أهم مميزات الفصول الافتراضية وعيوبها، وكيفية تهيئة بيئة مناسبة للتعلم

مميزات الفصول الافتراضية وعيوبها

إيه مميزات الفصول الافتراضية؟

بعد حدوث جائحة كورونا عام 2020، حصلت طفرة في عالم التواصل الافتراضي، واكتشف الإنسان فرص كتيرة يقدر يستغل من خلالها الإنترنت عشان يحقق أهدافه، وما يتعطلش، ومن أهم الفرص دي هي الفصول الافتراضية لتعليم الطلاب اللي وفرت وقت، وجهد كبير، بالإضافة لنتايجها الإيجابية.

في المقال دا بنعرض لك إيجابيات الفصول الافتراضية، وسلبياتها، وأبرز التفاصيل الخاصة بيها.

ما هي الفصول الافتراضية؟

بيُطلق مصطلح الفصل الافتراضي على عملية التعلم عن بعد، وبيكون زيه زي الفصل العادي في المدرسة، ولكن الفرق الجوهري هو إنه قائم على الإنترنت من خلال برامج مُحددة للغرض دا، وبيُسمح للطلاب، والمعلمين من خلاله التفاعل، وإنشاء عملية تعليمية متكاملة، 

بيقدر المعلم من خلال الفصل الافتراضي استخدام الوسائل الحديثة المُساعدة زي: 

  • السبورة البيضاء الافتراضية.
  • العروض التقديمية.
  • مقاطع الفيديو.

ويقدر كمان يقدم واجبات وتقييمات افتراضية، ويتحكم فيها على الإنترنت بشكل كامل كإنه في الفصل بالظبط.

متى أول مرة ذُكر فيها “الفصول الافتراضية”؟

ذُكر  مصطلح الفصول الافتراضية لأول مرة في ورقة بحثية تحت عنوان “الفصل الافتراضي”، أو “Virtual classroom” بواسطة العالم ستار روكسين هيلتز في عام 1986، وكان بيناقش في الورقة البحثية دي إمكانية استخدام الكمبيوتر، ووسائل الاتصالات الحديثة في التعليم فكتب: 

“هل حقًا يُمكننا أن نبني فصلًا دراسيًا افتراضيًا، يضم اتصالًا تفاعليًا، ومساحة تعلم داخل أنظمة الكمبيوتر؟”.

وقد كان، فاستُخدمت الفصول الافتراضية لأول مرة في خريف سنة 1996، بواسطة منظمة AT&T، واعتمد عليها أكتر من 19,000 ألف طالب وطالبة من مختلف بلدان العالم؛ للتعلم، والتواصل على الإنترنت.

بعد ما بدأت عملية البحث عن مميزات الفصول الافتراضية توسع الأمر، وبقى متاح:

  • عمل مؤتمرات بين الشعوب وبعضها، ودا بيظهر في اجتماعات الرؤساء، والوزراء من خلال الإنترنت.
  • إعطاء دورات تدريبية افتراضية.

ما أشهر برامج الفصول الدراسية الافتراضية؟

من خلال البرامج دي نقدر نستكشف مميزات الفصول الافتراضية وعيوبها، وازاي ممكن نقدر نتعامل معاها بالشكل المناسب، ومن أبرز البرامج اللي بتساعد على تنفيذ فكرة التعليم عن بُعد بكل سهولة:

برنامج زووم – Zoom

برنامج زووم أصبح من أكتر البرامج المستخدمة في التعليم عن بُعد، فهو سهل لكل الفئات، ويقدر أي طالب -مهما كان سنه- إنه يتعامل معاه ببساطة، ويحضر عليه دروسه في أي وقت، ومن أهم مميزاته:

  1. إتاحة تسجيل الحصص الافتراضية، فيقدر الطالب يسمعها في أي وقت بعدين.
  2. إمكانية إنشاء نشاطات مختلفة كتيرة، وممتعة بين المعلم، والطلاب. 
  3. إمكانية إدارة الحصة بسهولة من قبل المُدرس.
  4. التواصل المرئي، والصوتي بين الطرفين. 
  5. إتاحة دخول عدد كبير من الطلاب.

برنامج مايكروسوفت تيمز – Microsoft teams

قدمت شركة مايكروسوفت البرنامج دا لمواكبة التطور اللي حصل بعد استخدام برنامج زوم، وبالفعل انتشر مايكروسوفت تيمز بشدة، واستخدمته كتير من الشركات والجامعات والمدارس بسبب مميزاته المختلفة اللي بتظهر في:

  1. قدرة المعلمين على مشاركة الملفات، والوثائق مع الطلاب.
  2. إمكانية عقد اجتماعات، ومكالمات فيديو مع الطلاب.
  3. إتاحة إنشاء فرق للطلاب، والتواصل معهم.

برنامج جوجل كلاس روم – Google Classroom

هو خدمة مقدمة من شركة جوجل، بيساعد الطلاب على التفاعل بطريقة مميزة، وممتعة، وليه مميزات متعددة زي:

  • الأمان، فبيوفر برنامج جوجل كلاس روم مجموعة متنوعة من ميزات الأمان؛ زي التشفير، وإدارة الوصول، ودا بيساعد على حماية بيانات الطلاب.
  • التكامل مع باقي تطبيقات جوجل، فبيتكامل بسلاسة مع جوجل درايف، ودا بيسهل على المعلمين مشاركة الملفات، والوثائق مع طلابهم.
  • سهولة الاستخدام، ودا لإنه بيتمتع بواجهة استخدام سهلة، ومباشرة.

أما بالنسبة عن مميزات وسلبيات الفصول الافتراضية فبنعرض لك كل نقطة منهم بالتفصيل:

ما مميزات الفصول الافتراضية؟

مميزات الفصول الافتراضية

أثبت التعليم عن بعد جدارته في كتير من المجالات التدريسية، والتعليمية، ودا لإن مميزاته متنوعة؛ وبتتمثل في:

1- توفير الوقت، والمال

بتوفر الفصول الافتراضية على الطالب والمُدرس كتير من الوقت، والمصاريف، ودا بسبب:

  1. عدم الحاجة لمصاريف الكتب الدراسية الكتيرة؛ بسبب توفير المواد، والمصادر التعليمية، وإتاحة الوصول ليها من خلال الإنترنت.
  2. عدم الحاجة لفصول دراسية على أرض الواقع، وبالتالي توفير مصاريف الشراء، أو الإيجار على المُدرسين.
  3. تقليل الخروج للفصول الدراسية، والتعلم بشكل شبه كامل من المنزل.
  4. تجنب الوقت الضائع في المواصلات.

2- مرونة التعلّم 

يقدر الطالب يتعلم من خلال الفصول الافتراضية  في أي وقت، ومن أي مكان، والأمر ذاته بينطبق على المدرس، فيقدر يعلّم الأطفال في المواعيد اللي مناسباه من غير ما يتقيّد بأي شيء، 

من مميزات التعليم الافتراضي كمان إنه بيوفر فرص التعويض، فلو الطالب فاتته حصة شرح معينة، يقدر يسمعها في أي وقت -في حالة إنها مُسجلة-.

ومن أهم النقاط اللي تُحسب للفصول الافتراضية إنها بتتيح التعليم العالمي، فممكن يبقى الطالب في قارة، ويحضر حصص دراسية لمُعلم في قارة تانية، ودا ليه دور كبير في اتساع خبرات التعلم، وفهم ثقافات أخرى، وزيادة الفرص المعرفية.

3- تنوع وسائل التعليم 

بيوفر التعليم الافتراضي طرق جديدة؛ شيّقة، وممتعة للطالب، بتحفزه على التعلم، ومن ضمن الطرق، والوسائل دي: 

  • الأفلام الوثائقية، وفيديوهات الرسوم المتحركة، اللي بتُستخدم لتوضيح المفاهيم المعقدة، وشرح الأمثلة العملية بطريقة سلسة.
  • الألعاب التعليمية اللي بتساعد الطلاب على تنمية مهاراتهم المختلفة، وتعزيز عملية التعلّم.
  • المحتوى التفاعلي، اللي بيشمل: مقاطع الفيديو، والمناقشات، التمارين التفاعلية.
  • نماذج المحاكاة للواقع.

