مميزات وعيوب نظام التعليم الجديد 2021 

مميزات وعيوب نظام التعليم الجديد

 

قضية التعليم بتعتبر من أهم القضايا اللي بتشغل المجتمع كامل سواء كان ولي الأمر في المقام الأول لأنه دايمًا بيبحث عن الأفضل لتعليم أولاده وتطويرهم، وفي نفس الوقت بتشغل المسؤولين وأصحاب القرارات في الدولة لإنهم مدركين إن أهم خطوات النهضة والتقدم في كل المجالات والقطاعات بتبدأ من التعليم عشان كده هنلاقي في مصر اقتراحات وتطويرات بتحصل كل فترة في طريقة ونظام التعليم وبأساليب متنوعة بهدف التحسين.

ملامح نظام التعليم الجديد

في آخر ثلاث سنوات حصلت تغييرات واسعة وشاملة في نظام التعليم في مصر، ومع تولي دكتور طارق شوقي منصب وزير التربية والتعليم بدأ بإصدار نظام تعليم جديد وهدفه منه التحسين من مستوى التعليم في مصر، ومحاولة القضاء على المشكلات اللي بيعاني منها قطاع التعليم كامل سواء من:

قلة جودة التعليم، أو تكدس الطلاب في الفصول، أو أحوال واحتياجات المعلم المصري، عشان نوصل في النهاية إلى إننا نبني جيل حقيقي واعي يقدر يقدم ويصلح نفسه والمجتمع اللي حواليه.

كان من أهم ملامح النظام الجديد:

  1. التحول الإلكتروني الواسع في المنظومة من خلال الاعتماد على (التابلت) و السبورة الإلكترونية.
  2.  اعتماد المناهج بشكل أساسي على الفهم بعيدَا عن المعتاد من الاعتماد على الحفظ والتلقين.
  3. يشمل التغيير بداية من مرحلة رياض الأطفال حتى الثانوية العامة وبتتم التغييرات في كل المراحل المختلفة.
  4.  فتح مدارس يابانية بتعتمد على تطبيق النموذج الياباني “توكاتسو”، بالإضافة إلى المدارس التكنولوجية الخاصة بالتعليم الفني.

ملامح نظام التعليم الجديد

نظام التعليم الجديد ما زال تحت التجربة وبيظهر اختلافه الواسع ما بينه وبين النظام القديم وأكيد له مميزاته الواضحة وليه عيوبه بما إنه مازال تحت التجريب.

أهم الفروقات بين نظام التعليم الجديد والقديم

أهم الفروقات بين نظام التعليم الجديد والقديم المزيد على موقع دليل المدارس المصرية: مميزات وعيوب نظام التعليم الجديد 2021 https://egyptschools.info/?p=12219
اضغط على الصورة للتكبير

نظام التعليم الجديد للثانوية العامة

تعتبر الثانوية العامة أهم السنوات الدراسية في حياة الطالب المصري لأنه بيتحدد منها إيه الكلية اللي هيدخلها وأول ملامح مستقبله، عشان كده هتلاقي الأسر المصرية بتهتم جدًا بابنها في المرحلة دي، وعلى الرغم من إننا لحد النهارده منعرفش الشكل النهائي لطلاب الثانوية العامة 2020/2021 لكن نظام الثانوية العامة الجديد اللي بيسعى دكتور طارق شوقي لتنفيذه بيعتمد على قياس مهارات التفكير والتحليل والإبداع عند الطالب ودا من خلال أسئلة الامتحانات الإلكترونية اللي هتتم عبر التابلت في المدارس ويكون اعتمادها على أسئلة الاختيار ونادر فيها الكتابة، وتكون السنة دي آخر سنة هيطبق عليها النظام القديم بكونها نظام السنة الواحدة ومجموعة الثانوية العامة المعتاد، ومن بعدها هيبدأ تطبيق نظام الثانوي التراكمي.

مميزات نظام التعليم بالتابلت

  1. الاعتماد على البحث ومحاولة الفهم والتحليل والاستنتاج بدل من الاعتماد على التلقي والحفظ للمعلومات سواء في أثناء الدراسة أو في الامتحانات، فهنلاقي الأسئلة بتعتمد على اختيار من متعدد بدرجة أساسية والكتابة بتكون بشكل بسيط مقارنة بالاختيارات.
  2. توفير فرصة متساوية للجميع؛ لأن التصحيح بيتم إلكتروني فبالتالي مفيش فرصة لظلم التصحيح، كمان مش متاح فرصة لتسريب الامتحان قبله أو الغش في وقت الامتحان.
  3.  إتاحة مصدر كبير لتعليم “بنك المعرفة” واللي بيوفر آلاف الأبحاث والفيديوهات اللي هتسهل على الطالب وصوله للمعلومة وفهمها بشكل كويس وبالطريقة اللي تناسبه بسبب تنوع المصادر المتاحة ليه.
  4. رغم إن التابلت بيتوفر لطلبه بشكل مجاني إلا إنه مصنوع من خامات عالية وبيوفر لطالب احتياجاته من مكان واحد سواء بنك المعرفة، أو ممكن يضيف شريحة للنت ويبحث بشكل أوسع كمان.
  5.  توفير الوقت للطلبة والفلوس اللي كانت بتدفع في الدروس الخصوصية والكتب الخارجية، وبالتالي دا هيساعد الأسرة المصرية ويخفف عنهم الأعباء والمصاريف اللي كانوا بيتحملوها.

