
- تقديم الدعم اللازم للتلاميذ من الأسر محدودة الدخل لضمان استمرارهم في التعليم.
- تحسين التغذية المدرسية والرعاية الصحية بشكل يتناسب مع احتياجات التلاميذ.
- خفض كثافات الفصول في المناطق اللي فيها الكثافة عالية لتحسين بيئة التعلم.
- زيادة استقلالية المعاهد من خلال تطبيق نظام الإدارة المتمركزة حول المعهد.
- تطبيق التدخل الوقائي لتقليل غياب التلاميذ والتسرب والانقطاع عن المعاهد.
- توفير عدد كافي من الفصول الدراسية في جميع المعاهد والمناطق الأزهرية.
- زيادة استخدام التكنولوجيا في العملية التعليمية لتعزيز التعلم والابتكار.
- الارتقاء بمنظومة التوجيه والإشراف في مرحلة التعليم الأزهري الابتدائي.
- رفع مستوى الخدمات الصحية والتعليمية في مرحلة التعليم الابتدائي.
- تحقيق نقلة نوعية في مصادر التعلم البديلة لتعزيز تجربة التعليم.
- رفع كفاءة المناهج ومراجعتها وتنقيحها لتواكب التطورات.
- تنفيذ آليات لزيادة التمويل لدعم وتطوير المعاهد الأزهرية.
- بناء نظام متكامل لإدارة المعلومات التربوية.
اتعرف على: أشهر أماكن المعاهد الأزهرية النموذجية في مصر.
في النهاية، التعليم الأزهري الابتدائي بيقدم مزيج من المواد العلمية والشرعية، ودا بيساعد في بناء شخصية متوازنة للطفل من بداية رحلته التعليمية، وبالتالي دا بيحققله التوازن لباقي المراحل؛ لكن القرار بيرجع ليك كـ ولي أمر حسب احتياجات ابنك وتطلعاتك لمستقبله سواء اخترت التعليم الأزهري أو العام، الأهم إنك تكون متابع ومشارك في رحلة تعليم ابنك.
أضف تعليق