سعر امتحان sat في مصر لعام 2023

عدد كبير من الطلبة في مصر بيكون هدفهم إنهم يكملوا دراستهم الجامعية في أمريكا؛ عشان يكتسبوا خبرات أكثر ويتعرفوا على مناهج الجامعات الخارجية. 

ومن أقصر الطرق اللي هتساعد الطلبة دي على تحقيق حلمهم هو التقديم على امتحان sat والنجاح فيه، لإن باجتياز الطالب للامتحان دا بيحصل على شهادة معتمدة بتثبت إنه مؤهل بشكل كافي للالتحاق بالجامعات الأمريكية.

التقديم على الامتحان بيتطلب سداد بعض الرسوم، ومن المتعارف عليه إن سعر امتحان sat في مصر بيكون مرتفع عن امتحان الثانوية العامة.

وفي المقال دا هنتعرف أكتر على الامتحان، وأسباب ارتفاع سعره، وامتحان EST البديل المتاح حاليًا في مصر.

 ما هو امتحان SAT؟

في نهاية مرحلة ما قبل التعليم الجامعي -المرحلة الثانوية- بيحصل الطالب على شهادة تؤهله للالتحاق بالكليات، فعلى سبيل المثال، بنلاقي إن الجامعات المصرية بتشترط الحصول على شهادة الثانوية العامة؛ عشان الطالب يقدر يلتحق بيها.

أما بالنسبة لعدد كبير من الجامعات في أمريكا، وكندا، وغيرهم بيكون مجموع الطالب في المرحلة الثانوية -الـ GPA- غير كافي لإثبات مدى استعداد الطالب للالتحاق بالجامعات، فبيتم الاعتماد على امتحان sat بجانب المجموع الكلي للطالب. 

وفي بعض الجامعات بيكون الحصول على امتحان sat حاجة اختيارية، ولكنه بيزود فرصة قبول الطالب في الجامعة، وكمان بتخليه يتعود على نظام الدراسة والامتحانات باللغة الإنجليزية. 

وبالتالي نقدر نقول إن امتحان sat هو امتحان القبول في أغلب الجامعات الأمريكية، وعن طريقه بيقدر الطالب يدرس في الجامعات دي أو يحصل على منحة دراسية فيها. 

وبيختلف سعر امتحان sat في مصر، لكن قبل ما نعرض سعره خلينا نقولك إن امتحان SAT الأمريكي متقسم لنوعين، وهما:

1- امتحان SAT 1

وهو عبارة عن اختبار عام -General test- بيقيس مدى تفوق الطالب في اللغة الإنجليزية والرياضيات، وبيعتمد بشكل كبير على طريقة التفكير الممنهجة، وسرعة البديهة، ودا الامتحان اللي بيكون مطلوب في الجامعات التركية، وبيتكون من 4 أقسام: 

• الكتابة – Writing.
• القراءة – Reading.
• الرياضيات – Maths. 
• المقال – Essay.

2- امتحان SAT 2 

والامتحان دا بيكون متخصص أكثر -Subject test-، بمعنى إن الأقسام اللي بيمتحن فيها الطالب بتكون متعلقة بشكل كبير بالتخصص اللي حابب يكمل فيه دراسته الجامعية. 

الطالب اللي بيقدم على امتحان sat بيكون متاح له دخول الامتحان أكثر من مرة للتعويض، وبالتالي بيكون معاه فرصة كبيرة لتخطي الحد الأدنى للقبول في الجامعات الخارجية، والحصول على درجات مرتفعة.

وبالتالي التقديم على امتحان SAT واجتيازه بيعتبر فرصة كويسة للطلبة اللي خلصوا المرحلة الثانوية، وحابين يدرسوا في جامعات أجنبية.

كيفية التقديم لامتحان sat في مصر

التقديم ودفع سعر امتحان sat في مصر بيكون عن طريق الموقع الإلكتروني الخاص بمؤسسة College board المسئولة عن كل ما يخص الامتحان. 

لكن قبل التسجيل لازم التأكد من ميعاد الامتحان المحدد؛ عشان الطالب يقدر يستعد له، ويفضل إنه يقدم قبل الامتحان بمدة لا تقل عن شهر؛ لإن التأخر عن ميعاد التقديم بيتطلب دفع رسوم إضافية.

فبيبدأ التقديم بإن الطالب بيعمل حساب شخصي على الموقع، ويدخل كل البيانات الشخصية المطلوبة منه، ويتأكد إن كل المعلومات المكتوبة مظبوطة قبل ما يكمل، وبيحفظ الاسم وكلمة المرور عشان يعرف يدخل الموقع بيهم بعد كدا، وبعدين بيضغط تأكيد عشان الحساب يتفعّل. 