مميزات نظام التعليم الجديد بالتابلت
نظام التابلت أو الثانوية العامة الجديد زي ما ليه مميزاته اللي بتظهر ليه عيوبه اللي ممكن تحكم على النظام كامل بالفشل لو ماتمش محاولة إيجاد حلول بديله وتفادي العيوب دي.

عيوب نظام التعليم الجديد للثانوية العامة

  1. عدم وجود بنية تحتية قوية تكفي إنها تغطي الامتحانات بالنظام الجديد لكل مرحلة عمرية بحيث يقدروا يمتحنوا في وقت واحد وتحقق لهم فرصة عادلة ومتساوية.
  2. محصلش تحول تدريجي واعترض بعض أولياء الأمور إن التغيرات بتتم في مرحلة الثانوية عمومًا وفي تالتة ثانوي سنة الثانوية العامة خصوصًا، وإن الأفضل إن التحولات والتغييرات تتم بداية من المرحلة الابتدائية.
  3. زيادة الضغط على الطالب وأسرته بسبب الغموض اللي مازال مستمر لحد النهاردة حوالينا الطريقة النهائية اللي هيمتحن بيها طالب ثانوية عامة 2020/2021 ، بالإضافة إلى إن النظام مازال تحت التجربة، الحاجة اللي بيرفضها أولياء الأمور وبيعتبروها تضحية بتعليم ومستقبل أولادهم.

كمان من أهم القرارات اللي صدرت في نظام التعليم الجديد هو تحويل نظام الثانوية العامة للنظام التراكمي.

أهم ملامح النظام التراكمي

  1. إلغاء تشعيب علمي علوم وعلمي رياضة وهيكون متاح للطالب اختيار إما علمي أو أدبي بس.
  2. مجموع الطالب هيتحسب بناء على الـ٣ سنين كاملة هيتجمع درجات كل الامتحانات اللي امتحنها في نهاية كل سنة دراسية.
  3. هيكون متاح للطالب فرصة للتحسين وهيدخل الامتحان كذا مرة وأعلى مجموع هيتحسب كمجموع نهائي.

وعلى الرغم من المميزات اللي ممكن تظهر لنظام التعليم الجديد للثانوية العامة إلا إن ما زالت في عيوب ليه.

عيوب النظام التراكمي

  1. عدم وضوح المعايير اللي هيوضع على أساسها الامتحانات في كل مرة هيكون متاح للطالب يمتحن سواء الامتحان الأساسي أو لتحسين.
  2.  الأخطاء والأعطال الفنية وارد جدًا تحصل في أثناء الامتحان، وبالتالي ممكن تضيع على طالب فرصته وحقه.
  3. العبء اللي هتتحمله الأسرة المصرية بدل ما يتجمع في سنة واحدة هيكون مضاعف وهتتحمل العبء لـ ٣ سنوات متتالية بدون راحة فهيكون ٣ أضعاف بالإضافة لضغط النفسي والعصبي اللي هيمتد خلال الـ3 سنوات.
  4. لو تم فرض رسوم كبيرة على التحسين هتتكلف الأسر فوق طاقتها ومش هتكون فرص التحسين متاحة إلا لأصحاب الدخل المرتفع وبالتالي هيفقد الطلاب الفرص المتساوية.
  5.  على الرغم من إن النظام الجديد هدفه محاربة الدروس الخصوصية والقضاء عليها إلا أن بعض من الناس شايف إن اللي هيحصل العكس والدروس الخصوصية هتنتشر بشكل أوسع، وعشان نحل مشكلة الدروس الخصوصية ونرجع الطالب يتعلم في المدرسة محتاجين حلول تانية تعالج المشكلة اللي بدأت وانتشرت بشكل كامل في المجتمع المصري من سنين.
  6.  الضغط اللي هيتحمله طالب شعبة العلمي بدراسته لمنهج علمي علوم وعلمي رياضة الحاجة اللي اعترض عليها الطلبة وأولياء أمورهم؛ لإنهم شايفين إن إلغاء التشعيب هو مجرد زيادة في الضغط بدون فايدة حقيقة هتعود على الطالب في مسيرته التعليمية والمهنية.

