إقبال الطلبة على المدارس الإنترناشونال في مصر بدأ يزيد في الآونة الأخيرة؛ لحرص أولياء الأمور على توفير فرصة تعليم مميزة لأولادهم تساعدهم على التفوق والوصول لأهدافهم بعيدًا عن الأنظمة التعليمية اللي بتكون قائمة فقط على الحفظ، وجمع أكبر قدر ممكن من الدرجات، ومن أكتر الأنظمة اللي بيختاروها لولادهم هو نظام التعليم البريطاني.
النظام دا بيعد من أفضل الأنظمة التعليمية اللي بتعتمد على تدريس مناهج مركزة تؤهل الطالب للالتحاق بالجامعات العالمية، والمدارس اللي بتطبق النظام البريطاني بيتم اعتمادها من أكتر من جهة، ومن أكبر هيئات الاعتماد هي هيئة كامبريدج التابعة لجامعة كامبريدج العالمية.
وبالتالي بنلاقي إن المدارس المعتمدة من كامبريدج في مصر بتكون مميزة بشكل كبير عن باقي المدارس، وفي المقال دا هنتعرف بالتفصيل على نظام التعليم البريطاني، ونعرف المدارس المعتمدة من كامبريدج.
أهم ملامح نظام التعليم البريطاني
نظام التعليم البريطاني في مصر هو نظام يتبع مناهج بريطانية معتمدة، وبيشرف على تطبيقه المجلس الثقافي البريطاني بالتعاون مع وزارة التربية والتعليم والتعليم العالي.
النظام بيركز على البحث العلمي بشكل كبير، وهدفه يعلم الطالب كيفية البحث عن المعلومات بطريقة منظمة، والنقطة دي بتكون مفيدة للطلبة اللي مهتمين بمجال البحث العلمي؛ لإنها بتساعد على تطوير مهارة البحث عندهم.
كمان بنلاحظ إن الطالب في نظام التعليم البريطاني بيكون عنده مرونة في اختيار المواد اللي حابب يدرسها خلال السنة على حسب ميوله، والمجال اللي حابب يكمل فيه بعد كدا، لكن أحيانًا الطالب مش بيكون عنده قدرة على اتخاذ القرارات، فبيبدأ ولي الأمر يتدخل، ويختار معاه المجال.
وهنا ممكن تحصل مشكلة، وهي إن الطالب يكتشف بعد فترة إن المجال مش مناسبه، فيفكر في تغيير اختياراته ودا مش بيكون متاح للأسف.
أما عن المناهج فبتركز على الفهم أكتر من الحفظ، لكن بتتشابه مع مناهج المدارس الرسمية في مصر في كونها طويلة، والطالب بيمتحن عليها على مدار العام.
الامتحانات دي بيدخل منها في المجموع الكلي درجات كتيرة، أما درجات الأنشطة اللي الطالب بيمارسها خلال السنة بتكون بسيطة، ودا عكس اللي بيتم تطبيقه في نظام التعليم الأمريكي في مصر.
هيئات اعتماد النظام البريطاني
موجود في مصر 4 هيئات مانحة لاعتماد النظام البريطاني وهم:
- كامبريدج للتقييم والتعليم الدولي (Cambridge International Examinations).
- أوكسفورد انترناشيونال (Oxford International AQA Limited).
- بيرسون للتعليم المحدودة (Pearson Education Limited).
- المجلس الثقافي البريطاني (British Council).
وتعد هيئة كامبريدج هي أكبر الهيئات دي؛ لأنها تابعة لجامعة كامبريدج العالمية.
أفضل المدارس المعتمدة من كامبريدج في مصر
حرص ولي الأمر على حصول أولاده على تعليم بريطاني مميز بيخليه يبحث عن أفضل المدارس المعتمدة، ومن المدارس دي بنلاقي:
1- مدارس كامبريدج مصر المتكاملة
تعد واحدة من أفضل المدارس المعتمدة من كامبريدج في مصر، فبنلاقي إن المدرسة معتمدة من أكتر من جهة، وكمان بتقدم للطلبة أكتر من نظام تعليمي إلى جانب النظام البريطاني، فبتوفر شهادة الدبلومة البريطانية، بالإضافة إلى الدبلومة الأمريكية، وشهادة الثانوية العامة.
المدرسة بتهتم بخلق جيل منتج قادر على التفكير بطريقة عملية، وإيجاد حلول تطبيقية للمشكلات اللي بيواجهها، ورغم مميزاتها الكتيرة بنلاحظ إن أسعارها بتكون قليلة بالنسبة لباقي المدارس، وتقدر تعرف تفاصيل أكتر عن الأسعار لما تتواصل مع إدارة المدرسة قبل التقديم.
للتواصل مع الإدارة: 0223899115
2- مدرسة القرية الذكية
مدارس القرية الذكية بتعدد واحدة من أشهر وأفضل المدارس المعتمدة من كامبريدج في مصر، وليها فرعين:
مدرسة Kipling
ودي بتهدف إلى إعداد الطلاب لمواجهة التحديات في المستقبل، من الناحيتين التعليمية والنفسية، وبتتبدأ مصروفاتها من 71 ألف جنيه مصري للحضانة (شاملة مصروفات الكانتين والمصادر التعليمية والأنشطة)، وبتوصل لحد 136 ألف في السنوات الأخيرة.
