في كل مرحلة جديدة بيمر بيها الطفل بيظهر قدمنا مجموعة من التحديات اللي لازم نغلب عليها عشان نحافظ على استقراره، وطبعًا من أهم المراحل في حياة أطفالنا هي المرحلة اللي بيقبل فيها على الروضة وبيتعرف فيها على عالم جديد بالنسبة له.
وطبعًا البداية بتكون صعبة؛ لإن الطفل ممكن يشعر بالقلق والخوف من الدخول في المرحلة دي، وشعوره بينعكس على الوالدين.
لكن الصعوبة دي هتقل جدًا مع إجراء بعض الترتيبات اللي بتهيئ الطفل للروضة، عشان كدا في المقال دا هنعرض الترتيبات دي، وهنعرف بالتفصيل كيفية ترغيب الطفل في الروضة من خلال العديد من الطرق الفعالة.
متى أدخل طفلي الروضة؟
مرحلة الروضة هي مرحلة مهمة في حياة كل طفل؛ لإنه بيكتسب فيها العديد من المهارات الأساسية اللي بتؤهله لمرحلة المدرسة، دا غير إنها بتساعده يتعود على الدراسة، ويفهم طبيعتها.
وبالتالي بيكون من السهل عليه التعود على المدرسة فيما بعد، ولكن امتى الطفل هيكون جاهز للخطوة دي؟
الدراسات اللي اتعملت عشان نعرف من خلالها العمر الأنسب للطفل للتقديم في الروضة كانت نتايجها متضاربة، فعدد كبير شايف إن سن 5 سنوات هيكون مناسب، عشان الطفل يقدر يستوعب الشرح ويتعلم القراءة والكتابة، والمهارات المختلفة.
وذكر البعض إن سن 4 سنوات هو الأفضل؛ لإن الروضة هتكون بالنسبة للطفل مكان ترفيهي، فهيبقى مستمتع أثناء تواجده بيها، وبالتالي هسيتجيب للمعلمين والأنشطة اللي بيطلبوها منه، ومع الوقت هيكون في تطور ملحوظ في مهاراته.
كمان البعض شايف إن سن 3 سنوات بيكون مناسب جدًا للطفل، عشان ينمي مهاراته اللغوية والاجتماعية، ويكتسب مهارات جديدة تساعده على التميز، لكن بالنسبة لتدريس مناهج علمية للطفل فممكن يبقى صعب إلى حد ما.
بالتالي فالأمر بيختلف تبعًا للغاية اللي عايزين نحصل عليها من تقديمنا للطفل في الروضة، لكن في مجموعة حاجات لو موجودة في طفلك فمعناها إنه جاهز للروضة، والحاجات دي موجودة في قائمة مراجعة الاستعداد لرياض الأطفال.
ورغم أهمية مرحلة الروضة إلا إن البداية بتكون صعبة على الطفل زي ما قولنا، لإنه بيكون مضطر يترك بيته وأهله، ويتواجد وسط ناس مش عارفها لوقت طويل من اليوم.
فبيبدأ يشعر بالقلق والخوف، وبالتالي بيكون دورنا إننا نفهم طبيعة اللي بيمر به، ونحببه في الروضة، عشان كدا هنتعرف على كيفية ترغيب الطفل في الروضة.
نصائح لتهيئة الطفل للروضة
معرفة كيفية ترغيب الطفل في الروضة بيقصر علينا الطريق في تعاملنا معاه وبنقدر نتجاوز القلق والاضطراب اللي عند الطفل سريعًا، ومن أهم الحاجات اللي بتساعدنا على تهيئة الطفل للروضة:
1- خلق أنشطة جماعية بسيطة وضم الطفل لها
الأنشطة الجماعية بتساعد الطفل يتكيف بسرعة مع اللي حواليه، وبالتالي هتسهل عليه يتعود على زمايله ومعلمينه ويتعامل معاهم بدون خوف أو قلق.
ومن هنا لازم تعود طفلك على الأنشطة الجماعية، وتعلمه آداب المشاركة فيها؛ عشان تساعده في مرحلة الروضة.
2- الاستعانة بألعاب تعزز ثقة الطفل بنفسه
في طريقنا لمعرفة كيفية ترغيب الطفل في الروضة لقينا إن الألعاب لها دور كبير في تهيئة الطفل للروضة خصوصًا الألعاب اللي بتزود ثقة الطفل في نفسه زي:
الرياضة
معروف إن الرياضة بتزود اللياقة البدنية عند الطفل، وبتخليه يتمتع بصحة عالية، لكن كمان لقينا إنها بتزود ثقة الطفل في نفسه.
لإنه من خلالها بيتقبل إنه ممكن يتخلف في وقت معين، ووقت تاني يتقدم ويوصل لهدفه، وبتعلمه إزاي يتعامل مع الاحباط، ويصبح أكثر ثقة في قدرته على تحقيق الهدف.
الطبخ
المشاركة في إعداد الوجبات وتجهيزها بيزود ثقة الطفل في نفسه بشكل كبير؛ لإنه بيكون شايف نتيجة مجهوده قدامه، وبيبدأ يحس إنه شخص مهم لازم يساهم في مهام معينة، وإن دوره مميز.
وهنا الطفل بيكتسب ثقته من داخل المنزل وبيتعامل مع اللي حواليه بدون قلق.
لعبة الأدوار
فكرة اللعبة هي إن الطفل بيتقمص دور معين، وبيبدأ يمثله قدام الآخرين، فمعنى إن الطفل هيتكلم قدام الآخرين وهيلفت انتباههم إن ثقته في نفسه هتزيد بشكل كبير، ومع تكرار اللعبة هنلاحظ تطور في شخصيته، وبالتالي فلعبة الأدوار تعد لعبة مهمة جدا في دليل كيفية ترغيب الطفل في الروضة.
اقرأ أيضًا: أبرز 16 طريقة لزيادة الثقة بالنفس عند الأطفال
3- حكاية قصص عن الأطفال في الروضة
حكاية القصص عن أطفال الروضة بتساعد الطفل في تكوين صورة ذهنية حقيقية عن الروضة، وبتقلل من الخوف المرضي اللي ممكن يعاني منه وقت التحاقه بالروضة.
وبالتالي لازم تحرص إن حكايات كتير عن الأطفال في الروضة، عشان تؤهل طفلك للتواجد فيها.
كيفية ترغيب الطفل في الروضة | نصائح فعالة
أغلب أولياء الأمور اللي بيكون عندهم أطفال مقبلين على الروضة بيتطلعوا إلى معرفة كيفية ترغيب الطفل في الروضة، عشان يتخلصوا من حالة القلق والتوتر اللي بتصيب الطفل لما يسمع اسم الروضة.
من أهم النصائح اللي بتقلل من قلق الطفل ورفضه الذهاب للروضة:
1- زيارة الروضة وتعريف الطفل على المكان ومعلميه قبل بدء الدراسة
اصطحاب الطفل في زيارة إلى الروضة والتعرف على الأشخاص الموجودين فيها هيكسر الحاجز النفسي عنده، وهيقلل رهبة التعامل.
وكمان هيساعده يتعرف على طبيعة أجزاء اليوم هناك والأنشطة اللي بيمارسها الأطفال، عشان كدا لازم كأولياء أمور نزور الروضة مع الطفل قبل بدء الدراسة فيها.
2- إعلام الطفل بأنه سيذهب للروضة قريبًا
بعض أولياء الأمور بيتجاهلوا إنهم يعرفوا الطفل إنه مقبل على الروضة، والطفل بيتصدم لما يلاقي نفسه قدام أمر واقع ماكنش عارف عنه أي حاجة.
وهنا بتظهر المشكلة وبيرفض الطفل إنه يروح الروضة، وبيبدأ يدخل في نوبات الغضب المصحوبة بالقلق والخوف من اللي حواليه.
بالتالي من الضروري إننا نشرح للطفل إنه هيروح الروضة قريب، ونفهمه قد إيه هيكون مستمتع لما يتواجد هناك، وإيه أهمية دا بالنسبة له، عشان يبدأ يستجيب معانا.
3- إحضار متطلبات الحضانة قبل الدراسة بفترة كافية
الاستعداد للروضة لازم يبدأ قبل دخول الطفل بفترة، وبالتالي ضروري نتعرف على كيفية ترغيب الطفل في الروضة؛ عشان نتجنب أي مشكلة ممكن تحصل للطفل.
ومن الحاجات المهمة اللي بتساعدنا نؤهل الطفل للروضة قبل الدراسة بأسبوعين إننا نتأكد من إحضار جميع متطلبات الطفل زي: ملابس الروضة، والأحذية، والأدوات المطلوبة، وغيرها.
وهنا الطفل هيفهم إن موعد الدراسة اقترب وهيبدأ يقتنع إنه لازم يروح الروضة.
يفضل في الفترة دي إننا نكرر اسم الروضة قدام الطفل، ونفهمه إن كبر وقادر يتحمل مسؤولية نفسه، وإنه هيكون مستمتع أثناء تواجده مع زملائه داخل الروضة.
ملحوظة: معلم الروضة هو أكثر حد فاهم طبيعة اللي بيمر بيه طفلك، وأكثر حد ممكن يساعدك تؤهل طفلك للروضة، وبالتالي ممكن تستعين بيه، وتسمع منه النصائح اللي بتساعد على ترغيب الطفل في الروضة.
4- تغيير الروتين اليومي للطفل
الاستعداد للروضة قبل الدراسة بيكون مهم جدًا بالنسبة للطفل، ودورك في إدارة الموقف هو شيء أساسي.
وعشان نُعد الطفل في الحالة دي بنبدأ نغير الروتين اليومي للطفل، فبنخليه يتناول الوجبات بدري عن ميعاد كل يوم، وينام بدري كمان؛ لإننا بالطريقة دي هنساعده يستوعب إن في تغيير هيحصل في يومه، وبالتالي انتقاله لمرحلة الروضة هيكون سهل.
اقرأ أيضًا: 5 نصائح تنظيم وقت الأطفال في المنزل وجداول جاهزة للتحميل
5- الاستماع لآراء الطفل ومحاولة تهدئة مخاوفه
من الطبيعي إن الطفل يكون عنده مجموعة من المخاوف المتعلقة بالتحاقه بالروضة، وعشان نعرف كيفية ترغيب الطفل في الروضة لازم الأول نفهم أسباب مخاوفه، ونقدرها، ونظهر له تقديرنا دا.
وكمان نحاول قدر الإمكان نطمنه، ونقلل من فزعه عن طريق إننا نبسط له الأمر، ونشرح له طبيعة الروضة بالطريقة اللي يقدر يستوعبها.
6- إظهار السعادة في أول يوم دراسة
معرفة كيفية ترغيب الطفل في الروضة في أول يوم دراسة بيساعدنا نقلق من فرصة قلقه وبكاؤه في الساعات الأولى من تواجده بالروضة، فمن أهم الحاجات اللي المفروض نعملها هي إننا نبين للطفل إننا مبتهجين حتى لو كنا قلقين، ونكلمه عن المتع اللي هتكون في يومه.
عشان لو قلقنا كأولياء أمور ظهر هيحسس الطفل بعدم الأمان، وهيزود الاضطراب عنده.
كمان ضروري نقول للطفل إننا هنرجع ناخده بعد وقت قصير، عشان يتطمن، ونمشي بسرعة وقت ما نودعه، لإن البطء أو السماح بوقت إضافي لتواجدك كولي أمر مع الطفل هيفهمه إنك تقدر تقعد أكثر أو تفضل موجود معاه لحد آخر اليوم، ودا شيء مش في صالح الطفل، عشان كدا لازم تمشي سريعًا بعد ما تودعه.
طفلي لم يعد يريد الذهاب للحضانة: معرفة الأسباب والحلول
يعاني أولياء الأمور أحيانًا من رفض الطفل الذهاب إلى الروضة رغم تأهيله المسبق، ومش بيكونوا قادرين يوصلوا لحل معاه، والأمر دا ممكن يحصل نتيجة لعدة أشياء أهمهم:
قلق الانفصال
قلق الانفصال هو شيء طبيعي بيحصل أثناء نمو الطفل وبيتلاشى تدريجيًا، وبيكون مرتبط بحدث جديد أو موقف معين، واللي فيه بيكون الطفل قلقان من الانفصال عن أحد الأشخاص اللي بيحبهم أو فقدانهم أو الانتقال إلى مكان جديد، إلخ.
بالنسبة لطفل الروضة فبنلاقي إن الأعراض بتظهر في شكل بكاء، ونوبات غضب متكررة، وتشبث زائد بالوالدين، بالإضافة إلى صعوبة في النوم، والشعور بألم جسدي عن الابتعاد عن أحد الأحبة.
في الحالة دي بيكون التدريب على الانفصال هو خطوة مهمة في العلاج، بمعنى إن لو الطفل متعلق بشكل كبير بوالده فممكن الأب ينفصل عنه كليًا لمدة 10 دقايق، وبيكون في شخص تاني بيتابع سلوكيات الطفل لحد ما الأب يرجع.
ومع تكرار الموقف دا باستمرار هيبدأ الطفل يدرك إنه ممكن يتواجد في مكان ما بدون وجود الوالد وما يبقاش في مشكلة.
في حالة عدم ملاحظة تحسن بيكون من الأفضل عرض الطفل على طبيب متخصص ليتمكن من تقييم الحالة وعمل الخطة العلاجية المناسبة.
الملل من الروتين اليومي
الأطفال بطبيعتهم مش بيحبوا الروتين، وبيفضلوا التغيير والإثارة، عشان كدا من الطبيعي إن الطفل يمل بعد فترة من ذهابه للروضة ويرفض إنه يروحها تاني.
والحل هنا إننا نحاول نرجع للطفل شغفه عن طريق إننا نشجعه بالهدايا أو الثناء لما يستجيب ويروح للروضة، ومع الوقت هيبتدي يتعود على الأمر.
وجود مشكلة ما بالروضة
أحيانًا بيكون في مشكلة موجودة في الروضة هي اللي بتخلي الطفل يرفض يروح، زي إنه بيتعرض للتنمر مثلًا، أو بيضايقه هناك، أو إن المعلم اللي متعود عليه اتغير بشخص تاني لسه غريب بالنسبة له.
عشان كدا لو الطفل رفض يروح الحضانة في يوم لازم نسأل إذا كان في مشكلة في الروضة أو تغيير جديد مثلًا ولا لأ.
وبالتالي بيتضح إن حل مشكلة عدم رغبة الطفل في الذهاب للروضة بيتوقف على السبب، فلازم نحرص على معرفة السبب، ونحاول نعالجه الأول عشان نقدر نحل المشكلة بسهولة.
الخلاصة
كل حاجة جديدة بتكون صعبة في بدايتها خصوصًا على الأطفال، ودا بينطبق على ذهابهم للروضة، وبالتالي لازم كولي أمر تكون مدرك دا كويس جدًا ومتقبله، وتحاول تخفف من صعوبة الموقف قدر الإمكان.
وبالنسبة لترغيب الطفل في الروضة ففي مجموعة خطوات تقدر تطبقها مع طفلك عشان يروح الحضانة بدون خوف، زي إنك تزور معاه المكان قبل بداية الدراسة، وتفهمه إن هيروح الروضة قريب، وغيرهم زي ما وضحنا.
المهم إنك تصبر على الطفل، وتحاول معاه بأكتر من طريقة، ومع الوقت هيبدأ يتأقلم على الوضع الجديد، والخوف هيتلاشى تدريجيًا.
أضف تعليق