كمان لو حبينا ناخد نظرة شاملة على التطورات اللي بتحصل في نظام التعليم الجديد هنلاقي إن التعديلات والتطويرات بتشمل جميع المراحل مش بس المرحلة الثانوية.

نظام التعليم الجديد للمرحلة الإعدادية

في نظام التعليم الجديد هنلاقي إن الطالب في المرحلة الإعدادية هيدرس العلوم والرياضيات بالإنجليزي لو كان طالب في مدرسة حكومية، أما لو كان طالب في المدارس التجريبية اللي بتدرس اللغات فهيكون متاح قدام ولي الأمر اختيار المدرسة اللي تناسب طفله.

نظام التعليم الجديد للمرحلة الإعدادية

من أهم مميزات النظام:

  1. توجيه الاهتمام بالمدارس الحكومية والمحاولة لتطويرها وتحسنها كونها بتضم النسبة الأكبر من طلاب مصر.
  2. دراسة الرياضيات والعلوم باللغة الإنجليزية هيفتح مجال أوسع لطالب عشان يكون مطلع على العالم حواليه فهيقدر يبحث بنفسه ويتوسع بشكل أكبر مش مجرد دراسة لمنهجه، فبالتالي هياخد علم بشكل صحيح مش مجرد دراسة لمعلومة عابرة.

أما عيوب نظام التعليم الجديد للإعدادية:

  1. الطالب هيكون معرض للتغافل عن لغته الأساسية -العربية- واللي هيخليه يفقد جزء مهم من معرفته اللي لازم تعتمد على اللغتين ويكون الأساس ليها باللغة العربية.
  2. دراسة مادة معينة أساسية بغير اللغة الأم في سن مبكر هيقلل من التحصيل الدراسي للطفل.
  3. هيزيد انتشار الدروس الخصوصية لإن الطالب هيكون محتاج يشخص تاني يبدأ يشرح له العلوم دي بطريقة تناسبه أكتر عشان يستوعبها ويفهمها.

تعديلات نظام التعليم الجديد للمرحلة الإبتدائية و KG

  1. تغيير المناهج بشكل كامل وجذري والمحاولة لنشر الوعي عند الأهالي بأهمية وضرورة بناء أطفالهم بداية من المرحلة العمرية دي لإنها هتفرق في باقي مسيرتهم التعليمية كاملة.
  2. اعتماد التقييم على التقديرات (ضعيف، جيد، جيد جدًا، ممتاز) عشان يكون الامتحان هو مجرد أداة لتقييم ومش هيأثر على نجاح الطالب وانتقاله للمرحلة اللي بعدها.
  3. اللغة العربية هي الأساس اللي هيدرس بيها الطفل طول المرحلة دي سواء كان في مدرسة حكومية أو تجريبة.

بتظهر مميزات نظام التعليم الجديد للإبتدائية في إنه بيوفر لطفل طريقة تعليم صحيحة وبتتناسب مع فطرته في الاستكشاف والأسئلة ومحاولة التفكير والإبداع، الحاجة اللي محتاج الطفل تتنمى فيه أكتر لإنها هتشكل عقليته وطريق تعلمه من صغره.

وعلى الرغم من الميزة القوية للتطوير إلا إن أهم عيوب نظام التعليم الجديد هو اعتماد الطفل على الإلكترونيات بدل من الورقة والقلم في سن صغير وارتباطه بالتكنولوجيا أكتر من ارتباطه بالطبيعة حواليه واستكشافه ليها بصورة مباشرة لأن الطبيعة هتساعده ينمو بشكل صحي أكتر سواء جسديًا أو عقليًا أو ثقافيًا.

نظام التعليم الجديد  في مصر بيحصل فيه تغييرات كتير وتطبيقات وسياسات كتير ولكل خطوة مميزاتها وعيوبها واللي بنتمناه فعلًا المميزات تكون أكتر من العيوب ويحصل طفرة في مستوى التعليم المصري عشان نخرج أجيال أقوى بعلمهم قادرة تغير وتطور في بلدها.

الخلاصة

نظام التعليم الجديد  في مصر بيحصل فيه تغييرات كتير وتطبيقات وسياسات كتير ولكل خطوة مميزاتها وعيوبها واللي بنتمناه فعلًا المميزات تكون أكتر من العيوب ويحصل طفرة في مستوى التعليم المصري عشان نخرج أجيال أقوى بعلمهم قادرة تغير وتطور في بلدها.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

ورك شيت للاطفال Worksheet For Kids

فصول السنة ورك شيت – Seasons Worksheet

سنتعرف علي فصول السنة الاربعة بالترتيب (الشتاء – الربيع – الصيف – الخريف) و سنتعلم و نتعرف علي حالات الطقس من خلال صورة موضحة لكل

انضم إلي جروب دليل المدارس المصرية

إقرأ أكثر..

mood_bad
  • لا توجد تقييمات/تعليقات.
  • اضف تعليق