طفلك من أول ما بيبدأ خطواته الأولى بيكون معرض للإصابات البسيطة والصعبة، ومش هتقدري تتحكمي في تصرفاته، ولا توقفي الفضول اللي بيحركه، ولا تمنعي عنه الأذى بشكل كامل.
لكن تقدري تكوني مستعدة وقت ما يتعرض للأذى، وتلحقيه بالتصرف السليم والملائم لحالته، وعشان كدا لازم تكوني على دراية بالإسعافات الأولية وطريقة تطبيقها بشكل سليم، لحماية طفلك من التوابع اللي ممكن تحصله نتيجة أي إصابة.
ومن خلال المقال هنعرض الإسعافات الأولية للجروح عند الأطفال سواء السطحية والكبيرة، وأهم الأخطاء الشائعة اللي ممكن تأثر بالسلب عليه، وكمان نصائح مهمة لحماية طفلك من خطر الإصابات.
ما هي الإسعافات الأولية للجروح السطحية؟
طفلك مُعرض طول الوقت للإصابة بجروح سطحية في الوجه أو أي جزء من جسمه، سواء وقت اللعب أو أثناء أداء الأنشطة الرياضية، ولازم تكوني جاهزة لمعالجة طفلك في الجروح السطحية، من خلال خطوات بسيطة لازم تكوني على دراية بيها، وهي:
- حاولي تهدي طفلك الأول، وتطمنيه إن الأمر بسيط، وإنه شجاع وهيستحمل تنظيف الجرح.
- عقمي ايديكي واغسليها كويس.
- اغسلي المكان المصاب بالماء الجاري والصابون، في حالة الجروح البسيطة مش بتحتاج مطهر.
- حاولي إنك تشيلي أي أوساخ عالقة في المنطقة، وسيبي الماء الجاري فوقها لمدة دقيقتين، لإن الجرح الملوث بيسبب عدوى بعد كده.
- اضغطي بقطعة قماش نظيفة أو شاش لمدة 5 دقائق لوقف النزيف في حالة وجوده.
- في حالة النزيف الشديد، اضغطي على الجرح لمدة من 5 لـ 10 دقايق بقطعة قماش نظيفة، وتابعي الجرح لو قطعة القماش بقيت مبللة حطي فوقها قطعة تانية لحد ما تتأكدي إن النزيف توقف، وما تحركيش القطعة الأولى.
- حطي كريم مضاد حيوي أو غسول مطهر على الجرح لو مش سطحي أوي.
- غطي المنطقة بالشاش أو اللاصق الطبي.
- تابعي الجرح كل يوم وحافظي عليه نظيف وجاف.
- شيلي اللاصقة الطبية في حالة تكون قشرة للجرح.
- ما تحاوليش تشيلي الشاش أو اللاصقة بشكل قوي، استعملي الماء الدافيء أو محلول ملحي لإزالتها.
- ابتعدي عن النفخ على الجرح، لإن دا بيسبب نمو الجراثيم.
- عالجي التورم أو أثر الكدمة باستخدام الثلج عن طريق وضع كيس ثلج بارد ونظيف على المنطقة كل ساعة إلى ساعتين لمدة 10 لـ 15 دقيقة خلال الـ 24 ساعة الأولى، أهم حاجة إن الثلج ما يبقاش موجود بشكل مباشر على الجلد.
متى تلجأين لزيارة الطبيب لتقديم الرعاية الصحية لطفلك؟
عليكي اللجوء للمستشفى أو زيارة أقرب دكتور في بعض الحالات، زي:
- النزيف استمر حتى بعد الضغط عليه لمدة 10 دقائق، أو توقف وبدأ ينزف مرة تانية.
- إصابة طفلك في عينيه أو منطقة قريبة منها.
- الجرح عميق أو أطول من 0.5 سم.
- دخول مسمار أو زجاج في جلد الطفل مسبب ثقب.
- التعرض لعضة حيوان.
- ظهور علامات عدوى زي: ارتفاع درجة حرارة، أو التورم الزائد، أو حدوث كسر، أو تقرح بالجرح.
- استمرار الألم في الجرح، أو احمرار الجرح.
- وجود الجرح في وجه الطفل أو الرقبة.
في الحالات دي لازم تروحي لأقرب مستشفى لحصول طفلك على الرعاية الطبية اللازمة لحالته.
ما هي الإسعافات الأولية للجروح الكبيرة؟
الإسعافات الأولية للجروح الكبيرة للأطفال مهمة، فلازم تكوني على علم بيها، وتطبقيها على طفلك في حالة تعرضه لجرح عميق، وبتكون باتباع الخطوات دي:
- نظفي الجرح بالماء النظيف عشان تقدري تحددي حجمه وعمقه.
- غطي الجرح بقطعة قماش معقمة أو شاش، والبسي القفازات الطبية عشان تحافظي على الجرح من التلوث.