 4- سهولة، وسرعة التقييم

لما نتكلم عن مميزات الفصول الافتراضية لا بد من ذكر نقطة الاختبارات الإلكترونية، اللي من أهم مميزاتها إنها بتتيح تقييم مستوى الطلاب بكل سهولة، وسرعة من خلال عدة خطوات:

  1. استخدام الأدوات، والتقنيات الحديثة زي: منصات التعلم الإلكتروني اللي ذكرناها، والمجموعات التفاعلية، وأدوات البث المباشر لإنشاء الاختبارات، والتقييمات.
  2. استخدام مختلف أنواع الاختبارات، زي: الاختبارات الشفوية، أو الكتابية، أو متعددة الخيارات، أو الاختبارات القصيرة.
  3. استخدام أدوات التقييم الآلي، أو الأدوات اللي بتتيح تقديم Feedback فوري للطلاب.
  4. توفير فرص للطلاب لإعادة المحاولة في الاختبارات، أو المهام اللي فشلوا فيها.

اقرأ أيضًا: أهم 7 أسئلة وأجوبة عن مدارس التعليم المنزلي

ما سلبيات الفصول الافتراضية؟

من النادر وجود شيء لامع بدون ما يكون في غبار عليه، وعلى قد ما الفصول الافتراضية ليها مميزات مهمة، إلا إن عيوبها يجب وضعها في الحسبان، وإدراكها كويس، ومن أبرزها:

1-  نقص التفاعل الاجتماعي

لما بنذكر مميزات الفصول الافتراضية وعيوبها، فأكيد بيجي في ذهننا النقطة دي، فمن عيوب الفصول الافتراضية إنها بتقلل وقت التفاعل الاجتماعي للطالب مع البيئة من حواليه، على عكس اللي بيحصل على أرض الواقع في الفصول الدراسية التقليدية.

والعيب دا بيأثر بشكل كبير على الأطفال اللي سنها صغير بالتحديد، لإنهم بيحتاجوا للتواصل مع غيرهم من الأطفال، عشان ينمّوا مهاراتهم الاجتماعية، ويكتشفوا العالم من حواليهم.

2- الصعوبات الفنية عند المعلمين، والطلاب

بيواجه فئة مش قليلة من المعلمين صعوبات فنية في استخدام الفصول الدراسية، ودا لإنهم بيكونوا معتادين على طريقة التدريس التقليدية، وخبرتهم قليلة في التفاعل مع التكنولوجيا والإنترنت، وطبعًا نتيجة لقلة الخبرة دي، عملية التعلم الافتراضي ما بتأديش غرضها المطلوب، بل ممكن تتحول لتعلم ممل.

وبالنسبة للأطفال، فبيكون صعب عليهم دخول الحصة الافتراضية واستخدام الأدوات، والتفاعل مع المدرسين إلا من خلال التوجيه المستمر، ودا بيزود عندهم صعوبة العملية التعليمية بالطريقة دي.

3- صعوبة التحكم في الطلاب

من سلبيات التعليم الافتراضي هو إن التحكم في الطلاب بيكون صعب جدًا خصوصًا لو سنهم صغير؛ أو أعدادهم كبيرة، ودا بيأثر على سير الحصة التعليمية.

فبنلاقي أطفال بتتكلم بصوت عالي، أو بيتكلموا في نفس الوقت اللي المعلم بيشرح فيه، ولو كانت خبرة المعلم قليلة في إنه يعرف مين الطفل دا، أو يقفل المايك على الطلاب بشكل جماعي، فهيكون من الصعب عليه إدارة الفصل الافتراضي بكفاءة.

وبالتالي، فمميزات الفصول الافتراضية وعيوبها متفاوتة على حسب كفاءة المعلم، والطلاب، ومن الواجب على المعلم إنه يسعى لفهم الأمور الفنية دي؛ عشان يحسن من خبرته بالبرامج التعليمية الافتراضية، ويقدر يساعد الطلاب، ويوجههم في نفس الوقت، ويدير الفصل التعليمي بطريقة فعالة.