بعد ما الحساب بيكون اتعمل بالفعل بيضغط على كلمة SAT وبيختار إنه يسجل، فبيدخل اسم المستخدم (Username) وبتظهر صفحة التسجيل للامتحان. الطالب في الخطوة دي بيكمل باقي المعلومات الناقصة زي اسم المدرسة، وبلد الإقامة، والمجموع الكلي في كل مادة -GPA-، وغيرهم، وبيضغط متابعة في كل مرة، وبيوافق على الشروط والأحكام. 

كمان بيختار ميعاد الامتحان بالظبط، والمكان اللي هيمتحن فيه، ودا بيكون حسب الرقم البريدي اللي سجله في البداية؛ لإن الموقع بيعرض أقرب الأماكن للطالب. 

جزء المقال في امتحان sat 1 بيكون اختياري، فالطالب بيحدد وقت التسجيل هل هياخد الجزء دا ويمتحنه ولا لأ. 

في النهاية الموقع بيطلب تحميل صورة شخصية واضح فيها وجه الطالب بدون ما يكون في أشخاص تانيين في الصورة، وبعدها بيوصل لمرحلة الدفع، واللي ممكن تكون لأكثر من الطريقة زي PayPal أو فيزا، وبعد السداد بيكون الطالب أنهى عملية التسجيل بنجاح.

اقرأ أيضًا: كيفية التدريب على امتحان السات | أهم 5 نصائح للتدريب

أسباب زيادة سعر امتحان SAT

سعر امتحان sat في مصر بيكون مرتفع عن الامتحانات التقليدية، ومن أهم الأسباب اللي أدت إلى زيادة سعره هي إن الامتحان تابع لهيئة أمريكية College board، وبالتالي بيكون سعر امتحان SAT بالدولار، فالبعض بيعتبر إن قيمة الرسوم مرتفعة.

 كمان امتحان SAT مختلف تمامًا عن الامتحانات الأخرى زي امتحان الثانوية العامة وغيره؛ لإنه بيأهل الطالب لدخول أكبر الجامعات الموجودة في أمريكا، وكندا، وغيرهم، بدون ما يضطر إنه يحصل على شهادات معادلة تانية، فمن الطبيعي إن سعر امتحان SAT في مصر يكون مرتفع. 

سعر امتحان SAT في 2023

 التقديم على امتحان SAT بيتطلب سداد بعض الرسوم وقت التسجيل على الموقع الإلكتروني، وسعر امتحان sat بيتراوح بين 104 دولار أمريكي و 136 دولار أمريكي، بالإضافة إلى بعض الرسوم الأخرى، حسب الموقع اللي بيتم فيه الاختبار والمركز اللي بيديره.

 الطلبة اللي بيقدموا على امتحان SAT في مصر بيمتحنوا داخل المدارس في أماكن مخصصة لإجراء الامتحان ده، وهنتعرف على تفاصيلها.

 أماكن اختبار SAT في مصر

بعد ما بيتم سداد سعر امتحان sat في مصر، بيكون في لجان معينة في بعض المدارس لآداء الاختبارات؛ لإن مش كل المدارس بتكون متاحة لإجراء الامتحان ده. 

ففي وقت التقديم على امتحان sat على موقع College board، بيكون مطلوب كتابة الرمز البريدي لمكان سكن الطالب، وبناءً عليه بيتم عرض أقرب الأماكن المتاحة ليه عشان يمتحن هناك.

عيوب الإلغاء المتكرر لامتحان SAT

تم اعتماد امتحان SAT في مصر لفترة كبيرة، ولكن في الفترة الأخيرة حصل بعض المشاكل اللي أدت إلى إصدار قرار بإلغاء اعتماد امتحان SAT في مصر.

 مع أداء الامتحان في المدارس بيكون في سهولة لتسريبه، ودا اللي حصل لأكثر من مرة في مصر وبعض الدول الأخرى، وبالتالي من الأسباب اللي أدت إلى إلغاء الاعتماد هو تسريب امتحان SAT في مصر، فكان بيوصل تعليمات خارجية بتأجيل الامتحان لحين إشعار آخر.

و لإلغاء المتكرر لامتحان SAT كان بيسبب توتر وضغط للطلاب، لإن الطالب بيكون مستعد لدخول الامتحان في وقت معين وفجأة بيتم التأجيل، وهنا بدأ يشتكي عدد كبير من أولياء الأمور من المشكلة دي، وده أثر بالسلب على عدد المتقدمين للجامعات والحاصلين على امتحان الدبلومة الأمريكية. 

 وعشان يتم القضاء على المشكلة تم استبدال امتحان SAT بامتحان EST المصري، ودا امتحان بيشبه امتحان SAT إلى حد كبير في هيكله، لكنه بيكون تحت إشراف وزارة التربية والتعليم المصرية بدون أي تدخل خارجي، وبالتالي تم التغلب مؤخرًا على المشاكل اللي كان موجودة قبل كده في نظام SAT.

هل امتحان SAT وامتحان EST لطلبة الدبلومة الأمريكية فقط؟

 التقديم على امتحان SAT مش بيكون له شروط معينة، وبالتالي أي طالب خلص مرحلة الثانوية وحابب يكمل دراسته في جامعة أمريكية يقدر يسدد سعر امتحان sat في مصر، ويقدم عليه.

لكن عشان الطالب يقدر يحقق درجات عالية في الامتحان لازم يكون مستواه كويس في اللغة الإنجليزية؛ لإن مفيش نسخة من الامتحان دا باللغة العربية. 

وفي مايو 2022، أعلنت وزارة التربية والتعليم، إن امتحان EST هو المؤهل الوحيد لطلبة الدبلومة الامريكية لتنسيق الجامعات المصرية، بعد تعليق امتحانات الـ SAT في مصر.

وهو تصميم وتنفيذ امتحان مصري إلكتروني خالص لقياس درجة تحصيل طلاب الدبلومة الأمريكية،   لمساعدة الطلاب الدارسين للمناهج الأمريكية وبالنسبة لامتحان EST بيكون إلزامي فقط لطلبة الدبلومة الأمريكية، أما طلبة الثانوية العامة فالشهادة كافية لتأهيلهم لدخول الجامعات المصرية. 

وبالتالي أي طالب بيدرس في نظام مختلف عن النظام الأمريكي في مصر مش بيكون مضطر إنه يقدم على امتحان EST.

الفرق بين SAT و EST 

امتحان SAT بيشبه الامتحان المصري امتحان EST بشكل كبير، لكن بيكون في شوية اختلافات بينهم، من أبرزها: 

التأهيل لدخول الجامعات 

من المتعارف عليه إن اجتياز امتحان SAT بيأهل الطالب لدخول الجامعات أغلب الجامعات في أمريكا وغيرها، والشهادة اللي بيحصل عليها الطالب بعد الامتحان بيكون معترف بها دوليًا، ولكنها غير معترف بها حاليًا في مصر. 

على الجانب الآخر بنلاقي امتحان EST بيمكن الطالب من دخول الجامعات المصرية فقط، لكن عشان يقدر يلتحق بالجامعات الخارجية بيحتاج إلى شهادة تانية.

 ودا بيثبت إن خريج المدارس اللي مش بتتبع النظام الأمريكي في دراستها مش مضطر يقدم على امتحان EST. 

الإشراف على الامتحان 

امتحان SAT هو امتحان تابع في الأصل إلى نظام التعليم الأمريكي في مصر، وبالتالي بيكون في إشراف أمريكي على الامتحان، ودايمًا الامتحانات بيتم وضعها وتصحيحها خارج مصر.

 أما بالنسبة لامتحان EST  فهو خاص بمصر، بمعنى إن مسؤولية الإشراف على الامتحان دا بتخص وزارة التربية والتعليم المصرية فقط.

المصاريف المطلوبة للتقديم

سعر امتحان SAT في مصر بيختلف عن سعر امتحان EST؛ فبالنسبة لامتحان SAT هنلاقي إن المصاريف المطلوبة وصلت إلى 136 دولار زي ما وضحنا. 

أما امتحان EST في مصر بيكون توثيق المحاولة الواحدة للتقديم للجامعات المصرية بـ 4250 جنيه، ودا تبعًا لآخر سعر تم نشره في 2022.

الخلاصة

امتحان SAT هو امتحان يؤهل الطلبة لدخول الجامعات الأمريكية، وبيتم تحت إشراف هيئة College board، ودي مؤسسة أمريكية غير ربحية مهتمة بالأنشطة الأكاديمية. الامتحان مقسم لنوعين، SAT 1 امتحان عام بيختبر مدى استيعاب الطالب وسرعة البديهة، وامتحان 2 SAT،ودا متخصص بشكل أكبر. 

امتحان SAT تم إلغاؤه في مصر أكثر من مرة، بسبب حدوث التسريبات المتكررة، وبناء عليه أصدرت مصر قرار بإلغاء اعتماد SAT واستبداله بامتحان EST اللي بيتم الإشراف عليه من داخل مصر فقط.

وسعر امتحان sat في مصر في تزايد كل سنة، ووصل إلى حوالي 136 دولار أمريكي، وبيكون في رسوم إضافية بيتم سدادها وقت التقديم للامتحان على الموقع. 

أما لو عندك أي استفسارات تانية ما تنساش تكتبها في Comment عشان نجاوبك عليها.