مقر المدرسة في الجيزة – طريق الإسكندرية الصحراوي.
للتواصل مع المدرسة: 35370100
مدرسة Lycée Voltaire
ودي تعد واحدة من أغلى المدارس المعتمدة من كامبريدج في مصر، وبتبدأ مصروفاتها من 124 ألف جنيه مصري للحضانة (شاملة مصروفات الكانتين والمصادر التعليمية والأنشطة)، وبتوصل لحد 154 ألف في السنوات الأخيرة.
العنوان: الجيزة – طريق الإسكندرية الصحراوي.
للتواصل: 35370200
3- مدارس النور الدولية
مدارس النور هي مدارس انترناشونال بتقدم الشهادة البريطانية المعتمدة إلى جانب شهادة الدبلومة الأمريكية، وتشمل جميع المراحل التعليمية.
المدارس دي بتهتم بمهارات الطالب، وترسيخ شعور الالتزام تجاه الدولة والمعتقدات، وبتحرص إن يكون في شراكة دائمة بينها وبين أولياء الأمور، عشان تساعد الطالب إنه يوصل لهدفه.
للتواصل: 0115000641 – 0115000621
4- مدرسة وادي المعرفة
مدرسة وادي المعرفة معتمدة من أكتر من جهة، وتعد كامبريدج إحدى هيئات اعتمادها، وبتهدف المدرسة لترسيخ القيم المجتمعية الحميدة في نفوس طلابها زي: الصدق، والولاء، والتفاني، والكرامة، والامتنان، والاحترام، والمسؤولية، والعمل الجماعي، والثقة.
مصاريف الدراسة للعام الدراسي 2023 – 2024 بتبدأ من 40 ألف جنيه مصري للحضانة، وبتوصل لـ 85 ألف في السنوات الأخيرة.
عنوان المدرسة: الهرم – الجيزة.
ويمكن التواصل مع المدرسة عن طريق الاتصال على: 0237221413 – 01141004006
5- مدرسة نارمر المعادي
المدرسة بتضم جميع المراحل الدراسية من الحضانة إلى الثانوية العامة، وفيها قسم سيمي انترناشونال (مصري)، وقسم تاني دولي (بريطاني)، وهي واحدة من أشهر المدارس المعتمدة من كامبريدج في مصر.
وبتهدف مدرسة نارمر المعادي إلى تلبية الاحتياجات الفردية المختلفة للتعليم الجيد، واكتساب المعرفة، والمهارات، والتنمية الثقافية، ودا من خلال توفير الحافز للتميز الطلابي.
للتواصل: 27635411 – 27635862
6- مدرسة روتس
المدرسة بتطبق نظام التعليم البريطاني بطريقة تساعد على تطوير شخصية الطالب وتحقيق هدف النظام، عن طريق تزويد الطلاب بمنهج دراسي مليان بالتحديات، ودا عشان يكونوا قادرين فيما بعد على المساهمة بشكل إيجابي في المجتمع المحلي والعالمي.
والمدرسة لم تعلن عن المصاريف الدراسية على موقعها، بس تقدر تتواصل معاهم قبل التقديم وتعرف كل التفاصيل.
أرقام التواصل: 01154443561 – 01154443560
7– مدرسة علوي الخاصة
مدارس علوي للغات هي أحد أرخص المدارس المعتمدة من كامبريدج في مصر، ومع ذلك فهي بتحافظ على تقديم مستوى تعليمي جيد لطلابها.
العنوان: طريق المريوطية – فيصل – الجيزة.
للتواصل: 37722500 – 01152505551
مميزات المدارس البريطانية في مصر
المدارس المعتمدة من كامبريدج في مصر بتقدم العديد من المميزات اللي بتخلي عدد كبير من الطلبة يُقبل عليها كل عام، ومن أهم المميزات دي:
الحصول على شهادة معتمدة
نظام التعليم البريطاني في مصر بيقدم للطالب في نهاية دراسته شهادة معتمدة تأهله لاستكمال دراسته خارج مصر والإطلاع على الثقافات الأخرى.
وبعض الطلبة بيعتبروا النقطة دي أهم ميزة بيقدمها النظام البريطاني.
تطبيق طرق تعليمية حديثة
المدارس المعتمدة من كامبريدج في مصر بتكون حريصة على تطبيق أحدث الطرق التعليمية، وتدريس مناهج تناسب المرحلة العمرية للطالب، وتساعد على تطوير شخصيته ومهاراته بشكل عام.
ونظام الدراسة بيبعد تمامًا عن الحفظ والتلقين، وبالتالي الطالب بيشعر بمتعة التعلم بدون ما يكون مضطر يحفظ معلومات غير مفيدة، عشان يجتاز امتحانات معينة.
حرية اختيار المواد الدراسية
المدارس البريطانية المعتمدة من كامبريدج في مصر بتسمح للطلبة باختيار المواد اللي حابين يدرسوها على مدار السنة تبعًا لرغباتهم ومجالات اهتماماتهم، وبيكون في مرونة كبيرة في الاختيار.
لكن أحيانًا الطالب مش بيكون هو صاحب القرار زي ما ذكرنا، ودا بسبب تدخل بعض أولياء الأمور في اختيار مجال الدراسة، لإن الطالب لسه غير قادر على اتخاذ القرارات، وبعد فترة بيكون عنده رغبة في التحويل لمجال تاني، والمدرسة مش بتتيح الإجراء دا.
الاهتمام بمهارات الطالب إلى جانب مستواه الدراسي
أولياء الأمور بيشوفوا إن المدارس الرسمية في مصر بيقتصر اهتمامها على رفع مستوى الطالب بغض النظر عن الطريقة اللي بتتبعها عشان توصل لكدا.
وبالتالي بيدوروا على بديل لها يهتم بمهارات الطالب بجانب مستواه الدراسي، وأنسب بديل هو المدارس المعتمدة من كامبريدج في مصر.
المدارس دي بتحرص على التأثير في شخصية الطالب، وبتساعده على اكتشاف ذاته، وتطوير العديد من مهاراته أثناء فترة دراسته، وبالتالي بتخرج طالب واعي قادر على التعامل مع اللي حواليه بشكل كويس.
كيفية الالتحاق بالمدارس المعتمدة من كامبريدج
المدارس المعتمدة من كامبريدج في مصر بتضع بعض الشروط اللي بتساعدها في اختيار الطلبة المؤهلين للالتحاق بيها؛ وفي حالة عدم توافر الشروط دي قد يتم رفض أوراق الطالب.
من شروط التحاق الطفل بالمدارس دي:
- إتمام الطفل عمر 4 سنوات.
- اجتياز اختبار المقابلة الشخصية.
- تقديم جميع الأوراق المطلوبة.
أما بالنسبة للتقديم للثانوية البريطانية، فلازم يكون الطالب حاصل على الشهادة الإعدادية من مدرسة لغات عشان يقدر يكمل في المدارس البريطانية ويتفوق فيها؛ ودا لإن الدراسة في المدارس دي بتكون باللغة الإنجليزية.
شروط التحويل إلى المدارس البريطانية المعتمدة من كامبريدج
المدارس المعتمدة من كامبريدج في مصر بتتيح للطلبة فرصة التحويل ليها، ودراسة المناهج الدراسية اللي بتقدمها، ومن ثم الحصول على شهادة معتمدة.
في حالة تحويل الطالب إلى مدرسة بريطانية بيتم تقديم جميع الأوراق المطلوبة للالتحاق زي شهادة ميلاد الطالب وصور شخصية وغيرها، وكل مدرسة بتعلن عن الأوراق المطلوبة بالظبط قبل موعد التقديم، وبينتظر الطالب قبول أوراقه.
بعد قبول الملف بيتم تقديم طلب تحويل بعد ختمه من المدرسة اللي الطالب منقول منها، والحصول على توقيع الإدارة التعليمية التابعة للمدرسة.
أوراق التحويل بتختلف تبعًا للمرحلة الدراسية للطالب، وبالتالي من الأفضل إن ولي الأمر يتواصل مع المدرسة البريطانية اللي حابب يحول ابنه ليها، عشان يعرف كل الأوراق المطلوبة، ومواعيد تقديمها بالظبط.
الخلاصة
نظام التعليم البريطاني هو واحد من أفضل الأنظمة التعليمية المتكاملة في مصر اللي بتسعى لتطوير شخصية ومهارات الطالب من خلال برنامج مركز ومميز يخاطب عقل الطالب، ويبعد تمامًا عن الحشو والمعلومات غير المفيدة.
والنظام دا بيتم تطبيقه في المدارس المعتمدة من كامبريدج في مصر، زي مدرسة كامبريدج مصر المتكاملة، ومدرسة مصر الذكية، وغيرهم.
التحاق الطالب بالمدرسة بيبدأ بعد وصوله إلى سن 4 سنوات، ووقتها بيخضع لبعض اختبارات المقابلة الشخصية اللي بتحدد هل الطالب هيقدر يلتحق بنظام التعليم البريطاني ولا لأ.
كمان النظام بيتيح تحويل الطلبة إلى المدارس البريطانية الثانوية بشرط نجاحهم في المرحلة الإعدادية، وإنهم يكونوا تلقوا دراستهم السابقة في مدارس اللغات.
وأخيرًا لازم ولي الأمر يعرف تفاصيل النظام البريطاني، وأهم مميزاته وعيوبه، ويقارن بباقي الأنظمة الأخرى قبل ما يقدم لابنه، وكمان لازم يتأكد إن النظام البريطاني مناسب لابنه قبل التقديم فيه، عشان يساعده على التفوق وتحقيق هدفه.
أضف تعليق