- خلي الطرف المصاب في مستوى أعلى من مستوى القلب، وابعدي عن ربط العضو المصاب إلا في حالات معينة، زي في حالة بتر طرف، أو وجود جروح كبيرة في الطرف والنزيف مستمر، أو إن الجرح مش واضح وموجود في مكان صعب توصليله.
- راقبي الجرح، وفي حالة بلل الضمادة حطي فوقها قطعة تانية زي ما ذكرنا.
- استمري بالضغط على القطعة، وزوري أقرب طبيب للتعامل مع الحالة.
اقرأ أيضاً: أبرز الإسعافات الأولية للأطفال عند ارتفاع درجة الحرارة
نصائح هامة لحماية طفلك من خطر الإصابة بالجروح
من الصعب إنك تمنعي طفلك من الخطر طول الوقت، لكن تقدري تنبهي طفلك لبعض التعليمات لتقليل خطر إصابته بالأذى زي إنه:
- ما يحطش حاجات في أنفه أو أذنيه، زي: أعواد القطن والأقلام الرصاص.
- ما يجريش وفي حاجة في فمه.
- يتجنب مص الأشياء الصلبة أو الحادة.
- يلبس الواقيات، زي: واقي الوجه، والعينين، والأذن أثناء ممارسة الأنشطة الرياضية اللي ممكن تسبب له إصابة.
إلى جانب كدا، احتفظي بمجموعة أدوات الإسعافات الأولية للجروح في البيت أو السيارة، وتشمل:
- شاش طبي
- مطهر
- لاصق طبي
- قفازات طبية
- رباط ضغط
- مناديل مبللة بالكحول
- ترمومتر طبي
- قطن طبي
- ملقط صغير
- مقص حاد
أبرز الأخطاء الشائعة للإسعافات الأولية للجروح
تنتشر بعض الطرق بين الناس على إنها من ضمن الإسعافات الأولية للجروح، وإنها هتفرق مع الجرح بشكل كبير، ولكن النتيجة بتكون العكس، ومن أبرزها:
استخدام القهوة ووضعها على النزيف لوقفه
يعد من أشهر العادات الخاطئة في الإسعافات الأولية للجروح، لإنه يزود احتمالية تلوث الجرح، وكمان بيعيق تنظيف الجرح، وبيبقى صعب التخلص منها، وخاصةً لو احتاج للخياطة.
والأفضل هو الضغط المباشر على الجرح باستخدام ضمادة نظيفة، ولفه بإحكام بعد التأكد من توقف النزيف، وبيكون التغيير على الجرح يومياً.
اعرفي أكتر عن خطورة تنظيف الجرح بالقهوة
تنظيف الجرح عن طريق اللعاب
تنتشر نصيحة تنظيف الجرح باللعاب بحجة إنه يطهر الجرح من الجراثيم، ودا مش صحيح تماماً، لإن الفم مكان مليء بعدد كبير من الجراثيم، وبالتالي دا بيزود من تلوث الجرح مش بيعقمه، والأفضل اتباع الخطوات السابقة لتعقيم الجروح باستخدام المطهر أو المحلول الملحي.
ترك الضمادة أو اللاصقة على الجرح لفترة كبيرة
بعض الناس بيظنوا إن من الإسعافات الأولية للجروح هو إنهم يحطوا مرهم المضاد الحيوي على الجرح ويغطوه لمدة أيام من غير متابعته، اعتقاداً منهم إن دا هيسرع الشفاء، والجرح مش هيتعرض للتلوث، واللي بيحصل إن الجرح بيزيد عليه الرطوبة، ودا شيء غير مرغوب فيه.
والأفضل هو تنظيف الجرح ووضع المرهم، وترك الجرح يلتئم في الهواء الطلق، أو في حالة تغطية الجرح لازم يتم التغيير عليه مرتين يومياً، ومهم الحفاظ على المنطقة نظيفة وجافة.
استخدام عاصبة لربط مكان نزيف الجرح
في حالة الجرح العميق في الذراع أو الساق، بيفتكر بعض الناس إن الصحيح هو ربط عاصبة حول الفخذ أو أعلى الذراع لوقف النزيف، لكن دا ممكن يوقف تدفق الدم للطرف بالكامل، ويسبب أضرار كبيرة.
والحل هو الضغط النزولي المباشر على الجرح باستخدام طبقة سميكة من الشاش المعقم، و لف الجرح بإحكام عند توقف النزيف، ولو استمر النزيف أو كان الجرح محتاج غرز فلازم التوجه لأقرب مشفى.
وأخيراً، الإسعافات الأولية للجروح عند الأطفال مهمة جداً، لتجنب طفلك كتير من المضاعفات والتوابع السيئة، ودا بيلزم الآباء والأمهات بالإلمام بالمعلومات وخبرة الإسعافات الأولية للجروح عشان يتعاملوا بشكل سليم مع الإصابات اللي بيتعرض ليها أطفالهم.
يمكنك أيضًا قراءة: صندوق الإسعافات الأولية في المنزل: تعرف على أهم الأدوات الضرورية به
أضف تعليق