ما هو نظام البكالوريا الدولية IB | أهم 7 معلومات

ما هو نظام البكالوريا الدولية؟

 

من أشهر الأنظمة الدراسية العالمية والمنتشرة في العالم هو نظام البكالوريا الدولية IB وهي اختصار لـ International Baccalaureate وتعتبر منظمة تعليمية غير هادفة للربح ومنتشرة على مستوى العالم بالإضافة إلى إنها مستشار لمنظمة الأمم المتحدة للتربية والعلم والثقافة.

بتوفر  أربع برامج دراسية مختلفة للطلبة وهدفها الأساسي إنها تخرج طالب مطلع وواسع المعرفة عنده تفكيره المميز وقادر يبدع ومع محافظته على مبادئه وقيمه.

تاريخ الفكرة بدأ من سنة ١٩٤٨ من جنيف في سويسرا ومنها انتشر لكافة العالم، وعشان أهمية النظام دا هنتناوله في نقاط محددة عشان نعرفه ونتعرف عليه أكتر.

تاريخ نظام البكالوريا الدولية IB في مصر:

الفكرة بدأت من سيدة اسمها “ماري تيريز موريت” اللي كانت بتبحث عن تقنيات التعلم اللي هتوصل للسلام الحقيقي فأنشأت إطار تعليمي عشان يصبح فيما بعد بما يعرف أولًا بـ برنامج البكالوريا الدولية، وبعدها بتكون مجموعة من المعلمين من المدرسة الدولة في جنيف النقابة الدولية للامتحانات المدرسية، واللي هتتحول فيما بعد لشكل المعروف حاليًا والمنتشر في أنحاء العالم “بـ نظام البكالوريا الدولية IB”.

كان أول مقر للنظام في سوسيرا وكان الهدف الأساسي هو تطوير وتعديل البرنامج بشكل مستمر عشان يحقق الهدف منه في الوقت دا  واللي بيتمثل في توفير مؤهل قبول جامعي للطلبة اللي والدهم بيشتغل في الجزء الدبلوماسي والمنظمات الدولية ومتعددة الجنسيات، وبعدين تبعها إنشاء البكالوريا الدولية في مناطق مختلفة زي أمريكا الشمالية وبعدها في أفريقيا وأوروبا والشرق الأوسط وكمان في آسيا والمحيط الهادئ.

وبعدها تم إنشاء برنامج لطلاب السنين المتوسطة -الإعدادية- سنة 1994 ، وبعدها في سنة 1996 تم إنشاء برنامج لطلاب الابتدائية، وآخر برنامج في النظام تم تقديمه سنة 2012 وهو خاص بتنمية الجزء المهني والوظيفي للطالب.

مميزات نظام البكالوريا الدولية IB:

بتظهر نقاط القوة والتميز لنظام البكالوريا الدولية IB في عدة اتجاهات منها:

1- الاعتراف والقبول الدولي:

البرنامج موجود حاليًا في 150 دولة مختلفة في أنحاء العالم، فبالتالي الشهادة اللي هيحصل عليها الطالب هيكون معترف بيها في كل الدول دي.

2- تنمية شخصية الطالب:

النظام بيساعد الطالب على استقلاليته في التعلم وبتخليه يعتمد على نفسه بالدرجة الأولى في تعليمه وحصوله على المعلومات عشان دايمًا يكون عنده القدرة يتعلم في أي مكان وفي أي وقت بدون مساعده واعتماد على حد.

3- اكتساب مهارات متنوعة:

هنلاقي الطالب بسبب التعليم في نظام البكالوريا الدولية IB أصبح عنده القدرة على التفكير والتحليل والبحث والتواصل وكمان قدراته الإبداعية زادت بشكل كبير، وغيرها من المهارات المهمة ليها، وهيقدر يستفاد منها بعد ما يدخل الجامعة في دراسته وكمان بعد المرحلة الجامعية في حياته عمومًا.

4- إتاحة فرص للقبول الجامعي:

بيكون متاح للطالب إنه يدخل جامعات دولية ومرموقة في كل أنحاء العالم بسهولة بدون امتحانات وكمان هيكون سهل يدخل الجامعات الأعلى تصنيف.

5- النمو اللغوي:

هيكون متاح للطالب دراسة لغتين على الأقل وبالتالي هيوسع ثقافته واطلاعه على العالم حواليه.

6- الربط بين المعارف:

بيتيح ليهم مساق نظرية المعرفة الربط بين التعليم الأكاديمي اللي بيدرسوه واستكشاف طبيعة العلم والمعرفة كلها بشكل عام وأساسيتها.

7- التطور المستمر:

بيتميز نظام البكالوريا الدولية IB إنه بيتيح لطالب فرصة لتطور الذهني والبدني والأخلاقي فهو بيبدأ معاه أول خطوات التطور وبيعرف الأدوات اللزمة وبيدرب عليها ويمارسه طول فترة دراسته فبالتالي هتستمر بعد كده معاه طول حياته

وفي المقابل هتظهر  العيوب للنظام.