تعرًف على: الفرق بين التعليم الإلكتروني والتعليم عن بعد

كيف نُهيئ بيئات التعلم الافتراضي للطلاب؟

كيفية تهيئة بيئات التعلم الافتراضي للطلاب

بعد التعرف على مميزات الفصول الافتراضية وعيوبها، مهم جدًا نعرف ازاي نطوّع البيئات للطلاب عمومًا، عشان نساعدهم يطلعوا من التعلم الافتراضي بأكبر قدر من الاستفادة، ومن أهم الطرق دي: 

توفير الإرشادات

مهم قبل ما نبدأ مع الطالب بطريقة التعليم دي إننا نتكلم معاه، ونوضح له ازاي العملية التعليمية هتتم، وازاي يقدر يستخدم المنصة الافتراضية بكل سهولة، ويعتمد على نفسه في التحكم فيها، ودا دور الآباء.

أما عن دور المعلم فضروري يقدم لطلابه فيديوهات قصيرة، أو معلومات مُبسطة يفهمهم بيها نظام الحصص، وطريقة التعامل مع المادة التعليمية، وكيفية التقييم، وإجراء الاختبارات.

توفير الهدوء، والبعد عن المشتتات

عشان نساعد الطالب على الالتزام بالفصول الافتراضية في مواعيد محددة يوميًا، لازم نوفر ليه:

  • إنترنت جيد، فقبل كل حصة نتأكد إن في اتصال كويس بالإنترنت، عشان ما يتعطلش الطالب، أو يفوته الشرح المباشر للدرس.
  • متابعة مستمرة، فنشوف هو محتاج مساعدة مننا عشان يستفيد، أو يتفاعل بشكل أفضل مع مدرسينه، وزملائه، ولا لأ.
  • مكان هادي، بدون أي مشتتات تعطله عن التركيز في الحصص، زي الألعاب أو التلفزيون أو غيره.

وضع جدول زمني واضح

بعد ما وضحنا مميزات الفصول الافتراضية وعيوبها، لا بد من ذكر أهمية الجدول الزمني للطلاب في طريقة التعلم دي، ودا لإنه بيساعد على:

  • تقليل التوتر، ودا بيحصل بواسطة توزيع المهام على مدار الأسبوع، أو الشهر بشكل متوازن؛ عشان تكون عملية التعلم سلسة، وممتعة.
  • التنظيم، ودا من خلال تحديد الأوقات المخصصة لكل نشاط في الحصة، وبكدا يقدر المتعلمين، والمعلمين يخططوا،ويديروا وقتهم بفعالية.
  • تحقيق الأهداف، عن طريق تحديدها في مدى زمني معين، ووضع المحتوى، والموارد المطلوبة لكل حصة تعليمية.
  • الانضباط، فبيساعد الجدول الزمني على زيادة التزام الطلاب، وسير العملية التعليمية بطريقة منظمة.

تغيير الروتين من فترة لأخرى

مهما كانت مميزات الفصول الافتراضية وعيوبها متغيرة، ومتنوعة، فالنقطة اللي لازم تفضل ثابتة أثناء طريقة التعليم دي هي تغيير روتين الطلبة من فترة للتانية، ودا يقدر ينفذه ولي الأمر، أو المعلم، من خلال:

  • مساعدة الطالب على الخروج للبيئات الاجتماعية، وتحديد يوم في الأسبوع يغير فيه روتينه، يخرج في الحدائق، أو يلعب رياضة معينة، ودا هيدعم تنمية مختلف مهاراته بشكل صحي.
  • عمل أنشطة ترفيهية خلال الحصة التعليمية، وتوفير ألعاب جماعية أثناء الفصل الافتراضي، عشان نشجع، ونحبب الطالب في التعلم بالشكل دا.
  • عمل مسابقات تعليمية، ودي هتحفز الطلاب على التنافس بينهم، وبين بعض، وتطوّر مهارات تفكيرهم، وطرق اتخاذهم للقرارات.

يمكنك أيضًا التعرّف على: أبرز 5 معلومات عن نظام التعليم المدمج

في النهاية، من خلال معرفة مميزات الفصول الافتراضية وعيوبها نقدر نحدد ازاي ممكن نطلع من النهج التعليمي دا بأقصى استفادة لأولادنا، ودا عن طريق اتباع طرق تهيئة بيئات التعلم الافتراضي اللي وضحناها في المقال.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق