كل أم بتحاول دايمًا تحافظ على صحة أولادها، لكن في أمراض مش بتكون باينة في الأول وممكن تسبب قلق كبير، زي “جرثومة المعدة عند الأطفال”. كتير من الأطفال ممكن يصابوا بيها من غير ما يظهر عليهم أعراض واضحة، وده اللي بيخلّي اكتشافها مش سهل.
عشان كده، في المقال ده هنشرحلك كل حاجة محتاجة تعرفيها عن علاج جرثومة المعدة للأطفال، بداية من الأسباب والأعراض، لحد طرق التشخيص، وعلاج جرثومة المعدة عند الأطفال بالأدوية والأعشاب كوسيلة مساعدة.
ما هي جرثومة المعدة عند الأطفال؟
جرثومة المعدة دي بكتيريا اسمها العلمي Helicobacter pylori، البكتيريا دي بتعيش جوه جدار المعدة وبتحب البيئة الحمضية. ساعات بتدخل جسم الطفل من أكل أو شرب ملوث، أو من ناس تانية لو بيشاركهم أدوات الأكل أو الشرب.
والمشكلة إن كتير من الأطفال ممكن يكون عندهم الجرثومة من غير ما يظهر عليهم أعراض واضحة. يعني ممكن تبقى موجودة والطفل يشتكي من شوية مغص أو فقدان شهية، والأهل ميخدوش بالهم إنها حاجة كبيرة. بس لو ما اتعالجتش، ممكن تسبب مشاكل زي التهابات أو قرح في المعدة.
ودا بتأكده دراسة اتنشرت على موقع NIH إن جرثومة المعدة (الملوية البوابية) عند الأطفال بتخترق طبقة المخاط الواقية في جدار المعدة بسبب شكلها اللولبي وحركتها باستخدام الأهداب. وبعد اختراق المخاط، بتسبب التهاب في بطانة المعدة، ودا اللي بدوره بيسبب التهاب بيضعف حماية الخلايا ضد حمض المعدة والعصارة الهضمية.
ونتيجة لدا، خلايا المعدة بتبقى عرضة أكتر للتلف، وبالتالي بتتكون تقرحات في المعدة أو في الاثنى عشر (الجزء الأول من الأمعاء الدقيقة).
بالإضافة لأسباب غير واضحة، بتحفز البكتريا المعدة على إنتاج زيادة من العصارة الهضمية، ودا بيسبب شعور حرقة المعدة والحموضة.
وتعتبر التفاعلات الفسيولوجية دي هي السبب الرئيسي في الأعراض والمضاعفات اللي بتظهر عند الأطفال المصابين بجرثومة المعدة.
إزاي بتنتقل جرثومة المعدة للأطفال؟
قبل ما نفكر في علاج جرثومة المعدة للأطفال، لازم نفهم هي بتوصلهم إزاي أصلاً، عشان نعرف نحميهم منها ونمنع رجوعها تاني.
تبعًا لدراسة اتنشرت على موقع ScienceDirect فدي أشهر الأسباب اللي وجدوها عند الأطفال المصابين:
1. من الأكل أو الشرب الملوث
الطريقة دي من أهم الأسباب الشائعة، وبتحصل لما الطفل ياكل طعام ملوث ببكتيريا جاية من براز شخص تاني مصاب، أو يشرب مياه مش نظيفة. علشان كده، محاولة تجنب أكل المطاعم، وغسيل الخضار كويس والمياه النظيفة بيفرقوا جدًا.
2. من شخص لآخر
الجرثومة دي ممكن تتنقل كمان من خلال اللعاب أو القيء، يعني لو طفل شارك معلقة أو كوباية مع طفل تاني عنده الجرثومة ممكن تتنقل بسهولة، خاصةً في البيوت أو الحضانات.
3. قلة النظافة الشخصية
لو الطفل مش بيغسل إيده كويس قبل الأكل أو بعد الحمام، بيزود فرصة إنه يبلع البكتيريا دي من غير ما ياخد باله.
وعلشان كده، الوقاية أهم خطوة قبل ما نلجأ لـ علاج جرثومة المعدة عند الأطفال بالأدوية. النظافة الشخصية ومتابعة الطعام اللي بياكله الطفل هما خط الدفاع الأول.
أعراض جرثومة المعدة عند الأطفال
أهم العلامات اللي لازم تاخدي بالك منها:
1. وجع مستمر في البطن
لو طفلك دايمًا بيشتكي من ألم أو مغص، خصوصًا وقت ما يكون جعان أو بالليل، ده ممكن يكون مؤشر إن فيه التهاب ناتج عن الجرثومة.
2. ترجيع أو إحساس بالغثيان
الطفل ممكن يحس إنه عايز يرجّع على طول أو بيرجع فعلاً، ده لو بيحصل كتير لازم تروحي لدكتور فورًا.
3. فقدان شهية ملحوظ
مش بيأكل زي زمان؟ بيبعد عن الأكل أو يكتفي بلقمتين؟ ده بردو عرض محتمل من أعراض جرثومة المعدة.
4. انتفاخ وتجشؤ
لو حسيتي إن بطنه على طول منفوخة أو بيتجشأ (بيتكرع) بشكل مبالغ فيه، ممكن ده يكون بسبب التهاب في المعدة من الجرثومة.
5. حرقة أو حموضة
بعض الأطفال اللي أعمارهم كبيرة شوية ممكن يشتكوا من حرقان في المعدة وخاصةََ بعد الأكل.
6. اضطرابات في الهضم
زي الإسهال أو الإمساك أو حتى عسر هضم مستمر.
كل الأعراض دي لو اتجمعت أو حتى ظهر بعضها بشكل متكرر، فده مؤشر محتمل ولازم وقتها تتابعي مع دكتور علشان يشخص الحالة ويبدأ علاج جرثومة المعدة للأطفال.
أعراض خطيرة لجرثومة المعدة عند الأطفال
رغم إن أغلب حالات جرثومة المعدة ممكن تتعالج بسهولة، لكن في بعض الأوقات بيظهر على الطفل أعراض خطيرة لازم تتاخد بجدية وتستدعي تدخل طبي عاجل. لأن علاج جرثومة المعدة للأطفال في الحالات دي محتاج متابعة دقيقة وسريعة، ومن ضمن الأعراض دي:
1. وجود دم في القيء أو البراز
لو لقيتي الطفل بيرجع وفيه نقط دم، أو البراز لونه أسود زي الفحم؛ فده معناه إن فيه نزيف داخلي، وده خطر جدًا.
2. فقدان وزن واضح وسريع
لو لاحظتي إن طفلك وزنه بينزل بسرعة من غير سبب واضح، فده ممكن يكون ناتج عن تأثير الجرثومة على المعدة والهضم.
3. ألم باطني حاد ومفاجئ
وجع شديد جدًا في البطن بيظهر فجأة، خصوصًا لو معاه قيء أو حرارة أو خمول، لازم تروحي بيه علطول لأقرب مستشفى.
في الحالات دي، غالبًا الطفل هيحتاج فحوصات دقيقة، وأحيانًا الدكتور بيبدأ فورًا في علاج جرثومة المعدة بالأدوية.
تشخيص جرثومة المعدة عند الأطفال
عشان نتاكد من وجود بكتيريا جرثومة المعدة (الملوية البوابية) في الجهاز الهضمي عند الطفل، فيه أكتر من طريقة طبية ممكن الطبيب يلجأ لها:
اختبار الدم
بيكشف عن الأجسام المضادة اللي بينتجها جهاز المناعة لمحاربة الجرثومة. بس مش دايمًا دقيق، لأنه ممكن النتيجة تكون إيجابي حتى لو الطفل اتعافى.
اختبار البراز
بيتم تحليل عينة من براز الطفل عشان يتأكدوا من وجود بروتينات بكتيريا الملوية البوابية.
اختبار التنفس (اختبار اليوريا)
الطفل بيشرب سائل فيه اليوريا والجرثومة لو موجودة بتفككها، وبنقدر نكتشف ده من خلال تحليل النفس.
المنظار الداخلي
في حالات نادرة، الطبيب ممكن يستخدم أنبوب مرن بكاميرا (منظار) لفحص بطانة المعدة وأخذ عينة (خزعة) لتحليلها بدقة.
علاج جرثومة المعدة للأطفال
بعد ما الطبيب يشخص الإصابة بـ جرثومة المعدة عند الطفل؛ أول خطوة لازم تبدئي بيها هي العلاج المناسب. وهنا بييجي السؤال: نبدأ بإيه؟
الحقيقة إن علاج جرثومة المعدة للأطفال بيكون على مرحلتين: العلاج الأساسي بالأدوية، وممكن استخدام بعض الأعشاب الطبيعية تحت إشراف الطبيب.
أولاً: العلاج الدوائي (الأساس في العلاج)
مفيش علاج فعال أكتر من الدواء اللي بيقضي على الجرثومة من جذورها. الدكتور غالبًا هيوصف ما يسمى بـ”العلاج الثلاثي” أو “العلاج الرباعي”، وده بيستمر عادة من 10 لـ 14 يوم.
وعلاج جرثومة المعدة للأطفال بالأدوية يشمل:
1- مضادين حيويين مع بعض علشان يقللوا فرص مقاومة البكتيريا:
- أموكسيسيلين (Amoxicillin)
- كلاريثروميسين (Clarithromycin)
وبديل زي مترونيدازول أو تينيدازول لو في حساسية أو حسب الحالة.
2- دواء يقلل الحموضة (مثبطات مضخة البروتون – PPIs)
النوع ده من الأدوية بيشتغل على تقليل إفراز الحمض في المعدة، وده بيساعد جدًا في نجاح العلاج، لأنه:
- بيساعد المضاد الحيوي يشتغل بكفاءة أكبر.
- بيسرّع شفاء المعدة لو فيها التهابات أو قرح.
- بيقلل الحموضة اللي بتتعب الطفل.
أمثلة على PPIs:
- أوميبرازول (Omeprazole)
- إيزوميبرازول (Esomeprazole)
3- أدوية تانية ممكن يضيفها الطبيب
زي سبساليسيلات البزموت (Bismuth subsalicylate)، وده بيساعد على:
- تخفيف الإسهال أو التقلصات المصاحبة.
- حماية بطانة المعدة.
- تقليل نمو البكتيريا.
المهم هنا هو الالتزام التام بتعليمات الدكتور من حيث الجرعة والمدة، حتى لو الطفل بدأ يتحسن قبل ما العلاج يخلص. علشان كده بنأكد إن علاج جرثومة المعدة للأطفال بالأدوية هو الحل الرئيسي والموثوق.
بعد ما الطفل يخلص كورس العلاج، الطبيب غالبًا بيطلب تحليل أو فحص تاني علشان يتأكد إن العلاج بالأدوية جاب نتيجة، وإن الجرثومة فعلاً اختفت.
ثانياً: العلاج بالأعشاب (دعم طبيعي لكن تحت إشراف طبيب)
رغم إن الأعشاب مش بديل للعلاج الطبي لكن في بعض الأحيان، ممكن تكون مفيدة كوسيلة داعمة، وده طبعًا بعد ما تستشيري الطبيب.
من الأعشاب اللي ممكن تساعد:
- براعم البروكلي: بتحتوي على مركبات ممكن تقلل من نشاط الجرثومة.
- الكركم: مضاد قوي للالتهاب وبيساعد في تهدئة المعدة.
- الزنجبيل: ليه خصائص مضادة للبكتيريا ومهدئ للمعدة.
- الشاي الأخضر: بيقلل البكتيريا وبيهدّي الالتهاب.
- النعناع: بيساعد في تقليل الغثيان والانتفاخ.
- البابونج: مهدئ طبيعي للجهاز الهضمي.
أعشاب تحتاج حذر واستشارة طبيب قبل استخدامها:
- عرق السوس: مفيد لحماية المعدة لكن ممكن يرفع ضغط الدم.
- الثوم: مضاد للبكتيريا، بس لازم يستخدم بكميات صغيرة.
لكن خدي بالك، حتى علاج جرثومة المعدة للأطفال بالأعشاب لازم يتم بحذر، ويفضل يكون كدعم جانبي مش علاج أساسي.
إمتى يكون الجسم اتخلص من عدوى جرثومة المعدة؟
علاج جرثومة المعدة للأطفال بالأدوية، بياخد عادة من 10 لـ 14 يوم عشان يقضي على الجرثومة تمامًا. وبعد انتهاء العلاج، الدكتور ممكن يطلب تحليل للتأكد من اختفاء الجرثومة نهائيًا. فمهم جدًا إنك تكملي العلاج زي ما الطبيب وصف عشان تتجنبي رجوع المشكلة.
اتعرفي على: وصفات طبيعية وآمنة لعلاج البلغم عند الأطفال بالأعشاب.
إزاي تحمي طفلك من جرثومة المعدة؟
الوقاية هي المفتاح الأساسي للحماية؛ لأن تجنب العدوى من البداية أريح وأضمن من الدخول في رحلة علاج بالأدوية.
غسل الإيدين باستمرار
علمي طفلك إن أول حاجة يعملها بعد اللعب، أو قبل الأكل، أو بعد الحمام، هي إنه يغسل إيده كويس بالمياه والصابون. ده بيقلل احتمالية انتقال الجرثومة بنسبة كبيرة.
التأكد من نظافة مياه الشرب
اتأكدي إن المياه اللي بتشربوها في البيت نظيفة. لو في شك، اغلي المياه، ويفضل استخدام مياه معدنية مضمونة للأطفال الصغيرين.
التأكد من نظافة الطعام وطبخه حتى تمام النضج
اغسلي الخضار والفاكهة كويس جدًا، وخصوصًا اللي بيتاكل من غير طبخ. اللحوم لازم تستوي كويس قبل الأكل، وحاولي تبعدي عن أكل الشارع لأنه غالبًا بيكون مصدر للعدوى.
منع المشاركة في الأدوات الشخصية
شجعي الطفل إنه يستخدم معالق وكوبايات خاصة بيه، وميشاركهاش مع أطفال تانيين، خاصة في المدارس أو الحضانات.
تقوية مناعة الرضع من خلال الرضاعة الطبيعية
للأمهات اللي لسه بيرضعوا، الرضاعة الطبيعية مهمة جدًا لأنها بتقوي مناعة الطفل وبتحميه من جرثومة المعدة وغيرها من العدوى.
اتعرفي على: طرق فعالة لعلاج السمنة عند الأطفال بالأعشاب.
نصائح غذائية مهمة أثناء علاج جرثومة المعدة للأطفال
الوقت اللي طفلك بياخد فيه علاج جرثومة المعدة؛ النظام الغذائي ليه دور كبير في دعم العلاج وتخفيف الأعراض.
1. قدّمي وجبات صغيرة ومتكررة
بدل ما ياكل 3 وجبات كبيرة، خليه ياكل 5 – 6 وجبات خفيفة على مدار اليوم، عشان المعدة تشتغل براحة ومتحسش بالحِمل الزايد.
2. قللي من الأكلات الدهنية والحارة
الأكل المقلي، التوابل الكتير، والشطة ممكن يزودوا التهيج في المعدة، فالأفضل تمنعيهم خالص خلال فترة العلاج.
3. زودي البروبيوتيك في الأكل
الأكلات اللي فيها بروبيوتيك زي الزبادي واللبن الرايب مهمة جدًا، لأنها بتساعد في تعويض البكتيريا النافعة اللي بتتأثر بسبب علاج جرثومة المعدة للأطفال بالأدوية.
4. اهتمي بالسوائل
المياه ضرورية جدًا، وكمان العصاير الطبيعية (غير الحمضية زي البرتقال أو الليمون) هتفيد. الهدف هو الحفاظ على ترطيب جسم الطفل وتسهيل الهضم.
وخليكي فاكرة دايمًا إن التغذية السليمة بتكمل رحلة الشفاء. وأي تغيير في نظام الطفل الغذائي لازم يكون تحت إشراف الطبيب.
الخلاصة
جرثومة المعدة عند الأطفال مشكلة شائعة، لكنها مش حاجة تخوف، لما يكون عندنا وعي كافي ونتدخل سريع بالعلاج المناسب. ومن خلال الاهتمام بالنظافة الشخصية للطفل، وتقديم أكل ومياه نظيفة، وكمان المتابعة مع الدكتور عند ظهور أي أعراض، تقدري تضمني صحة طفلك وسلامته.
المهم تتابعي أي أعراض متكررة مع الطفل سواء ألم في البطن، أو حرقان زايد، ترجيع، تجشؤ، اتجهي فورًا لزيارة الطبيب عشان يعمل الفحوصات اللازمة ويكتبلك العلاج المناسب، ومع الالتزام بالأدوية والابتعاد عن أسباب الإصابة، الطفل بيرجع طبيعي.
أضف تعليق