عيوب نظام البكالوريا الدولية IB:

عيوب
عيوب نظام البكالوريا الدولية

نقاط الضعف وعيوب البرنامج بتتمثل في:

1- طول المدة الدراسية:

مدة الفترة الدراسية بتكون طويلة جدًا مقارنة بين الانظمة التانية فهنلاقي نظام الثانوية عبارة عن سنتين، وطبيعة السنة الدراسية بتكون عبارة عن أربع فصول.

2- اختيارت أقل:

الطالب بيكون محكوم بمجالات بسيطة جدًا وهي بس اللي بتكون متاح يقدم ويدرس فيها، عبارة عن 6 مواد إجبارية مقسّمة على 6 فئات مختلفة، واختيار المواد بيكون معتمد على المدرسة اللي الطالب بيدرس فيها.

3- التزامات أكتر:

بيكون الطالب مطلوب منه أنشطو وواجبات وأبحاث مختلفة بالإضافة للامتحانات الحاجة اللي زي ما هتفيد الطالب لكن كمان هتخليه تحت ضغط كبير جدًا وهتستهلك منه وقت ومجهود كبير، وممكن تأثر على حياته الاجتماعية وأنشطته التانية بالسلب.

4- نسبة قبول أقل:

على الرغم من إن الشهادة بتكون معترف بيها دوليًا والطالب يكون متاح يدخل جامعات أعلى تصنيف، لكن نسبة القبول لطلاب البكالوريا الدولية في الجامعات المصرية الحكومية هي 5% بس.

5- التكلفة العالية:

بيتحمل ولي الأمر تكاليف كبيرة جدًا عشان ابنه يقدر يدرس في النوع دا من الأنظمة سواء كانت المدرسة تابعة للقطاع الحكومي أو القطاع الخاص.

 

برامج نظام البكالوريا الدولية IB:

بيوفر البرنامج نظام تعليم للطلاب بداية من سن الـ 3 سنوات حتى سن 19 سنة ولكل فئة عمرية بيكون متاح ليها برنامج مختلف يتناسب مع عمرهم واحتياجاتهم التعليمية المتنوعة.

programs 1
برامج نظام البكالوريا الدولية

النظام بيقدم 4 برامج مختلفة على حسب الفئة العمرية وهم:

 

1-   برنامج  Primary Years Programme (PYP)  من سن 3 سنوات حتى سن 12 سنة.

وفيه بيتم تعليم الطالب المهارات الأكاديمة المهمة ليه، وكمان تعريفه بالقيم والمبادئ المختلفة ومتاح إن الطالب يدرس البرنامج دا بلغة بلده الأساسية، والمقررات التعليمية ليه بتشمل: اللغة العربية واللغة الإنجليزية ومبادئ الرياضيات  والأنشطة المختلفة واللي بتعتبر هي الأساس للمرحلة والبرنامج.

 

2-  برنامج Middle Years Programme  (MYP) من سن 11 سنة حتى سن 16 سنة.

وفيه بيتم التركيز على التطبيقات العملية في أرض الواقع لكل العلوم المختلفة اللي عرفها واتعلمها الطالب، بالإضافة للاهتمام بميول الطالب واحتياجاته.

بيشترك الطالب مع المدارس الحكومية إنه بيمتحن نفس امتحاناتهم في اللغة العربية والتربية الدينية والدراسات الاجتماعية والقومية، وباقي المواد بيدرسها باللغة الإنجليزيةومعيار التقييم فيها بناء على معايير البكالوريا الدولية.

– في البرنامج الأول والثاني التعليم مش بيعتمد على الكتب الدراسية ولكن بيتم الاعتماد على البحث

3-  برنامج (IB) Diploma Programme (DP) من سن 16 سنة حتى سن 19 سنة.

وفيه بيتم إعداد الطالب للمرحلة الجامعية والحياة العملية بعدها

4- البرنامج الوظيفي والمهني

وهو عبارة عن برنامج مرتبط بمجال الطالب ومسيرته المهنية من سن 16 سنة حتى سن 19 سنة.

مواد نظام البكالوريا الدولية IB:

بيختار الطالب في برنامج الدبلوما في البكالوريا الدولية مادة دراسية واحدة من كل مجموعة من المجموعات الدراسية الخمسة بالإضافة إنه بيختار مادة فنون من المجموعة السادسة أو مادة دراسية تانية من المجموعات الدراسية الخمسة الأساسية.

بالإضافة إن في مواد مشتركة بين المجموعات يقدر الطالب يختار منها.

البرنامج متاح في مستوى عادي ومستوى عالي فمتاح إن الطالب يختار  ٣ مواد دراسية ومش أكتر من ٤ مواد في المستوى العالي، وباقي المواد بيختارها من المستوى العادي، وكمان متاح للطالب يدرس باللغة الإنجليزية، أو الفرنسية، أو الأسبانية حسب اختياره.

المجموعات الدراسية في نظام البكالوريا الدولية IB:

١- المجموعة الأولى: دراسات في اللغة والأدب

اللغة أ : الأدب متاح ٥٥ لغة مختلفة

اللغة أ : اللغة والأدب متاح ١٦ لغة

الأدب والأداء وهي مشتركة مع المجموعة السادسة ومتاح فيها ٣ لغات

 

٢- المجموعة الثانية: اكتساب اللغة

اللغة ب : ٢٣ لغة متاحة

مادة اللغة للمبتدئ ١٢ لغة متاحة

اللغات الكلاسيكية: لغتين متاحتين

 

٣- المجموعة الثالثة: الأفراد والمجتمعات

– الأعمال والإدارة

– الاقتصاد

– الجغرافيا

– التاريخ

– الفلسفة

– علم النفس

– علم الإنسان الاجتماعي والثقافي

– تكنولوجيا المعلومات في المجتمع العالمي

– الديانات العالمية – متاحة للمستوى العالي فقط-

– الأنظمة البيئية والمجتمعات وهي مشتركة مع المجموعة ٤

 

٤- المجموعة الرابعة: العلوم

– الأحياء

– الكيمياء

– الفيزياء

– تكنولوجيا التصميم

– الأنظمة البيئية والمجتمعات وهي مشتركة مع المجموعة ٣

– علوم الحاسب

– الألعاب والتمارين الرياضية والعلوم الصحية – متاحة للمستوى العالي فقط-

 

٥- المجموعة الخامسة: الرياضيات

– دراسة الرياضيات للمستوى العادي

–  الرياضيات الإضافية للمستوى العالي

 

٦- المجموعة السادسة :الفنون

– الموسيقى

– المسرح

– الفنون المرئية

– الرقص

– الفيلم

– الأدب والأداء مشتركة مع المجموعة ١

 

اختبارات نظام البكالوريا الدولية IB:

 

التقييم للطلاب مش بيكون بس على المواد الدراسية لكن كمان بيكون مطلوب منهم:

١- مقال مطول بيكون مطلوب منه عمل بحث مستقل عشان يجاوب فيه على سؤال في مادة من المواد اللي بيدرسها، وبكده هيمتلك الطالب مهارات البحث والتقصي وهيتعمق على الأقل في مادتين مواده عشان يقدر يجاوب على السؤال دا بشكل تفصيلي وشامل.

٢- نظرية المعرفة:

بتطور أسلوب التعليم عند الطالب ومن خلالها هيقدر ينمي الطالب التفكير النقدي عنده

٣- الإبداع والنشاط والخدمة:

بيشارك الطالب في مجموعات من الأنشطة:

الإبداع هيساعده على تنمية التفكير الإبداعي

النشاط: ممارسة الأنشطة البدنية

الخدمة: المساهمة في خدمة المجتمع عشان الطالب يتعلم ويتغرس فيه قيم مهمة.

 

أما عن نظام الامتحانات والتقييم
في نهاية البرنامج بيخضع الطالب لاختبار كتابي وبيتم التصحيح من خلال مصححين من الخارج تابعين لبرنامج البكالوريا الدولية.

ودرجات كل مساق والمقياس بيكون من ١ كحد أدنى و ٧ كحد أعلى، وكمان ممكن الطالب يحصل على درجات إضافية ٣ درجات بحد أقصى مقابل نتيجتهم في المقال المطول ونظرية المعرفة.

أقل مجموع كلي الطالب ممكن يحصل عليه هو ٢٤ نقطة على الأقل بشرط إنه يكون حصل على مستويات محددة كحد أدنى مقابل المشاركة في البرنامج ككل وكمان في الإبداع والنشاط والخدمة، وأعلى مجموع كلي هو ٤٥ نقطة.

 

الجامعات المتاحة لطلبة نظام البكالوريا الدولية IB:

 

بتعتبر البكالوريا الدولية زي جواز سفر ذهبي بيتيح للخريج إنه يدخل كافة الجامعات الدولية والمعتمدة في كافة أنحاء العالم. وبيكون معترف بشهادة الطالب ومش بيحتاج لعمل معادلة أو دخول اختبار لغة أو حتى حضور الدورات التأسيسية.

الطالب بيكون قدامه فرصة لدخول جامعات عريقة ومرموقة زي  Ivy League universities, MIT, Oxford, Sorbonne, Humboldt وغيرهم من الجامعات.

طالب البكالوريا بيتاح ليه فرصة كبيرة للحصول على منح دولية ومنح خاصة، وكمان ممكن يحصل خصومات على المصروفات الدراسية.

لكن في المقابل هنلاقي إن طالب نظام البكالوريا الدولية IB  في مصر فرصة دخوله للجامعات الحكومية المصرية قليلة جدًا بتصل لـ 5%.

الخلاصة

نظام البكالوريا الدولية IB هو عبارة عن نظام دراسة مميز قادر يخرج طالب مبدع ومفكر وعنده قدر كبير من المعرفة والعلوم وفي نفس الوقت شخصية مميزة قادرة تنجح في جوانب مختلفة في الحياة، ولكن مش كل الطلبة بيكون عندها المقدرة إنها تتكيف وتتحمل النظام دا فهي قدرات بتختلف من شخص للتاني، وهنا بيجي دور الأب والأم في محاولة اكتشاف طفلهم وقدراته وتوظيفها في المكان الصح اللي يفيده وبالتالي يوفر له حياة كريمة يسعد بيها.

 

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق