أهم 9 معلومات عن امتحان ACT

أهم 8 معلومات عن امتحان Act

الاختبارات النهائية اللي بتُطبق في المدارس الثانوية، وبتشرف عليها وزارة التربية والتعليم في مصر؛ ما بتكونش كافية لوحدها إنها تبين مدى استعداد الطالب لاستكمال دراسته في الجامعات الخارجية، هي بس بتتيح له فرصة الالتحاق بالجامعات المصرية.

بالتالي بنلاقي إن الطالب اللي حابب يكمل دراسته الجامعية برا مصر لازم يدخل امتحان تأهيلي معين زي امتحان ACT، أو الـ SAT الأمريكي قبل ما يقدم في الجامعة.

شهادة امتحان ACT مطلوبة أكثر من شهادة الـ SAT في الجامعات التركية، وكمان بتطلبها بعض الجامعات في أمريكا، وبنلاحظ إن الامتحان دا بيتميز عن امتحان الـ SAT في أكثر من نقطة زي إن اجتيازه بيكون أسهل، والتحضير له كمان بيكون أبسط.

عشان كدا هنتكلم عنه في المقال دا بالتفصيل، ونعرض أهم المعلومات اللي بيحتاجها الطالب قبل دخول الامتحان.

1- ما هو امتحان ACT؟

امتحان ACT هو اختبار الجامعات الأمريكية –American College Test-، ودا امتحان إلكتروني منافس لامتحان الـ SAT الأمريكي، بيختبر الطلبة في الأجزاء اللي درسوها قبل كده، وبيأهلهم للالتحاق بعدد كبير من الجامعات الأمريكية، وبعض الجامعات التانية حول العالم.

الامتحان بيختبر كذا مهارة عند الطالب، وبيشمل العديد من الأقسام اللي بتبين فعلًا مدى استيعابه للمعلومات اللي درسها في السنوات الأخيرة، وإزاي بيقدر يستغل المعلومات دي فإنه يوصل للحل الصحيح للسؤال خلال وقت محدود جدًا أثناء الامتحان.

امتحان ACT بيكون باللغة الانجليزية فقط، والهيئة المسؤولة عن الامتحان هي هيئة ACT، ودي منظمة غير ربحية بتشرف بشكل كامل على إجراؤه سواء في مصر، أو في أي دولة تانية.

بعض الطلبة وأولياء الأمور بيسألوا عن الشروط المطلوبة للتسجيل في امتحان ACT، وهنوصل لإجابة السؤال دا حالًا.

2- هل توجد شروط للتسجيل في امتحان ACT؟

امتحان ACT ما بيكونش ليه شروط محددة للتسجيل، يعني أي طالب حابب يكمل دراسته الجامعية في أي جامعة خارجية حول العالم بتطلب الامتحان دا، يقدر يسجل فيه، ويدخله بسهولة، وفي حالة اجتيازه الامتحان بيحصل على شهادة معتمدة دوليًا.

الامتحان في الأصل موجه لطلبة الدبلومة الأمريكية، والطلبة دي في الغالب بتكون متقنة للغة الانجليزية؛ لإن دي اللغة اللي بيدرسوا بيها المناهج كل سنة، فبالتالي لغة امتحان ACT بتكون سهلة بالنسبة لهم، أما طلبة المدارس الرسمية فالأمر ممكن يكون صعب عليهم.

عشان كدا يفضل إن الطالب اللي بيسجل في امتحان ACT يكون متقن اللغة الانجليزية؛ عشان يقدر يستوعب أسئلة الامتحان كويس، وبالتالي يوصل لحلها بسهولة، ولكن دا مش شرط من شروط التسجيل فيه.

3- ما أقسام امتحان ACT؟

أقسام امتحان ACT

امتحان ACT بيتكون من 4 أجزاء رئيسة بالإضافة إلى جزء اختياري، والأجزاء دي بتختلف عن امتحان الـ SAT الأمريكي، وهي كالآتى:

اللغة الانجليزية

قسم اللغة الانجليزية هو أول قسم في امتحان الـ ACT، وبيكون عبارة عن مجموعة من النصوص، وعليهم 75 سؤال اختيار من متعدد، والأسئلة دي بتقيس مستوى الطالب في تكوين الجمل بطريقة صحيحة بدون ما يكون عنده أخطاء نحوية، أو أخطاء في الأسلوب.

المدة اللي بيمتحن فيها الطالب القسم دا من الامتحان بتكون 45 دقيقة فقط من الوقت الكلي.

الرياضيات

قسم الرياضيات بيعتبر من أهم الأقسام الموجودة في امتحان ACT؛ لإنه بيقيس سرعة البديهة عند الطالب، وبيبين مدى قدرته على التعامل مع المشكلات، وإيجاد حلول صحيحة بشكل سريع بناء على المعلومات اللي درسها في المرحلة الثانوية.

القسم دا بيتكون من 60 سؤال؛ شامل الجبر، والهندسة، وحساب المثلثات، وبيكون مطلوب حل الأسئلة خلال 60 دقيقة فقط، وبالتالي فهي كمان بتقيس مدى قدرة الطالب على التفكير، والتعامل تحت ضغط.

القراءة

والقسم دا هدفه يحدد مدى فهم الطالب للفقرات، ومعرفته لمعانيها الأساسية، وبيكون مطلوب تحديد الأفكار الرئيسة للفقرات دي، كمان بيوضح إذا كان الطالب متقن للغة الإنجليزية، ولا لأ.

بنلاحظ إن قسم القراءة مكون من 40 سؤال، والطالب بيحل جميع الأسئلة خلال 35 دقيقة.

العلوم

قسم العلوم في امتحان ACT بيتكون من أكثر من جزء، والأسئلة الموجودة فيه فكرتها بتقوم على قياس قدرة الطالب على التحليل، وإيجاد حلول للمشكلات، والأسئلة دي بتكون متعلقة بالعلوم الطبيعية المختلفة اللي الطالب درسها أثناء تواجده بالمدرسة.

الامتحان هنا مكون من 35 سؤال، ومدته 40 دقيقة.

المقال

المقال هو الجزء الاختياري الوحيد في امتحان ACT، بمعنى إن الطالب ممكن يمتنع عن دخول الجزء دا من الامتحان لو مش حابب يدخله، وكمان ما بيكونش عليه درجات في المجموع النهائي.

ملحوظة: جميع الاسئلة الموجودة في امتحان الـ ACT هي أسئلة اختيار من متعدد -MCQ-.

4- كيفية التدريب على امتحان ACT

التدريب بشكل كويس على الامتحانات، والتجهيز لها قبل موعدها هو شيء أساسي بالنسبة لأي امتحان، وخصوصًا الامتحانات التأهيلية؛ لأن التدريب دا بيساعد الطالب إنه يفهم المادة العلمية كويس، ويستعد لأي سؤال فيها.وأهم النصائح اللي هتساعد الطالب في الحصول على درجات مرتفعة في امتحان الـ ACT هي ما يلي:

بدء المذاكرة قبل الامتحان بفترة كافية

الاستعداد للامتحان قبل ميعاده بفترة كافية هيعطي للطالب فرصة أكبر لمراجعة كل المعلومات اللي محتاجها، وهيقلل الضغط النفسي اللي ممكن يحصله في الفترة دي.

بالتالي دا هيساعده ينجز أكثر، ويجتاز الامتحان بسهولة، ومنه يحصل على الدرجات اللي تؤهله لدخول الكلية اللي حابب يكمل دراسته فيها.

حل أسئلة الامتحانات السابقة من الموقع الرسمي

الموقع الرسمي لامتحان الـ ACT بيوفر مجموعة كبيرة من أسئلة الامتحانات السابقة اللي بتختلف في مستويات الصعوبة، وبيوفر كمان حلول الأسئلة دي، وطريقة الوصول للحل بالتفصيل، ومنها الطالب بيستوعب طريقة التفكير في السؤال، والوصول لحله في وقت قصير.

الممارسة هنا هتخلي الطالب يتقن المواد العلمية، ويفهم الطريقة اللي بيتحط على أساسها الامتحان، وبالتالي هيقدر يحل كويس في الامتحان النهائي.

التدريب على المهارات اللي يتطلبها الامتحان

أسئلة امتحان الـ ACT بتقيس عند الطالب مجموعة من المهارات المختلفة، فكل سؤال بيتطلب استخدام مهارة معينة للوصول إلى الحل الصحيح، ولو المهارة دي مش موجودة فالطالب هيواجه صعوبة في حل السؤال، وهيضيع وقت كبير فيه، وفي النهاية ممكن ما يوصلش للإجابة الصحيحة أثناء الامتحان.

ومن هنا لازم الطالب يعرف إيه المهارة المطلوبة في كل سؤال؛ عشان يعرف يوصل للحل بسرعة، والنقطة دي هيكتسبها لما يحل أسئلة كتير خصوصًا أسئلة الامتحانات السابقة.

التمعن في قراءة الأسئلة

دايمًا في المدارس بيقولوا إن فهم السؤال بيساوي نصف الإجابة، والمقولة دي صحيحة جدًا؛ لإن الفهم الصحيح لفكرة السؤال بيساعد في التوصل للحل بسهولة، وبالتالي لازم الطالب يعطي لنفسه وقت كافي لقراءة السؤال، ويتجنب التسرع في الحل بدون فهم، عشان يقدر يجاوب كويس، ويجتاز الامتحان.

الرجوع إلى الأخطاء المتكررة

أثناء تدريب الطالب على أسئلة الامتحانات السابقة هيلاحظ إنه بيخطئ في حل مجموعة من الأسئلة دي، وممكن الأخطاء تكون متكررة، ودوره هنا إنه يجمع الأسئلة اللي أخطأ فيها، ويحاول يفهم طريقة الحل، ويرجع يحلها بنفسه تاني، وبالطريقة دي هيفهم الفكرة الموجودة في الأسئلة، ومش هينساها، أو يخطئ فيها تاني.

5- ما الجامعات التي تشترط اجتياز امتحان ACT؟

أشهر الجامعات التي تشترط الحصول على شهادة ACT

عدد كبير من الجامعات حول العالم بيشترطوا على الطلبة إنهم يقدموا شهادة اجتياز امتحان ضمن أوراق الالتحاق بيها، وما بيتمش قبول الطالب اللي مش معاه الشهادة دي.

من أشهر الجامعات اللي بتتطلب شهادة ACT:

  1. جامعة بنسلفانيا University of Pennsylvania.
  2. جامعة جورج واشنطن George Washington.
  3. جامعة جورج تاون Georgetown University.
  4. جامعة سيراكيوز Seracuse University.
  5. جامعة تافتس Tufts University.
  6. جامعة رايس Rice University.
  7. كلية بومونا Pomona College.
  8. جامعة ييل Yale University.

6- ما مواعيد التسجيل في امتحان ACT؟

امتحان الـ ACT بيتطبق في مصر 7 مرات على مدار السنة، وبالتالي بيكون مع الطالب فرصة للتسجيل في الامتحان، ودخوله أكثر من مرة خلال السنة الواحدة، والمواعيد دي بتكون في شهور:

  • فبراير.
  • أبريل.
  • يونيو.
  • يوليو.
  • سبتمبر.
  • أكتوبر.
  • ديسمبر.

باب التسجيل بيفتح دايما قبل ميعاد الامتحان بفترة كافية، والمواعيد دي بتختلف من وقت للتاني، وبالتالي لازم الطالب يتابع كويس جدًا مواعيد التسجيل للامتحان، عشان يكون مستعد ليها، ويتابع القرارات الصادرة من وزارة التربية والتعليم المصرية بخصوص المواعيد.

7- رسوم التسجيل في امتحان ACT

الرسوم المطلوبة وقت التسجيل في امتحان الـ ACT بيتم سدادها بالدولار؛ ودا لأن الامتحان أمريكي الأصل، وبنلاقي إن سعر امتحان ACT بيقترب من 55 دولار بدون المقال للطلبة الأمريكيين، والكنديين.

أما بالنسبة للطلبة الدوليين فالرسوم بترتفع إلى 150 دولار بدون المقال، وفي حالة اختيار جزء المقال فالطالب بيدفع رسوم أكثر من القيمة دي.

ملحوظة: لو الطالب قرر إنه ما يدخلش الجزء المقالي من الامتحان، وغيّر رأيه يوم الامتحان أو العكس، بيضطر يسدد رسوم إضافية قيمتها حوالي 16 دولار أمريكي.

8- الفرق بين SAT و ACT و EST

الفرق بين امتحان Act و SAT و EST

الامتحانات التأهيلية للجامعات دايمًا بتختلف عن بعضها في كذا نقطة، والاختلاف دا ممكن يكون ميزة، أو عيب في الامتحان، عشان كدا لازم نعرف الفروقات ما بينهم.

امتحان SAT

امتحان الـ SAT يُعد أشهر امتحان تأهيلي للجامعات الأمريكية، وبيكون مطلوب في أغلب الجامعات هناك أكثر من ACT.

الامتحان بيتكون من أقسام مختلفة، وهي:

  • الكتابة واللغة.
  • الرياضيات.
  • القراءة.
  • المقال.

اعتُمد السات في مصر لفترة طويلة، ولكن مؤخرًا ظهرت بعض المشاكل فيه زي التسريب، وإلغاء الامتحان أكثر من مرة، ومن هنا أصدرت وزارة التربية والتعليم في مصر قرار بإلغاء الـ SAT واستبداله بامتحان مصري تاني اسمه EST.

امتحان ACT

امتحان الـ ACT هو امتحان تابع لمؤسسة غير ربحية بيأهل لدخول عدد كبير من الجامعات زي ما وضحنا، وبيكون أسهل من الـ SAT، فرغم إن الوقت المحدد لكل سؤال بيكون قليل إلا إن الطالب ما بيواجهش صعوبة كبيرة في الحل.

الامتحان دا كمان تم إلغاء اعتماده من مصر من فترة بسيطة، وأصبح امتحان EST هو امتحان الدبلومة الأمريكية الوحيد اللي بيأهل لدخول الجامعات المصرية.

امتحان EST

امتحان EST هو امتحان موجه لطلبة الدبلومة الأمريكية في مصر؛ عشان يكونوا مؤهلين لدخول الجامعات المصرية، والامتحان دا بيكون تحت إشراف وزارة التربية والتعليم المصرية بدون تدخل من المؤسسات الأمريكية، ودا ظهر بعد إلغاء اعتماد امتحان الـ SAT و ACT في مصر.

من خلال الشهادة اللي بيحصلوا عليها من الامتحان دا بيقدروا يلتحقوا بأي جامعة مصرية؛ بس طبعًا بعد تحقيق باقي الشروط اللي بتطلبها الجامعة.

امتحان الـ EST بيشبه امتحان الـ SAT في التركيب لكن الجامعات الأمريكية ما بتعترفش بيه للأسف، وبالتالي لو الطالب حابب يكمل دراسته في الجامعات المصرية فبيكتفي باجتياز الامتحان دا بس، لكن لو حابب يدرس برا مصر فبيحتاج إنه يقدم على الـ SAT الأمريكي، أو ACT حسب متطلبات الجامعة اللي هيقدم فيها.

اقرأ أيضًا: ما هو امتحان EST و ما هي شروط الحصول عليه؟

9- صلاحية امتحان ACT

شهادة امتحان الـ ACT بتمكن الطالب من دخول عدد كبير من الجامعات العالمية، ولكن دا بيكون متاح خلال فترة معينة فقط، فبنلاقي إن صلاحية الشهادة بتكون لمدة 5 سنوات، وبعدها الطالب يقدر يسجل في الامتحان مرة تانية ويجدد الشهادة.

في النهاية

امتحان ACT من الامتحانات المهمة جدًا لأي طالب حابب يقدم في جامعات برا مصر، ووضحنا في المقال كل خطوة ممكن الطالب يمر بيها قبل وأثناء التقديم للاختبار، وازاي يقدر يجتازه بنجاح عشان يوصل في النهاية لهدفه، ويحقق الحلم اللي بيطمح ليه.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق